Hakim-hakim Uram 11
11
Yefta ab Gilead ab deyok
11:1-11
1Er Yefta bira Gilead mutuknyi mikib tingting ilintonyi kuramwe. Er Yefta bira er nai biryi talyi yortamni ner doamuryi, deiamwe mi kuramwe. Yefta er nai si ara a mutuk si makmak akwe, “Gilead,” eboka si doamnyi. 2Ani, Gilead er ner kobdoba ababyi er akenyi biti mabwe deibkarebmou. Ura, er ner kobdoba aryi a deiamwe mabwe sirya nebdobmai ura, sun kwit Yefta bira aminda dortabangni ner doamuryi, deiamwe mi deyok akiryi, er kwit yabwe aryi ersi yakdonokmai. Yakdonokmaici ato ebmai, “Kanda aminda dortabangni ner mi deyok aryi nun ai ninyi bona talena nirya ara kanci talena ara kikiman kum kubkwandim,” eboka yakdonokmai. 3Ba, er weit yabwe ab, er du yabwe ab kankan aryi cukoka, mutuk si Tob dam bindoka kuroramwe. Kuramwe bok, yu nang ab antaniboka er ab tonkwa talyi yibaramnyi.
4Ura, uki mitikanun kunmai ani, Amon yala nang aryi sun Israel nang asi mar bobmai. 5Ani, Amon yala nang aryi sun Israel nang asi mar bobmai talak ara Gilead mutuk sien nang aryi Yefta bisi Tob mutuk dam kuramwe asi inirorbinmai. 6Binmai ura, Yefta bisi ato ebmai, “Kanda nun ninyi mar bona sienyi kibsiminyi ura, Amon yala nang asi mar bobkwayeb,” ebmai. 7Uca, Yefta biryi Gilead sien nang a binmai nang asi ato ebmou, “Sunci ni ai ninyi kankan aryi nisi malyi kiboka, kum yakanindau darib? Unato ati yandoka titik-titik enmarum do?” ebmou. 8Ba, a sien nang aryi ersi ato ebmai, “Nunci ukuryok kan dam tamuboka yanmab ati, nun milibsiminyi ba, Amon yala nang asi mar bobkwayeb. Ba, kanda nun sienyi kibokabminci Gilead mutuk nang nirya talebkwandim,” ebmai. 9Uca, Yefta biryi Gilead sien nang asi ato ebmou, “Ati, sunci nisi Amon yala nang mar bobkwamabyi ati, iniboka bobinkwamanumunyi ura, Iya Erebdobnyi biryi Amon yala nang asi niti karebkwamanir. Karebnici ba, obnyi ura, dib ni sun sienyi kiboka talebkwansin do?” eboka asibmou. 10Uca, Gilead wis yoka nang aryi Yefta bisi ato ebmai, “Nun sisingmab dinyi ara Imtamnyi sirya kekenmasir bok ebkub: Kan nun milibmasiminci, Amon nang mar bobmabyi ba, Iya Erebdobnyi biryi nun taruk dam karebsici ura, ebmarim to kuboka nun sienyi kibkwansirim,” ebmai. 11Ura, Yefta bira sun Gilead sien nang ab tonkwa binmai ura, sunci ersi sun mar ordan nang sienyi tikeibmai. A talak aryok Mizpa dam aryi Yefta biryi Iya Erebdobnyi urasin dam asi, er wa ibde binkwamwe dinyi ati lak ebmou.
Yefta ab, Amon yala nang ab deyok
11:12-28
12Ura, Yefta biryi Amon yala nang sienyi bisi ninyi ton bokdonokmouci, uram ato kuboka ebdeibmou. “Kan ab, ni ab ara deyok ton kum bok asi una deyok ati, ni atei asi mar bobkwamasirim do?” eboka uram deibmou. 13Uca, Amon yala nang atei sienyi biryi Yefta uram ebdeibmouci, bokdonokmou nang asi erbabyi tubto ato ebdeibmou, “Sun Israel nang ara Mesir mutuk aryi anaboka yanganmai uca, ni mutuk me Arnon kin aryi kuboka ani, me Yabok kin aryi kuboka, Yordan kin nirya talyi ukula arabdanei. A deyok aryi ordana kumkum mangkau asa aryi ni mutuk nibiramnyi tamubkarebkwaning,” eboka erbabyi uram ebdeibmou. 14Bok, Yefta biryi Amon yala nang sienyi bisi erbabyi tubto ninyi bokdonokmouci, ato eboka uram deibmou. 15“ ‘Yefta bira ato ebmar,’ ebkwandarur. ‘Sun Israel nang ara Moab ninyi mutuk ab, Amon yala nang mutuk ab ara ton ararona kum kuamyi. 16Sun Israel nang yangaramnyi ara yini mutuk bisik yangaramnyi ani, me Teberau kwan dam yandoka mutuk Kadesh dam oungyanamnyi. 17Ato kubmai ura, Israel nang aryi Edom mutuk sienyi bisi ato eboka molobmaici uram deibmai, “Kan mutuk ara nun yibinkwamab ati, molobmakib mundu lobsurum,” eboka molobmai. Uca, Edom mutuk sienyi biryi mundu kum lobmou. Ani, Moab mutuk sienyi biti ninyi bokeibmaici uram deiboka molobmai ababyi mundu kum lobmou. Ukuboka mundu kum lobmou ura, Israel nang Kadesh dam a yandoka kuroramnyi. 18Ani, sun anaboka yini mutuk bisik kuboka, Edom mutuk ab, Moab mutuk ab bukamwa tok nirya boongobde kingkaningnamnyi ani, Moab mutuk yaletam kuboka asi tingyanamnyi. Ura, sunci atei me Arnon kubkub dinatam yandoka ai doboka kuramnyi. Ani, Moab mutuk ara me Arnon kouboka dinatam ara yuk nang mutuk wiliba ati, otam bisirbana kum kubmai. 19Ura, sun Israel nang aryi Amori yala nang sienyi si Sihon bisi ninyi ton bokdonokmai ba, Hesybon atei dam asi ato erbinmai. “Kan mutuk bisik kuboka, ‘Nun a binkwayeb,’ tenen banub mutuk bindobkwayeb ati, mundu lobsurum,” eboka molobmai. 20Uca, Sihon biryi sun Israel nang er mutuk bisik banmai ba, “Talyi kum yanganmanung,” tenen er mundu kum lobmou. A deyok aryi er taleamwe atei nang nirya bulubdeibmou. Ura, er ab, er taleamwe atei nang ab aryi Israel nang asi mar bobkwamai ati, Yahas mutuk dam yandoka atei dobmaici mar bobmai. 21Uca, Er Iya Erebdobnyi, Israel nang sun Nai biryi er Sihon ab, er atei nang nirya ab asi doboka Israel nang taruk dam karebmou ura, sunsi obkiribmai. Ura, Sihon mutuk ninyi a nirya ara obkiriboka a mutuk nirya arabdobmaici, sun mutuk kibdoamnyi. 22Ato kuboka Israel nang aryi Amori nang mutuk nirya araboka sun mutuk kibdamnyi. Ara, me Arnon kin aryi kuboka me Yabok kin arabdoamnyi. Ani, yini mutuk dam aryi kuboka me Yordan kin ababyi nirya arabdoamnyi. 23Ato kubmai ura, Er Iya Erebdobnyi, sun Israel nang molonungnyi biryi sun Amori nang mutuk asi Er mabwe Israel nang mutuk kibdeiamwe. Kanda a nang mutuk asi tubto kanbiramnyi kibdobkwandimci ebmarim do? 24Sunda, sun molorandumnyi si Kamos biryi karebsou mutuk kurondarur to akwe. Nunbabyi nun Nai Iya Erebdobnyi biryi utotoa nirya araboka karebsou mutuk kuronub. 25Ani, tonda Moab sienyi Zipor mi Balak bira malinyi ba, kanda telebnyi darib? Ani, sun Israel nang asi sun mininga ati, deknindarur eboka ton moloboka ordana kum kuamnyi. 26Sun Israel nang Hesybon mutuk dam weik atei ab, mitik atei ab nirya kuramnyi. Ani, Aroer mutuk weik atei ab, mitik atei ab kuramnyi. Ani, me Arnon lingkwa dinatam-dinatam nirya kuramiryi kwalina yubwa 300 baryi kwaliamnyi talak ababyi minob ararona kum kubumcok, asi una deyok ati a talak aryi, “Anda donung atei nirya arabdobkwan,” ebmarim do? 27Ato kubmai deyok aryi niryi kansi kum manmalibdongobkise. Eda, kanci nisi yu bobnoumci, nisi mar ibnoumwe. Ati, nun Israel nang ab, sun Amon yala nang ab asi Er Iya Erebdobnyi bira malyi deyok lilinanyi kurur deyok aryi Erci lilibkwinsir,’ ebkwandarur,” Yefta biryi uram ebdeibmou. Ba, Yefta biryi uram ebdeibmou ba, erbinmai ninyi aryi Amon sienyi bisi ato ebmai. 28Uca, Amon sienyi bira Yefta biryi bokdonokmou nang aryi ato ebmai uram kum kekebmou.
Yefta biryi, “Iya dib kunubkwan,” en uram ebmou deyok
11:29-40
29Ura, Yefta bisi Iya Erebdobnyi kanya Roh aryi er kanya dam wengyanmou ura, Gilead mutuk dam, Manasye yala nang mutuk nirya yibarkiringmou. Ani, Gilead mutuk Mizpa dam binmou. Ani, a barmurunmou tok asi Amon yala nang mutuk binmou. 30Ura, Yefta biryi Iya Erebdobnyi bisi “Iya dib kunubkwan,” en uram aryi ato ebmou, “Kanci Amon yala nang asi iya dib sirik nisi karebkwaniminyi ba, obkiribkwamanyi ura, 31ni Amon nang asi mar ibinmanyi ani, kum obningnyi ba, atei yangaronyi talak aryi, ni ai bublan dam asi, niti diryanganici dinyi ara Iya Erebdobnyi kan dinyi kibkwande. Ba, niryi a dinyi obokabniryi Kanti ni dama deiboka uk dabkwankin,” ebmou.
32Ura, Yefta banmou tok Amon nang asi mar bobmou. Ba, Iya Erebdobnyi biryi Amon yala nang asi Yefta biti karebmou ba, obkiribmou. 33Ara, Imtamnyi biryi sunsi ilinto ordana kibdeibokmou. Ba, mutuk Aroer aryi kuboka mutuk si Minit dam weik atei yubwa 20 baryi atei ab, mutuk si Abel-Keramim ab nirya obkiribmai. Ukuboka Israel yala nang aryi Amon yala nang asi obkiriboka malyi kibmai.
34Ura, Yefta er atei Mizpa dam yandoka diramwe uca, er ai bublan dam asi er nebnyi mot semna keica si rebana douboka kulabnin, mot sebnin, er nai bisik diryangau asi asing eibmou. A nebnyi ara tentok a kunum deibdamwe nebnyi, mi babyi nebnyi babyi ton da kum deiamwe. 35Er nebnyi asing eibmou deyok aryi er ongon aling kwilikabokmou ura ato ebmou. “Se, a nebnyi kanci ni kanya obkwetebnirim. Ba, Ni noutama daksaknir. Kanci ni sirya obsinibnirim. Ara, ni minob si akoksiryi, ‘Iya dib ukubkwankin,’ en uram aryi Er Iya Erebdobnyi biti sirya eanse akiryi da kum takwamakin,” ebmou.
36Uca, er nebnyi aryi ato ebmou, “Nai, kanci si ibokaminci, si darabdeiboka en uram aryi Er Iya Erebdobnyi bisi ato eaminyi ura, kan si ibokaminyi to kuboka nisi ur teleb aryi da kunubnurum. Ara, kan ab ordandarur nang Amon yala nang asi Er Iya Erebdobnyi biryi kanti dekeibmakir ati, nisi ur da kunubnurum,” ebmou. 37Ani, er nai bisi ton ato ebmou, “Ato kubkwanirim bok, eda kan mundu loboka wala bitinyi lobdeibmaniminyi ba, nira mutuk kon dam yibinkirikoka ni ka yabwe kam nerabwe ab ninyi dona kum kubmanuryi, mi ton kum deibmonwe dinyi ati, engebibyi ba, da ukubnurum,” ebmou. 38Ura, er nai Yefta biryi ato ebmou, “Ur birum!” eboka wala bitinyi mundu lobmou. Ba, a kam ner ab, er ka yabwe ab tonkwa mutuk kon dam engerbinmai. 39Ani, a wala bitinyi sirya bisibmou ura, tamuboka er nai dam yanmou. Ba, er nai biryi iya dib ukubkwan en uram eamwe to kunubmou. Akiryi a kam ner ara ninyi dona kum kubmou bok asi Er Imtamnyi taruk dam karebmou. 40Ura, sun Israel nang kwalina kwalibdongobingnyi tok ara Israel kam nerabwe aryi uki dumbaryi Yefta nebnyi ati engerbaramnyi.
Currently Selected:
Hakim-hakim Uram 11: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
