Hosea Uram 9
9
“Sun Israel nang asi yuk mutuk boboka deirlorbingnyi ai aryi kilkil kanya kum bobkwamnyi,” ebmou uram deyok
9:1-9
1We, Israel nang a, sunda sun Nai Imtamnyi bisi deibloboka yuk kwemdeina asi molondarur.
Ati, sun kanya kilkil kusina mem.
Ani, sunci talyi yordana dengna dinyi asi kanya deibmunyi ura, ato tenerandum.
“Gandum yalyi kwen dam asi talyi yordarorbibyi uca, Baal biryi eiboka nunsi dengdeirininto ara gandum ilinto karebkwansir,” tenerandum.
Ati, sunda sun yuk mutuk nang aryi kanya karyi asa mot semnaming to ukuna mem.
2Sunsi gandum du yalyi kwen ai ab, anggur du yung urun ai ab aryi yina kum yibkarebkwansiring.
Eda, anggur aryi sunsi mundu tulubsinibkwansir.
3Israel nang sunda Er Iya Erebdobnyi biryi sunti karebsou mutuk dam ara iya kum kubkwandum.
Bok, eda Efraim yala nang ara tubto Mesir mutuk tamurbinkwandarur.
Ba, sunda Asyur mutuk dam ara malyi yina asi yibde kubkwandum.
4A mutuk dam ara sunda Er Iya Erebdobnyi biti kanya teleb kimdeirin dinyi sun dama anggur du yung ab, sun winin dinyi ab kum uk dabkwandum.
Sun yibkwandum roti kwaning ara boukwe bordan dinyi ato kubkwandum.
Ba, a roti kwaning yibkwaming nang nirya ara malyi dinyi bol lin nang ato kubkwandum.
Ara, ato deyok ati ebman.
Sun yirandum roti kwaning Er Iya Erebdobnyi ai umbura dam bobana kum dinyi, eda sun yin dinyi akwe kurur.
5Sun weik uki tum erdarandum tum ara una kubkwandum do?
Ani, Er Iya Erebdobnyi weik uki tum ara una kubkwandum do?
6Sunsi orminingna dinyi yanganmaci tum ara, yuk mutuk dam bobindoka deiblobkwansing.
Ba, sun kankan aryi kablobsingnyi nang ara Mesir nang aryi yandoka boboka bulubdeibkwansing.
Ba, Memfis nang aryi sunsi tukwe dongobkwansing.
Ba, sun taleramunyi bona talena dengna weik dinyi perak deiramunyi ai sungsunga aryi siklibkwande.
Sun dobde kuramunyi ai ara kirikna aryi aboka libkwande.
7Niryi sunsi, “Sunda wenebkwansir tum ara sirya dam kubmar.
Sun malyi kun dinyi dengdeirin tum sirya yankwamar dam kubmar.
Sun Israel nang aryi a dinyi nirya bobkwandum,” eransin.
Ati sunci ato eranurum, “Er Imtamnyi uram ermurunanyi nabi bira okoloma amakdobnyi.
Imtamnyi kanya ongobunyi bira luba talebdobnyi,” eranurum.
Sunci ato endarur ara sun malyi kun dinyi ilinto kundarur deyok aryi endarur.
Ani, sunci nisi mar irdeirinindarur ara weiktoto.
8Niryi sun Efraim yala nang ni Nai Imtamnyi biryi wibmasou atei yan memen uram esunun.
Bok, sunci ni Er uram ermurunanyi yibanmanyi bisik a nirya ara maka ebde youraming to kunindarur.
Ni Nai Imtamnyi ai dam ara ninyi nirya aryi ni Er uram ermurunanyi bisi mar irdeiriranurum.
9Sunda iya yu weik dinyi asi kundarur.
A kundarur yu ara sun Gibea nang aryi kuramnyi yu ato dinyi asi kundarur.#9:9 Gibea dam kuamnyi yu dinyi ara ato kuamnyi. Sun neik yalanyi biryi ner asi tatab-tatab eboka yobmai ba, sun mamun ordaramnyi. Hak. 19:1-30
Ba, Erci sun malyi kun dinyi ara iya kanya teneinkwansir.
Ani, sun malyi kun dinyi aryi wenebkwansir.
Sun Israel nang aryi malyi dinyi kuramnyi ba, yuk mutuk yakdonokmou uram deyok
9:10-17
10Er Imtamnyi biryi ato ebmou, “Niryi sun Israel nang yuma dobmasise talak ara ninyi baitam yibanmangnyi uca,
co anggur du mouranci asi eibdobingiryi, kanya teleb kurande to kubmanou.
Niryi sun abwe kisok yuma kobdob eibmase ura, ninyi aryi co si ara
yuma kuba dangnamingci kanya teleb kurande to kubmanou.
Bok, sunda kwemdeina si Baal-Peor bisi baroramnyi.
Ba, ersi bindobne ura, malyi dinyi asi kanya deiriramnyi.
Ba, sun nong ababyi sun kanya deiriramnyi kwemdeina malyi dinyi ato kuramnyi.
Sun nerabwe mer ara mi mundu bona ton kum kunung.
Ba, sun kankan dam ara ninyi ton kum deirtabangnung.
11Minob sun Efraim yala nang si ererdeiriramnyi dinyi ara ukuryok sirya maka langlang eboka barorande to kubdobwe.
Sun nerabwe mer ara mi mundu bona ton kum kunung.
Ba, sun kankan dam ara ninyi ton kum deirtabangnung.
12Sun mabwe deiboka nerdeiriroramunyi ababyi Niryi sun mabwe ara doronkwansin.
Ba, ninyi ton kum kubkwandum.
Diba ati, Niryi sunsi deiblobsinyi tum ara mambul weik dobkwandum.
13Niryi dinmasinyi ura, sun Efraim yala nang sun malyi kun dinyi aryi maka don tam ato kuboka sun mabwe nirya orkirinung.
Sun Efraim nang ara sun malyi kun dinyi aryi, sun mabwe asi obkwamangnyi nang ati dorkarendarur.
14Yo, Nai Iya Erebdobnyi, Kanci sunsi karebdum.
Ara, Kanci, ‘Sunsi karebkwan,’ tenebmaminyi dinyi asi karebdum.
Kanci sunsi mi you dinyi karebdum.
Tonda, mi moum dinin dinyi moum yung ara cebdeibdum.
15Sun Efraim nang aryi iya yu dinyi ukunung a nirya ara Gilgal mutuk aryi deyok kouboka ukunung.
Diba ati, a mutuk dam aryi Niryi sunsi dina ara Ni li kunurur.
Sun dam nang aryi yu dinyi ukunung deyok aryi Niryi sunsi Ni atei dam aryi yakdonokwan.
Niryi sunsi boukwe tubto kum kibkwan.
Sun atei dam sien nang nirya ara Nisi lebesengnunung.
16Sun Efraim nang ara sirya kulaboka wenebman.
Ba, sunda yating sirya koula dananci co aryi du kum mourande to kubkwaming.
Sunci mabwe ton kum deinkwaming.
Sunci mabwe deirina ara deiramingnyi bok, sunci kanya deiramingnyi mabwe nirya ara Niryi orkarongkwan.
17Sunci ni Nai Imtamnyi bisi kum kekenung deyok aryi sunda Erci bai donokwande.
Ba, sunda ninyi atei yibarkiringna nang kibkwaming,” ebmou.
Currently Selected:
Hosea Uram 9: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
