Hosea Uram 10
10
Sun Israel nang aryi kwemdeina moloramnyi deyok ati wenebmou uram deyok
10:1-8
1“Sun Israel nang ara co anggur aryi buksaliboka du weik mourande ato atei nang kunung.
Sun bona talena ilinto talertabangnungci, sun kwemdeina ati dama deirin ai ababyi ilinto keil dukdeibde banung.
Tukwe ababyi iya telebto kurur ba, sun kwemdeina molon ai ababyi telebto kuboka dobde banung.
2Sun kanyatam ara dangum alim en kanya akwe bonung.
Ati, ukuryok ara sun baramnang malyi kunung dinyi aryi ikin bobdobkwaming.
Ba, Er Imtamnyi biryi sun kwemdeina dama deiboka uk dan keil dungna ara dalubsinibkwande.
Ani, sun kwemdeina urasin kanya tenein dinyi kikninung dinyi ara dakdakoka donokwande.
3Ba, diba ati, sunci ato ebkwamang talak dam kubmar.
Ara, ‘Nunci Er Iya Erebdobnyi bisi ilil kum tenenub deyok aryi,
ukuryok ara nunda weik sien nang aryi kalingsina ton kum kuraming.
Ati, weik sienyi kurante ababyi, erci nunsi kum lebdeibsute,’ ebkwaming.
4Sunda tola uram akwe enung nang kunung.
Ani, tola ati, ‘Ato kum kubkwayeb,’ eboka uram ebdeiamingiryok,
kununa kum kunung nang akwe kunung.
Sunci yan memen uram asi dangurminingnung ba, sun kunung ai ara kikiman kum dinyi asi anararur.
Ara, wa in dam asi utotoa nirya obde yirande co arande to kurur.
5Sun Samaria nang asi kisal dangnanci dinyi ara sun dam aryi kisibdaki yuk ai bindobkwande.
Sunci Bet-Awen mutuk bisam lembu mi moloramingnyi dinyi asi bobinkwaming deyok aryi, ‘Nun una kubkwayeb do?’ tenen ilil dobkwaming.
Diba ati, a mutuk dam kunung nang ara a deyok ati, boukwe bobkwaming.
Ba, ninyi dama deirin nang ababyi a deyok ati engebkwaming.
6Ba, a bisam lembu mi ara a Asyur mutuk dam bobinkwaming.
Bobingnyi ura, weik sienyi si bikdobnyi biti muna karen dinyi karebkwaming.
Ba, Efraim yala nang ara alyi dobdobkwaming.
Ba, Israel nang ara sun damnang aryi uram sisikoka kiknirminingdamingnyi deyok aryi alyi dinyi dobdobkwaming.
7Samaria atei ara daksinibkwan.
Ba, akatei weik sienyi bira me deici asi co taruk sekdoba borkengnande to kubkwande.
8Sun Israel nang aryi malyi kurbanung mutuk kon Awen mutuk ara daksinibkwan.
Ba, sun dama uk daramingnyi keil dungna dub ai ara kirikna ab, ur tiling-tilinga sungsunga ab abkwande.
Ba, sun Samaria nang mutuk konkon asi ato ebkwaming, ‘Nunsi siklibsurum,’ ebkwaming.
Ba, yim bibingdarur mutuk asi ato ebkwaming, ‘Dalubkaboka yibsurum,’ ebkwaming,” eboka wenen uram ebmou.#Luk. 23:30; Why. 6:16
Sun Efraim yala nang kuramnyi dinyi aryi Er Imtamnyi kanya u yiramwe uram deyok
10:9-15
9Er Imtamnyi biryi sun Israel nang ati ato ebmou.
“We Israel nang a, sunda Gibea nang aryi iya ukubman kum dinyi asi ukubmai talak aryi malyi kun dinyi ukubkalibdau.
Akatei dam aryi Nisi mar bobmanei.
A deyok aryi Gibea atei dam aryi sun kanya teleb bon kum nang ab mar obdankwaming.
10Niryi sun dam yandoka sunsi kulabukwan.
Sun mining malyi kun dinyi ilinto kurdongordaramingnyi deyok ati, kulaboka onmanyi ura,
yuk atei nang-yuk atei nang buluboka antaniboka sunsi mar bobkwaming.
11Minob talak ara sun Efraim nang ara sirya kelerdeirin bisam lembu ato atei nang kuramnyi.
Sunda gandum du yalyi kwena ara sun kanya teleb kuboka wa iramnyi.
Ati, Nira sun amnyok ai tabwe biribdongoboka iya ikin dinyi kum bordeiriranse.
Bok, ukuryok ara sun Efraim deibdoba nang aryi Nisi lebesengnunung ati, Niryi sun amnyok ai ikin co bubum lin tabwe biribdongobse.
Ani, sun Yakub deibdoba nang nirya asi, Niryi, ‘Sun wa aliboka ibdobkwandarur,’ eboka arukmase.
Ura, sun Yehuda mutuk nang ababyi Niryi wa arukmase.
12Niryi sunsi ato ebmasin, ‘We, Israel nang a, ukuryok ara kikimanto kuboka kunkwamunyi wa asi ukdobdarur.
Ura, kikimanto kuboka kunun yala asi kwekwandarur.
Ba, sunci Nisi busul kuboka boukwe kimna dinyi aryi kisal dangna dinyi dobdobdarur.
Sunci Er Iya Erebdobnyi bisi ingkiringna talak sirya dam kubmar.
Ati, sunci ukuryok wa ukdobdarur. Ba, Erci yandoka sunti kikiman dinyi karebkwansir,’ ebmasin.
13Bok, sunda Ni esunun to kununa kum uca, danguboka malyi kun dinyi wa asi indarur.
Ba, a dinyi koubdoba kwinindarur dinyi ara tola ati, kikiman kum dinyi asi kwinindarur.
Ani, du dakde yiraming to dinyi ara tola uram akwe endarur.
Sunda sun bukoka kongkong eryibarandum bisam kuda mikib asi kanya deiboka talernururandum.
Ani, sun yin doun nang asi kanya deirirandum.
14A deyok aryi, sun atei nang kankan ara ninyi mar ordana li dobkwaming.
Ani, akatei dam mar iboka bun ai doramingnya nirya ara dakwaming.
Ara, uki tentok tum aryi mar ordanmai tum aryi Salman biryi Bet-Arbel atei dakmou to kuboka dakwaming.
Ura, sun nerabwe babyi mabwe babyi ara obukwaming.
15We, Israel nang a, Niryi sunsi ato kubkwansin.
Ara, sunci yu dinyi kurandum dinyi ara iya weikto kurandum deyok aryi kubkwansin.
Belekuna kiting ururukna aryi sun Israel nang sienyi bira mar ordangnyi talak aryi obkwaming ba, dibkwande.”
Ato eboka Er Imtamnyi biryi sun Efraim nang malyi kuramnyi dinyi ati ebmou.
Currently Selected:
Hosea Uram 10: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
