Hosea Uram 8
8
Sun Israel nang aryi Er Imtamnyi biryi erdeirin uram asi dangbisiramnyi ba, wenebmou uram deyok
8:1-14
1Er Imtamnyi biryi ato ebmou,
“Sunci mar bordan lak kimna dinyi buu ubdarur.
Mar ordana nang aryi Ni atei nang asi dalubkwamangci iyanganmang.
Ara, maka bib aryi lena eibdongoboka u nunuki cungyibarande to kunmang.
Ara, Niryi wibmase atei nang aryi Niryi sunsi ebdeianse uram asi dangbisinung deyok aryi obkwamang.
Ani, tonda Ni eterena uram asi lebesengnung deyok aryi obkwamang ati iyanganmang.
2Sunci Nisi ato eboka uram dobkwaming, ‘Yo, Imtamnyi Kanda nun Nai. Kanda nun Israel nang bingkunub,’ ebkwaming.
3Bok, Israel nang aryi teleb kun dinyi ara, ‘Nun li,’ teneboka dongdongonung.
Ati, sun mar ordana nang aryi sunsi ur a domkiringmanung.
4Sunci sun talen weik sienyi tikdeibyi bok, ara Niryi, ‘Ur tikeibdarur,’ kum ebse.
Sunci sun atei si sien nang erebdeibyi bok, ara Ni kum bikse boka tikeibyi.
Dengna weik keil si emas ab perak ab ara sun kwemdeina molon dinyi kikninung.
Ati, sunda kum dansekwaming.
5We Samaria mutuk nang a, Nira sunci bisam lembu mi kiknirandum dinyi ara, ‘Ni li,’ ebmasin.
Nira sunti yu kuranir ara uk angninto kuranir.
Sun malyi dinyi ukuraming dinyi ara una talak aryi taklobkwandum do?
6Sun Samaria nang aryi kikniboka molorandum bisam lembu mi ara sun Israel nang utotoa kiknina bingna nang aryi kikninung dinyi.
A kikninung dinyi ara, Er Imtamnyi bitoa kuma.
Diba ati, Samaria atei kiknibyi bisam lembu mi ara telebkabokdarur.
7Sunci kiknib kum dinyi asi moloramunci kumwe yala kwengninto kuramunyi ura, wenen dinyi ara ibalya doboka utotoa nirya dalubminikwansurur.
Gandum du eng on dinyi ara sun wa in dam ton kum kunkwandur.
Ba, anda dinyi aryi sunsi sici borbosa ato dinyi roti kwaning kiknina kum anardeinkwansurur.
Ba, anda dinyi aryi yina ukutoto karebci ura, yuk nang aryi araboka yironkwanung.#Ul. 28:33,51
8Sun Israel nang ara yuk atei nang aryi sirya tomoboka kweinyakyi.
Ba, ukuryok ara sunda yuk atei nang kankan kunung.
Uca, sunda teleanci dinyi kum, kwilikanci dinyi kum asi
ninyi aryi atoto dinyi ara teleb kum teneraming ato atei nang kunung.
9Ara, ato ati ebman.
Sun Israel nang ara mambis kuranci bisam keledai aryi lebesekoka bai kurande to kubyi.
Ura, sun kanya aryok lebesekoka Asyur nang mutuk bindoka kunung.
Ani, sun Efraim nang ara yuk atei nang asi ninyi bun urubdandoka burdanung.
10Sunci yuk mutuk nang-yuk mutuk nang asi ninyi bun urubdandoka kuramingnyi ababyi
dam talak akiryi Niryi sunsi bulubdeiboka wenebkwaman.
Ba, sunci sun mutuk talen weik sienyi tingdeirina taklobkwamang.
Ani, sun atei sien nang tingdeirina ababyi deiblobkwamang.
11Diba ati, sun Efraim yala nang aryi sun dama uk dan keil dungna ilinto dobde banmang.
Uca, a donmang keil dungna aryi sunsi malyi kun dinyi kurminingmar.
12Niryi arungdeirin uram ab, lilirdeirin uram ab sunti ilinto kerek sengdeirinun.
Bok, sunci, ‘A dinyi ara nirya nun bingnub dinyi kuma,’ teneboka deirlorongnung.
13Sunda Niti tenen sun dama oboka uk dan dinyi asi sun teleb kurur.
Ba, sunci sun winin dinyi oboka uk danmangiryok sun damnyi yironung.
Bok, Ni Iya Erebdobnyi bira sunda Ni kanya kum kuranir.
Ati, ukuryok ara Niryi sun malyi dinyi kanya teneibdenkwan.
Ani, Niryi sun malyi kun dinyi ati wenebkwan.
Ba, sunda Mesir mutuk wa irmilin nang kuramnyi to tubto tamuboka yuk mutuk nang wa irmilin nang kibkwaming.
14Israel nang aryi sun Kiknibmounyi Imtamnyi bira luba kiboka weik sien nang kun atei asi dobde banung.
Sun Yehuda mutuk nang ara Er Imtamnyi luba kiboka sun atei asi kanya deiboka nirya lika doboka aknabde banung.
Bok, Niryi sun sien nang kun atei dam uk dobkwetebkwan.
Ba, sun lika aknaboka don atei nirya uk yibkwande,”
eboka Er Imtamnyi biryi ato ebmou.
Currently Selected:
Hosea Uram 8: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
