Hosea Uram 7
7
1Er Imtamnyi biryi ato ebmou, “Ni Imtamnyi biryi, ‘Niryi wibmase atei nang Israel nang asi kwetebdeibkwan.
Tonda, Ni ab sun ab tubto tamuboka te murubdatibyi,’ tenenun.
Bok, sun Efraim yala nang aryi malyi kun dinyi kuboka siklirdanung dinyi asi lak kimdur.
Ani, sun Samaria nang aryi yu dinyi kuboka siklirdanung dinyi asi lak kimdur.
Sun malyi kun dinyi lak kimdur ara sunci tola dinyi ukuraming dinyi aryi lak kimdur.
Tonda, sunci ninyi ai bublan akdonokoka ai kalaboka ukula dorkiringnung dinyi aryi lak kimdur.
Ani, baitam asi ninyi yubwa aryi yuk nang dinyi asi araboka doramingnyi dinyi aryi lak kimdur.
Ba, Niryi ukubkwan tenenun dinyi ara kum kununun.
2Ba, Niryi sun yu dinyi ukuramingnyi ati, kanya teneibdenkwana ara sun kanya ton kum teneirdenung.
Ukuryok talak ababyi sun mining malyi kun dinyi aryi sunsi oblibde banmar.
A kunung dinyi nirya ara Ni urasin dam asi lak kimdur.
A deyok aryi Ni Imtamnyi ab, sun Israel nang ab ola te kum murubkwayeb,”
eboka Er Imtamnyi biryi ato ebmou.
Sun Israel nang aryi Er Imtamnyi bisi molon tam babyi, a mutuk dam talen nang tam babyi asi malyi kurdongoramnyi uram deyok
7:3-16
3Er Imtamnyi biryi ato ebmou,
“Sun Israel nang ara yu dinyi ukuboka a mutuk dam weik sienyi bisi kanya teleb kimdeirinung.
Ani, tola-tola dinyi kunuboka a mutuk sien nang asi kanya teleb kimdeirinung.
4Sun Israel nang nirya ara yu dinyi kuboka malyi kun dinyi akwe kunung.
Sunci Niti, ‘Nun li,’ tenenung dinyi kiklina ara roti kwaning inin nang aryi uk sekmangnyi ba, ilinto kuboka angnande to kurur.
Ara, roti dabkwamangnyi uk seklobingnyi ba, ilinto kuboka angci ura, roti iniraming.
Sunci Niti, ‘Nun li,’ tenenunung dinyi sun kanyatam uk angnande to kurur ara ato kurur.
5Nun mutuk weik sienyi kwalina weik tum aryi sun a mutuk sien nang nirya antaniboka anggur me yinung.
Me a yinmangnyi uca, sun mundu u yiboka nong a nirya tin akwe burur.
Ato dinyi aryi weik sienyi bira Er Imtamnyi bisi ina ngilingna nang ab antaniboka me yina ara er teleb kurur.
6Sun Israel nang nirya yu dinyi ati kanya teneinmangnyi ura, sun kanyatam ara uk sengna dam aryi tin burande to kurur.
Ani, sunci yu bonung dinyi ara uk ukurande to kunung.
Ara, lukunda ara uk du asing kubmaci ani, berekde baci ura, tubto buk aboka leberengnande.
Ato sun yu ababyi neiktoto ukurur.
7Sun nirya ara yu dinyi asi uk tin burande to ukurur.
Ba, sun deyok lilirdeirin nang asi uk yalibde yirande to kuboka orkirinung.
Sun a mutuk talen weik sien nang ara nirya orkirinung.
Asi, sun kankan ninyi tentok aryi Nisi ton uram dordena kum kunindarur.
8Efraim yala nang aryi sun yuk atei nang-yuk atei nang ab talbalirminingdanung.
Efraim yala nang ara roti kwaning ila kiknibmangnyi bok, malyi kubmaci ba, ‘Doboka yibtibyi,’ kum teneraming ato nang dansekyi.
9Sun yuk atei nang ab talbaliboka kuna aryi sun mikib nirya oboka yirkirironung bok, sun dam nang ara kum bingdanung.
A kunung uca, sun kisok otong kul ilinto aboka mitang kurur bok, sun dam nang ara kum bingdanung.
10Sun Israel nang ara sun mining wingdanung dinyi aryi sun malyi kunung dinyi lak kimdanung.
Uca, sunci tamuboka sun Nai Imtamnyi Iya Erebdobnyi tam urasin deirina kum kunung.
Ani, sunci a nirya ukurur dinyi aryi Ersi ingkiringdona kum kunung.
11Sun Efraim yala nang ara sirya angkalung maka emnanyi ato dansekyi.
Kanya bona kum nang ato kunungci, Mesir nang namkiringnung.
Ani, Asyur mutuk dam baronung.
12Sunci a nambangnyi ura, Niryi bisik sekoka weinya ena kuna ebmanyi youbkwande.
Niryi sunsi maka imtam aryi orkweteraming to kubkwan.
Niryi sun mining yu dinyi ukuraming deyok aryi sunsi kulaboka wenebkwan.
13Sunda Ni boukwe dam aryi anabkaboka cungdorbanung ati, Niryi sunsi wenebkwan ba, mambul dinyi bobdobkwaming.
Sunci Ni uram asi lebesengnung ati, sunda kum dansekwaming.
Niryi, ‘Sunsi, sun mar ordana nang taruk dam aryi tamuboka dekwan,’ tenenun.
Bok, sunci Nisi tola eboka molonunung.
14Sunci Nisi uram doboka molonung ara Nisi kanya deibmaningiryi kum molonung.
Bok, eda sunda Nisi diba tenena kum nang aryi ukuraming to talyi mabmangnyi ai aryok engenung.
Sunci Nisi gandum ab anggur du yung me ab molobkwamangnyi ura, sun kwemdeina molon nang aryi sun nong tarakoka ourdaronmangiryi, moloraming to kuboka molonunung.
Sunda diba ati, Ni erdeirin uram asi Ni urasin dam aryi lebesekoka dangbisinung.
15Niryi sunsi etereboka sun taruk ningningdeirinun bok,
sunda Nisi urasin dam asi yu dinyi ukubkwamangnyi to ati kanya teneiboka kiknirminingnung.
16Sunci sun molon dinyi si Baal asi tamurbanung
ara tola dinyi iya mikib kum dinyi asi milinung.
Sun atei sien nang ya si deici aryi dibkwaming ara
sunci wingdaboka uram malyi asi mikibanun ebkwaming deyok aryi dibkwaming.
Ba, a deyok ati, Mesir mutuk nang aryi sunsi ina ngilikoka akwi tubkwaming,” ebmou.
Currently Selected:
Hosea Uram 7: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
