Hosea Uram 6
6
Sun Israel nang aryi Er Imtamnyi bisi diboka dib kum tenebmai uram deyok
6:1-6
1Sun Israel nang aryi ato ebdanmai, “Nun kwit yabwe, kekerandarur.
Er Imtamnyi biryi nunsi talebdongoboka oransir.
Ani, Erci nunsi kweterdeiransir.
Ani, Erci nunsi kulaboka obmasici ani, Erci nunsi dilaka sakmasica liboka kweteransir.
Ati, tubto tamuboka Er Iya Erebdobnyi tam urasin deibkwayeb.
2Uki bitinyi mabmabyi ura, Erci nunsi kam kubdeibkwansir.
Ba, uki winiryi tum ara Erci nunsi kam bukeibkwansir.
Ba, nunda Er urasin dam asi kam kubdobkwayeb.
3Ati, nun kwit yabwe, kekendarur. Nunci diboka-diboka Er Iya Erebdobnyi bisi bikdobkwayeb.
Erci nun dam yankwande ara kiting aryi ton anamyangana kum uki tum ton kum kurur. Ato kuboka diba ati yankwande.
Ani, Erci nun dam yankwande ara mo cemnande ato kuboka yankwande.
Ani, Er yankwande ara co keta li dobkwamariryi, mo ilinto ceboka tukwetam me orande to kubkwande.
Ati, nunda Ersi diboka bikdobkwayeb,” ebdanmai.
4Ura, Er Imtamnyi biryi sun Israel nang asi ato ebmou,
“We, Efraim yala nang a, Niryi sunsi una kubkwansin do?
We, Yehuda mutuk nang a, Niryi sunsi una kubkwansin do?
Sunci Nisi busul kuboka kanya deirinindarur dinyi ara berentam asi duwa tiya iabci ani, langdorande ato kundarur.
Ani, mo doun aryi tiya co bok deici dobmaci ani, berentam kum danarorande ato kundarur.
5A deyok aryi Niryi sunsi Ni uram ermurun nang nabi nang biriman erdeirinun uram aryi oboka sici kiminingsunun.
Ni si bambul dam aryi ananurur uram aryi Niryi sunsi weneboka osunun.
Ba, Niryi, ‘Ato kubdarur-ato kuna mem,’ en uram eanse dinyi aryi sun dangbisin dinyi lak kimdeirisurur.
6Ara, Niryi sunsi, ‘Iya telebto kunung,’ tenesunun dinyi ara sun winin dinyi oboka uk dan dinyi asi kum teleb tenesunun.
Eda, sun kanya busul kuboka Niti, ‘Nun Nai Imtamnyi,’ tenen kanya deirinin dinyi asi teleb tenesunun.
Ani, sunci utoto boyandoka uk dan dinyi ara, ‘Iya telebto kunung,’ kum tenesunun.
Eda, sunci Nisi diboka bingnin dinyi asi, ‘Ara, iya telebto kunung,’ tenesunun,” eboka Er Imtamnyi biryi ebmou.
Sun Efraim yala nang aryi, “Er Imtamnyi bisi dib tenena nun li,” tenebmai uram deyok
6:7–7:2
7Er Imtamnyi biryi Efraim yala nang ati ato ebmou, “Sun Nisi diboka bingnin dinyi asi, ‘Iya telebto kunung,’ tenesunun.
Bok, sunda mutuk si Adam#6:7 A uram umbura dam aryi Adam eboka kerek sekwe ara Yuma kobdobnyi si kuma eda, mutuk si. Bok, Imtamnyi uram sengnung nang ara ton nang ara, “Adam biryi kuamwe to kundarur,” eboka sengnung. Bok, Una uram ara, “Mutuk si Adam dam aryi Er Imtamnyi uram dakbisiamnyi to sunbabyi ukundarur,” eboka sekubwe. dam aryi Niryi erdeirin uram asi dakbisiamnyi Ni erdeirin uram dangbisindarur.
Ba, Niryi erdeirin uram ara yan yanisitamdarur.
8Gilead atei ara yu nang kunung atei.
Akiryi ninyi ilinto onung ba, akatei ara ninyi ining ilinto langkaringdur.
9Sun ninyi dama deirin nang imam nang buluboka wengnung.
Ara, bisik ai yibanmangnyi nang asi bisik sekoka daluraming nang yubwa kunung to buluboka wengnung.
Sikhem bana bisik asi sunci ninyi onung ara ilinto onung.
Sun ukunung dinyi ara malyi ukubman kumto dinyi asi ukunung.
10Niryi asing dinuna uca, sun Israel nang kankan dam ilil dinyi kunurur asi asing eirinun.
A dikum ara Efraim yala nang ara ner talyi yordanung asi asing eirinun.
Ba, Israel nang ara sun damnyi beterminingdanung asi asing eirinun.
11Ba, we, sun Yehuda nang a, sunbabyi malyi kuramunyi deyok ati wenebkwansin,” ebmou.
Currently Selected:
Hosea Uram 6: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
