Hosea Uram 5
5
Sun Israel nang ab sun sien nang ab ati yu uram ebkarebmou uram deyok
5:1-7
1Er Imtamnyi biryi ato ebmou, “We, sun ninyi dama deirin nang imam nang ara a ebkwaman uram asi diboka kekebdarur.
Ba, sun Israel nang ur nang ara a ebkwaman uram asi diboka diblilibdarur.
Ba, sun weik sienyi ai ninyi ara amol tang ebdeiboka Ni ebkwaman uram asi diboka kekenmandarur.
Ara, ati ebmasin.
Wenen dinyi yankwande ara sunti yankwansir.
Sunda Mizpa#5:1 Mizpa mutuk dam asi Tabor kon ai ab Sitim kon ai ab ara kwemdeina si Baal molorbaramnyi ai kimnamnyi. atei nang ati, amtong deirininto kundarur deyok aryi wenen dinyi yankwansir.
Ani, sunda Tabor mutuk dub asi maka ebde youna lilibde biriraming to kurdandarur deyok aryi wenen dinyi sun dam yankwansir.
2Ani, sun Sitim mutuk tukwe asi siling um angdona kurur ato nang kundarur.
Ati, Niryi sun a Israel nang nirya asi kulaboka wenebkwansin.
3Sun Efraim yala nang ara Ni bingsunun.
Ba, Israel nang ara Ni urasin dam ara inibdob nang ton kum kundarur.
Sun Efraim yala nang aryi talyi yortamni nerabwe ato kurdandarurci kwemdeina molondarur ara Ni bingsunun.
Ba, sun Israel nang ara sun damnyi beterminingdandarur ara Ni sirya eirisunun.
4Sun Israel nang ara sun mining malyi kun dinyi aryi bisik sengsinirur.
Ba, Ni Iya Erebdobnyi bisi tamuboka yangarona kum kunung.
Tonda, sunda talyi yon nerabwe yon kanya akwe deirirur.
Ura, Ni sun Nai Imtamnyi bisi tamuboka yangarona ara ukubman kum kurur.
5Sun Israel nang ara wingdan kanya bondarur dinyi aryi sun damnyi lak kimdandarur.
Tonda, Er Imtamnyi bisi luba kiboka kwemdeina asi molon kanya bondarur dinyi aryi sun damnyi lak kiminingdandarur.
Efraim yala nang ara sun mining malyi dinyi aryi wenebkwansir ba, mambul mitik kum dobkwandum.
Ba, Yehuda nang ababyi Efraim nang ab tonkwa wenen dinyi dobkwandum.
6Sunci Er Iya Erebdobnyi bisi ingkiringmamunyi ura,
bisam kambing domba ab, lembu sapi ab boboka ingkiringbinkwandum.
Bok, Erda sun dam aryi sirya kisibdobwe aryi sunci Er ab kum eibdankwandum.
7Sunci deirirandum mabwe nermabwe ara Niti deirirkareranuruma kuma.
Sun ab sun mabwe nermabwe ab ara Ni Iya Erebdobnyi bisi busul kuboka kum miliranurum.
Eda, sunda kwemdeina asi molon nang kimdarur.
A deyok aryi uki kuna kum uca, sun ab sun wa ibde yirandum mutuk tukwe ab asi
Niryi yuk atei nang asi liknibdongoboka kum daneibkwansin talak dam kubmar,”
eboka Er Imtamnyi biryi yu uram ebkarebmou.
Sun Israel nang aryi, “Yuk atei nang aryi nunsi ton milibdobkwansununga,” tenen ingkirikmai uram deyok
5:8-14
8Er Imtamnyi biryi ato ebmou, “We, Israel nang a, sun mar ordana nang iyanganmasing ati, Gibea mutuk dam asi sangkala buu ebdarur.
Ba, Rama mutuk dam asi nafiri ubdarur.
Bet-Awen mutuk dam ara, ‘Ninyi mar iyanganmasing ati, yin mar dobdarur e,’ eboka uram dobdarur.
Ba, We, Benyamin yala nang ara tikalaboka ninyi mar bomenekdarur.
9Wenen uki tum ara, Efraim yala nang mutuk atei ara ninyi oboka kum daneibkwande.
Ba, Israel mutuk atei nirya ara ninyi kuna kum mutuk ato kibkwande.
Ba, Ni Imtamnyi biryi sun Israel nang yala mutuk dam iya dib kunubkwande dinyi ati ebdeibmasin.
10Sun Yehuda mutuk sien nang ara sun kwit yabwe me utam kuramnyi nang wiliba mutuk asi dangbisinung ato nang kunung.
Ati, sunsi Nira Ni yu kuranir dinyi ara sunsi me siklirande to kubdeibkwasir.
11Efraim yala nang ara diba kum dinyi kwemdeina asi bindoka milindarurci, kanya kat birirongdarur.
A deyok aryi, Ni Imtamnyi biryi sun Efraim yala nang asi wenebkwansin.
Ara, yuk atei nang aryi sunsi obminikwansing.
12Diba kum dinyi kwemdeina asi milindarur deyok aryi Nira belbela kurande to kunkwansin.
Ara, belbela aryi ukutotoa bok kwilikde yirande to Niryi sun Efraim yala nang asi obkiribkwansin.
Ani, Nira maka kuroro kurande to kubkwansin.
Ara, maka kuroro aryi lun co otongnande to Niryi sun Yehuda mutuk nang nong asi borbotom ebminikoka lubminikwansin.
13Sun Efraim yala nang aryi dirdanmamunyi uca, sun mutuk nang a nirya ara u yiranci nang ato kuranci eibdamunyi ura, ‘Asyur mutuk nang aryi kwetebkwansunung,’ tenen Asyur mutuk dan bandarur.
Bok, sunci u yiranci nang kweterdeiriraming to kum kubdeibkwansing.
Ba, sun Yehuda mutuk nang ababyi dirdanmangnyi uca, sun mutuk nang a nirya ara torok dirirdarande to kuranci eibdangnyi ura, ‘Asyur mutuk taleanci weik sienyi bisi nun miliboka lebdobsurum,’ eboka ninyi bongdeirinung.
Bok, erci sunsi torok dirirdarande to kuranci dinyi ara torok si kwinirkaraming to kum kubkwande.
14Ara, Niryi sun Efraim yala nang asi mar ibokabsiniryi, obkwansin.
Ara, bai kam singa aryi lena si toboka cungbarande kubkwansin ara ton kum lebdeibwansing.
Ani, Niryi sun Yehuda mutuk nang asi mar iboka mar bobkwansin.
Ara, kabunyi ukuryok nebmaci kam singa ibarya kibmaning lena si toboka bobaranto kubkwansin.
Niryi sunsi taruk taleboka si toboka bobinkwansin.
Niryi sunsi bocungbinkwansin bisik ara ninyi tentok aryi ton kum lebdeibkwansing,” ebmou.
Sun Israel nang aryi, “Er Imtamnyi dam tamurbinkwayeb,” ebmai cok, diboka kum kuramnyi uram deyok
5:15
15“Nira Ni atei tubto tamuboka bindanyi ba, sun malyi kun dinyi lak eboka Ni urasin ingkiringyankwaning.
Sunci mambul doramingnyi ai aryi Nisi kanya teneibdengnyi ura, Nisi ingkirikde yankwaning,”
eboka Er Iya Erebdobnyi biryi ebmou.
Currently Selected:
Hosea Uram 5: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
