Hosea Uram 4
4
Er Imtamnyi biryi sun Israel nang asi, “Sun malyi kundarur,” eboka durukmou uram deyok
4:1-19
1Er Iya Erebdobnyi biryi sun Israel nang ati uram eboka durukmou.
Ara, ato eboka durukmou, “We, sun Israel nang e, sun a mutuk dam ara iya busul kuboka Er Imtamnyi bisi kanya kum deirindarur.
Tonda, Er Imtamnyi bisi boukwe kimna kum kundarur.
Ani, tonda Er Imtamnyi bisi diboka kum bingdondarur.
Ati, Erci sunsi a ebdeibmar uram ara diboka kekebdarur.
2Sun a mutuk dam kundarur nang ara ninyi sumna nang akwe kundarur.
Ani, tola uram en nang akwe kundarur.
Ani, yuk nang dinyi ukula don nang ab, yuk nang ner ukula yordan nang ab akwe kundarur.
Ani, yu dinyi akwe kuboka, ninyi obdandoka ining sangdeirirdarona akwe kundarur nang akwe kundarur.
3A deyok aryi a mutuk dam ara mambul kanya boboka engebkwandum.
Ba, a mutuk dam kundarur nang nirya ara u doboka engen kanya akwe bobkwandum.
Ani, baitam kuboka lulungnande dinyi ababyi,
maka imtam langlang eryibarande dinyi ababyi,
mekinaia weik me kwan umbura kurande dinyi ababyi
nirya dibsekwaming.
4Ati, we sun ninyi dama deirin nang imam nang a.
Sun malyi kun dinyi ara yuk nang asi kisirdongona mem.
Ani, sunci yuk nang asi, ‘Sunda malyi kun dinyi aryi ato kusurur,’ ena mem.
Niryi sun imam nang asi kisibdongobmasin.
5Sun imam nang asi kitingtam aryi ilabkaboka sangdarura.
Ani, Er Imtamnyi uram ermurun nang nabi nang ababyi sun tonkwa antaniboka lukunda aryi ilabkaboka sangdarura.
Ani, sun kwin Israel bibabyi sun dornilisurur deyok aryi Niryi oboka kum daneibkwan.
6Sun imam nang aryi Ni Imtamnyi bisi kum bingnindarur.
Ati, Nibabyi sunda ninyi dama deirin nang kimna ara, ‘A nang ara Ni li,’ eboka uram sekwansin.
Ba, Niryi wibmase nang ababyi sun imam nang diliboka Ni sun Nai Imtamnyi bisi kum bingnunung deyok aryi Niryi sunsi kum daneibkwan.
Ani, sunci Ni eterena asi luba kimdarur deyok aryi
Nibabyi sun mabwa ara luba kibkwan.
7Sun ninyi ilinto aryi ninyi dama deirin nang kimtabangdarur.
Ba, Ni urasin dam sun malyi kun dinyi ababyi ilinto kurtabangdarur.
Ati, Niryi sunsi kisal dakna dinyi karebmasin to dinyi ara unuboka ina ngilingna dinyi karebkwansin.
8Sun ninyi dama deirin nang ara Ni uram keken nang aryi sun malyi kun dinyi kilina ati boyanmangnyi dinyi asi yinung.
Ani, sunci tenenung ara, ‘Ni uram keken nang ara malyi dinyi akwe kuranting,’ tenen kanya bonung.
9A deyok aryi Ni mabwe nermabwe mambul donung to,
sun ninyi dama deirin nang ababyi neiktoto mambul dobkwandum.
Sun mining malyi kundarur deyok aryi Niryi sunsi wenebkwansin.
Ani, sun damnyi ukundarur to dinyi aryi diblilibdeboka dekeiboka wenebkwansin.
10Sunda, Ni Iya Erebdobnyi bira takloboknumunyi ura, sun kwemdeina molon dinyi asi talernururorandum.
Ati, sunda yina yironmamunyi bok, mundu burbana kum kunkwansir.
Sunci wa tukwe bitana ati, ner talyi yobdoro yibaramunyi ababyi mi ton kum deironkwandum.
11Sunci anggur du yung me ukuryok urubmangnyi ba mitang tuba kurande dinyi yinmamunyi babyi, kanya kum borandum.
Ani, minob uruboka kirdeiramingnyi ba, mikib kurande dinyi babyi yinmamunyi ura, kanya teleb boramunyi kanya ara waningminingsurur.
12Niryi wibmase atei nang ara talyi yon nerabwe yon kanya akwe deirirur.
Tonda, Ni Imtamnyi sun Nai bira deirlobokningnyi ura, kwemdeina akwe molororaming.
Ura, sunci kwemdeina molon co asi sun tenen dinyi asirderaming.
Bok, dumun kama aryi sun bikmanto dinyi sun dam asi erkarerur.
13Nira deiblobningnyi ura, mutuk konkon asi sun dama deiboka karerbaraming.
Ani, tonda mitik-mitik mutuk kon ati, sun winin dinyi oboka uk darbaraming.
Tonda, ilila co bukandiryi bok ilinto lumlam eboka deyok dam teleb kuranci ura,
tongtong teleb dinyi boboka uk darbaraming.
Ato kuraming deyok aryi sun nermabwe ara talyi yortamni nerabwe kimnung.
Ba, sun yamal nerabwe ababyi talyi yortamni nerabwe kimnung.
14Niryi wibmase atei nang ababyi yuk talyi yortamni nerabwe kwemdeina molon ai dam wa in nerabwe ab yorkiringdarur.
Sunda talyi yortamni nerabwe ab tonkwa antanibdobmunyi ura, kwemdeina ati bisam oboka uk dabmunyi ura molorandum.
Ati, sun nermabwe talyi yortamni nerabwe kimnamingnyi ara Niryi sunsi kum wenebkwamatinyi do?
Ani, sun yamal nerabwe ababyi talyi yortamni nerabwe kimnung ara Niryi sunsi kum wenebkwamatinyi do?
Er Imtamnyi deyok asi diboka liliboka bingdona kum nang ara wenen dinyi dobdobkwaming.
15We Israel nang a, sunci kwemdeina moloramunyi ura,
sun Yehuda mutuk nang ababyi sun Israel nang ukundarur malyi kun dinyi milisina mem.
Sunci Gilgal mutuk molorbana mem.
Ani, Bet-Awen#4:15 A mutuk si yuk si ara Betel enung. Betel ena ara, “Er Imtamnyi Ai” ena ati a si doamnyi. Ba, Hosea kuramwe talak ara sun Israel aryi kwemdeina si Baal moloramnyi. Ati a uram dam aryi si sibwe ara Bet-Awen eboka si sibwe. Ara, sunci yu dinyi kurumnyi deyok aryi akatei si ara Bet-Awen eboka si doamnyi. welebindoka molorbana mem.
Ani, sun uram eboka katabdeibkwamamunyi ati, ‘Er Iya Erebdobnyi iya kam kururnyi si deici aryi ebman,’ ena mem.
16Ara, ato ati ebmasin,
Sun Israel nang ara bisam domba aryi ninyi uram kekerande to kurandate ura, Niryi sunsi kalingnansitinyi.
Bok, sunda bisam sapi aryi ninyi uram kum kekerandaryi kisok kat birirande.
Ato sunbabyi kisok kat birisurur ati Niryi sunsi kum kalingsunun ati ebmasin.
17Sun Efraim#4:17 Er Imtamnyi uram umbura dam ara, Efraim yala nang ton erur. Israel nang ton erur. A erur ara neik atei nang atikwe ton dikum ara Efraim erur ura, ton yuk dikum ara Israel nang erur. Israel (Efraim) ara ninyi yala takubaryi nang deirina aryi me utam kuboka doramnyi atei nang si ati erur. yala nang ara kwemdeina asi uruboka yan kwatinung.
Ati, sunda a deiblobmabyi ba, iya a kuranung.
18Sun walina talen me yinmangnyi nang ara ilinto yinmangnyi deyok aryi
sun kanya ara ner talyi dobde yiban kanya akwe deirirur.
Sun ato kun nang ara sun si asi teleb kibdeibmanto dinyi ara to kum kununung.
Eda, sunda ina ngilingna dinyi asi sun teleb kurur nang kununung.
19A deyok aryi ilila kumwe aryi urdonongnande to kuboka sunda era mutuk asi bobindoka deirlorbinkwansing.
Ani, sunci kwemdeina asi dama deiriraming deyok aryi alyi dobkwaming,” eboka durukmou.
Currently Selected:
Hosea Uram 4: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
