Hosea Uram 3

Er Imtamnyi biryi sun Israel nang asi tubto tamuboka dobmou bok, ninyi kum atei ato kibmou uram deyok

3:1-5

1Hosea biryi Er Imtamnyi biryi ebmou to ati, ato ebmou, “Er Iya Erebdobnyi biryi nisi ato ebmou, ‘Sun Israel nang ara Nisi deibloboka sun urasin ara kwemdeina molon dinyi ab, kwemdeina ati anggur du asi yalyi kweboka eingnaming dinyi asi deirbana asi sun teleb kurur. Sunda ato kunung bok, Ni Iya Erebdobnyi biryi sun Israel nang asi, “Ni mabwe nermabwe boukwe,” tenebman. Ati, Hosea kanbabyi ato kuboka kan ner asi tubto tamuboka, kan doamoumwe bok, talyi yortamnung ner asi, “Ni ner boukwe,” tenebdum,’ eboka arukmanou. 2Ura, niryi ni ner nibiramnyi tamuboka dobde yankwamase ati dengna ara dengna weik keil perak yubwa 15 baryi kareboka dekmase. Ani, gandum du dekmase ara 150 kilogram baryi dekmase. 3Ura, ersi ato ebmase, ‘Kanda ni ab ara iya kuronkwanim. Ani, kanda talyi yortamni ner kurum ara ukuryok ara ur kubdobkwandum. Tonda, kanda yuk nang ninyi tentok aryi kansi dona kum kubkwankir. Ani, ton yuk dinyi ara nira kan ab tonkwa mana kum kunkwanim,’ ebmase. 4Niryi ato ebmase ara, ‘A talak aryi kuboka ara uki weikanun sun Israel nang kobdoba aryi sun yuk weik sien nang kiboka taleramnyi to ton kum kubkwamnyi ati,’ ebmase. Ani, yuk ninyi bobde menengna nang ababyi ton kum kunkwamnyi ato ton ebmase. Ura, tonda bisam oboka uk darbaramnyi to ababyi kum kunkwamnyi ati ebmase. Ani, sun kwemdeina moloboka isa kinkin dam dongorban ai ababyi kum kunkwamnyi. Ani, sun mirei-mirei boramnyi dinyi ababyi kum kunkwamnyi deyok ati kikliboka ebmase. 5Sun Israel nang aryi ato dinyi sirya ukubingnyi ura, tamuboka Er Iya Erebdobnyi bira sun Nai Imtamnyi bisi tamuryankwaming. Ani, Daud deibdobanyi sun weik sienyi kibkwandanyi bisi ingkirikwaming. Sirya kobdob uki berekwande talak aryi sunci Er Iya Erebdobnyi bisi sirim asa aryi Er dam yankwaming. Ani, Erci teleb kurdeirin dinyi ati, ingkirikde yankwaming ati, ebmase,” eboka Hosea biryi ebmou.

Currently Selected:

Hosea Uram 3: MTG

Highlight

Copy

Compare