Hosea Uram 12
12
Sun Israel nang ab Efraim yala nang ab aryi malyi kuramnyi ati wenebmou uram deyok
12:1-15
1Er Imtamnyi biryi ato ebmou, “Sun Israel yala nang aryi Niti tola enunung.
Efraim yala nang ara tola uram aryi Nisi mar bonunung.
Ba, Yehuda nang ara Ni Imtamnyi dam aryi inirdaronung.
Ani, Nira sun Israel nang aryi ilil weik kuboka Ererdeirininanyi biryi busul kuboka boukwe kimnunyi dam aryi inirdaronung.
2Sun Efraim yala nang ara bikdob kum dinyi kumwe ublingnande ato dinyi ati, kalikeiboka bunung.
Ani, yaletam kumwe dorande ato dinyi ati, domkiringdonmanyi uca iniboka berekoka kimdur.
Sundam ara tola ebdandoka orminingdaron dinyi asi tabangdongordanung.
Ba, sunci Asyur nang asi kunubdeibdandoka uram erdeirdaronung.
Ani, Mesir mutuk dam ara tong teleb erande co yung me bobanung.
Ara, ninyi bun ururdanungci ukurdanung.
3Ni Iya Erebdobnyi bira sun Yehuda mutuk nang asi mar bobkwan.
Ba, Yakub deibdoba nang asi wenebkwan ara sun kuramingnyi to diblilibdeboka wenebkwan.
Ba, sunsi dengdeininto kuboka wenebkwan dinyi ara sun kuroramingnyi to kuboka karebkwan.
4Israel nang ara sun abwe kisok Yakub biryi er kwin mundu umbura aryi er du bisi tola eamunyi deibdoba nang kunung.
Ani, sirya nebmou ura, erci ilil kum asa ibarya kibmaning aryi Er Imtamnyi ab taleboka kwinkwinikdanin yibinmarei.
5Ura, Yakub biryi Er Imtamnyi uram eryuryangananyi ab taleboka kwinkwiningdanmarei uca, Yakub biryi muna kibdongobmou.
Ura, Yakub biryi engeboka Er Imtamnyi bisi, ‘Boukwe kibnurum,’ eboka molobmou.
Ba, Betel mutuk aryi erci Imtamnyi ab ebdanmarei.
Ura, a mutuk dam aryi Er Imtamnyi biryi nun abwe Yakub bisi uram ebmou.
6A sisikmareinyi Er si ara Iya Erebdobnyi, nun Nai Imtamnyi im ton tukwe ton kikniamunyi.
Er si ara yuk si ton kum. Eda, Er si ara a kunum naboka molonkwanubnyi.
7Ati, sun Yakub deibdoba nang ara sun Nai Imtamnyi bisi diboka diba tenebmunyi ura, tamuboka Er dam yandobdarur.
Sunda busul kuboka yuk nang asi boukwe kimna dinyi ab, kikimanto kuboka kunun dinyi ab asi kunkwandarur.
Ura, tuba-tuba Er sun Nai Imtamnyi bisi iya dibde bunkwandarur.
8Sun Israel nang ara Kanaan nang aryi yuk nang asi dengna ikin luluboka dororaming to kundarur. Ara, sunci teneboka timbangan malyi kibdeiboka yuk nang dinyi dororaming to kundarur.
Ani, sun kanya dam ara, yuk nang asi ining urubde yiraming nang kanya ato bondarur.
9Ba, sun Efraim yala nang ara ato endarur, ‘Nunda bona talena ilinto dounub nang kunub.
Nunda bona talena ilinto lamtalenub nang kunub.
Bok, nunci mikib doboka doronub dinyi nirya aryi nunsi malyi kurminingdan dinyi ton kum kunub,’ erdandarur.
10Bok, Nira Iya Erebdobnyi kununyi a kunum.
Nira sun Nai Imtamnyi Mesir mutuk aryi taruk taleboka boyanmasisinyi.
Sun yinimwe mutuk keis ol ai umbura kurandau talak ara Ni sun ab erdaramoubwe.
Ato kuboka Niryi sunsi utotoa kum nang kibdeibsinyi ba, sunda keis ol ai tubto kubkwandum.
Ba, sunda yinimwe mutuk bisik ai keis ol ai kubde yangaramnyi to tubto kubkwandum.
11Niryi Ni uram ermurun nang asi uram erdeirinun.
Ani, Niryi liki ilinto sun dam asi kunumna lak kimdeirinun.
Ani, uram ermurun nang dam asi kebdeiboka eteren uram erkarenun.
12Gilead mutuk nang ara yu dinyi kuramingnyi ura, a dinyi nirya ara talyitam dib kum dinyi kuramingiryi.
Ba, Gilgal mutuk asi sunci kwemdeina ati, bisam lembu yim oboka uk daramingnyi deyok aryi sun dama uk dan keil dungna ara dalubsakwande.
Ara, wa in dam lelebdeiamingnyi keil asi daluboka sangnande to kubkwande.
13Yakub bira Aram mutuk dam inirdarorbinmou.
Israel bira a mutuk dam aryi ner dobkwamwe ati, yuk nang wa irmilinanyi kibdanamwe uca, ner doamwe.
Yo, ara ner dobkwamwe ati bisam kalingnanyi kiamwe.
14Israel nang ara Er Iya Erebdobnyi biryi Mesir mutuk aryi boyangaramwe ura, Er uram ermurunanyi si Musa bisi liknibdongoboka boyanamwe.
Yo, sun Israel nang ara Er Imtamnyi uram ermurunanyi tentok aryi kalingnamwe.
15Efraim yaldangna nang aryi Ni kanya asi u yirminingnindarur iya sik weik.
Ati, Ni Imtamnyi biryi sunsi kisok dakwansin.
Ani, Niryi sunsi wenen dinyi aryi dengdeirininto kubkwansin,”
eboka Er Imtamnyi biryi ato ebmou.
Currently Selected:
Hosea Uram 12: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
