Hosea Uram 11
11
Er Imtamnyi biryi sun Israel nang malyi dinyi kuramnyi nang asi boukwe kibmou uram deyok
11:1-11
1Er Imtamnyi biryi ato ebmou,
“Sun Israel nang ara kabir kuramnyi talak ara Niryi naboka Ni mabwe nermabwe kibmase talak aryi Niryi sunsi boukwe kimnanse.
Ura, Ni mi ara Mesir mutuk kuramwe asi nabmase.#Mat. 2:15
2Niryi sunsi tuba-tuba namtabangmanyi bok, Ni dam yangarona kum kunung.
Eda, sunci Ni uram kum kekebman ato kuboka Ni dam aryi leimdonunung.
Ura, sunci sun molonung kwemdeina si Baal asi dama deiboka molonung.
Ani, sunci kwemdeina ati tong teleb dinyi uk danung.
3Sunci ato kunung ara Niryi sunsi ukunun dinyi ara kanya kum teneirdenung.
Ara, Niryi Efraim yala nang asi bisik u dikum eterenun dinyi ara kum teneirdenung.
Ani, Niryi sunsi Ni taruk deici boyibanun.
Bok, sunci diboka kanya teneibdeboka Nira sun kwetenanyi kunung dinyi ara sun kum bingnunung.
4Niryi sunsi tabwe taleboka lininto kunun dinyi ara
Niryi sunsi busul kuboka dirnilinun dinyi aryi taleboka lininto kunun.
Ani, Niryi sunsi tabwe demninto kunun dinyi ara
Niryi sunsi boukwe kimnun dinyi aryi tabwe demninto kunun.
Sunci ikin co bubum ato dinyi takunung ara Niryi lordeirinun.
Niryi sunti yina karebkwamanyi ura, Ni amnyok dukokabniryi yina yirkarenun.
5Bok, sunci sun malyi kunung dinyi takloboka Ni tam urasin deina kum kunung.
Ati, sunda Mesir mutuk tubto tamuboka bindobnung.
Ani, Asyur mutuk nang aryi weik sien nang kiboka sunsi talebsunung.
6Sun mutuk atei ara Asyur mutuk ya doun nang aryi iyankwaming.
Ura, atei lika bublan darardongon co balang ara akdonokwaming.
Ani, sun mar ordana nang aryi sun Israel mutuk nang asi sun mining atei obukwaming.
7Ni mining wibse atei nang aryi Nira iya dong kimdongnunung.
Ura, Ni si asi weik ererdeinina ara sirya taklobiryi sun molon kwemdeina si Baal asi iya namnung.
8Ni kanya ara danguboka sunsi boukwe kimsin dinyi akwe wengyanganurur.
Ani, Ni bico aryi sunsi boukwe kimsin dinyi akwe kanya teneisunun.
Ati, we Efraim yala nang a, Niryi sunsi unatoa ati takwamasitinyi do?
We Israel nang a, sunsi unatoa ati dobkarebkwamasitinyi do?
Niryi sunsi Adma atei ukubdeibmase to ara unatoa ati, kubkwamasitinyi.
Ani, Niryi sunsi Zeboim#11:8 Atei si Adma ab Zeboim ab ara atei si Sodom ab Gomora ab kanya teneibdena teleb. Lak kimna Kej. 14:2 dan 14:8 dibdenkwanub. atei nang asi kubdeibmase to ara unatoa ati kubdeibkwamasitinyi do?
Ato kum kubsunun. Eda, Ni boukwe bosunun.
9Ati, Niryi sunti yu boransin ba, uk angam-angam erande to kuranir dinyi ara sunsi kum labasibkwansin.
Niryi sun Efraim yala nang asi tubto tamuboka ona kum kubkwan.
Ato kubkwansin ara Nira sun ninyi kundarur atonyi kum kunun.
Eda, Nira Imtamnyi sun Molonanyi kunun.
Sun kankan dam aryi Nira iya teleb aryi mililnyi kunun.
Ni sun kankan dam yanganun ara sunsi obkwamasinyi ati kum yanganun,” ebmou.
10Ura, ton ato ebmou, “Niryi bai kam si singa uram kamurande to kamubnyi ura,
sunci Ni Iya Erebdobnyi bisi milibkwaning.
Diba ati, Ni uram ara bai kam singa kamurande to ebkwan.
Ba, sun Ni milibkwaning nang ara kitingbantam aryi sirim asa yankwaming.
11Ani, maka kurande to kuboka sirim asa aryi Mesir tam aryi miliryankwaning.
Ani, maka emnanyi kurande to kuboka Asyur mutuk aryi miliryankwaning.
Ba, Niryi dobtaleboka sun atei yuk-yuk kaibdongobkwan,”
eboka Er Iya Erebdobnyi biryi ebmou.
Currently Selected:
Hosea Uram 11: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
