Kejadian Uram 49
49
Yakub dibkwamouci, er mabwe ati, sirya uram ebdukeibmou deyok
49:1-28
1Ura, Yakub biryi er mabwe nirya asi ato eboka nabmou. “Ni mabwe nirya ni dam buluryandarur. Ba, niryi sunsi aminda do talak kubde binkwandum to minob ebdeibkwansin:
2Ni Yakub mabwe, ni dam buluryandarur!
Ni sun nai Israel biryi ebkun uram asi yandoka kekendarur!
3Ni mi Ruben, kanda yandua deibkise mi kurum,
a deyok aryi kanci nisi yuma mikib kibkarebnoumwe.
Kanda mikib kabloboka erebdobnyi kubkwandim.
Ni mabwe, kan weit yabwe yuk nang ara kan amwetam nang kibkwaming.
4Kan kanya mikib ara me lontik eboka ola dinibde sangnande atonyi kurum.
A deyok aryi kanda yuma deibkisinyi bok,
kanda ukura dunyi kuma, talyi kankan tamnyi kibkwandim.
Ara, talyi kum ebmakin eda, kanci ni kan nai man sokon asi weleboka ni tabangni ner ab maandurumwe ati ebmakin.
Ni kan nai man sokon asi mabumwe uca,
kan nai man sokon betebdongobnoumwe.#Kej. 35:22
5Simeon ab Lewi ab sun du-weit ara,
ninyi on yin akwe doururum.
6Sun a bitinyi nang borurung kanya ara ninyi on kanya akwe borurung.
Sun kanya ara wa in bisam sapi melmel bibikmaci asi talyitam sengdongoraming nang kanya borurung.
Nira, sun a bitinyi nang borurung kanya ara ni kanya ab makdongobniringnyei.
7Sunda yu dinyi weksou dinyi ara kum darur eboka subman.
A nang wengdur yu ara mikib mak bobdei.
A bitinyi nang ara sun yala yuk kiboka kurona kum kubkwanding,
Eda, ni Yakub mabwe ton nang kuramingnya kankan turukoka kubkwanding.
8Ni mi Yehuda kanda, kan kwit yabwe ton nang aryi kisal dakoka kironkwanking.
Kanci, kan mar ordan nang asi kan taruk aryi talerongkwandim.
Kan dam asi ni kan nai mabwe aryi, kutam ikdeiboka, luknuboka molobkwanking.
9Yehuda kanda bai kam singa aryi kurande to kubkwandim.
Ni mi, kanda bai kam singa aryi er dam yibaci keica ce tong eboka obdobci ura, er kuranci ai bobde barande to kubkwandim.
Bai kam singa mabmaci asi kamubmanto kum kurande atonyi kibkwandim.
10Yehuda sienyi kiboka taleaminyi dinyi ara iya sasibkwande.
Er sienyi kiaminyi dinyi ara er mabwe ababyi odei-odei sien nang kibde binkwaming.
Yuk-yuk mutuk nang aryi sien nang ati, boyangaraming dinyi er dam boyankwaming.
Ani, er dam kutam ikeiboka er arukmaci to kunubkwaming.
11Kan boyiban bisam keledai ara co anggur teleb asi birikwandim.
Kan bisam keledai mi ara anggur teleb tikanca dam asi kubkwande.
Kan ongon aling ara anggur du me aryi ilikwandim.
Kan ongon aling ara ining bi bol akwe kibkwande.
12Kan asing ababyi anggur me aryi bi lukwankir.
Kan si ara moum yung me yina aryi kait bukwankir.
13Ni mi Zebulon, kanda weik me kwan kubkub dam asi kubkwandim.
Kan kubkwandim dikum ara me deici yiban aia deiriryangan dikum asi kubkwandim.
Kan mutuk wiliba ara Sidon mutuk dam sirya wilibkwandim.
14Ni mi Isakhar, kanda bisam keledai yok mikib kurande atonyi kibkwandim.
Kanda keledai ikin keica bobdeibingnyi ba, ikin keica borande to kubkwandim.
15Kan ikin boboka yiban dikum ara telebto dikum asi kubkwandim.
Ura, ikin dinyi ara mundu loboka bobkwandim.
Ba, kansi arukoka ikin wa karebkwanking.
16Ni mi Dan kanda, kan taleaminyi nang asi deyok liliboka wenebkwandim.
Ato kuboka wenebkwandim to ara Israel yala nang kankan aryi ukunung to kubkwandim.
17Kanda kwatima bisik dam mabmaci aryi bisam kuda yibaci asi yan bumnyok si torande to kubkwandim.
Ba, bisam kuda bobmarinyi bira langangdonongnande to kubkwandimnyi.
18Nira, Nai Iya Erebdobnyi Kanti, ‘Lemyanurum,’ tenen dibde bunmakin.
19Ni mi Gad, kanda ninyi obde yiban nang aryi oryangakingnyi asi,
sunbabyi danguboka obkwandim.
20Ni mi, Asyer kanda, yina ilinto kurankici aryi yina teleb akwe yibde binkwandim.
Kanci sien nang-sien nang asi kanci yina karebkwandim.
21Ni mi Naftali kanda, bisam rusa ner kurande to kubkwandim.
Kan nermabwe sun urasin ara telebto urasin akwe deibkwandim.
22Ni mi Yusuf kanda, co du muruk tuba mourande atonyi kubkwandim.
Kanda me u dam tikanci co du mourande atonyi kubkwandim.
Kanda co weleboka lika bisirande atonyi kubkwandim.
23Kan mar ordan nang aryi yandoka onmakingnyi bok,
kanci sunsi oboka erebdobkwandim.
24Er Imtamnyi, ni kan nai Yakub kalingnururnyi biryi kalikwankir,
Ni kalingnururnyi bira Israel yala nang nirya kalingnanyi kurur.
Ati, kan taruk ara mikib yabkwankir.
Ani, kan mar dobkwandim ara dolong ena kum kubkwandim.
25Ni kan nai Yakub, molonun Er Imtamnyi biryi kansi lebdobkwankir.
Er Imtamnyi Iya Mikibnyi biryi kisal dakwankir.
Ara, imtam aryi mo cebdongoboka karebkwankir,
Tukwetam yangabwe me deici aryi karebkwankir.
Kansi ninyi kin mabur deici biriman aryi mabwe deibde binkwandum,
Moum biriman aryi kan mabwe neboka odei-odei binkwaming.
26Ni kan nai biryi kisal dakoka karebmakin dinyi ara,
minob talak ereboka burdaramwe mutuk kon ara bisibkaboka iya erebdob dinyi kurur.
Ati, a dinyi nirya ara Yusuf kan dobkwandim.
Yusuf kanda ni mabwe a yaldaksa kankan dam aryi iya bikdobnyi nun kubkwandim.
27Ni mi Benyamin bira bai kam aryi, er yin keica yibaci asi, ola ce tong, eboka talerongnande atonyi kurur.
Belekuna ara orbinmaci ani,
sintam ara oboka yanmaci dinyi bongnande atonyi kibkwande,” ebmou.
28Yakub kuramwe ani, sirya dibkouci, er mabwe Israel yala nang amolbaryi nang asi sirya uram ebdeiboka, sunsi yuk-yuk ukubde binkwamnyi to kisal dakmou.
Yakub dibmou ba, keil umbura dongobmai deyok
49:29-33
29-30Ani, sirya uram aryi er mabwe ati, ton ato kubkwandarur ebmou, “Ni dibnyi ura, ni nai yabwe ab, ni abwe yabwe ab, ni ai ninyi ab tukwe dongobyi mutuk dam neik umbura akwe dongobkwanindarur. A dongobkwanurum mutuk ara Kanaan mutuk asi Mamre dinatam yaletam kuboka mutuk si Makhpela keil deyok dongobkwanindarur. A mutuk ara Het yalanyi si Efron bisi ni abwe Abraham biryi sirya dekoka er dinyi kiamwe ati ebman. 31A mutuk Makhpela keil imira ara ni abwe Abraham ab, er ner Sara ab, ni nai Ishak ab, ni kwin Ribka ab, 32ni ner Lea ab ukuboka, a keil imira dongoamnyi. A keil imira ara Het yalanyi bisi a mutuk dekoka neik keil imira akwe dongobyi keil umbura akwe nibabyi dongobkwanindarur,” ebmou.
33Yakub biryi er mabwe ati, sirya uram ato ebdeibmou ura, maryibinmou uca, dibmou.
Currently Selected:
Kejadian Uram 49: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
