Kejadian Uram 48

Yakub biryi Yusuf mabwe Manasye ab Efraim ab ati, kisal dangna dinyi karebmou deyok

48:1-22

1Ura, Yusuf a talak da kubde banmou ani, uki tentok tum ara ninyi ton er dam binmaici, ato ebmai, “Yusuf, kan nai bira u yinmar!” ebmai. Ura, er mabwe Manasye ab, Efraim ab boboka sun abwe Yakub u yinmoua dam boyanmou. 2Ura, a tikabyi nang aryi Yakub bisi ato ebmai, “Kan mi Yusuf a yanmar,” ebmai. Ura, er nai Yakub kekebmouci, mabmou deici aryi mikib bulunmou ani, mikib asa bukokmou. 3Ura, Yakub biryi er mi asi ato ebmou, “Kanaan mutuk asi Lus#Kej. 28:19 dam aryi Er Imtamnyi, Er Iya Mikibnyi biryi nisi lak kibdanmouci, kisal dangna dinyi kareanou.#48:3 Mutuk si Lus bok Er Imtamnyi lak kibmou deyok aryi Yakub biryi a mutuk ara si Betel eboka si doamwe. 4Karerdongonou ura, ato eboka kisal dakanou, ‘Kansi mabwe ilinto karebkinyi ba, kan deibdoba aryi mabwe ilinto odei-odei binkwaming. Ba, kan deibdoba yala aryi a mutuk yuk-yuk nirya kan mabwe mer asi weik kubde binkwaming,’ eanou. Ani, tonda ato eanou, ‘A mutuk Kanaan dam ara kan mutuk kibdobminci, a mutuk iya kubde binkwandum,’ eanou. 5Ati, kan Mesir mutuk dam minob yandoka kurumci, mabwe bitinyi deibdobumwe. Bok, ni Mesir dam a yase ura, a mabwe bitinyi Manasye ab, Efraim ab sun nisin ni mabwe akwe kibdei. A mabwe bitinyi ara ni mabwe kobdoba Ruben ab Simeon ab ato kibdei. 6Eda, aminda ka tubto deibdobminyi mabwe asi ara kan mabwe kibkwande. Bok, ni boranyi bona ara sangkuna aminda deibminyi mabwe talena kum kubkwanung, eda Manasye ab Efraim ab sun deici aryi dobdobkwanung. 7Ara, Nibabyi kan kwin Rahel bisi ato kuanse, ni ab kan kwin Rahel ab mutuk si Padan dam aryi anaboka Kanaan baronmanoumwe uca, kan kwin bisik dam dibmou.#Kej. 35:16-19 Ura, atei si Betlehem dam Efrata banung bisik kubkub dam asi kan kwin tukwe a dongoanse. Ato kuanse ati kan mabwe bitinyi ara ni mabwe kibdobman,” ebmou.

8Ura, Yakub biryi er mi Yusuf mabwe eibmou ura, ato ebmou, “Ara, unanyi mabwe da?” ebmou. 9Uca, Yusuf biryi, “Nai, ara ni mabwe. Mesir mutuk a yandoka kunun talak aryi, Er Imtamnyi biryi karebnou ba, deibse mabwe atiba,” ebmou. Ura, Yakub biryi, “Niryi a mabwe sunsi kisal dangna dinyi karebkwinsin ati, ni dam atoto tingyarurum!” ebmou. 10Ura, Yakub bira wisi danamwe aryi er asing ara oba liliamwe aryi eibkatabman kum kubmou. Ura, Yusuf biryi er mabwe taleboka Yakub dam tingdeirirbinmou. Ba, sun abwe biryi a mabwe asi iriboka u kunkunubdobmou. 11Ura, Yakub biryi Yusuf bisi ato ebmou, “ ‘Ni mi da kuranci asi aminda urasin eibkwanca,’ tenen kanya ton bona kum kurankise. Bok, Er Imtamnyi biryi, ‘Kan ab kan mabwe ab, ni ab urasin eibdating,’ tenebmar to urasin eibdab,” ebmou. 12Ura, Yusuf biryi er mabwe ab sun abwe ab kwaliboka kirdanmaia sirya ura, er mabwe lobdeibmou. Ura, erci er nai Yakub bisi kisok tukwe ikeiboka kibdobmou. 13Ura, er mabwe taruk taleboka er nai Yakub dam tingdeirirbinmou. Ara, Efraim bira siriktam taruk talebmou ura, Manasye bira kwanimtam taruk taleboka tikeibmou. 14Ura, Yusuf biryi er nai Yakub dam asi, er mi dunyi Efraim bira, “Siriktam taruk aryi kisal dakwande,” tenen er nai Yakub siriktam kuboka tikeibmou. Ba, “Weitnyi Manasye bira kwanimtam taruk aryi kisal dakwande,” tenen kwanimtam kuboka tikeibmou. Uca, er nai Yakub biryi taruk wamuboka weitnyi bisi siriktam taruk aryi kisok talebmou ura, dunyi bira kwanimtam taruk aryi kisok talebmou. 15Ato kubmou ura, sun a mabwe sun nai Yusuf bibabyi kisal dakmouci, ato ebmou.

“Ni abwe Abraham ab, ni nai Ishak ab ara Er Imtamnyi urasin dam kurandei.

Sun a molorandeinyi bikwe nibabyi molonun.

Ba, Er Imtamnyi biryi ni kam kunun talak nirya kalikoka boyibanurur.

Ani, uku talak ababyi kalikmanir ba, kunman.

16Er Imtamnyi biryi nisi obmanto dinyi ni dam yangaci asi, Erci lemdeiriranir.

Ni a lemdanirnyi biryi a mabwe asi kisal dakwande.

Ba, a mabwe deici aryi, ni si ab ni abwe Abraham si ab, ni nai Ishak si ab erebde binkwaming.

A mabwe yaldangna aryi odei-odei binkwaming.

Ani, yuk-yuk mutuk nirya sun deibdoba kubde binkwaming.”

17Ato eboka Yusuf mabwe asi kisal dakmou. Ba, Yusuf dinmou uca, er nai siriktam taruk ara weitnyi Efraim kisok talebmou. Ba, kwanimtam taruk ara dunyi Manasye kisok talebmou. Ba, Yusuf asing eibmou, er kanya ara, “Ato kubmar ara aibdanmar?” tenen aryi er nai taruk dobtaleboka, siriktam taruk talebmou taruk asi dobtaleboka, kwanimtam talebmou kisok deici kimdeiriuci, er nai bisi ato ebmou. 18“Nai ato kuma, dunyi bira atam tikmar. Ba, otam ara weitnyi tikmar. Ati, sirik taruk ara dunyi kisok asi talebdum,” ebmou. 19Uca, er nai biryi Yusuf bisi erekdobmouci, ato ebmou, “Ami se! Ni bikmanci kubman. Kwanimtam talebman mi ababyi kisal dangna dinyi ara er mabwe ilinto yaldakde binkwaming bok, outamtoto yaldakde binkwaming ati kubman. Bok, er weit siriktam taruk talebmananyi er deibdoba ara ilinto yaldakde binkwaming ati, kubman,” ebmou. 20Ura, a talak aryi, a mabwe bitinyi asi kisal dakmouci, ato ebmou, “Sun Israel nang aryi sun mabwe kum, yuk nang kum asi, kisal dangna dinyi karebkungnyi ura, sun si siboka, kisal dakwaming. Ara, ato ebkwaming, ‘Er Imtamnyi biryi Efraim ab Manasye ab asi kisal dangnamwe to kansi kisal dakwankir,’ eboka kisal dangna dinyi karebkwaming,” ebmou. Ura, Efraim bisi kisal nunukoka kisal dangna dinyi karebmou. Ba, Manasye bira aminda kisal dangna dinyi karebmou. 21Ura, Yakub biryi er mi Yusuf bisi ato ebmou, “Ni dibkwaman talak dam kubmar. Ati, kanda Er Imtamnyi biryi kansi milirankici ba, kuraminyi ani, nun mutuk aminda tamurbinkwandum. 22Ati, ukura niryi kansi tentok karebkwinkin dinyi ara mutuk si Sikhem asi ebkin. Ara, Amori mutuk dam asi niryi ninyi on ya aryi a mutuk kuramnyi nang oboka arabdanse. A mutuk ara kantikwe karebkin. Kan du yabwe ara ton kum karebkwaman,” ebmou.

Currently Selected:

Kejadian Uram 48: MTG

Highlight

Copy

Compare