Kejadian Uram 50

Yakub dibmou ura, Kanaan mutuk boboka tukwe dongobmai deyok

50:1-14

1Ura, Yakub er mabwe ati, sirya uram ebdeibmouci, maryibinmou uca, muruboka dibmou. Ura, er mi Yusuf biryi er nai dibmoua deici marbindoka, er nai tukwi asi u kunkunuboka engebmou. 2Ura, Yusuf biryi er nai dibmoua tukwi asi, “Luboka tong ebcei,” tenen ninyi dibmangnya tukwi luraming keica lubkwamai ati, ninyi kweten nang asi nabmou. Ura, Yakub dibmoua tukwi anda keica lubmai ura, kaluna aryi akuboka deibmai. 3Yakub dibmoua tukwi asi tong en dinyi ab, kat birin dinyi ab, luboka deiamnyi talak ara uki 40 baryi deiamnyi. Ani, Mesir mutuk ninyi aryi Yakub biti yandoka engeramnyi uki ara uki 70 baryi bita deiboka engeramnyi. 4Yakub diamwe tukwi bita deiboka buramnyi uki sirya bisibmou. 5Ura, Yusuf biryi Mesir sienyi biti uram deibmouci, sienyi wa irmilin nang ati, ato ebdeibmou. “Nai sienyi, kansi molobmakin. Ni nai sirya dibkoua dam talak aryi, nisi ato ebmanir, ‘Ni dibkuna dam kubmar. Ati, ni mi kanci, “Nai, kan tukwi ara boboka Kanaan dam bobikinyi ura, kandamnyi kiknibdeibdobumwe keil deyok asi deirirbinkwankin,” ebnurum,’ eboka molobmanirci, dibmar. Ati, ni nai tukwi boboka er Kanaan dam bindoka tukwe dongobnyi ura, tamuryankwan,” eboka molobmou. 6Ba, a uram sienyi dam bindoka ebmai ura, sienyi biryi Yusuf biti ato ebdeibmou, “Ur, ukubmarum. Kan nai biryi, ‘Ni dibnyi ura, ukubkwanurum,’ eankou. Ba, kanci kan nai bisi uram talak ebdeiboka, ‘Kan ebmarim to kunubkwankin,’ eamoumwe to kunuboka, kan nai tukwi asi tukwe dongorbinmarum,” ebmou. Ba, a uram boboka Yusuf bisi yandoka ebmai. 7-8Ura, Yusuf ab, er du weit yabwe nirya ab, Mesir sienyi wa irmilin nang ab, Mesir nang weik nang nirya ab, Yusuf ai ninyi ab nirya anabmai. Ura, Yakub diamwa tukwi boboka Kanaan dam tukwe dongorbinmai. Sun kuramnyi mutuk Gosyen dam takloboka binmai ara mabwe nermabwe toto, bisam yabwe kambing toto, domba toto, sapi toto ab weik mutuk bana kikiman kum nang ab akwe takloboka binmai. 9Yakub tukwi boboka banmai ara ninyi buna si kereta deici bukoka banmai ninyi yubwa ton, kuda deici bukoka banmai ninyi yubwa ton, ukuboka banmai ara ninyi tilib weik kubmou. 10Banmai ani, me Yordan kouboka otam mutuk si Goren-Haatad binmai. Ura, Yusuf biryi a mutuk bindoka er nai biti boukwe eiboka engebmou ba, sun nirya uki tabaryi a kunmaici, engebde kunmai. 11Ba, Kanaan ninyi aryi ato kuboka engenmai dikum ara, “Mesir ninyi weik engena engen dikum,” eboka si dobmai. A mutuk uram ara, “Abel-Mizraim,” eboka si dobmai. 12Ara, sun nai Yakub biryi minob er mabwe asi, “Ukubkwanindarur,” ebdeiamwe to kuboka kunubmai. 13Ura, sun nai Yakub tukwi bobinmai ani, Kanaan mutuk sirya binmai. Ura, mutuk si Mamre tam kuboka yaletam asi minob uca, sun abwe Abraham biryi tukwe dekamwe. A mutuk ara Het yalanyi si Efron bisi dekamuryi, sun tukwe kiamnyi aryi Yakub bira Makhpela keil imira dongobmai. 14Ura, Yusuf er nai tukwi ara sirya keil imira deibmouci, er du yabwe ai ninyi nirya ab, Mesir ninyi nirya ab tamuboka sun mutuk Mesir dam binmai.

Yusuf biryi er du yabwe asi kanya darabdeibmou deyok

50:15-21

15Sun nai Yakub sirya dibmou ura, Yusuf er du yabwe aryi ato ebmai, “Minob nunci Yusuf ersi me longna umbura dongoamoubwe ati, nunbabyi deksicei,” ebmai. 16Ura, ninyi ton Yusuf bisi bokdonokmaici uram ato ebdeibmai, “Nun nai Yakub bira dina kum kubmo cok nunsi ato ebdeibmo. ‘Sun weit Yusuf bisi ato ebkwandarur, “Yusuf kan du yabwe asi minob kansi ukuankei dinyi ati sunbabyi dekwan tenena mem. 17Eda, kan du yabwe asi libdobkwandum.” Ati, nun nai biryi Er Imtamnyi uram kekeboka Ersi si weik eramwe to akwe nunbabyi kununkwayeb,’” ebmai. Ato ebmai uram kekebmou ura, Yusuf isin dakeiboka engebmou. 18Ura, Er du yabwe Yusuf dam yandoka urasin luknubdongoboka ato ebmai, “Nunda kan damulub tam kuboka kan wa in nang kubmab,” ebmai. 19Uca, Yusuf biryi sunsi ato ebmou, “Sun ilil kuna mem. Nira, Er Imtamnyi bitonyi kununa kuma. 20Sunda yu wekmasou ba, nisi malyito kuanindau. Bok, Er Imtamnyi biryi yu dinyi asi namin kibdeiboka teleb dinyi karebmasir. Sunci nisi ato kuanindau deyok aryi, uku talak aryi ninyi ilinto teleb kubde binkwaming. 21Sunda, nun weit yu bobsouci, aminda erbabyi dekwansirca, tenena mem. Sun mambul kubkwansir dinyi nirya niryi yina karebkwansin,” eboka namin uram ebmou ba, er du yabwe kanya darabmou.

Yusuf dibmou uram deyok

50:22-26

22Yusuf Mesir mutuk dam Er yala nang ab kuramnyi. Yusuf kam kuramwe kwalina uki nungna ara 110 baryi kwaliamwe. 23Ba, Yusuf biryi er mi Efraim biryi deiamwe mabwe asing eiamwe. Ani, mabwe odei-odei baramnyi ani, diki winiryi yaldangna ababyi asing eiamwe. Tonda, Manasye mi Makhir mabwe ababyi asing eiamwe. 24Ura, Yusuf biryi er du weit yabwe asi ato ebmou, “Ni uki kum uca dibkwaman. Bok, Er Imtamnyi biryi sunsi dibliliboka kalikansiriryi, a mutuk dam aryi boboka Erci nukeibsou mutuk dam bobinkwansir. Ara, Er Imtamnyi biryi uram talak Abraham dam ab Ishak dam ab Yakub dam ab asi ebdeibwe mutuk dam bobinkwansir,” ebmou. 25Ura, Yusuf biryi Yakub yala nang asi, ato ebmou, “Sunci ni dam asi ato kubkwankib eboka uram talak ebdeibnindarur. Ni dianyi tukwe ara sun anaromunyi ura, a mutuk dam deirlonina mem, eda bobkwanindarur. Ba, Er Imtamnyi biryi dibliliboka kalingkwansir ati,” ebmou. 26Ura, Yusuf er kam kuna kwalina uki nungna 110 baryi kurbinmou ura, Mesir mutuk dam dibmou. Ba, tong teleb en me ab, minob luna kum me yung ab lubdeibmaici, ninyi tukwe dongon co sangkol umbura dongoboka Mesir mutuk deibmai.

Currently Selected:

Kejadian Uram 50: MTG

Highlight

Copy

Compare