Kejadian Uram 47

Yakub ab Firaun ab deyok

47:1-12

1Ura, Yusuf minob Mesir sienyi ai dam binmouci, ato ebmou, “Ni nai ab, ni du yabwe ab, sun bisam yabwe kambing toto, domba toto, sapi toto, sun bona-bona nirya Kanaan mutuk aryi boboka yanmangci, ukura mutuk si Gosyen dam o yandoka kunmang,” ebmou. 2Ura, Yusuf biryi er du yabwe ninyi amubaryi boyanmou aryi Mesir sienyi bisi, “Ni du yabwe ara a boyanman atiba,” eboka amubmou. 3Ba, Mesir sienyi biryi a nang asi ato eboka asibmou, “Sunda, una wa indarur do?” eboka asibmou. Uca, a nang aryi ato ebmai, “Nunda, minob talak aryi nun abwe yabwe ara bisam winin nang kuramnyi. A deyok aryi nunbabyi bisam winin nang akwe kunub,” ebmai. 4Ani, sienyi bisi ton ato ebmai, “Nai sienyi, nun kuramoubwe mutuk Kanaan dam ara kwaning utan li berekwe aryi, maning murmuta nun bisam yabwe kabdeibmanto dikum ton kum kubwe ati, nai nunda a mutuk dam tingdoryanamib. Ati, nai, kanci nunsi mutuk si Gosyen dam asi nunti ebsurum,” eboka molobmai. 5Ura, Firaun biryi Yusuf bisi ato ebmou, “Kan nai ab, kan du yabwe ab ara kansi sirya a mutuk dam yanmang. 6Mesir mutuk a nirya ara kanti wa karebkise ba, kanci talebumwe. Ati, kan nai ab, kan du yabwe ab asi mutuk ton da ebdum. Sunti ebkwandim mutuk ara sun kurona kikiman dikum ara Gosyen dam asi eterebdum. A mutuk asi sun bisam winibde kurona kikiman,” ebmou. Ani, ton ato ebmou, “Kan du yabwe kankan dam aryi ninyi ton wiboka, ni bisam yabwe wininkwaningnyi nang ton wa karebkwandum,” ebmou.

7Ato eboka sisikmai ura, Yusuf biryi er nai Yakub bibabyi Firaun dam boboka urasin amurbinmou. Sirya bobinmou ura, Yakub biryi Mesir sienyi bisi bindoka kisal dakmou. 8Ura, Firaun biryi Yakub bisi, “Kan kam kurum talak ara kwalina unabaryi kwalibyi da?” eboka asibmou. 9Uca, Yakub biryi ato ebmou, “Nai, nira a mutuk nirya yibinkirikoka, yuk-yuk mutuk kubde yibanun deici aryi kwalina yubwa 130 baryi kwalibyi. Ni yuk-yuk mutuk yibarkiringnunci, mambul dinyi kunurur dinyi ab, ni kam kunun kwalina bisibwe dinyi ab ara bumang to bok, ni nai yabwe yuk-yuk mutuk yibinkirikoka, kam kuramnyi uki ara cang weikto kuramnyi,” ebmou. 10Ato ebmou ura, Yakub biryi Firaun bisi kisal dakmou. Ura, Firaun dam aryi sakweteboka binmou. 11Ura, Yusuf biryi er nai ab er du yabwe ab asi bindoka, Firaun biryi nukmou to kuboka, “A mutuk dam asi sun mutuk kiboka kuronkwandum,” eboka eterebmou. A eterebmou mutuk dam ara iya mutuk teleb nun asi eterebmou. Ba, a mutuk ara Rameses atei dam mutuk si Gosyen dam asi sun mutuk kiboka kuramnyi. 12Ba, Yusuf biryi er nai mabsilib ab, er du yabwe mabsilib ab asi ninyi kuramnyi to nukdeboka yina bongdeiriramwe ba, yibde kuramnyi.

Kwaning utan li doamwe ba, kuramnyi deyok

47:13-26

13A talak ara Mesir mutuk babyi, Kanaan mutuk babyi nirya kwaning utan li berekamwe ba, ninyi nirya kwaning utan aryi dibmanto kuramnyi. 14Ba, Yusuf bira gandum du kwaning ersi dengyangaramnyi. Ba, a dekmangnyi uang ara buluboka Firaun dam boyangaramwe. 15Ba, Mesir ninyi ab, Kanaan ninyi ab nirya sun uang iya kum dandobmou ba, Yusuf bisi yandoka ato ebmai, “Nai, nun taksiminyei. Nun uang iya kum dasir ati, gandum du kwaning ur karebsurum! Nun kwaning utan aryi nirya dibsekub,” ebmai. 16Uca, Yusuf biryi ato ebmou, “Gandum du kwaning talyi bongdeirisina ara kum kubkwansin. Eda, sun bisam kamyoa boyarinyi bikwe gandum du kwaning dekwan,” ebmou. 17Ba, yuma kwalina ara a mutuk ninyi nirya aryi bisam sapi toto, kambing toto, domba toto, keledai toto boyandoka dekingnyi ura, kwaning dingdeiriramwe. 18Ani, kwalina bitinyi dinyi ara a mutuk ninyi yandoka Yusuf bisi ato ebmai, “Nunci kan keken dam lak ebkub. A kwalina ara nun bisam winiroramoubwe dinyi nirya ara kantikwe boyandoka, kwaning dekiribokib ba, nun bisam yabwe nirya kan dam akwe kubde. Ba, ukura nun nong ab nun mutuk ab demang asi kwaning dekoka yinkwayeb. 19Ati, nun ninyi asi ukuboka a takloansiminyi ba, dirsengna ara mem. Ani, nun mutuk ababyi a takloaminyi ba, mutuk yok dem buna ara mem. Eda, nun ninyi babyi, nun mutuk babyi asi gandum kwaning aryi dekdobsiminci, sienyi kan dinyi akwe kibdobdum. Ba, nun ninyi ara dina kum kubkwayeb. Ani, nun mutuk ababyi mutuk yok dem a burlona kum uca, gandum yala koubkwayeb. Ati, gandum yala ton karebsurum,” ebmai. 20Ura, kwaning utan mak ati, Mesir mutuk ninyi a kuramnyi tok sun mutuk yuk-yuk nirya ab, sun nong ab ara Yusuf biryi nirya dekmou. Ba, Mesir mutuk a bukamwe mutuk nirya sienyi mutuk akwe kibmou. 21Ani, Mesir mutuk a kuramnyi ninyi nirya Firaun er wa arukni ba, il don nang akwe kibsekmai. 22Bok, Mesir mutuk nang sun kwemdeina moloramnyi ai wa in nang ati, Firaun biryi sunti tukwe dengnamwe deyok aryi a nang tukwe ara dengna kum kubmai. 23Ura, Yusuf biryi Mesir ninyi asi ato ebmou, “Arub aryi sun nong babyi, sun mutuk yuk-yuk nirya babyi Firaun biti dekeibne. Ba, a dekman mutuk nirya asi gandum koubdobkwandum ati, gandum yala a karebsin. 24A gandum yala karebman ara kouamunyi ani, du moubci ba, kinmamunyi ura, meici kukoka olong amubaryi ara Firaun biti boyankwandarur. Ba, kablobmunyi dinyi ara ton meici kukoka yala deibdobkwandarur. Ani, tonda sun bisam yabwe yina kibkwandarur. Ani, sun ab, sun nerabwe mabwe ab yirona kibdobkwandarur,” ebmou. 25Ura, Mesir ninyi aryi ato ebmai, “Nun kwaning utan weik utasurur bok, lebdobsirim ati, nun nai teleb ebmakib. Nunda teleb aryi Firaun wa il arungna nang da kibkub,” ebmai. 26Mesir mutuk ninyi asi Yusuf biryi, “Gandum olong amubaryi wiboka sienyi bisi boyankwandarur,” ebmou dinyi ara iya kunubde bankwamnyi dinyi kibdeibmou. Uku talak ababyi Mesir ninyi tuba kunubde banung. Ucab, kwemdeina molon ai wa in nang tukwe ara Firaun er tukwe kimdona kum kibmou.

Yakub kam kubde baramwe ani, dibkwamou talak dam kubmou ba, sirya uram ebdeibmou deyok

47:27-31

27Yakub ab, er mabwe ab Mesir mutuk tingbindoka Gosyen dam kuramiryi a mutuk nang kiamnyi. A mutuk bindoka kuramiryi mi yaldakoka Mesir mutuk oblibmou. 28Ba, Yakub Mesir mutuk bindoka kwalibmou kwalina ara 17 baryi kwalibmou. Ba, minob kwalibde yangaramwe kwalina ab antaniboka ara 147 baryi kwaliamwe. 29Ani, Yakub wisi sirya danmouci, dibkwamou talak dam kubmou ura, er mi Yusuf bisi nabmouci, ersi ato ebmou, “Ni nai,” tenen kanyi deianiminyi ura, ni keil deici asi kan taruk deiriryarum. Ura, kanci uram talak ebdeibnurum ara ato, “Nai, kan dibminyi ura, Mesir mutuk a tukwe kum dongobkwankin, eda bobinmakinyi ani, kan mutuk kobdob bindoka tukwe dongobkwankin,” ebnurum. 30“Ati, dibnyi ura, bobinmaniminyi ani, ni nai yabwe minob tukwe dongoamnyi dikum akwe bindoka, tukwe dongobkwanurum. Ba, ni nai yabwe dongoamingnyi umbura akwe ni dongonina asi ni teleb kubmanir,” ebmou. Ura, Yusuf biryi ato ebmou, “Nai, kan ebmarim to kunubkwankin,” ebmou. 31Ura, er nai Yakub biryi ato eboka molobmou, “Nai, Iya dib aryi uram talak ebmakin, ebnurum,” ebmou. Ba, Yusuf kunuboka, “Nai iya dib ebman,” ebmou. Ba, er nai Yakub er man sokon deici asi kisok deibdongoboka kibdobmou.

Currently Selected:

Kejadian Uram 47: MTG

Highlight

Copy

Compare