Kejadian Uram 46

Yakub ab er mabsilib ab Mesir mutuk binmai deyok

46:1-34

1Yakub er bona talena nirya caboka bobmouci, anaboka banmou ani, mutuk si Bersyeba mutuk dam binmou. Ura, Bersyeba dam aryi er nai si Ishak si weik eboka moloramunyi Er Iya Erebdobnyi biti bisam oboka dama deibmou. 2Ura, a tum lukunda mabmou uca, kunumna deici aryi Er Iya Erebdobnyi biryi ato ebmou, “Yakub! Yakub!” ebmou. Uca, Yakub biryi, “Yo, Nai, ni a kunman,” ebmou. 3Ba, Er Iya Erebdobnyi biryi, “Nira Iya Erebdobnyi kan nai bibabyi si weik eranounyi biryi nabmakin. Kan Mesir mutuk ur birum. Biminyi ura, Mesir mutuk dam ara kan yaldangna asi weik kibdeibkinyi ba, yaldakoka odei-odei binkwaming ati, kan Mesir mutuk dam bana ara ilil kukina mem! 4Kan binkwandim mutuk Mesir dam ara Ni milibkwankin. Ani, Niryi kansi tubto tamuboka boyankwankin. Kan dibkwamaminci sirya asing bam ara Yusuf biryi tunibdongobkwankir,” ebmou. 5Ura, Yakub Bersyeba dam aryi kuboka anaboka binmou. Ba, Sienyi Firaun biryi, “Yakub borbindarur,” eboka kongkong ena bon nang asi arukmou ba, boryanmai keica deici asi Yakub bisam deici bukmou ba, bobinmai. 6Ani, Yakub er bona toto, er bisam yabwe toto Kanaan mutuk aryi doramnyi bona ab, Yakub er mabwe silib nirya ab banmai ani, Mesir mutuk sirya binmai. 7Ara, Yakub er mabwe ab er mabwe nerabwe ab, sun mabwe ab nermabwe ab er yaldangna nirya boboka Mesir binmou.

8Yakub mabwe Israel yala nang Mesir dam yanmai nang sun si ara: Yakub mi dounyi si Ruben deiamwe. 9Ba, Ruben biryi deibmou mabwe si ara Henokh ab, Palu ab, Hezron ab, Karmi ab deibmou. 10Ba, Simeon mabwe si ara: Yemuel ab, Yamin ab, Ohad ab, Yakhin ab, Zohar ab, Saul ab deiamwe. Anda mabwe sun kwin bira Kanaan ner aryi yaldakamwe. 11Ba, Lewi mabwe si ara: Gerson ab, Kehat ab, Merari ab deiamwe. 12Ba, Yehuda mabwe si ara: Er ab, Onan ab, Syela ab, Peres ab, Zerah ab deiamwe. Uca, Er ab Onan ab ara Kanaan dam aryi diandei. Ba, Peres mabwe ara Hezron ab, Hamul ab deiamwe. 13Ba, Isakhar mabwe ara: Tola ab, Pua ab, Ayub ab, Simron ab deiamwe. 14Ba, Zebulon mabwe ara: Sered ab, Elon ab, Yahleel ab deiamwe. 15Ara, Yakub ner Lea biryi mutuk si Padan-Aram aryi deiamwe mabwe. Ani, ner tentok si Dina deiamwe. Ukuboka Yakub biryi yaldakamwe mabwe nirya sal babyi, nerabwe babyi nungna ara 33 baryi deiamwe. 16Ba, Gad biryi deiamwe mabwe ara: Zifyon ab, Hagi ab, Syuni ab, Ezbon ab, Eri ab, Arodi ab, Areli ab deiamwe. 17Ba, Asyer mabwe ara Yimna ab, Yiswa ab, Yiswi ab, Beria ab deiamwe. Ba, ner tentok deiamwe ara Serah deiamwe. Ba, Beria biryi deibmou mabwe ara Heber ab, Malkiel ab deibmou. 18A yaldakmou mabwe ara Zilpa biryi yaldakmou mabwe. A ner Zilpa bira Yakub ner Lea er me ilingni ner kibkwamwe ati, Laban biryi me ilingner kibdeiamwe ner aryi Yakub dobmouci, mabwe 16 baryi yaldakmou. 19Ba, Yakub ner Rahel bira Yusuf ton Benyamin ton bitinyok deiamwe. 20Ba, Yusuf biryi Mesir mutuk yaldakmou mabwe ara: Yusuf Mesir mutuk ner si Asnat doboka mabwe bitinyi deiamwe. A mabwe bitinyi si ara Manasye ab, Efraim ab deiamwe. A mabwe sun kwin Yusuf ner Asnat bira Potifera nebnyi doamwe. A ner er nai Potifera bira On mutuk Mesir nang kwemdeina molon ai wa inanyi kuramwe. 21Ba, Benyamin mabwe si ara: Bela ab, Bekher ab, Asybel ab, Gera ab, Naaman ab, Ehi ab, Rosh ab, Mupim ab, Hupim ab, Ared ab deiamwe. 22A yaldakamwe mabwe ara Rahel biryi deiamwe mabwe nungna ara 14 baryi deiamwe. 23Ba, Dan biryi deiamwe mi si ara Husim deiamwe. 24Ba, Naftali mabwe si ara: Yahzeel ab, Guni ab, Yezer ab, Syilem ab deiamwe. 25Anda mabwe ara Bilha biryi yaldakamwe mabwe. A ner ara Laban biryi er nebnyi Rahel ai me ilingni ner kibdeiamwe uca, Yakub dobmouci, yaldakamwe ara tabaryi deibmou. 26Ninyi yubwa ilinto Yakub ab Mesir dam binmai. Bok, Yakub er nerabwe ab yuk nang ab ara nungna kum. Eda, Yakub er yaldangna demang nungna ara 66 baryi binmai. 27Ba, Yakub mi Yusuf Mesir kuramunyi biryi mabwe bitinyi deiamwe mabwe ab nungna ara 70 baryi Mesir mutuk yuma binamnyi.

28Ura, Yakub biryi er mi Yehuda bisi, “Ni mi Yusuf minob inirbirum ba, ni er nai ab Gosyen dam ebdankwanim,” eboka bokeibmou. 29Ba, Yehuda sirya bindoka ebmou ba, Yusuf ola er kongkong eryiban keica doboka bisam kuda deici biribdongobmou ura, bukoka Gosyen dam er nai Yakub bisi yanmou. Yanmou ura, er nai bisi iribdobmouci, takonya kwaliboka uki weik engebdanmarei. 30Ura, er nai Yakub biryi er mi Yusuf bisi ato ebmou, “Dibumwe tenebkise uca, Ni mi kam tuba kurum asi sirya asing eibkin ati, ur da dibnyi ababyi teleb,” ebmou. 31Ura, Yusuf biryi er du weit yabwe ab er nai mabsilib asi ato ebmou, “Ni minob menekoka sienyi bisi, ‘Ni nai ab ni weit yabwe ni du yabwe ab Kanaan mutuk kuramungwe ani, ni dam sirya yanmang,’ erbinkwaman. 32Ani, ton ato ebkwaman, ‘Ni du yabwe ni weit yabwe ab nun nai er mabsilib ab ara sunda bisam kambing toto, domba toto, sapi toto winin nang kunung deyok aryi sun bisam yabwe ab sun bona talena nirya bobde yanmang,’ ebkwaman. 33Ato ebnyi uca, sienyi biryi sunsi nabsiriryi, ‘Sunda una wa indarur do?’ eboka asibsici ura, ato ebkwandarur! 34‘Nunda, nun nai yabwe aryi bisam winin nang kuramnyi to akwe nunbabyi bisam winin nang kunub,’ ebkwandarur. Ato ebmunyi ba, sienyi biryi sunsi mutuk Gosyen dam asi eterebsici ba, kubdobkwandum ati, ebman,” ebmou. Yusuf biryi er du yabwe asi minob ato ebmou ara Mesir nang ara bisam kalingna nang ab tonkwa kuna ara sun li kuramwe deyok ati ato ebdeibmou.

Currently Selected:

Kejadian Uram 46: MTG

Highlight

Copy

Compare