Kejadian Uram 45

Yusuf biryi er du yabwe dam asi, “Nira Yusuf,” eboka lak ebdanmou deyok

45:1-28

1Ura, Yusuf er du yabwe asi inina dongdamwe ani, er kanya darabdobman kum kubde bau ura, sun a wekmai nang asi ato ebmou. “A wekmarum nang nirya bindarur!” eboka yakwetebmou. Ba, a wekmai nang nirya Yusuf ab tonkwa a kuna kum uca nirya sakweteboka bindobmai. Ura, Yusuf biryi, “Nira Yusuf,” eboka er du yabwe dam asi lak ebdanmou. 2Ura, Yusuf kisok taleboka engeramwe ba, Mesir mutuk nang ab, sienyi ai dam kunmai nang ab ababyi kekebmai. 3Ura, Yusuf biryi er du yabwe asi ato ebmou, “Ni kwit yabwe, nira Yusuf. Ni nai bira tuba kam kurur do?” eboka asibmou. Uca, er du yabwe kekebmaici, er urasin dam ara sun ilil aryi sirim talebdanmou aryi uram ena kum kubmai. 4Uca, Yusuf biryi er du yabwe asi ato ebmou, “Ni damtoto a yandarur,” ebmou. Ba, er dam binmai ura, tubto ato ebmou, “Nira sun weit, Yusuf bitiba, sunci Mesir nang asi dekanindaunyi bitiba,” ebmou. 5Ura, ton ato ebmou, “Sunci Mesir nang ati, dekanindau bok, sun kanyatam, ‘Nai e, nun talya kuamoubwe,’ tenen sun kanya ilil kusina mem. Sunci ato kuboka Mesir nang asi dekanindau ara Er Imtamnyi biryi, ‘Ninyi kam kubkwaming,’ teneamwe to kuboka dekanindau. Ba, ni minob a mutuk yase deici aryi ninyi kam kubkwaming. 6A mutuk dam kwaning utan li dobwe ara kwalina bitinyi kubmar. Ani, kwalina amubaryi kubkwande ara wa iboka kina kum kubkwaming. 7A deyok aryi Er Iya Erebdobnyi biryi nisi, ‘Kanda minob Mesir mutuk minob bindoka kurandum. Ba, kan Mesir mutuk a binaminyi deyok aryi kan yala nang kum danana kum uca, kam kubingiryi, dukmuruboka odei-odei binkwaming,’ tenen bokdonokmou. Ba, ni minob Mesir mutuk yandoka kunun ara sun lebkwansou ati yase. 8Ati, sun kanya tenen dinyi aryi ni Mesir nang ati kum dekanindau. Eda, Er Iya Erebdobnyi biryi teneamwe to kuanindau. Ba, nira a mutuk weik sienyi Firaun bisi, ‘Ato kubdum-ato kubdum,’ enanyi kiboka, sienyi ai dam sienyi kibsiryi Mesir mutuk nirya talebse. 9Ati, ukura tamuboka nun nai bisi bimunyi ura, ato ebkwandarur. ‘Kan mi Yusuf biryi kanti ato ebdeibmakir. Er Iya Erebdobnyi biryi Mesir mutuk nirya sienyi kibdeibnou. Ati, nai kanda ur ni dam minola yarum! 10Yaminyi ura, ni kuranya dam mutuk si Gosyen yandoka kubkwandim. Kan ab, kan mabwe ab, sun nerabwe mabwe ab, sun bisam yabwe kambing toto ab, domba toto ab, lembu toto ab, sapi toto ab, sun bona nirya bobdobmunci, ur yandarur! 11A yandoka kubkwandim dikum ara niryi kansi kalikwankin. Ara, kwaning utan li ara kwalina amubaryi tuba kubwe ati ebman. A mutuk yandobminyi ura, kan utotoa bulung kuna kum kubkwandim. Ara, kanbabyi, kan mabsilib nirya babyi yina bulung buna kum kubkwandum,’ ebkwandarur,” ebmou. 12Ani, Yusuf biryi er kwit yabwe asi ato ebmou, “Ni kwit yabwe, sun asing aryi ni Yusuf eibmanurum. Ani, ni weit kobdoba Benyamin bibabyi kan asing eibmanirim. Ati, ni uram sunsi a enmasin ara Yusuf si bambul aryi ebmasin. 13Sunda nun nai dam bimunyi ura, sun asing eibmarum to kuboka, ni Mesir mutuk nirya niryoka akwe kiboka talebse dinyi asi nukdarur! Nukmunyi ura, nun nai minola iniboka boyandarur!” ebmou. 14Ura, er weit kobdoba Benyamin bisi iribdobmouci, Yusuf babyi, Benyamin babyi ngang bin takonya-bin takonya labdandoka engebmarei. 15Ura, Yusuf engenmou deici aryi, er du yabwe nirya iriboka, u kunkunuboka, malyi kina kibdoro yibinmou. Sirya er du yabwe ab, er weit yabwe ab kibdandobmai ura, bukoka uram tonkwa sisikmai.

16Ura, Yusuf er du yabwe yanmang en uram sirya weik sienyi ab, sienyi wa in nang ab sirya kekebmai. Ura, sun kanya teleb kubmou. 17Ura, Mesir weik sienyi Firaun biryi Yusuf bisi ato ebmou, “Kan du yabwe ara sun boyanmang bisam deici asi, gandum aling ilinto deiboka Kanaan mutuk bobde binkwanung. 18Binmangnyi ani, sun nai inibdobingnyi ura, ur Mesir mutuk ni dam yandobnung. Ba, niryi sunsi mutuk sul teleb nun eterebnyi ba, yandoka kubingiryi, wa ibde yironkwaming. 19Ani, Yusuf kanci, kan du yabwe ab, kan weit yabwe ab asi ato kuboka arukdum, ‘Mesir mutuk dam anda deirinun bona si kongkong eboka yiban keica, bobmunyi ura, sun nerabwe mabwe ab boyandarur. Ani, ni nai bibabyi boyandarur,’ eboka arukdum. 20Ati, sun bona Kanaan mutuk anda takloboka yamunyi ati, sun kanyi sungsina mem. Mesir mutuk a kurur bona nirya ara sun dinyi kibkwande,” Mesir sienyi Firaun biryi ato ebmou.

21Ura, Yakub mabwe ara Mesir sienyi ebmou to kunubmai. Ura, Yusuf biryi sienyi ebmou to kunuboka, yan serek kongkong eboka boban keica, dobkwetebmou. Ani, bisik dam yibde bana ababyi kiknibdeibmou. 22Ura, Yusuf biryi er du yabwe asi ukuryok ongon aling tentok-tentok karebnin yibinmou. Ba, er weit kobdoba Benyamin bira keil uang perak aryi kiknin dinyi asi 300 karebmou. Ba, er ongon aling ara amubaryi karebmou. 23Ura, Yusuf biryi er nai Yakub biti, bisam keledai yim akwe takubaryi deibmouci, Mesir mutuk kuramwe keica teleb-teleb dinyi nirya kiboka a bisam keledai yabwe deici deibmou. Ani, tonda bisam keledai ner akwe takubaryi deibmouci, gandum aling ab, roti ab, er nai Mesir yanganaryi yibnin yankwamwe yina toto a bisam yabwe deici deibmou. 24Ura, er du yabwe ab, er weit ab asi, “Ur bindarur!” eboka bokdonokmou. Ura, ato ebmou, “Bisik dam obdanin bana ara mem! Eda, ur bindobkwandarur,” ebmou.

25Ukuboka banmai ani, Kanaan dam sun nai Yakub bisi yanmai. 26Ura, sun nai bisi ato eboka nukmai. “Yusuf bira kam tuba kurur. Yusuf kam kururci, Mesir mutuk nirya ercok talebwe,” ebmai. Uca, Yakub kanya ara ikib kubmouci, “Dib ebmang,” tenen kanyi darana kum kubmou. 27Uca, Yusuf biryi ebdeibmou uram nukmaici, er nai biti bona toto, yina toto, er bobinkwamnyi keica yan serek kongkong eboka boraming keica toto, erti deibmou asi karebmai. Ura, sun nai Yakub er kanyi darabmouci, er karyi weik kubmou. 28Ura, sun nai Yakub biryi ato ebmou, “Ah uci, ni mi kam tuba kunurur aryok ni kanya teleb kubmanir. Ati, ni dina kum kuabnyi talak aryok ni mi Yusuf asing eibniryok dibkwan,” ebmou.

Currently Selected:

Kejadian Uram 45: MTG

Highlight

Copy

Compare