Kejadian Uram 44

Yusuf me yiramwe meyok wanikamnyi ani, dobmai deyok

44:1-17

1Sunci Yusuf ab tonkwa sirya yibmai ura, Yusuf biryi er ai wa in nang sienyi bisi ato ebmou, “A yanmang nang sun aling yuk-yuk asi gandum sun bobdobkwamangnyi to kuboka kibdeibnin yibirum! Ura, sun mining uang ara neik bisik sun aling umbura bublan dam kibdongobnin yibinkwandum. 2Ani, ni me yiran meyok perak aryi kiknibyi dinyi asi doboka sun weit kelenyi aling bok asi kibdongobkwandum! Ani, gandum dekmou uang ab erbabyi neik bisik kibdongobkwandum,” ebmou. Ura, er ai wa in sienyi biryi Yusuf ebmou to kunubmou. 3Ura, mabmai ani, belekuna kobdob ara a nang sun keledai bukoka Yusuf er du weit yabwe ab bokdanmai. 4Mesir mutuk weik atei aryi anaboka eratoto mutuk luluna kum kuabyi bok, Yusuf biryi er ai wa in nang sienyi bisi ato ebmou, “Ola anaboka a banmang nang asi dombirum! Dombinmaminyi ani, sun dam biminyi ura, ato ebkwandum. ‘Nunda kanya teleb asa aryi sunsi du dongobdobmasib bok, sunda unatoa ati, yu kanya bobmarum do? 5Ara, aminda mabde binkwayeb tam ara ukubkwande eboka lak kimdur meyok ukula doboka yanmarum. Sunci ato kuboka ukula doboka yanmarum to ara iya malyito kuboka yanmarum,’ ebkwandum,” ebmou.

6Ura, Yusuf er wa in sienyi anaboka domyanmou ani, sun dam yandoka Yusuf er ebdeibmou to ebmou. 7Ba, a nang aryi anyi bisi ato ebmai, “Nai, unato ati ato uram yandoka ebsirim do? Iya dib sirik aryi ato dinyi ara nun ton kum kubmab asi eansirim! 8Nun gandum kin bisik alib asi uang neik bisik kibdongobmasurum dinyi ara a kibmab ati tamubkarebkwayeb. Nunci sienyi bona emas kum, perak kum, asi er ai umbura aryi nunci, ukula kum dobtibyi. 9Nai, ato ebmarim ura, sangkuna nun kankan dam aryi nun aling yuk-yuk yokoka ingkiringmaminyi uca, a keica kibmarinyi bira teleb aryi anyi obdum. Ba, nun yuk nang ara kan wa arungna nang kibsurum,” ebmai. 10Ura, a sienyi biryi sunsi ato ebmou, “Sunci ato kubsurum ebmarum to ara teleb. Bok, a ingkiringyanman meyok asi unanyi aling umbura kubmaci asi eibmaninyi er demang bobinkwaman. Yuk nang ara sun atei bindobkwamarum,” ebmou. 11Ura, sun gandum kiboka bobanmai aling yuk-yuk nirya dobkwetebmai ura, a nirya yokoka ingkirikdenmai. 12Ura, Yusuf ai wa in nang sienyi biryi anda nang aling yuk-yuk nirya liliboka ingkirikmou. Yuma ara dunyi aling aryi yokoka ingkirikde binmou ani, kelenyi aling bindoka yongnamwe uca, kelenyi Benyamin aling asi a meyok a mabmou asi eibdongobmou. 13Ura, a nang nirya sun kanya, see tenen kanya bobmaici, sun ongon aling nirya kwilikiribokmai. Ura, sun a nang nirya sun bisam keledai deici bukokabiryi, tamuboka Mesir mutuk weik atei yanmai.

14Sirya Mesir mutuk weik atei yanmai ura, Yusuf ai wengbindoka diramnyi uca, Yusuf a bukmou ura, er dam asi kisok tukwe dumuboka kibmai. 15Ura, Yusuf biryi a nang asi ato ebmou, “Sunda dara una kubmarumci, binmarum da? Ni kunun atonyi bira yukto da kubmamunyi dinyi ababyi ni mirei deici aryi minob bikwansun. Ni kun ato nang ara, ‘Nun biksicei,’ kum tenebmandau do?” ebmou. 16Ba, Yehuda biryi Yusuf bisi ato ebmou, “Nai, nunci una ebtibyi do? Kan wa in nang kan meyok nun aling umbura sirya dobmang. ‘Nunci kum dobmab,’ eboka limdarona kum kubkwamab. Nun minob ura malyito kubmoubwe dinyi ara Er Imtamnyi sirya eibmasirci, bikmasir. Ati, ukura kan meyok nun weit aling umbura mabmounyi bikwe ikin dinyi karena kum kubkwamarim. Eda, nun a yanmab tok nirya kanci, da weneboka ikin wa karebsurum,” ebmou. 17Uca, Yusuf biryi ato ebmou, “A ebmarum to ara ni kum kunubkwamasin. Eda, ni meyok er aling umbura kubmonyi bikwe ikin karebkwan. Ati, yuk nang ara sun atei ur tamuboka, sun nai bisi bindobdarur,” ebmou.

Yehuda biryi Benyamin bisi lebdobmou deyok

44:18-34

18Ura, Yehuda biryi Yusuf dam kobdob tingbinmou ura, ato ebmou, “Nai, ni molobmakin. Nisi kerebninyei. Ni kan ab, ‘Uram ton sisiktinimyi,’ tenebman ati, uki ton lobdeibnurum. Kanda a mutuk weik sienyi kibninto kubumwe ati, ni molobmakin,” ebmou. 19“Nai, kanci nunsi ato eboka asibmasumwe. ‘Sun nai ab, sun du weit yabwe ton atei takoka yanmarum do?’ eboka asibmasumwe. 20Ba, nunci kansi ato ebmoubwe, ‘Nun nai wisinyi ab, nun weit kelenyi ab asi atei takloboka yanmab,’ ebmoubwe. ‘Kelenyi bira nun nai er wis deib aryi deibwe,’ ebmoubwe. Ba, kelenyi er du bira dibwe. Dibunyi ab, er ab ara sun kwin tentok aryi deiamwe. Akiryi nun nai bira kelenyi bisi er mi kanyi deibwe mi kurur. 21Ani, nai kanci, ‘A mi kelenyi bira ni dam boyamunyi ba, ni asing eibkwan,’ ebmoumwe. 22Bok, nunci kansi ato ebmoubwe, ‘A mi ara er nai takloboka yibana kum kurande. Takloboka yibici ura, er nai, “Dibcei,” tenen er ab akwe kuranding,’ ebmoubwe. 23Uca, nai kanci nunsi ato ebmasoumwe, ‘Sun weit kelenyi bisi iniboka yangana kum kubmunyi ura, ni urasin eirina kum kubkwanurum,’ ebmoumwe. 24Ba, nun a yanmoubwe ani, tamurbinmoubwe ura, nun nai dam asi bindoka a kan ebmoumwe to ebmoubwe. 25Ura, nun nai biryi ato ebwe, ‘Minob binmandau mutuk akwe tubto yina dengdorbisindarur,’ ebmar. 26Uca, nunci nun nai bisi ato ebmoubwe, ‘Nun weit kelenyi ab bana kum kubkwamabyi ura, nun yina dengbana kum kubkwamab. Kelenyi kum anabmaci ura, a sienyi nun asing eirina kum kubkwamab. Eda, kelenyi anabte ba, tonkwa binkwamatibyi,’ ebmoubwe. 27Uca, nun nai biryi nunsi ato ebmasou, ‘Ni ner, a mi er kwin bira mabwe bitinyok deibkareanou. 28Bok, dunyi bira ni ab tuba kuna kum kururci, bai kam da o yibwe aryi er urasin aminda kum eibkwan. 29Ati, a mi ababyi iniboka tonkwa banmamunyi ura, sangkuna da obci asi ni obsinibkwamanurum. A mi dibci kum, obci kum ura, er boukwe ati kuraniryi ni dibnyei,’ ebmou. 30Ati, nai a mi asi tonkwa teleb asa akwe yanmanimnyi ani, nun nai dam bana kumci, a takloboka binmabyi ura, nun nai dibkwamar. Nun nai bira er yuk kubman kum kurur. Eda, a mi ab tonkwa kuna asi er kiknirur. 31Ati, a mi kelenyi bisi tonkwa bana kum kubmabyi ura, nun nai bira er boukwe ati kunmaci ura, dib dibkwamar. 32Ani, niryi a mi deyok ati, ni nai bisi uram talak eboka yanman. ‘A mi tonkwa binmanimnyi uca, sangkuna da obkwamar kum, dibkwamar kum, ara niryi nai kansi malyi dinyi iya kibdongobkwankin,’ eboka yanman. 33Ati, a mi asi malyi kun nang dongoboka talen ai dongobmanto dinyi ara nisi unubkwan. Ba, a mi ara er du yabwe ab ur bindobkwaming. 34Ara, a mi kelenyi ab ni ab tonkwa nun nai dam bana kum kubnimnyi ba, ni dinmanyi bok, ni nai dina ni li ati ebman,” ebmou.

Currently Selected:

Kejadian Uram 44: MTG

Highlight

Copy

Compare