Kejadian Uram 43

Yusuf er du yabwe liki bitinyi dinyi Mesir mutuk dam binmai deyok

43:1-34

1Ura, Kanaan mutuk dam ara kwaning utan li weikto berekamwe. 2Akiryi sun gandum Mesir mutuk dekoka binamnyi dinyi ara sirya yibsekmai. Ura, sun nai Yakub biryi ato ebmou, “A mabwe, tubto Mesir dam yina ton dengdorbisindarur!” ebmou. 3Ura, Yehuda biryi ato ebmou, “Nai, nun gandum bindoka dekmoubwe sienyi bira ato ebmasou. ‘Sun weit kelenyi bisi tonkwa yangana kum kubmamunyi ura, ni urasin eirina kum kubkwanurum!’ ebsou. 4Ati, yina dengdorbinkwamasibyi ura, kan mi Benyamin bisi, ‘Ur bindarur,’ eboka mundu lobsurum. Ba, yina kanti ton dekoka bobkwamakib. 5Bok, kan mi Benyamin bisi, ‘Ur tonkwa bindarur,’ ena kum kubmaminyi ura, nun kum binkwamab. A sienyi bira ato ebwe, ‘A mi tonkwa yangana kum kubmamunyi ura, ni urasin eirina kum kubkwanurum,’ ebsou ati ebman,” ebmou. 6Ura, Israel biryi ato ebmou, “Anyi bisi, ‘Nun weit ton a kurur,’ enmandau ara talyi enmandau se! Ni kanyi u yirsiniranurum!” ebmou. 7Uca, er mabwe aryi ato ebmai, “Nai, anyi bira nun yuk-yuk deyok babyi, nun nirya deyok babyi, liliboka asim-asim erongmasou deyok aryi lak ebmoubwe. Ani, ato eboka asibmasou, ‘Sun nai bira kam tuba kurur do?’ eboka asibmasou. Ani, ‘Sun weit ton atei takloyanmarum do?’ eboka asibmasou. Ba, nunci ton inina dongna kum uca, nun kunub to nirya lak ebmoubwe. ‘Sun weit boyandarur!’ ebkwamou dinyi bikmoubwa kum, eda nun mangkau aryi liliboka lak enmoubwe,” ebmou. 8Ura, Yehuda biryi er nai Israel bisi ato ebmou, “Malyi nai, ur mundu lobsurum! A mi ara ni ab tonkwa binkwamanim. Nunbabyi kanbabyi, nun nerabwe mabwe babyi kwaning utan aryi dibsekibyei. Ati, a mi ur anabci ba, ni kalikwaman ati binkwayeb. 9A mi binanimnyi uca, da yukto kubci ba, a mi kan dam boyangana kum kubnyi ura, a mi deyok ati, nisi ikin karebkwanirim. Ani, a mi deyok ati, niryi malyi dinyi bobdoanyi tok iya kubkwanir. 10Uki weik nenerdanmab ara ukura binmatibyi ani, yanmatibiryok tubto binmatibyi ani, yanmanto uki kibde banmar,” ebmou. 11Ura, sun nai Israel biryi ato ebmou, “Ato ebmarim ura, ato kubdarur: A mutuk Kanaan dam kurur keica asi teleb-teleb keica akwe wiboka anyi biti gandum kin aling umbura kiboka bobmamunyi aryi sun dama bindoka karebkwandarur. A bobkwamamunyi dinyi ara balsam toto mitikanun ton, tong teleb erande co si damar tuktuka toto mitikanun ton, kwiryi me mitikanun ton, co si kemiri du mitikanun ton, co si badam du ton bobkwandarur. 12Ani, uang sun gandum kin aling neik bisik kibdongobmasei dinyi ab, a dinyi koubni ato akwe ton kalikloboka bobkwandarur. Sangkuna sun Mesir nang aibdandoka kibdongoansununga ati ebman. 13Ani, sun weit Benyamin bibabyi ur anyi bisi bobindarur. 14Er Imtamnyi Iya Mikibnyi biryi anyi kanya teleb karebmaci ba, sunsi boukwe kiboka Simeon ab asi malyi kun nang wenen ai dongobmaci ababyi lobdeibci ba, er ab, Benyamin ab, sun nirya teleb aryi tamuryankwandum. Ni mabwe akwe wanikde baranyi ba, ‘Se,’ tenen kanya akwe da boranyi ababyi teleb,” ebmou.

15Ura, Israel mabwe ara anda bona ebmou to kunuboka bobmaici, sun weit Benyamin bibabyi iniboka bobmai. Ura, anabmaici, Mesir mutuk binmai. Sirya Mesir dam binmai ura, Yusuf dam bindoka wekmai. 16Ba, Yusuf diramwe uca, er weit Benyamin bira er du yabwe kankan a bindoka tikmou asi asing eibmou. Ura, er ai wa in nang sienyi bisi ato ebmou, “A yandoka wekmang nang asi boboka ai dongobdum. Ura, domba bisam ton ngang sekoka obminci, yuboka kiknirongkundum! Ba, a yanmang nang ab, ni ab a kiting dukduk en yina yibkwamab,” ebmou. 17Ura, Yusuf er ai wa in nang sienyi biryi er ebmou to kunuboka kiknibdeibmou. Ura, a nang asi naboka Yusuf ai umbura bodongobmou. 18Ba, anda nang ara a mutuk weiknyi Yusuf ai wengbana sun ilil mitik kum kubmou. Ura, ato tenebmai, “Yina yuma dengdoryanmoubwe tum aryi, uang neik bisik kibdongobmasei deyok ati, ikin wa kareboka, nun boboka yanmab bisam keledai toto dobdobkwamasir ati nabmasir,” tenebmai. 19Ura, Yusuf ai wa in nang sienyi bisi nabmai ba, bisik bublan dam yanmou ura, ato ebmai, 20“Nai, nun minob tum yanmoubwe ara yina dengdoryanmoubwe. 21Yina dekdoboubwe ura, baronmoubwe ani, bisik noutam bindoka mabmoubwe ai bindoka, nun aling yokoka diramoubwe uca, nun dekmoubwe uang nikibmaning nun aling yuk-yuk a mabnin yibinmou asi eiboubwe. Ati, arub ara a uang tamurkareryanmab. 22Ani, yuk uang ababyi yina dekdobkwamab ati, bobde yanmab. A dekmoubwe bok, nun uang neik bisik kibdongobmasei ara anyi biryi kibdongobsou ara nun kum bikoubwe,” ebmai. 23Uca, Yusuf ai wa in nang sienyi biryi ato ebmou, “Sun ilil kuboka, kanya mambul dongobsicob. Sun ab, sun nai ab molondarurnyi biryi Er bona inibdob dinyi asi sun aling kibdongobmasou ati, sun ilil kubsicei,” ebmou. Ura, Simeon malyi kun nang wenen ai dongoamya lobdeibmai ura, a nang dam boyanmai.

24Ura, Yusuf ai wa in nang sienyi biryi a nang asi iniboka Yusuf ai bodongobmou. Ura, sun yan me ilingdona me kiknibdeibmou ba, sun yan me ilikdobmai. Ani, sun bobinmai bisam keledai ababyi yina karebmai. 25Ura, a nang aryi Yusuf kitingtam talak yaci ba, karebkwamai dinyi ati, sun atei aryi bobdanmai keica kiknirdeinmai. Ara, kekerabyi uca, “Yusuf ab tonkwa yina yibkwamarum,” en uram kekebmai deyok aryi ato kubmai. 26Ba, Yusuf sirya yanmou ura, a nang aryi sun mutuk kuramwe keica sun dama boboka Yusuf biti ai bowengbinmai. Ura, sun kisok tukwetam dumubdongoboka Yusuf bisi kibdobmai. 27Ukubmai ura, Yusuf biryi sun yanmai deyok ati ato eboka asibmou. “Sunda teleb akwe do? Ani, sun nai ebmandaunyi bira kam tuba kurur do? Ura, er teleb akwe kurande do?” eboka asibmou. 28Ba, ato ebmai, “Nun nai, kansi, ‘Weiknyi,’ eboka kibdobmakiranyi bira er teleb akwe kurur,” ebmai. Ura, sun kisok tukwe dumubdongoboka kibmai. 29Ura, Yusuf biryi diramwe uca, er weit kobdoba Benyamin sun kankan dam a yandoka tikmou asi asing eibmou. Ura, ato ebmou, “ ‘Nun weit kelenyi atei takloboka yanmab,’ ebmandaunyi bira a yanmar dari?” eboka asibmou. Ani, ton ato ebmou, “Ni weit, Er Iya Erebdobnyi biryi kansi boukwe kimna dinyi karebkwamakir,” ebmou. 30Ura, Yusuf er weit kobdob urasin eibmou deyok aryi er kanya dikdobmou. Ba, iniboka engebkwamou dikum ingkiringmou. Ani, er man ai wengbindoka engebmou. 31Sirya engebkabokmou ura, me urasin ilikabokmouci, anaboka yanmou. Yusuf er kanyatam ara engena talebman kumto kunmou bok, erci koukwe darabdandoka ato ebmou, “A nang asi yina karebmunyi ba, yironung,” ebmou. 32Ura, Yusuf ai wa in ninyi aryi yina bokoka, Yusuf olong yuk, a nang olong yuk, Mesir nang akai wa in nang yuk kiboka bokmai. Ato kuboka bokmai ara Mesir nang ara Ibrani nang ab yina tonkwa yina kum kuramnyi deyok ati ukuboka olong yuk-yuk bokmai. Sun Mesir nang ara Ibrani nang ab yina tonkwa yina ara sun duknasito dinyi kiboka ukuramnyi to aryi ukubmai. 33Yusuf er du yabwe ara Yusuf er bukoka yinmouci, urasin deibmou tam asi bukoka lelebmai ara dunyi biryi kuboka, kelenyi sirya bukmou. 34Ba, Yusuf wa irmilin nang aryi yina bongmai ara Yusuf biti deibmai co lamna deici aryi doboka er du yabwe ati ton doboka bokeibnin yibinmai. Uca, Benyamin kelenyi bira liki amubaryi lukeibmai. Ura, ato ukuboka Yusuf ab tonkwa me yibde kimaici karyi asa wengmai.

Currently Selected:

Kejadian Uram 43: MTG

Highlight

Copy

Compare