Kejadian Uram 42

Yusuf er du yabwe ab er weit yabwe ab Mesir dam binmai deyok

42:1-38

1Yakub kekeramwe uca, “Mesir mutuk ara roti kiknin keica gandum ilinto kurur,” ena kekebmou. Ura, er mabwe asi ato ebmou, “Sunda yina doboka yibmanto wa ton irosina kum uca talyi ur kundarur ara unatoa ati do? ‘Yina una kuboka yibde kunkwayeb,’ teneboka ingkiringdosina kum kundarur aryok se?” ebmou. 2Ani, ton ato ebmou, “Ni kekebman ara, ‘Mesir mutuk dam ara gandum du ilinto yinung,’ ebmang asi kekebman. Ati, nun kwaning utan aryi dibibyei ati, Mesir mutuk dengdorbisindarur!” eboka arukmou. 3Ura, Yakub mabwe Yusuf er du yabwe takubaryi nang anaboka Mesir mutuk yina dengdorbinmai. 4Bok, Yakub biryi er mi Benyamin bira, “Er du yabwe milibci asi da wanikoka yangnyei,” tenebmouci, “Benyamin bira tonkwa kum binkwandum,” eboka uram sekmou 5Ura, Yakub mabwe ara Kanaan mutuk kwaning utan ilinto kuramwe deyok aryi, Mesir mutuk gandum du dengdorbinmai. A dengbanmai kankan ara yuk nang ababyi neika Mesir mutuk yina dengdorbinmai.

6Mesir mutuk dam a talak ara Yusuf biryi gandum buluboka miningdamuryi, dengnamwe. Ba, anda mutuk ninyi nirya dengyangaramnyi. Akiryi Yusuf er du yabwe Mesir dam yanmai ura, sun weit Yusuf bisi kisok tukwe dumubdongoboka kibdobmai. 7Ba, Yusuf biryi er du yabwe kobdob asing eibmou cok, yuk nang kuna likibna bukam kibokmou. Ura, Yusuf biryi, “Sun una ebkwaming do?” tenen ato eboka erekdobmou. “Sun dan mutuk aryi yanmarum da!” eboka erekdobmou. Uca, sunci ato ebmai, “Nunda Kanaan mutuk aryi yina ati dengdoryanmab,” ebmai. 8Yusuf bira er du yabwe kobdoba eibmou bok, er du yabwe ara erda sun kum bikmai. 9Ura, Yusuf bira sun ukubkwamnyi to er lengdera minob maamwe dinyi asi kanya teneibmou. Ura, Yusuf biryi sunsi ato ebmou, “Sunda ninyi kalingna ati dirmeimyanandum tenebmasin,” ebmou. 10Uca, sunci ato ebmai, “Nai, nunda ninyi ati dirmeimyanmaba kuma. Eda, nun yina ati, dengdoryanmab. 11Nun a yanmab nang nirya ara nun nai tentoknyi biryi deibsou. Nunda tola en nang kuma, nun ninyi ati kum dirmeimyanmab,” ebmai. 12Uca, Yusuf biryi ato ebmou, “Tola ati enmarum! A mutuk ninyi kalingna ati, meimyanmarum cok, enmarum!” ebmou. 13Uca, sunci ato ebmai, “Nai, nun a yanmab nang ara neik weit yabwe silib yanmab. Nunda tentoknyi biryi amolbaryi deibsou ba, Kanaan dam kunub. Nun weit kelenyi bira er nun nai ab atei kunmaring. Ba, nun weit tentok da wanikoubwe ara nun kum bingnub,” ebmai. 14Ura, Yusuf biryi sunsi ato ebmou, “Yo, sunda, ‘Ninyi dirmeimyangan nang yanmarum,’ eibmasin,” ebmou. 15Ura, ton ato ebmou, “A yanmarum dinyi ara niryi, ‘Dib yina dengyanmarum do? Tola ati, yandoka ablangmarum do?’ tenen ukubdenkwansin. A mutuk Mesir sienyi si deici aryi ebkun. Ara, sun weit kelenyi takloboka yanmarumnyi iniboka yamunyi ura, ‘Dib ebmang,’ tenebkwansin. Kum iniyanmunyi ura, sun mutuk tamuboka bana kum uca, eda iya a mutuk dam kunkwandum. 16Sun kankan dam aryi ninyi ton bokdonokmunyi ba, sun weit kelenyi bisi atei inirbirur! Bok, da nang nirya ara akatei dam malyi kun nang wenen ai dongoboka bublan tirikdongobkwansin. Firaun si deici aryi ebkun. Sun weit kelenyi bisi iniboka yamunyi akwe ara, ‘Dib ninyi kalingna ati dirmeim yanmanga kuma, yina dengdoryanmang,’ nang tenebkwamasin,” ebmou. 17Ura, Yusuf biryi er du yabwe a yanmai nang nirya malyi kun nang wenen ai dongoboka bublan tirikdongobmou. Ba, uki winiryi malyi kun nang wenen ai kubmai.

18Uki winiryi tum ara Yusuf biryi ato ebmou, “Nira Er Iya Erebdobnyi bisi ilil kuboka Er uram kununanyi kunun. Ati, lobdeibkwamasin bok, ni molobman dinyi asi kunubkwandarur. 19Sunda dib tola uram ena kum nang ebmamunyi ura, ninyi tentok malyi kun nang wenen ai a kuranci ba, ton nang akwe yina dekdobmarum dinyi sun nerabwe mabwe ati bobde bindarur. 20Bok, sun weit kelenyi bira ni dam boyandarur! Ba, sun ebmarum to ara, ‘Dib ebmang,’ tenebsinyi ura, sunsi ona kum kubkwamasin,” ebmou ba, Yusuf ebmou to kunubmai. 21Ba, a nang aryi ato ebdanin yibinmai, “Diba, nunci nun weit asi minob malyito kuamoubwe dinyi ara a lak kibkwinsir ati ebmar. Erci, ‘Ni lebdobnindarur se!’ enmou uca, nunci lemdeirina kum kuamoubwe. Ati, ukura er mambul doamwe dinyi ati, nunsi dekwamasir,” ebdanmai. 22Uca, Ruben biryi ato ebmou, “Nira sunsi una ebmasise. ‘Ami asi malyito dinyi ukuna mem!’ ebdenmasise. Uca, sunda ni uram kum kekeanindau deyok aryi ukura nunbabyi dekwinsir ake,” ebmou. 23Uca, Yusuf bira a nang Ibrani uram aryi sisingmai dinyi ara sirya kekebokmou. Bok, a nang sun kanya ara, “Yusuf kum bikmasir,” tenebmaici ato eboka sisingmai. Ara, Mesir uram ab Ibrani uram ab bikoka danguboka ebmounyi biriman aryi uram sisingmai deyok aryi ato tenebmai. 24Ba, Yusuf sun enmai to sirya kekebmou ura, a dikum aryi takloboka, yuk dikum inibdob ai binmou ura, engebmou. Sirya engebkabokmouci, engen sinsin uram kum danmou ura, er du yabwe dam tamuryanmou. Ura, Yusuf er milin nang asi, “Simeon bisi tabwe debdarur!” eboka arukmou ba, a nang kankan dam aryi Simeon bisi tabwe debmai. 25Ura, Yusuf er milin nang asi ato eboka arukmou, “A nang sun aling yuk-yuk asi gandum kibdongobnin yibindarur. Ani, sun dekmang uang ababyi neik bisik kibdongobnin yibindarur. Ani, sun bisik dam yibdoro binkwamang yina ababyi kibdongobdarur!” eboka arukmou ba, kunubmai.

26Ura, anda gandum bisam keledai deici deiboka bobdakde binmai. 27Banmai ani, bisik noutam bindoka mabkoi ai bindoka ninyi tentok aryi karum aling yokoka diramwe uca, er gandum dekmou uang ara karum aling bublan dam a mabmou asi eibmou. 28Ura, er kwit yabwe asi ato ebmou, “Ni dekmonwe uang ara tamuboka a kibdongobmaning a dibdendarur!” ebmou. Ba, sun kanya ikin kubmouci, sirim talebmou ba, asing dibdanmai. Ura, ato ebmai, “Er Iya Erebdobnyi biryi ato kubmasir dinyi asi ilil ebkwayeb!” ebmai.

29Ura, sun yanganmai ani, sun nai Yakub dam Kanaan mutuk dam sirya atei yanmai ura, sun ukubmai to nirya nukmai. 30Ura, ato ebmai, “Nun Mesir dam binmab uca, a mutuk sienyi biryi erengdonmasiraryi, ‘A mutuk dam dirmeim yanmarum!’ eboka erengdonmasir. 31Uca, nunci ato ebmab, ‘Nunda tola uram en nang kuma. Nun dib sirik aryi, nunda ninyi dirmeimyangan nang kum yanmab,’ ebmab. 32Ani, ato ebmab, ‘Nunda, nun nai tentoknyi biryi mabwe amolbaryi deiansou. Bok, mi tentok da wanikoubwe. Ba, nun weit kelenyi tentok ara nun nai ab atei Kanaan mutuk dam o takloboka yanmab,’ ebmab. 33Uca, a mutuk sienyi kibunyi biryi nunsi ato ebmasir, ‘Ato ebmarum deyok ati, niryi dib ebmang tenebkwan ati, ninyi tentok ni dam a takloboka bindarur! Ba, yuk nang ara sun nerabwe, mabwe yina bulung buna ati, boboka, karerbindarur!’ eboka arukmasir ba, yanmab. 34Ani, tonda ato ebmar, ‘Sun weit kelenyi bisi ni dam iniboka yamunyi ba, ni asing eibniryi, “Dib sunda ninyi dirmeimyangan nang kuma,” tenebkwansin. Ato tenebnyi ura, “Dib ebmongwe,” tenebkwan. Ato tenebnyi ura, sun kwit a tabwe debmananyi lobdeibkwansin. Ukubsinyi ura, a mutuk ilil kuna kum asa kuronkwandum,’ ebmasir,” ebmai.

35Ura, gandum kibmai aling nirya yokmai uca, sun uang bindoka dekmai uang ara yuk-yuk nirya aling umbura a kubnin yibinmai asi eibmai. Ura, sun nai bisi amubmai ura, sun nirya ilil kubmou. 36Ura, sun nai Yakub biryi ato ebmou, “Anda mabwe se, suncok ni mabwe kum danabdeibnin banindarur! Ni mi Yusuf da wanikanindau. Ani, Simeon Mesir mutuk dam takoka yarum. Ani, ura Benyamin iniboka bobankundum. Nai e, ni mabwe kanyi sungdona akwe aryok se!” ebmou. 37Uca, Ruben biryi er nai bisi ato ebmou, “Nai, Benyamin bira ur bindarur! eboka mundu lobsurum. Kan mi Benyamin bobinmanyi uca, sangkuna obingnyi ba, yanyi ura, ni mabwe bitinyi deibsa asi a nisin obkwamarim,” ebmou. 38Bok, sun nai Yakub biryi ato ebmou, “A mi er du sirya kum dau. Ba, er tentok deyok ati, Benyamin bira tonkwa sun ab bana kum kubkwamarum. Sangkuna a mi bisik banmamunya dam aryi da dibci asi, ni boukwe ati kuraniryi, ni wisi dase aca, engenmaniryi su sekoka dibnyei,” ebmou.

Currently Selected:

Kejadian Uram 42: MTG

Highlight

Copy

Compare