Kejadian Uram 41

Firaun lengdera mabmou asi, Yusuf biryi liliboka lak ebmou deyok

41:1-36

1Kuramnyi ani, kwalina bitinyi sirya kwalibmai ura, Mesir mutuk sienyi Firaun lengdera mabmou. Lengdera mabmou ara ato kubmou, me si Nil yibaramwa kubkub tikoka dinmou. 2Uca, me Nil umbura aryi bisam si sapi nong bingbing eboka nenmou bisam akwe tabaryi anabmai. Ura, a bisam sapi yabwe ara me Nil dala kuramwe murmuta yibde yibanmai asi eibmou. 3Ani, tubto me Nil tam akwe asing dirdonongkwe uca, me Nil umbura aryi bisam sapi nong bol tumakoka yila biribdanamwe sapi tabaryi anabmai. Anabmai ura, a me dala akwe yuma anaboka yanmaici kunmai bisam yabwe dam yandoka tikmai. 4Ura, a sapi yila biribdanamwe bisam mer aryi bindoka, nong bol teleb sapi mer asi obde yironmai asi asing eibmou. Ura, Mesir sienyi Firaun bira lukdandoka bukokmou.

5Ani, tubto mabdongoabwe uca lengdera bitinyi dinyi mabmou. Ba, a mabmou lengdera ara ato gandum du mouna yabla tentok uca, du teleb akwe tabaryi dikamwe asi eibmou. 6Ba, ton diramwe uca, gandum du mouna kum uca, kumwe aryi kulubkabokamwe aryi balang yok dem tikmou asi eibmou. 7Ba, balang yok dem gandum yabla aryi du dikamwe yabla aryi oboka yibmou. Ura, Mesir sienyi Firaun lengdera ato kuboka mabmouci, lukdandoka bukokmou. Ura, er kanya aryi, “Lengdera aca,” tenebmou.

8Ura, belekuna bukokmouci, ilil kanyi akwe kubmou. Ura, Mesir mutuk nang nirya asi, “Lengdera lak eboka lilibdeibmanto nang ton da kuranunga?” tenen mirei bingna nang ab, lengdera lak en nang ab nabmou. Nabmou ba, yanmai ura, er lengdera, “Ukuboka mabman,” ebmou. Ba, sunci lilirdenmai uca, a mabmou lengdera kunubmanto dinyi lak ton kum ebdeibmai. 9Uca, Mesir sienyi er me kiknina deyoknyi biryi ato ebmou, “Arub ara niryi minob talak uca, kan dam asi, ‘Lengdera lak erurnyi ton a kurur,’ ena kum kuanse ara malyito kuankise, tenebman ati, lak ebkun. 10Nai sienyi kanci, ni ab, kan roti kikninanyi ab nunsi yu bobmasumci, nunsi sienyi kan ai dam kalingna sienyi ai umbura malyi kun nang talen ai dongoansumwe. 11A dongoansumwe ba, malyi kun nang talen ai kuranoumwe talak ara lukunda tentok aryi nun lengdera mabmanoumwe. Ara, er mabmou lengdera kunubkwamwe to yuk. Ba, ni mabmase lengdera kunubkwamwe to yuk ati, nun lengdera ababyi yuk-yuk mabmanoumwe.

12Uca, Ibrani yalanyi sal kabir tentok malyi kun nang wenen ai dongoamnyi ba, nun tonkwa a malyi kun nang wenen ai kuramoubwe aryi nun lengdera ersi nukmanoumwe. Ba, anyi biryi nun lengdera nukmanumwa asi, ‘Aminda ato kubkwansir ati, a lengdera mabmarurum,’ eboka nun lengdera yuk-yuk lak ebdeibmasou. 13Ba, anyi biryi, ‘Ukubkwansir,’ eboka nun lengdera lilibdeiansou tok sirya kunubwe. Ara, ni mabmase lengdera ara, ‘Sienyi biryi tubto erebdeibkwankir,’ ebmanou tok kunuboka kanci erebdeibnoumwe. Ba, ni kwit er lengdera ara, ‘Sienyi biryi co deici laboka bing dakwankir,’ ebmou tok kunuboka co deici erebdeiboka bing dakoumwe,” ebmou.

14Ato eboka nukmou asi Mesir sienyi kekebmouci, “Yusuf iniboka yandarur,” eboka arukmou ba, inirbinmai. Bindoka malyi kun nang wenen ai bublan kukeibmai ura, er otong kukoka, er ongon aling unubdeibmai ura, iniboka Mesir sienyi bisi bobinmai. 15Ura, Mesir sienyi biryi Yusuf bisi ato ebmou, “Ni lengdera mabman asi, ‘Ato kunubkwande ati, a lengdera mabmarim,’ eboka lak ebman to nang ton kum ati, kansi nabmakin. Ara, ni kekenmonwe uca, ‘Ibrani yalanyi tentok lengdera mabmangnyi to lak erur,’ ena kekebmakinci, kansi nabmakin,” ebmou. 16Ba, Yusuf biryi ato ebmou, “Nai, sienyi, kan lengdera ara niryi lak ebkwamana kuma, eda Er Imtamnyi biryi kan lengdera kunubkwande to lilibdeibkwamakir,” ebmou. 17-18Ura, Mesir sienyi biryi ato eboka lengdera nukmou, “Ni lengdera deici aryi, nira me si Nil dala tikoka diranwe uca, me Nil umbura aryi bisam sapi tabaryi anabmangci, me kubkub asi murmuta yandoka yinmang. A sapi tabaryi nirya sun nong bol ara bingbing ebde neamungwe sapi akwe anabmongwe asi eibman. 19-20Ani, tubto diranwe uca, me Nil umbura aryi tubto yila biriboka ya cok nyelebdanamwe sapi tabaryi anabunguryi, bol teleb sapi yuma anaboka murmuta yirabungwe sapi yabwe asi bindoka obde yinmongwe. Aminda anabmang sapi bol ara Mesir mutuk nirya ato sapi bol ara ni ton kum eirinun sapi asi eibman. 21Ura, a yila biribdob sapi aryi nong weik sapi asi oboka yibnin yibinmang ababyi, sun mundu dam lak marbindoka biknena kum kubmar. Eda, sun mundu minob a ya cok nyeleboka mundu a surukloamwe tok asi eibman. Ani, nira a sapi yabwe dam a tikoka kalikmonwe. Ato kuboka mabmanci, ni lukdandoka bukokman. 22Ani, tubto marbinwe uca, lengdera ton yuk dinyi ato kuboka mabman. Roti kikniraming keica gandum du mouna yabla tentok uca, du teleb akwe tabaryi dikamwe asi eibman. 23Ba, ton diramwe uca, gandum du mouna kum uca, yaletam kumwe aryi kulubkabokamwe aryi yabla yok dem tikmoci, tumakamwe asi eibmonwe. 24Ba, tumakamwe gandum yabla aryi du teleb mouamwe gandum yabla asi oboka yironmo asi asing eibmonwe. Ni lengdera ato kuboka mabse ati, Mesir nang mirei bingna nang ab, lengdera lak en nang ab naboka asirdenman. Uca, ninyi tentok ababyi, lak eboka lilirdeirina ton kum kubnei. Ati, kanci lak lilibdeibnurum,” ebmou.

25Ura, Yusuf biryi Mesir sienyi Firaun bisi ato ebmou, “Nai, sienyi Firaun, Er Imtamnyi biryi kan lengdera mabmarim to kuboka kansi ukubkwankir to aryi ato lengdera mabmarim. Ara, a mabmarim lengdera bitinyi nirya ara neik dinyi atikwe a lengdera mabmarim. 26Nong bol bingbing eboka neamwe sapi tabaryi ab, gandum yabla du mouamwe dinyi tabaryi ab ara neik dinyi atikwe mabmarim. Ara, kwalina tabaryi kwaning yin li dobkwande to kiklibmar. 27Ba, yila biriboka ya cok nyeleamwe sapi tabaryi anaboka yibinmang asi eibmarim dinyi ab, gandum yabla du mouna kum kuamwe yabla ab eibmarim ara neik dinyi atikwe mabmarim. Ara, kwalina tabaryi kwaning utan li dobkwande to ati, a lengdera mabmarim. 28Ato kubkwande deyok aryi niryi nai sienyi kansi ato ebmonwe, ‘Er Imtamnyi biryi aminda ukubdeibkwande to ati, kansi asing eibdur,’ tenen lak kibdeibmakir,” ebmonwe. 29“Ati, nai sienyi kan minob bikandum. Kwalina tabaryi ara Mesir mutuk nirya kwaning yin li dobkwande. 30Ani, tubto Mesir mutuk nirya kwalina tabaryi ara kwaning utan li dobkwande. Ba, Mesir mutuk nirya kelkel ebci ba, kwaning yiramingnyi talak aryi teleb asa kuramingnyi dinyi ara luba kibsekwaming. 31Ani, kwaning utan li uki weikto kubkwande deyok aryi, kwaning yiramingnyi olong ara kum bikwaming. 32Ati, neik dinyi ukubkwande to atikwe lengdera liki bitinyi karebmakir ara: Er Imtamnyi biryi, ‘Ukubkwan,’ eboka sirya kiknibdeibmarci, kansi lak kibdeibmakir aryi a lengdera karebmakir ba, lengdera mabmarim. 33Ati, nai sienyi kanci, ninyi tentok da wimaminyi ani, etekdobnyi nun asi tentok wiboka tikeibminyi ba, Mesir mutuk nirya erci talebkwande. 34Ani, tonda nai sienyi kanci ato kubdum. Kwaning yin talak kwalina tabaryi kunmangnyi talak aryi wa in nang wibdum. Ba, a nang aryi Mesir mutuk nirya gandum wa iramingnyi ani, kibmangnyi dinyi ara meici kukoka koubni amubaryi kiboka bulubde yibinkwaming. 35Ba, o talak kwalibde binkwaming kwalina nirya ara ni nai, sienyi Firaun biryi er miliboka wa in nang ton wa karebkwande. Ba, a nang aryi anda donung weik atei nirya yibindoka, yina amuma nirya buluboka a deirin ai deiryankwaming. 36Ato kuboka Mesir mutuk asi kwaning utan li kwalina tabaryi kubkwande ati, gandum kiboka minob dirinkwanung. Ba, kwaning utan aryi ninyi dibsekingnyei. Ati, kabul talak uca, minob bulubde deirinkwanung,” ebmou.

Yusuf bira Mesir mutuk weik sienyi amwetam sienyi kibmou deyok

41:37-57

37Ura, Yusuf biryi Mesir sienyi bisi, “Ukubdum,” ebmou dinyi ara erbabyi er wa in nang ababyi sun teleb kubmou. 38Ura, Mesir sienyi Firaun biryi er wa in nang asi ato eboka asibdenmou, “Anyi bira Er Imtamnyi Kanya er kanya dam wa irur. Ati, anyi bisi tingdeirina ara kikiman tenebman,” ebmou. 39Ura, Mesir sienyi biryi Yusuf bisi ton ato ebmou, “Er Imtamnyi biryi, ‘Ato ebdum!’ eboka kan kanya dam wa inmakir ba, uram teleb akwe enmarim. Ati, kan etekdob dinyi bikumwe to nang da ton kum kunung. 40Ati, kanda ni sienyi kibse ai dam kalingna sienyi kibkwandim. Ani, kanci ebminyi tok ninyi nirya kunubkwaming. Bok, ni sienyi kiboka bukse sokon tentok ara kan kum bukwandim,” ebmou. 41Ani, Firaun biryi Yusuf bisi ton ato ebmou, “A deyok aryi niryi kansi Mesir mutuk nirya talebkwandim ati, ai dam kalingnanyi weik sienyi tikeibkwinkin,” ebmou. 42Ura, sien nang taruk du dongoraming keica, Mesir sienyi er taruk du dongoamwe dinyi kwiriboka Yusuf taruk du dongobdeibmou. Tonda Yusuf bisi cang ongon aling bol namin aling ongobdeibmou. Ani, keil emas karakna Yusuf ngang karakeibmou. 43Ura, Mesir sienyi biryi er bukoka yibaramwe keica si kereta bitinyi dinyi asi, “Burwelebirum,” eboka arukmou ba, Yusuf a kereta deici burwelebmou. Ba, sienyi ai wa in nang menekoka dina-dina kunmai ninyi asi, “Nun nai Yusuf sienyi kibmar ati, teleb eboka kibdarur,” ebde menekmai. Ato kuboka Mesir sienyi biryi Yusuf bisi Mesir mutuk talebkwamwe ati, wa kareboka tikeibmou. 44Ura, Mesir sienyi Firaun biryi Yusuf bisi ato ebmou, “Nira Mesir mutuk sienyi kibsinyi biryi kansi ebkwinkin ara kekerum. Mesir mutuk ninyi nirya aryi kan bingna kum kubmaminyi bok, sun kanyi mangkunuk kubkwamang ara ukubman kum. Eda, kan bikminci, kanci arukminyi to akwe kunubkwaming,” ebmou. 45Ura, Firaun biryi Yusuf si ara yuk si dobmouci, “Zafnat-Paaneah,” eboka si dobmou. Ani, er ner ababyi kabdeibmou. A ner ara Potifera nebnyi si Asnat kabdeibmou ba, Yusuf dobmou. A ner er nai Potifera bira atei si On dam kuramuryi, kwemdeina molon ai wa inanyi kiamwe. Ato kuboka Yusuf Mesir mutuk talebmouci, a mutuk nirya yibarkiringnamwe.

46Yusuf biryi Mesir mutuk sienyi dam yuma binmou talak ara er kwalina yuma deirin tum aryi nungna ara kwalina 30 baryi kubmou talak aryi binmou. 47Mesir mutuk ara kwalina tabaryi nirya kwaning yin talak berekamwe ba, gandum wa iboka kibde miningnamnyi ara ai dukuramwe. 48Ba, Yusuf biryi a kwalina tabaryi ara Mesir mutuk weik atei nirya yibinkirikoka gandum deirin ai yuk kikniboka deibde yibaramwe. 49Ura, Yusuf biryi gandum kiboka akatei nirya deiriamwe ara me wininga ato kuramwe. Ba, a mutuk ninyi aryi nungderamnyi ababyi nuksekman kum kubmou ba, nungna taklobmai.

50Kwaning utan talak dobkwamwe kwalina wengbana kum kubmai talak aryi, Yusuf ab er ner Asnat ab sun mabwe bitinyi deibmarei. 51Ura, yuma deibmarei mi si ara Manasye eboka si dobmou. A si dobmou ara, “Mambul dinyi weik dobde yananse dinyi ab, ni nai kobdoba ab ara Er Imtamnyi biryi luba kibsinibnou ba, sirya luba kibse,” ebmouci, er mi si Manasye eboka si dobmou. 52Ba, Yusuf mi bitinyi mi deibmou mi si ara Efraim eboka si dobmou. A mi Efraim ena ara, “Er Imtamnyi biryi ni mambul dobde kununa kankan aryi mabwe deirin dinyi karebnir ba, mabwe deibde binkwan,” ebmouci, a si dobmou.

53Ura, Mesir mutuk nirya kwalina tabaryi kwaning yin talak kuramnyi ani, 54kwalina tabaryi sirya bisibmou ura, Yusuf biryi minob eamwe to kunuboka kwaning utan talak kwalina wengbinmai. A talak yuk-yuk mutuk nirya ara kwaning utan talak berekamwe ba, kwaning bulung kuramnyi. Bok, Mesir mutuk atei nirya ara Yusuf biryi gandum minikde yibinamwe aryi roti kwaning tuba yibde kuramnyi. 55Ba, Mesir nang kwaning bulung bukmangnyi ura, Mesir sienyi dam yandoka, “Nai e, nun kwaning bulung bukmab ati, roti ton karebsurum!” eboka moloramnyi. Bok, Mesir sienyi biryi, “Sun nai Yusuf bisi bimunyi ba, erci ebkwande to kunubdarur,” eramwe. 56A kwaning utan li berekamwe ara im dangna tukwe dangna nirya kwaning utan li doamwe. Ba, Yusuf bira Mesir weik atei nirya ara gandum deirin ai doboka minikde yibinamwe aryi Mesir nang ara ersi dengyangaramnyi. 57Ani, yuk-yuk mutuk nang ababyi Mesir mutuk dam Yusuf bisi gandum dengyangaramnyi.

Currently Selected:

Kejadian Uram 41: MTG

Highlight

Copy

Compare