Kejadian Uram 40

Yusuf biryi Mesir sienyi me kikninanyi ab, roti kikninanyi ab sun lengdera lak ebmou deyok

40:1-23

1A talak kubde baramnyi ani, Mesir mutuk sienyi ai me kikninanyi ton, roti kikninanyi ton aryi sun nai Mesir sienyi bisi malyito dinyi kunubmarei. 2Ba, Mesir mutuk sienyi biryi erti me kiknin deyoknyi ab, roti kwaning kiknina deyoknyi ab asi yu bobmou. 3Ura, a bitinyi nang asi weik sienyi kuramwe ai dam ninyi on nang tabwe deboka dongon ai umbura dongoboka bublan tirikdongobmou. Akai ara Yusuf bibabyi minob a dongoamnyi. 4Ura, Mesir sienyi kalingna sienyi biryi a bitinyi nang asi Yusuf biti wa kareamwe ba, kalingnamwe ai asi dongobmai. Ba, Yusuf biryi a nang asi kalingnamwe. A bitinyi nang tabwe deboka dongon ai dongoamnyi ba, uki weik akai umbura kuramnyi.

5Ani, uki tentok tum lukunda ara a bitinyi nang mabmarei uca, tentok lukunda aryok lengdera tonyi babyi-tonyi babyi lengdera deyok yuk-yuk mabmarei. Ani, a lengdera kunubkwamwe ababyi, yukto-yukto kunubkwamou to lengdera mabmarei. 6Belekuna ara Yusuf sun bukmarei ai yandoka diramwe uca, sun kanya sulukdongoboka, see tenen kanya boboka bukmarei bok, Yusuf yanmou. 7Ura, Yusuf biryi a bitinyi nang Mesir sienyi me ab roti ab kiknirandei nang malyi nang dongon ai a dongobmai nang asi ato eboka asibmou, “Arub ara sun kanya sulukdongoboka bukmarurum ara unatoa ati do?” eboka asibmou. 8Uca, sunci Yusuf bisi ato ebmarei, “Nun lengdera mabmanim asi ninyi ton yandoka, ‘A lengdera ara ato kubkwansir ati mabmarurum,’ eboka lilirdeirisina nang ton kum aryi nun kanyi teneina bukam kunmasir,” ebmarei. Uca, Yusuf biryi ato ebmou, “Ni kwit yabwe, Er Imtamnyi biryi sun lengdera mabmarurum dinyi ara lak ebkwinsir. Ati, sun lengdera mabmarurum to ni keken ai nukdurum!” ebmou. 9Ura, Mesir sienyi me kikniramwa deyoknyi biryi er lengdera mabmou to Yusuf bisi ato eboka nukarebmou. “Ni lengdera ara co anggur tentok tikamwe. 10Ba, a co anggur ara taruk winiryi lekoka bok ukuryok silingmo. Ucab, liki tentok keta oboka du ababyi liki tentok du mouboka eng obmo asi eibman. 11Ba, ni taruk dam ara Mesir sienyi Firaun me yirande meyok doubmonwe aryi a anggur du asi daktalebokabnuryi, a meyok umbura urubdongobni ura, Mesir sienyi bisi karenman,” ebmou. 12Ba, Yusuf biryi ato ebmou, “Kan a mabmarim lengdera ara ato kubkwamaking ati a lengdera mabmarim. Anggur taruk winiryi lekamwe ara uki winiryi mabkwamarim. 13A winiryi uki aryi sienyi biryi kansi erebdeiboka, kan minob iramoumwe wa tubto karebkici ba, me kikniboka sienyi bisi bobaramoumwe to bobankwandim aryi a lengdera mabmarim,” ebmou. 14Ura, Yusuf biryi ato ebmou, “Sangkuna kan lengdera lak eankinyi to kunubminyi ura, nisi yandoka, ‘Teleb, kan eanoumwe to kunubnou,’ eryankwanurum. Ani, Mesir sienyi bisi ato ebkwandum, ‘Anyi biryi ni lengdera nukanou to kunubnou,’ eboka nukwandum. Ato ebminyi ura, nisi yandoka lobdeibniminyi ba, anaboka bindobkwan. 15Nira Ibrani nang mutuk aryi deyok kum bok, ukula tomoboka boyanei ba, Mesir mutuk a yandoka kunun. Ani, a mutuk ababyi malyi dinyi ton dangbisina kum bok, malyi kun nang wenen ai dongoboka bublan tirikdongobnei ba, a kunun ati, ebman,” ebmou.

16Ura, Yusuf biryi me kikninanyi lengdera liliboka lak ebmou dinyi asi kekebmou uca, “A lengdera kubkwamwe to diboka ebmar,” tenebmou. Ura, roti kwaning kiknina deyoknyi biryi Yusuf bisi ato ebmou, “Nibabyi lengdera ton mabman. Ara, tower aling winiryi asi roti kwaning kiboka, ni kisok dub dukdandoka bobman. 17A tower aling umbura asi yina yala amuma nirya dongoboka Firaun biti bobanman. Uca, alib kobdob dinyi ara maka yubwa yandoka dobde yironmang,” ebmou. 18Uca, Yusuf biryi ato ebmou, “A mabmarim lengdera ara ato ati mabmarim. Tower aling winiryi ara uki winiryi kubkwamarim. 19Ba, a uki winiryi tum ara Mesir sienyi biryi kansi co ikoka, co deici laboka bing dakwamakir. Ba, maka yandoka dobde yinmongwe to ara kansi co deici im dub bing dakmakeici asi maka aryi yandoka kan tub kwilikoka yibkwamaking to ati, a lengdera mabmarim,” ebmou.

20Ura, uki bitinyi mabmou ani, uki winiryi tum ara Mesir mutuk sienyi er deirin tum kubmou. Ura, Mesir sienyi biryi er wa irmilin nang nirya bulubmaici, me yinmai. A yinmai talak aryi er me kiknina deyoknyi ab, er roti kwaning kiknina deyoknyi ab asi malyi kun nang wenen ai aryi boboka sun me yinmai dam bobinmai. 21Ura, er Mesir sienyi biryi me kikniramunyi bisi wa tubto karebmou. Ba, anyi biryi wa tubto dobmouci, me kikniboka meyok tubto sienyi taruk dam kareramwe. 22Bok, sienyi er roti kikninanyi bira er lengdera mabmou to asi, Yusuf biryi, “Co deici ereboka bing dakwankir to ati, lengdera mabdeibdanmarim” eboka lilibdeibmou to kunubmou. 23Ba, Mesir sienyi me kiknina deyoknyi bira Yusuf biryi, “Sangkuna kan lengdera lilibdeibmakin to kunubminyi ura, nisi lebdobkwanurum,” eamwe dinyi luba kiamwe.

Currently Selected:

Kejadian Uram 40: MTG

Highlight

Copy

Compare