Kejadian Uram 39

Potifar ner aryi tola ati, “Yusuf biryi yobmanir,” ebmou deyok

39:1-23

1Ura, Yusuf bira Ismael yala nang aryi boboka Mesir mutuk bobinmouci, Mesir mutuk sienyi Firaun kalingna nang sienyi si Potifar bisi bobindoka karebmou ba, dekdobmou. 2Bok, Er Iya Erebdobnyi biryi tanglona kum uca, Yusuf bisi tuba miliramwe. A deyok aryi er wa iramwe dinyi ara kununa akwe kuramwe. Ba, Yusuf bira Mesir mutuknyi, er dekamunyi ai a kuramwe. 3Ura, Yusuf dekamunyi Potifar biryi diramwe uca, Yusuf bira Er Iya Erebdobnyi tuba miliramwe aryi er wa iramwe dinyi nirya kunuramwe dinyi asi asing eiriramwe. 4A deyok aryi Potifar biryi Yusuf bisi kanyi deibmouci, er ai me ilikoka er yina yuboka, kimnanyi kibdeibmou. Ani, Potifar er ai umbura kuramwe bona nirya Yusuf bikwe eterebmou ba, erci talebmou. 5Mesir mutuknyi Potifar biryi Yusuf bisi er ai wa inanyi kibdeibmou. A wa karenmou tum aryok Yusuf akatei kunkwamwe deyok aryi Er Iya Erebdobnyi biryi Mesir mutuknyi ai asi kisal dangna dinyi karebmou. Ato kuboka kisal dangna karebmou ba, akai umbura bona babyi, wa ina dam babyi telebto akwe kuramwe. 6Ura, Potifar er bona ai miningnamwe dinyi nirya Yusuf biti karebmou ba, Yusuf bikwe talebmou. Ba, Potifar biryi er ai deiriramwe bona er taruk aryi lilina ton kum kuramwe. Eda, er yibkwamaci dinyi demang asi er talerdongoninto kuramwe.

Yusuf bira ninyi teleb nun neamwe aryi, ninyi kanyi mantangnanyi nun kuramwe. 7A talak kuramnyi ani, uki tentok tum ara Potifar ner aryi Yusuf bisi dinmou uca, er kanyi mantanakmou ura, ato ebmou, “Ni ab tonkwa mabdobkwinim ati, yangarum!” ebmou. 8Uca, Yusuf biryi, “Nong, kan ebmarim to kununa ni li. Ni nai Potifar bisi akai miningdur bona ara niryi milibnyi ba, er bona liliboka miningna kum kubkwamar. Eda, akai kurur bona nirya niti, ‘Kanci talebdum,’ eboka wa karebnou ara akai umbura aryi malyi dinyi kunubdur tenen wa kum karebnou. 9Akai umbura kubdob dinyi a nirya ara er taleamwe to kuma, ukura ni tikwe karebmanir. Bok, er ner kan tentok asi er dinyi tuba kubmar. Ato ebmarim dinyi ara ni Nai Iya Erebdobnyi urasin dam asi manmalibdongobdankwaman do?” ebmou. 10A kuramnyi talak nirya Potifar ner aryi, “Ni ab mabdobkwanim,” eboka arung-arung eroramwe, bok Yusuf biryi, “Ni li,” akwe eramwe.

11Ani, uki tentok tum ara akai ninyi nirya binsekmai. Ba, Yusuf bira akai wengbindoka, “Wa inkwan,” tenen ai wengbinmou. 12Ura, Potifar ner aryi Yusuf alib ongon aling talebdongoboka ato ebmou, “Ni ab mabdobkwinim,” ebmou. Uca, Yusuf lebkaboka, ai dam sakweteboka bindobmou. Bok, er alib ongon aling ara a ner aryi langaktalebmou. Ba, a ongon aling ara a ner taruk dam tuba a doubmou. 13Ura, a ner aryi teneiramwe uca, Yusuf sakweteboka bindobmouci, er ongon aling er taruk dam a takloboka binmou ura, “Ato kubkun,” tenebmou. 14-15Ura, a ner aryi akai ninyi nirya asi nabkirikoka, bulubdeibmou ura, ato ebmou, “A dibdendarur, ni akenyi biryi Ibraninyi bok, dekoka boyau ba, akai kururnyi biryi alyi benebdeibmasir. Ara, anyi biryi ni man ai wengbindoka, ‘Yobkwankin,’ enmanir asi ilinto ngalungdon ba, bai sakweteboka bindobmar. Anyi er ongon aling ara a takloboka binmar a dibdendarur!” ebmou. 16Ura, Yusuf ongon aling a kwiribtalebmou ara a ner er dam tuba a deibmou ba, er akenyi yanmou. 17Ura, a ner aryi er akenyi Potifar bisi tola ati, ato eboka nukmou, “Kanci, Ibraninyi a boyandoka kan wa inanyi kibdeibumnyi biryi, ‘Yobkwankin,’ enmanir atiba de! 18Uca, ilinto ngolongdonwe ba, er ongon aling ara a takloboka binmar atiba,” ebmou. 19Ura, er ner aryi, “Ukunmanou-uenmanou,” eboka nukmou ba, er akenyi yu weik wekmou. 20Ura, “Yusuf talebdarur!” eboka arukmou ba, Yusuf bira taleboka weik sienyi biryi ninyi on nang tabwe deboka dongon ai dongobmai.

21Bok, Yusuf ninyi on nang tabwe deboka dongon ai kuramwe dam ara Er Iya Erebdobnyi biryi tuba miliramuryi, Er boukwe kimna dinyi Yusuf bisi tuba-tuba karermururamwe. A deyok aryi ninyi on nang dongon ai sienyi bibabyi Yusuf bisi boukwe kimnamwe. 22Ura, akai kalingna sienyi biryi Yusuf bisi, “Ninyi on nang tabwe deboka dongon ai nirya kalikoka wa inkwandim. Ani, ni ibmanto wa ababyi kancok inkwandim,” eboka wa karebmou. 23Ba, ninyi tabwe deboka dongoramnyi nang ai sienyi bira Yusuf biti kareamwe wa ton kum talerderbaramwe. Ba, Yusuf ibde baramwe dinyi ara Er Iya Erebdobnyi biryi miliramwe ba, telebto akwe iboka kunubde baramwe. A deyok aryi akai kalingna sienyi kiamunyi biryi Yusuf bisi, “Ukubdum-ukubdum,” ena ababyi ton kum kuramwe.

Currently Selected:

Kejadian Uram 39: MTG

Highlight

Copy

Compare