Kejadian Uram 38

Yehuda ab Tamar ab deyok

38:1-30

1A talak ara Yehuda bira er du weit yabwe takloboka weik atei Adulam ateinyi si Hira bisi bindobmou ba, tonkwa kurorandei. 2Kurandei ani, Yehuda diramwe uca, Kanaan mutuknyi si Syua nebnyi asi ebdanmareici, a ner dobmou. 3Ura, Yehuda a ner dobmouci, kurandei ani, a ner sal deibmou. Ura, a mi si ara, “Er,” eboka si dobmou. 4Ani, a ner ara mundu tubto bobmouci, sal mi akwe deibmou ura, a mi si ara, “Onan,” eboka si dobmou. 5Ani, tubto winiryi dinyi mundu bobmouci, sal akwe tubto deibmou. Ura, a mi si ara, “Syela,” eboka si dobmou. Yehuda er ner a mi deirinmou talak ara Kezib atei dam bindoka kunmou talak deibmou.

6Kuramnyi ani, Yehuda mi yanduanyi si Er bira sirya nebmou ura, er nai biryi ner si Tamar doboka kabdeibmou. 7Bok, Yehuda mi dunyi si Er bira Iya Erebdobnyi urasin dam malyito kuramwe aryi, Iya Erebdobnyi biryi obmou ba, dibmou. 8Er dibmou ura, Yehuda biryi er mi si Er weit Onan bisi ato ebmou, “Kan du doamwe ner dam asi biminci, a ner dobminyi ura, kan du yala weik kibdeibdum. Ara, kan du bira mi ton deirina kum bok dibmar ati a ner dobdum,” ebmou. 9Bok, Onan tenebmou ara, “A dibmaranyi yala ati, unubnyei,” tenebmou. Ura, er du doamwe ner yorbinmaci tum ara den yung kirdongona kum kuramwe. Eda, yonmaci ba, den yung yangaci ura, urkarongnamwe ba, den yung talyi ai sangnamwe. 10Bok, Iya Erebdobnyi biryi dina ara ato kuna ara malyi kuramwe. A deyok aryi Iya Erebdobnyi biryi Onan bisi obmou ba, dibmou. 11Ura, Yehuda biryi ato tenebmou, “Ni mi Syela doranci asi er du yabwe Er Imtamnyi biryi obwe to ukubcei,” tenebmou. Ura, Yehuda biryi er basiner Tamar bisi ato ebmou, “Ur sulyi ner da kurandum. Ara, kan nai ai bindoka kurandum. A kuraminyi ba, ni mi Syela sirya nebdobdiryi dobkwankir ati ur kurandum,” ebmou.

12Ura, anda kunmai talak aryi Yehuda ner, ninyi si Syua nebnyi ara dibmou. Yehuda ner dibmou ati, biti deibde bunmai ani, sirya talak ara Yehuda biryi er kwit Hira Adulam mutuknyi bisi inibmouci, Timna mutuk bisam domba otong kungmaia dam binmarei. 13Ura, Yehuda er mabwe doandei ner bok, a nang dibmarei ba, deibloandei sulyi kuramwe ner si Tamar bisi ato ebmai. “Kan basinyi Yehuda bira Timna mutuk er bisam domba otong kungmanga dam binmar,” ebmai. 14Ura, Tamar bira sulyi nerabwe kikniboka ongobde kuramwe ongon aling ara kwiriblobokmou. Ura, kisok ab urasin ab limdaron kaluna aryi libdandobmou. Sirya libandobmou ura, anaboka weik atei si Enaim lika bisik bublan wengyangana dam asi bindoka bukmou. A bisik ara Timna mutuk baramnyi bisik kondanya asi bukmou. Ato kubmou ara a ner er tenebmou to ara, “Yehuda er mi Syela sirya nebwe bok, kamdeirina kum kubnou,” tenebmou ura, ato kubmou. 15Ukuboka bukmou bok, Yehuda yandoka diramwe uca, ner ton a kisok kalubdandoka bukmou. Ura, er kanya ara, “Talyi yortamni ner bukmara,” tenebmou. 16Ura, er mangkau a ner asi ato ebmou, “Yangarum, yobkwankin ati,” ebmou. Yehuda kanya ara, “Yuk nerabwe aca,” tenen ato ebmou. Uca, er basiner Tamar bisi ato ebmou. Ura, a ner aryi Yehuda bisi ato ebmou, “Yobniminyi ura, unatoa karebkwamanirim do?” eboka asibmou. 17Uca, Yehuda biryi ato ebmou, “Niryi kansi kambing ukuryok nenmaca asi karebkwamakin,” ebmou. Uca, a ner aryi ato ebmou, “Ato ebmarim ura, unatoa ton ni dam deibdongoboka binmaminyi ani, kan ebmanirim bisam boyanganiminyi ura, dobdobdum,” ebmou. 18Yehuda biryi ato ebmou, “Unatoa asi deibdongobnute tenebmarim do?” eboka asibmou. Uca, a ner aryi, “Kan mur lurandim dinyi ab, kan ngang karangna ab, kan doubmarim kama ab asi a deibdongoboka birum,” ebmou. Ura, a ner molobmou keica, er taruk dam karebmou ura, yobmou. 19Ura, a ner atei bindoka kisok libdanmou kaluna langakabokmou ura, minob ongoramwe aling ongobdobmou. Ura, kunmai ani, do talak ara a ner mundu bobmou.

20Ba, Yehuda bira kambing mi ukuryok nenmou asi tomoboka deibmou ba, er kwit Adulam mutuknyi biryi boboka a ner asi boyanmou. Ani, a bisam domba kareryanganmou uca, Yehuda deiboka binmou keica doryanmou. Uca, a ner a bukmou dikum tuba kum bukmou ba, yandoka saklobmou. 21Ura, anda kunmai ninyi asi, “Talyi yortamni ner Enaim bisik bublan dam a bukmou ner ara er atei dan dikum kurur da?” eboka asibdenin yibanmou. Uca, “Talyi yortamni ner ara a dikum ton kum kurur,” ebmai. 22Ura, anyi tamuboka Yehuda dam binmou ura, ato ebmou, “A ner ni kum eibman. A dikum kunung ninyi ara ato ebmang, ‘Talyi yortamni ner ara a dikum ton kum kurur,’ ebmang,” ebmou. 23Ba, Yehuda biryi ato ebmou, “A ner taruk dam a karebmonwe keica ara ur er dam akubdur. Ingkirikoka doranimnyi asi, ‘A nang aryi ukubmaring,’ eboka ina ngiliksingnyei,” ebmou. “Kambing mi ara a ner er dam karebkwamonwe bok, bobinmomwe ani, botamubmarim deyok aryi kubnima,” ebmou.

24Yehuda wala winiryi mabwe bok asi, er dam ato ebmai, “Kan basiner Tamar bira talyi yortamnung uca, mundu bobwe,” ebmai. Bok, Yehuda biryi ato ebmou, “A ner uk dabkwan ati a boyandarur!” ebmou. 25Ura, a ner borbanmai uca, Tamar biryi ato ebmou, “Ni yobnou ba, mundu bobse ara ni taruk dam a doubman keica damnyi biryi yobnou,” ebmou. Ani, ton ato ebmou, “A kama ab, a ngang karangna ab, a mur ab ara unanyi dinyi do? Ati, sunci a keica damnyi bisi lilinmandarur!” ebmou. 26Ura, Yehuda bira anda keica er dam boyanmai ba, er dinyi asing eibmouci, ato ebmou, “Nai yabwe, ni manmalibse. Bok, a ner ara diboka kubwe. Ara, niryi minob ato eanse, ‘Ni mi Syela nebci ura, dobkwankir,’ eanse. Bok, kamdeirina kum kubse deyok aryi ukubwe ati ebman,” ebmou.

27Ura, a ner mundu boamwe ara kwabitinyi mabwe boamwe asi bikmai. 28Ba, mi deirinmou tum ara yuma yangau mi ara mi dein nerabwe aryi er taruk asi bi tabwe aryi biribdongoboka taleboka tikmaici, ato ebmai, “A mi ara yuma deibkwetebmar mi,” ebmai. 29Uca, a mi taruk bemtingyanmou ani, tubto taruk libdobmou. Ba, lak kum kibmou mi asi taruk lak kibmounyi wikibkaboka minob sakmou. A deyok aryi mi deirin nerabwe aryi ato ebmai, “A mi kansi minob wikibkaboka kurtangyarim ati, kanda yana mikib bobumwe do?” ebmai. Ato kubmou deyok aryi a mi si ara, “Peres,” eboka si dobmai. 30Ura, yuma taruk tabwe biribmai mi deibmou. Ba, a mi si ara Zerah eboka si dobmai.

Currently Selected:

Kejadian Uram 38: MTG

Highlight

Copy

Compare