Kejadian Uram 37

Yusuf ab er du yabwe ab deyok

37:1-11

1Yakub bira er nai Ishak biryi yuk nang mutuk tingbindoka kuramwe mutuk si Kanaan dam kuramwe. 2Yakub er mabwe yaldakamwe nang kubde baramnyi to ara ato kuboka baramnyi. Yakub mi si Yusuf bira kwalina 17 baryi kibmou. Ara, er kabir tuba kunmouci, er du yabwe ab tonkwa bisam kambing toto, domba toto winibde kuramnyi. A nang sun kwin yabwe ara sun nai Yakub nerabwe Bilha ab, Zilpa ab aryi deiandei mabwe kuramnyi. A kuramnyi ani, Yusuf biryi sun nai Yakub bisi er du yabwe aryi yu kanya boboka malyi kimnamnyi ati, “Ni du yabwe aryi yu dinyi akwe kununung,” eboka sun nai dam nukmou. 3Ba, sun nai Yakub uruma si ara Israel eraminyi biryi er mi Yusuf bisi kanyi deiriramwe. Ba, er mabwe yuk mabwe nirya ara bita kanyi deirina kum kuramwe. Ara, Yusuf bira er wisi sirya danmou cok, deibmou mi deyok aryi er kanyi deiriramwe. A deyok aryi Yusuf ongon aling ara, “Bol teleb ongon aling asi wibdarur,” eboka arukamwe ba, wiamnyi. Akiryi Yusuf bira bol teleb ongon aling akwe ongoramwe. 4Uca, er du yabwe aryi diramnyi ara sun nai bira Yusuf bisi kanyi deiboka boukwe kimnamwe dinyi asi sirya bikmai. Ura, er du yabwe aryi Yusuf bisi teleb-teleb kiboka uram kaimna kum uca yu boramnyi. Ani, uram kaimangnyi ababyi yu asa eramnyi.

5Uki tentok tum ara Yusuf lengdera mabmou. Ura, a lengdera mabmou to er du yabwe dam nukmou. Ba, a lengdera nukmou uca, er du yabwe wanok yu bobmai. 6Yusuf biryi er du yabwe dam asi er lengdera mabmou to kuboka nukmou. Ara, ato ebmou, “Ni lengdera mabmana nukwan ati, kekendarur. 7Roti kiknin keica gandum wa in dam kunmabci, gandum du yabla sekoka koubde miningmab. Uca, ni gandum du yabla koubni asi ereboka tikmar. Ba, sun gandum du yabla ara daluboka ni gandum tikmara amwetam asi wengyanganmang asi asing eibman,” ebmou. 8Ba, er du yabwe aryi ato ebmai, “Kanda nun sienyi tikwandim ati, a lengdera mabmarim tenebmab?” ebmai. A lengdera nukmou ba, kekebmaici, wanok ersi yu bobmai.

9Ani, Yusuf biryi lengdera ton tubto mabmouci, er du yabwe dam asi tubto nukmou. Ara, ato ebmou, “Ni lengdera ton ato kuboka mabman. Kiting ab, wala ab, kurya koklombaryi ab aryi nisi sienyi tikeibmaningci, sun ngang ara dakdongoboka kinmaning,” asi eibman ebmou. 10Ani, a lengdera ara er nai keken ai ababyi nukmou. Uca, er nai Yakub biryi ersi erekdobmouci, ato ebmou. “Una lengdera mabmarim da? Kantonyi bisi kan du yabwe ab, ni ab, kan kwin ab aryi kisok luknubdongoboka molobkwamakitibyi do?” ebmou. 11Ato kuboka Yusuf er du yabwe aryi ersi yu akwe boramnyi. Bok, er nai Yakub bira Yusuf er lengdera maramwe dinyi kanyitam iya boramwe.

Yusuf bisi er du yabwe aryi Mesir nang asi dekdobmai deyok

37:12-36

12Liki tentok tum ara Yakub mabwe aryi sun nai bisam yabwe kambing toto, domba toto mutuk Sikhem dam winibde kunmai. 13Ura, sun nai Yakub er uruma si ara Israel biryi Yusuf bisi ato ebmou, “Kan du yabwe ara bisam kambing toto, domba toto Sikhem atei dam winirbinmang. Ati, kanda niryi kansi arukinyi ba, kan du yabwe binmang mutuk aminda binkwindim ati, a yarum!” ebmou. Ba, Yusuf biryi, “Yo nai, a yanganman!” ebmou. 14Ura, Israel biryi er mi Yusuf bisi ato ebmou, “Kan du yabwe asi aminda biminyi ura, sun telebto akwe bisam wininung ba, bisam bol kamuk telebto kurur kum? Ani, sun nong ababyi teleb akwe kunung kum? Ati, kan du yabwe dirbirum! Dibdeboka yaminyi ura, ni dam asi ato kunung ebdum,” ebmou. Ura, sun nai Yakub biryi Yusuf bisi mutuk si Hebron dam aryi bokdonokmou ba, Yusuf banmou ani, sirya Sikhem mutuk binmou. 15Ura, Yusuf biryi er du yabwe bisam winiramnyi dikum ingkiringmou. Uca, sal tentok ebdanmareici, anyi biryi ato eboka asibdenmou. “A mi, kanda unatoa ingkiringmarim do?” eboka asibmou. 16Uca, Yusuf biryi ato ebmou, “Ni du yabwe bisam wininung dikum ingkiringman. Ati, ni du yabwe bisam wininungci kunung dikum eterebnurum,” ebmou. 17Uca, anyi biryi ato ebmou, “Kan du yabwe ara a mutuk kuramnyi ani, anaboka baronkouci, ato ebmai, ‘Dotan mutuk bindobkub,’ eboka ananmai asi kekebmase ati, ebman,” ebmou. Ura, Yusuf aminda banmou ani, Dotan mutuk binmou ura, er du yabwe ab ebdanmai.

18Yusuf bira era dikum a bindoka dinmou uca, er du yabwe asing eibmou. Ba, Yusuf bira er du yabwe dam kobdob bana kabul talak ara er du yabwe aryi, “A yangaci ura, ukuboka obkwayeb,” eboka uram sisingdonmai. 19Ba, sun weit Yusuf sun dam binmou ura, ato ebmai, “Nun lengdera masina deyoknyi a yar ake! 20Anyi taleboka obibyi ura, me longna umbura ceanci dinyi asi dongobokub. Sirya dongobibyi ura, er nai bisi ato ebkwayeb, ‘Bai kam aryi oboka yibmar,’ ebokwayeb. Ato kubibyi ura, er lengdera marur dinyi kunubkwande kum?” ebmai. 21Uca, a moun yinmai dinyi ara er du Ruben kekebmouci, “Ni weit sun taruk dam aryi lebdeibkwan,” tenebwe ura, ato ebmou, “A mabwe, nun weit bisi ona ara mem!” ebmou. 22Ani, Ruben biryi tubto ato tenebmouci, ebmou, “Kam kibmaning dongobmabyi aryi tubto doboka er nai bisi bobinkwan,” tenebmouci, ato ebmou. “A mabwe ersi oboka ining sangdeirina ara mem! Eda, a mutuk dam asi er kam kibmaning tomobtaleboka me longna cebdanca umbura dongobkwayeb,” ebmou.

23Ura, Yusuf bira er du yabwe kunmai dam ukuryok tingbau bok, er du yabwe aryi talebmaici, er ongon aling kwiribkabokmai. A ongon aling ara iya bol telebto aling ongobmou asi kwiribkabokmai. 24Ura, sun weit Yusuf bisi boboka banmai ani, me longna cebdamwa umbura asi dobkwetebmai. 25Sirya dobkwetebyi ura, bukoka, “Kwaning yibkub,” tenen bukmai. Bukoka diramnyi asi ninyi mer unta deici bungdanmai nang ton yangai asi eibmai. A nang ara Ismael yala nang asi mutuk Gilead dam aryi tong teleb erande co si damar tuktuka toto, balsam toto, yuk-yuk dinyi toto boboka Mesir dam bobanmai asi eibmai. 26Ura, Yehuda biryi er kwit yabwe asi ato ebmou, “Nun weit Yusuf bisi oboka duknubmabyi ba, telebto dinyi ton da dobkwamab do? 27Ati, Ismael yala nang asi dekdobkub. Ersi ona ara kum kubkwayeb, nun mining weit kobdob asi obkwamab ara malyito ati ebman,” ebmou. Ba, er kwit yabwe yuk nang asi ato ebmou ba, sun a uram sirya kekebmai. 28Ura, sun weit Yusuf me kwena umbura dongobmaia ara wekoka dobmaici, Ismael yala nang Midian banmaici, unta deici bukoka yibanmai nang asi dekdobmai. Sun weit Yusuf kareboka dekmai ara keil perak uang 20 baryi dekmai. Ukuboka dekdobmai ba, Yusuf boboka Mesir mutuk bobde binmai. 29Ba, Ruben bira a dongobmai umbura yandoka diramwe uca, Yusuf kum danmou. Ura, Ruben er ongobmou ongon aling kwilikabokmou. 30Ura, tamuboka er kwit yabwe asi bindoka ato ebmou, “A mi ara kum danmar, ati nira dan bindobkwan da?”#37:30 Ruben biryi, “Nira dan bindobkwan da?” ebmou ara sun nai Yakub bisi ukubmar ena asi er ilil kubmou ati ato ebmou. ebmou.

31Ura, kambing tentok obmaici, Yusuf alib ongon aling kwiribdeibmaia doboka ining lubmai. 32Ura, “Yusuf alib ongon aling iya bol teleb aling ara er nai bisi bobindarur!” eboka ninyi ton bokdonokmai. Ura, ato ebdeibmai, “Nai, ongon aling demang eiboka a boyanmab. Ati, a ongon aling ara Yusuf ongoramwe ongon aling a kunum do? ebkwandum,” eboka bokdonokmai ba, sun nai Yakub dam bobinmai. 33Ba, Yakub biryi a ongon aling biti dirlilirderamwe uca, Yusuf alib ongoramwe ongon aling eibmou. Ura, Yakub biryi ato ebmou, “Yo, diba, ara ni mi Yusuf ongoramwe ongon aling a kunum. Ati, ni mi a kunum bai kam oyibmar,” ebmou. 34Ura, Yakub er mi boukwe kubmou ura, er ongon aling kwilikabokmouci, kaluna demang der arikdaburyi, a talak uki nirya boukwe boboka ai biti buramwe. 35Ba, er mabwe toto, er nermabwe toto aryi nenerderamnyi uca, “Nenemnina ni li,” tenebmouci, ato ebmou. “Kum, ni mi kanyi sungnurur ati, iya engebde kuranyi tok ani, din nang baraming mutuk wengbindoka asing eibnyi akwe ara kanyi darabkwanir,” ebmou. Ato kuboka Yakub biryi er mi Yusuf biti engeramwe. 36Bok, er mi Yusuf bira er du yabwe aryi Midian mutuknyi bisi dekdamnyi. Ba, a Midiannyi biryi boboka Mesir mutuk dengdorbinamwe. Bindoka Mesir mutuk sienyi bisi kalingna nang sienyi si Potifar biti bindoka dekdamwe. Ba, Yusuf bira Potifar ab kurandei.

Currently Selected:

Kejadian Uram 37: MTG

Highlight

Copy

Compare