Ezra Uram 9

Ezra biryi sun Israel nang malyi kuramnyi dinyi ati, Er Imtamnyi bisi molobliknibmou uram deyok

9:1-15

1Er Imtamnyi biti nun dama uk sirya dabmoubwe ura, sun Israel nang sien nang aryi ni Ezra dam yandoka ato ebmai, “Ur Israel nang ab, imam nang ab, Lewi yala nang ab ara, sun a mutuk dam yoka nang tonkwa talbaliboka kunub. Nunda Er Imtamnyi urasintam iya malyi kun dinyi kunung nang ab ninyi bun urubdandoka tonkwa kunub. Ara, sun Kanaan mutuk nang ab, Het yala nang ab, Feris yala nang ab, atei Yebus nang ab, Amon yala nang ab, Moab yala nang ab, Mesir mutuk nang ab, Amori yala nang ab ninyi bun urubdandoka talbaliboka kunub. 2Ara, a yuk mutuk nang ab tonkwa antaniboka kunubci, nunda Israel nang aryi akatei nang nermabwe asi doboka nun nerabwe ton kimdonub ura, ton doboka nun mabwe ati kamdeirinub. Ato kunub uca, nunda Israel nang ara Er Imtamnyi biryi wibdeiboka yuk lek kibdeiansou bok, sun Er Imtamnyi uram bingna kum nang ab talbalirsininub. Ara, nun sien nang aryi deyok kouboka manmalibsinibmoubwe uca, ur nang ababyi milisunung,” ebmai.

3Ni Ezra biryi ato uram ebmai asi kekebmase ura, ni kanya aryi, “Se unatoa ati Er Imtamnyi uram yan yanibmang do?” tenebse uca, ni kanya mambul weik kubnou ura, ni ongobdobmase aling ab, alib ongon aling weik nang ongoraming aling ab kwilikokabsiryi, kisok otong kwinibdandoka bam otong kwinibdase ura, ni kanya koulkoulya dakdobnou ba, tukwe ai burongyuryibinmase. 4Ura, sun Israel nang kankan aryi ilil kanya boboka Er Imtamnyi uram tuba kekeramnyi nang aryi yandoka ni dam bulubmai. Ara, “Nun kwit yabwe Israel nang ara sun Kanaan mutuk minob tamuryanamnyi nang ara iya malyi kun dinyi ton kunuramnyi se,” tenen deyok aryi ni dam bulubmai. Bok, nira tukwe ai ukuboka tuba buklobmase bok, sintam ninyi dama uk daramnyi kiting yakna kimbinmou. 5Tukwe ai buklobmase ani, sintam ninyi dama uk dan kiting yakna kibmou ura, ni nong orminingdanmase ara takloboka tikokmase. Tikokse ura, ongon aling kwiliklobmase ab weik nang ongoraming aling kwiliklobmase tuba ongobdobmasiryok, ni kutam ikdongoboka taruk lakokabsiryi, ni Nai Iya Erebdobnyi bisi uram sisikoka molobmase. 6Molonmase ara ato eboka molobliknibmase, “Nai Imtamnyi o, nun kwit yabwe Israel nang ara Kanaan mutuk nerabwe dobdai deyok aryi ni alyi mitik kum kubmanir. Nai Imtamnyi, nun malyi kun dinyi ab, wenebmasin to dinyi ab kurtabangnub dinyi ab ara langkarikde welerur ba, nun kisok bisiboka im asi bolibmanto kubmar. A deyok aryi ni urasin ereboka Kansi dibwelebdenman kum kubmanir. 7Minob nun abwe yabwe kuramnyi talak ababyi malyi kuramnyi to nunbabyi nun malyi kun dinyi ilinto kunub. Ara, nun Israel nang ab, nun weik sien nang ab, nun ninyi dama deirin nang imam nang ab aryi minob ura malyi dinyi kuramoubwe deyok aryi, kanda Imtamnyi biryi nunsi weneboka nun ordana nang taruk dam dobkareansoumwe. Uca, yuk mutuk weik sien nang yandoka nunda Israel nang muna kimdongoransei. Ara, nun kankan aryi ton nang asi oransei ba, ton yuk nang ara muna kibdongoboka nun atei aryi boboka yuk mutuk era mutuk bobindoka deirlorbaransei. Ura, tonda nun ordana nang aryi nun bona bon dinyi nirya daluroramnyi ba, ninyi nirya aryi, ‘Yuk mutuk weik sien nang aryi sunsi muna kibdongobsei,’ eboka nunsi ina ngilingnansei. 8Ato kuransei bok, ukuryok talak aryok Kanda Nai Imtamnyi nun Molonubnyi biryi nunsi kisal dangna dinyi karebsoumwe. Ara, Kanci nunda Israel nang asi wenen dinyi karebsoumwe bok, nun nirya asi kum obsoumwe. Eda, nun kankan aryi ninyi ton nang wibdeiboka tamuboka kalingsurum ba, nunda iya teleb mutuk karebmasoumwe mutuk Israel tubto tamuryanmab. Ara, yuk mutuk weik sien nang nunsi tuba taleransei bok, Iya Erebdobnyi Kanci nunsi boboka Kan molon ai dam boyanmasirimci, mangkau dinyi karebmasirim. Ura, Kanci nun kanya lengleng ebdeiboka nun asing ara elengdeininto kubmasirim. 9Yuk mutuk weik sien nang aryi nunsi tuba talesunung bok, Kanda nun Nai Imtamnyi biryi nunsi tanglosina kum kusurum. Eda, Kanda Iya Erebdobnyi biryi tuba kalingsurum deyok aryi sun Persia mutuk weik sien nang aryi nunda Israel nang ati boukwe kimnansei. Uca, sunci, ‘Sun mutuk tamurbindoka Er Imtamnyi ai dakamnyi asi tamuboka dobdarur,’ eansei. Tonda, Kanda Iya Erebdobnyi biryi nunda Yehuda mutuk Yerusalem atei tamuryanmab nang asi kalikoka lika ato kuransoumwe ba, nunci Kanda nun Nai Imtamnyi ai daksekamnyi asi tubto dobmoubwe.

10Ura, Nai Iya Erebdobnyi o, ukuryok ara nunci uram eboka libdandobman kum kubmasir. Kanci nunsi milisurum bok, nunci Kansi takloboka malyi kun dinyi iya kununub. Ara, Kanci nunsi, ‘Mem,’ eansoumwe uram asi nunci dangbisinub. A deyok aryi nun alyi weik kubmasir. 11Ati, Kanci, minob ura Kan uram ermurun nang nabi nang deib aryi nunsi ato eboka arukdeibmasoumwe, ‘Kanaan mutuk ara sunci wengbindoka kubkwandum mutuk nang ara iya malyi dinyi kun nang kunung ati, sunci a nang ab talbaliboka ninyi bun burdana mem. Ara, Kanaan mutuk nirya aryi iya malyi kun dinyi kunung. 12A deyok aryi sunci sun nermabwe asi akatei nang mabwe ati kamdeirina mem. Tonda, sunci akatei nermabwe doboka sun mabwe ati kamdeirina mem. Tonda, sunci, “Sun Kanaan nang ab antanibdeibdankwayeb,” tenen sun dam bindoka ninyi bun bukdandoka, “Nun kwit yabwe,” eboka taruk mururdongordana mem. Eda, sunci Er Imtamnyi uram kekebmunci, sun Kanaan nang dam bindoka ninyi bun burdana mem. Ato kuboka sun yuk kuramunyi ura, Kanaan mutuk ara sun dinyi iya kibkwansir. Tonda, sun deibdoba nang dinyi iya kubkwande. Er Imtamnyi biryi kisal daksici ba, sun tukwe ara koubmunyi ura, kwaning weik mabkwande. Tonda, co du ara weiktoto moubkwande. Ara, Kanaan mutuk yina-yina langdiboka yibmunyi ura, boubkwansir,’ ato eboka Kan wa irmilin nang aryi nunsi minob arukansei. 13Nai Iya Erebdobnyi, nunda malyi kun dinyi ilinto kuramoubwe deyok aryi Kanci nunsi wenebmasoumwe. Wenebmasoumwe ba, nunci mambul dinyi ilinto doramoubwe bok, Kanci nunsi boukwe weik kuransoumwe deyok aryi, nun nirya asi kum obsoumwe. Eda, nunda Israel nang kankan aryi ton nang asi wibdeiboka lebdeibmasoumwe ura, nunsi Yerusalem atei boyanmasoumwe. Ati, nun malyi kun dinyi ilinto bok, Kan wenesina ara mitikanun karebsoumwe. 14Ati, nunci tamuboka Kanci ebdeibmasoumwe uram asi dakbisiboka malyi dinyi ilinto kunung mutuk nang ab ner kaibdankwamatibyi do? Ara ukubman kum. Nunci ato kubtibyi ura, Kanci nunsi yu weik kuboka onmasutum ura, ton nang ara onmasutum bok, ton deici nang ara takdongobkwamasutum do? Ara ato kum ukubsutum. Eda, nirya oboka kum daneibsutuma. 15Nai Iya Erebdobnyi, nun Israel nang Molokunubnyi. Kanda Iya Telebnyi kurum. Ara, ninyi wenenmaminyi ura, kikimanto dinyi akwe dibliliboka kunurumnyi kurum. Nunda Israel nang ara Kanci wenebdeibmasoumwe bok, nun nirya asi kum obsoumwe. Eda, Israel nang kankan aryi ton nang asi lebdeibsoumwe ba, arub ababyi tuba kunmab. Ati, Nai Imtamnyi, nun malyi dinyi kununub ati Kan urasintam aryi lak ebmab. Nunda nun malyi deyok ati Kan urasintam bana ara kikib kum kuransir bok, nunci Kan dam yandoka nun malyi kun dinyi a kunum sirya lak ebmab.” Ato eboka Ezra biryi Er Imtamnyi bisi uram sisikoka molobliknibmou.

Currently Selected:

Ezra Uram 9: MTG

Highlight

Copy

Compare