Ezra Uram 8

Babel mutuk bobinamnyi nang asi Ezra ab tamuboka yanmai nang si kerek sengna uram deyok

8:1-30

1A kerek sekwamab nang si ara ni Ezra ab tonkwa Babel mutuk botanglorbinansei mutuk aryi anaboka Yerusalem tamuryanmoubwe nang si yuk-yuk kerek sekwamab. Ara, sun tamuryanmai nang si nirya ara kum sekwamab. Eda, sun deyok nong nang si akwe si siboka kerek sekwamab. A nang ara weik sienyi Artahsasta kalingnamwe talak aryi tamuryanmai nang sun si ara ato: 2-3Pinehas er deibdoba ara Gersom tamuryanmou; Ba, Itamar er deibdoba ara Daniel tamuryanmou; Ba, Daud er deibdoba ara Sekhanya mi Hatus tamuryanmou; Ba, Paros deibdoba ara Zakharia tamuryanmou. Ba, Zakharia ab tonkwa tamuryanmai nang ara ninyi sal akwe nukoka 150 baryi tamuryanmai. A nang sun si ara sun neik yala nang deibdoba kerek sengna sengdamnyi umbura sekdongobmai. 4Ba, Pahat-Moab deibdoba ara Zerahya mi Elyoenai tamuryanmou. Ba, Elyoenai ab tonkwa tamuryanmai nang ara ninyi sal akwe nukoka ninyi 200 baryi tamuryanmai; 5Ba, Zatu deibdoba ara Yahaziel mi Sekhanya tamuryanmou. Ba, er ab tonkwa tamuryanmai nang ara ninyi sal akwe nukoka 300 baryi tamuryanmai. 6Ba, Adin deibdoba ara Yonatan mi Ebed tamuryanmou. Ba, Ebed ab tonkwa tamuryanmai ara ninyi sal akwe nukoka ninyi 50 baryi yanmai; 7Ba, Elam deibdoba ara Atalya mi Yesaya tamuryanmou. Ba, Yesaya ab tonkwa tamuryanmai ara ninyi sal akwe nukoka ninyi 70 baryi tamuryanmai; 8Ba, Sefaca deibdoba ara Mikhael mi Zebaja tamuryanmou. Ba, Zebaja ab tonkwa tamuryanmai nang ara ninyi sal akwe nukoka ninyi 80 baryi tamuryanmai; 9Ba, Yoab deibdoba ara Yehiel mi Obaja tamuryanmou. Ba, Obaja ab tonkwa tamuryanmai nang ara ninyi sal akwe nukoka ninyi 218 baryi tamuryanmai; 10Ba, Bani deibdoba ara Yosifya mi Selomit tamuryanmou. Ba, Selomit ab tonkwa tamuryanmai nang ara sal akwe nukoka ninyi 160 baryi tamuryanmai; 11Ba, Bebai deibdoba ara Bebai mi Zakharia tamuryanmou. Ba, Zakharia ab tonkwa tamuryanmai nang ara sal akwe nukoka ninyi 28 baryi tamuryanmai; 12Ba, Azgad deibdoba ara Hakatan mi Yohanan tamuryanmou. Ba, Yohanan ab tonkwa tamuryanmai nang ara sal akwe nukoka ninyi 110 baryi tamuryanmai; 13Ba, Adonikam deibdoba nang tamuryanmai nang sun si ara Elifelet ab, Yehiel ab, Semaya ab tamuryanmai. A nang ara Ezra ab tonkwa kum tamuryanmai. Eda, kunmai ani, sunda aminda aryi tamuryanmai. Tonda, sun ab tonkwa tamuryanmai nang ara sal akwe nukoka ninyi 60 baryi tamuryanmai; 14Ba, Bigwai deibdoba ara Utai ab, Zabud ab tamuryanmarei. Ba, sun ab tonkwa tamuryanmai nang ara sal akwe nukoka ninyi 70 baryi nang tamuryanmai.

15Ni Ezra biryi sun Yerusalem atei binkwamnyi nang nirya asi naboka me si Ahawa kin bulubdeibmase ura, a me dala uki winiryi mabmoubwe. A mabmabuburyi, niryi sunsi diblilibde yibanmase uca, a nang nirya ara ur yuk Israel nang ab, ninyi dama deirin nang imam nang ab akwe miliryanmai asi eibmase bok, Lewi yala nang ara Er Imtamnyi ai wa irmilin nang ton kum yanmai asi eibmase. 16Ura, Lewi yala nang ton kum eibmase ura, niryi, “Lewi yala nang ababyi milibsiting,” tenebmase ura, ninyi toubnibaryi nang asi arukmase. Arukmase nang sunsi ara, Eliezer ab, Ariel ab, Semaya ab, Elnatan dunyi ab, Yarib ab, Elnatan weitnyi ab, Natan ab, Zakharia ab, Mesulam ab asi, “Lewi yala nang asi nambindarur,” eboka bokdonokmase. A nang ara sun atei nang kankan ara sien nang kuramnyi asi bokdonokmase. Ba, ninyi eteren nang kuramnyi asi bokdonokmase nang ara ninyi si Yoyarib ab, Elnatan ab, sun ab tonkwa bokdonokmase. 17Ara, niryi a nang asi ato eboka bokdonokmase, “Sunci Babel mutuk Lewi yala nang atei si Kasifya bindoka akatei sienyi si Ido ab er weit yabwe Er Imtamnyi ai wa irmilin nang ab asi ato ebdarur, ‘Ezra biryi sunsi ato ebdeibmasir, “Akatei nang ara Lewi yala nang kurandum ati, sunci sun kankan dam aryi Er Imtamnyi ai dam wa ibmilibkwaming nang ton bokeibmunyi ba, a nang ara nun ab tonkwa Yerusalem atei binkwayeb,” ebdeibmasir,’ ebdarur,” eboka bokdonokmase. 18Bokdonokmase ba, inirbinmai ani, sun ab Lewi yala nang ninyi mikbaryi ab tonkwa nun dam yanmai. Ara, nun Nai Imtamnyi biryi kanya namin aryi nunsi kalingdansou deyok aryi, Lewi yala nang mikbaryi aryi, “Nunbabyi Yerusalem atei binkwayeb,” tenen yanmai. A yanmai nang kankan ara Lewi mi Mahli deibdoba anyi si Serebya yanmou. Anyi bira teleb wa ina ati bikdobnyi kuramwe. Serebya ab, er mabwe ab, er du weit yabwe ab ara ninyi 18 baryi yanmai; 19Tonda, Lewi mi Merari deibdoba nang si Hasabya ab, Yesaya ab, sun du weit yabwe ab, sun mabwe ab ababyi nun dam yanmai. A nang ara ninyi 20 baryi sunbabyi, “Yerusalem atei tamurbinkwayeb,” tenen yanmai. 20Ura, tonda sun Lewi yala nang ibmiliboka Er Imtamnyi ai keta mambul weik wa dobdobkwamnyi nang ara ninyi 220 baryi yanmai. A nang sun abwe yabwe ara minob Israel mutuk tuba kuramnyi ura, Er Imtamnyi ai keta dam mambul wa iramnyi. Ara, minob ura Israel nang weik sienyi Daud ab er amwetam bun nang ab aryi, “Er Imtamnyi ai dam keta mambul wa ibkwandarur,” eboka a nang sun abwe yabwe asi arukamnyi. Ba, ukuryok ara sun deibdoba nang ara Babel mutuk tanglorbinamnyi ba, kuramnyi ani, “Yerusalem atei tamurbinkwayeb,” tenen yanmai nang ababyi sun si nirya sekdongobmoubwe.

21Ura, me Ahawa dala tuba kunmoubwe ai aryi niryi uram ato ebmase, “Yerusalem atei tamurbana kabul talak aryi nunci, ‘Nun damnyi Er Imtamnyi urasintam aryi luknubdongobkwayeb,’ tenen yina si teboka bukibiryi, Er Imtamnyi bisi molobkwanub,” ebmase. Ara, “Nunci, ‘Nai Imtamnyi, nun Babel mutuk aryi anaboka weik bisik binkwayeb ati, kanci nunsi bisik ai kaliksiminyi bok, nun ninyi wise babyi, nun mabwe nerabwe babyi, nun ukutoto bona babyi kaliksiminyi ba, binkwayeb,’ eboka molobkwayeb,” ebmase. 22Weik bisik ban ai ara, “Bisik ai yiban nang sun bona dalubdobtibyi,” tenen nang ilinto kuramnyi bok, niryi Persia mutuk weik sienyi bisi, “Kan yin doun nang ab, kuda deici bukoka ordan nang ab ilinto arukminyi ba, nunsi miliboka kalikwansing,” eboka molona alyi deyok ati kum molobmase. Niryi weik sienyi bisi, “Yin doun nang ara bobindoka kalingsina kum. Ato dinyi moloabtinyi ara alyi kimdeirirdan dinyi kubnute. Nun Nai Imtamnyi bira nunda Ersi ingkiring don nang asi lebdeiboka kalingsurur. Bok, sun Ersi takloboka bindobingnyi nang ara Er Imtamnyi biryi yu weik aryi sunsi mambul dinyi mikib kuboka takurdeirirande,” eamoubwe. 23Ati, niryi ebdeibmase to, nunci nun damnyi luknubdandoka yina si teboka bukibiryi, Er Imtamnyi bisi, “Nai, kaliksurum,” eboka molobmoubwe. Ura, nun molobmoubwe to Er Imtamnyi biryi kekebmouci, nunda bisik noutam baramoubwe nang asi tuba-tuba kalingnansou.

24Ura, nun anarona kabul talak aryi, ni Ezra biryi ninyi dama deirin nang imam nang asi dua kibdob nang wiboka ninyi amolbaryi wibdeibmase. A nang sun si ara Serebya ab, Hasabya ab, sun ab tonkwa wa inkwamnyi nang ninyi takubaryi wibdeibmase. 25Ura, niryi a nang ab, sun wa irmilin nang ab asi ato ebmase, “Er Imtamnyi ai wa ina ati dengna weik dinyi dobdobmoubwe asi sunci Yerusalem atei bobindarur,” ebmase. Ara, “Persia mutuk weik sienyi ab, er uram dorkaren nang ab aryi nun dam karebmasei dengna weik dinyi ton bobmunci, weik sienyi amwetam nang aryi karebmasei dengna weik dinyi ton bobmunci, nun kwit yabwe Israel nang nun ab tonkwa kum binkwamoubwe nang aryi karebmasei dengna weik dinyi ton bobmunci, Yerusalem atei bobindarur,” ebmase. Ura, niryi a dinyi nirya ikin kiklina si timbangan dub deibdongoboka kiklibdeibmase ura, sun a dinyi bobinkwamnyi nang sun taruk dam karebmase. 26Ara, dengna weik dinyi si perak ara 22.000 kilogram dobdobmoubwe asi timbang deibdongoboka kiklibdeibmase ura, sun taruk dam karebmase. Ba, perak aryi makdongoboka kiknin dinyi ara 3.400 kilogram baryi dobdobmoubwe asi timbang deibdongoboka kiklibdeibmase ura, sun taruk dam karebmase. Ba, emas ara 3.400 kilogram baryi dobdobmoubwe asi timbang deibdongoboka kiklibdeibmase ura, sun taruk dam karebmase. A dinyi nirya ara Er Imtamnyi bisi dama deirin dinyi yuk wibdeiboka niryi, “Yerusalem atei bobindarur,” eboka sun taruk dam karebmase. 27Ba, kat moyok emas aryi kiknin dinyi ara 20 baryi dobdobmoubwe asi niryi sun taruk dam karebmase. A moyok ara timbang deibdongoboka kiklibdeibmase ura, 8 kilogram baryi kiklibdeibmase. A moyok dengna ara antaniboka dengna weik dinyi si dirham 1.000 baryi dengnamnyi. Ba, mangdongon dinyi ara keil si tembaga aryi kiknin dinyi bok emas mil dangding erande ato dinyi aryi kiknin dinyi bitinyi asi dobdobmoubwe asi niryi sun taruk dam karebmase. 28Ura, ni Ezra biryi sun Er Iya Erebdobnyi dama Yerusalem atei bobinkwamnyi nang asi ato ebmase, “Sunda Er Imtamnyi biryi wibdeiboka, ‘Ni wa akwe ibkwanung,’ tenen tikeibsou nang kundarur. Tonda, sun bobinkwandum dinyi ababyi ara Er Iya Erebdobnyi biryi a dinyi ara, ‘Ni dinyi akwe,’ tenen yuk wibdeibmou dinyi asi bobinkwandum. A bobkwandum dinyi ara emas aryi kiknin dinyi ab, perak aryi kiknin dinyi ab ara ninyi aryi kanya teleb asa aryi, ‘Er Imtamnyi bira nun abwe yabwe aryi moloraminyi bisi dama deibkwayeb dinyi,’ tenen Er Iya Erebdobnyi bisi dama deibmai. 29Ati, sunci a dengna weik dinyi nirya boboka Yerusalem atei bobaramunyi ura, diboka dibliliboka kalikwandarur. Bobaramunyi ani, Yerusalem atei bobimunyi ura, sunci a dinyi nirya Er Imtamnyi ai umbura dam bowengbindarur. Bowengbimunyi ura, sunci a dinyi nirya timbang deibdongoboka kiklibkwandarur. Ara, sun ninyi dama deirin nang sien nang urasin dam ab, sun Lewi yala nang urasin dam ab, sun Israel yala nang sien nang urasin dam ab, sunci a dinyi nirya timbang deibdongoboka kiklibkwandarur,” ebmase. 30Ura, sun ninyi dama deirin nang imam nang ab, Lewi yala nang ab aryi, “A dengna weik dinyi emas ab perak ab nun Nai Er Iya Erebdobnyi ai wa ina ati bobinkwayeb,” tenen dobdobmai.

Ezra ab er ab tonkwa milibmai nang ara Yerusalem atei yanmai uram deyok

8:31-36

31Ura, ilila me si Ahawa yibinamwe me kin dam aryi anabdobmoubwe tum ara wala yuma wala tanggal 12 aryi anabmoubwe. Ba, bisik noutam yangaramoubwe nirya ara Er Iya Erebdobnyi taruk mikib aryi kalikoka boyangaransou ba, nun mar ordana nang ab, bai kuboka ukula dorkiringna nang ab taruk dam ara lemdeiriransou teleb kuboka yangaramoubwe. 32Wala dumbaryi bindoka bisik noutam baramoubwe ani, Yerusalem atei yanmoubwe. Sirya yanmoubwe ura, uki winiryi ur kunmoubwe. 33Ani, uki dumbaryi tum berekwe ura, nun boramoubwe dengna weik keil perak ab, emas ab nirya boboka Er Imtamnyi ai dam bobinmoubwe. Bobinmoubwe ura, nunci a dengna weik dinyi nirya timbang deibdongoboka kiklibdeibmoubwe. Ara, Uria mi ninyi dama deirinanyi imam si Meremot biryi kalikmasou bok, nunci nun boamoubwe dengna weik dinyi timbang deibdongobmoubwe. Tonda, Pinehas mi ninyi dama deirinanyi si Eleazar biryi kalikmilibmou ba, Lewi yala nang Yesua mi Yozabad ab, Binui mi Noaja ab sunsi wa ibmilibmai ura, nunci nun boramoubwe dinyi nirya timbang deibdongoboka kiklibdeibmoubwe. 34A boramoubwe dinyi ara Er Imtamnyi wa ina ati karen dinyi nirya asi timbang deibdongoboka kiklibdeibmoubwe to ikin ara nukoka kerek sekdongobmai.

35Ba, a tum ababyi nunda Babel mutuk botanglorbinansei asi Yerusalem atei tamuboka yanmoubwe nang nirya ababyi Er Iya Erebdobnyi biti nun dama deiboka uk dabmoubwe. Ara, nun Israel nang nirya ara ninyi yala amolbaryi kuramoubwe to, nunda bisam sapi yim amolbaryi oboka uk dabmoubwe. Ba, nunci tabak-tabak eboka bisam domba yim ara 96 baryi oboka uk dabmoubwe. Ba, bisam domba nerkalkalirlon dinyi ara 77 baryi oboka uk dabmoubwe. Ba, nunci, “Er Imtamnyi biryi nun malyi kun dinyi kilibsute,” tenen bisam kambing yim ara amolbaryi oboka uk dabmoubwe. A nirya oboka uk dabmoubwe ara Er Imtamnyi biti nun dama deibmoubwe. 36Er Iya Erebdobnyi bisi nun dama sirya deibmoubwe ura, nunci Persia mutuk weik sienyi biryi deibmou kerek sengna asi doboka weik sienyi amwetam bun nang ara me Efrat kouboka kitingbantam mutuk kalingna nang sun taruk dam karebmoubwe. Sirya nukmai ura, Persia weik sienyi amwetam bun nang aryi sun nai weik sienyi arukmou uram kunuboka nun Yahudi nang ab Er Imtamnyi ai wa ina ati miliransei.

Currently Selected:

Ezra Uram 8: MTG

Highlight

Copy

Compare