Ezra Uram 7

Persia mutuk weik sienyi biryi Ezra bisi, “Kanci Yerusalem atei biminyi ura, sun Yahudi nang asi, ‘Ato-ato kuboka Er Imtamnyi bisi molobde binkwayeb,’ eboka eterebkwandum,” eboka arukdeibmou to, Yerusalem atei yanmou uram deyok

7:1-28

1A nirya kuramnyi ani, sirya kubmai ura, ukuryok sienyi si Artahsasta Persia weik sienyi kibmou. Weik sienyi Artahsasta tuba kalingnamwe ba, Lewi yalanyi si Ezra bira Babel mutuk aryi anaboka Yerusalem atei binmou. Anyi Ezra bira Seraya mi kuramwe ba, er abwe si ara Azarya. 2-5Anyi Ezra bira Lewi yalanyi kuramwe ba, er abwe kisok ara Er Imtamnyi biti dama deirina du kibdobnyi si Harun. Ezra er abwe yabwe si yuk-yuk ara ato: Er abwe kisok Harun biryi Eleazar deibmou; Eleazar biryi Pinehas deibmou; Pinehas biryi Abisua deibmou; Abisua biryi Buki deibmou; Buki biryi Uzi deibmou; Uzi biryi Zerahya deibmou; Zerahya biryi Merayot deibmou. Merayot biryi Azarya deibmou; Azarya biryi Amarya deibmou; Amarya biryi Ahitub deibmou; Ahitub biryi Zadok deibmou; Zadok biryi Salum deibmou; Salum biryi Hilkia deibmou; Hilkia biryi Azarya deibmou; Azarya biryi Seraya deibmou; Ura, Seraya biryi Ezra deibmou. 6Ezra bira Persia mutuk weik sienyi biryi er arungnanyi tikeiamwe ba, erda Musa kerek sengna bingnanyi kuramwe. Ara, sun Israel nang moloraminyi Er Iya Erebdobnyi biryi Musa bisi kareamwe kerek sengna ara erda nirya bingdamunyi kuramwe. Ura, er moloramunyi Er Iya Erebdobnyi biryi ersi dirniliramwe deyok aryi, Ezra biryi teleb tenebmou to moloramwe dinyi ukutotoa ara Persia mutuk weik sienyi biryi ersi nirya karebmou. Ura, Ezra bira Babel mutuk aryi anabdobmou ura, Yerusalem atei yanmou.

7Ara, weik sienyi si Artahsasta sienyi kibmou ba, kuramnyi ani, kwalina tabaryi dinyi kum kwalibmai bok, Ezra ab, yuk Israel nang ab ersi miliboka Yerusalem atei yanmai. A yanmai nang ara deici mikbaryi yanmai. Ton nang ara Er Iya Erebdobnyi bisi dama deirin nang imam nang kuramiryi, yanmai. Yuk nang ara Lewi yala nang yuk nang kuramiryi, yanmai. Ton nang ara Er Iya Erebdobnyi ai mot semna nang kuramiryi, yanmai. Ba, yuk nang ara Er Iya Erebdobnyi ai bisik bublan dam kalingna nang kuramiryi, yanmai. Ura, tonda yuk nang ara Israel nang kuma bok, Er Iya Erebdobnyi ai dam keta mambul wa ibkwamnyi ati, sunbabyi Babel mutuk aryi anaboka Yerusalem atei yanmai. 8-9Weik sienyi Artahsasta kalingnamwe talak ara kwalina nabaryi sirya kwalibmai ura, wala ara yuma wala tanggal satu sirya berekmou ura, Ezra ab er ab tonkwa banmai nang ara Babel mutuk aryi anaboka baramnyi. Ura, weik bisik baramnyi ani, wala ara amubaryi wala sirya dobmou ura, Yerusalem atei yanmai. Er Nai Iya Erebdobnyi biryi Ezra bisi teleb kubdeiboka dirniliramwe deyok aryi, Persia mutuk weik sienyi biryi Ezra molobmaci tok nirya kunurdeiriramwe. 10Ara, Ezra biryi Er Iya Erebdobnyi Musa deici aryi kareamwe uram, “Ukubdarur-ukuna mem,” erdeirin uram asi tanglona kum uca dibliliboka kunuramwe deyok aryi Er Iya Erebdobnyi biryi ersi teleb kubdeiboka dirniliramwe. Tonda, Ezra biryi sun Israel nang urasintam aryi Er Imtamnyi erdeirin uram yuk-yuk asi etereramwe deyok aryi Er Imtamnyi biryi ersi kisal dakoka kalingnamwe.

11Ura, weik sienyi Artahsasta biryi, “Ezra bira ni bokdonokmasinyi kurur ati lak kibdeibkwan,” tenebmouci, kerek sengna ton sekdeibmou. Sirya sekdeiboka Ezra bisi karebmou ura, erda Er Imtamnyi biti dama deirinanyi imam biryi a kerek sengna bobmouci, binmou. Ezra bira Er Iya Erebdobnyi uram sun Israel nang urasintam aryi, “Ukubdarur-ukuna mem,” en uram asi diboka bikoka dirliliramunyi kuramwe. Persia mutuk weik sienyi biryi sekdeibmou kerek sengna si konga ara ato:

12“Ni Artahsasta bira yuk weik sien nang erebkaboka Iya Erebdobnyi biryi imam Ezra bira Er Imtamnyi dama deirinanyi bisi, ‘Teleb,’ ebmakin. Kanda Er Imtamnyi, imtam yin doun nang sienyi biryi erdeirin uram kerek sengna bingnanyi bisi kibdobmakin. 13Ukuryok niryi uram dobkwetebman ara ato eboka dobkwetebman: Unanyi biryi ni kalingnan mutuk kuraming nang aryi ‘Yerusalem atei bindobtibyi,’ tenebingnyi nang ara kan ab tonkwa ur binkwaming. Ara, Israel nang ur talyi nang babyi, Er Imtamnyi bisi dama deirin nang babyi, Lewi yala nang yuk nang babyi ur binkwaming ati ebman. 14Ara, ato deyok aryi, ni Persia mutuk weik sienyi ab, ni uram dorkaren nang ninyi tabaryi nang ab aryi kanda Ezra bisi, ‘Yerusalem atei birum,’ eboka bokdonokmakib. Ara, ‘Sun Yerusalem atei nang ab, Yehuda mutuk yuk atei-yuk atei nang ab ara una kuboka kuraming do?’ tenen dirkiringbirum. Ara, kanci talerandim uram ara Er Imtamnyi biryi erdeirin uram ati, ‘Diboka taleraming do kum do?’ tenen dirkiringbirum. 15Ura, tonda kanci dengna weik keil emas ab perak ab boboka Yerusalem atei binkwandim. A dengna weik dinyi ara ni Persia mutuk weik sienyi ab, ni uram dorkaren nang ab aryi nun kanya lobdob asa aryi Israel nang sun Molondarurnyi Yerusalem atei kururnyi biti karebkwamab ati kanci bobinkwandim. 16Ura, tonda weik atei Babel mutuk nang aryi karebkingnyi emas ab perak ab ababyi bobinkwandim. Tonda, Er Imtamnyi bisi dama deirin nang ab, yuk Yahudi nang ab aryi, ‘Nunda Israel nang Molonubnyi Yerusalem atei kururnyi biti nun kanya lobdob asa aryi karebkwayeb,’ tenen dengna weik keil si perak ab emas karebingnyi ba, kanci dobdobminyi ura, Yerusalem atei bobinkwandim. 17Kan Ezra biryi a dengna weik dinyi dobminci, bisam sapi yim totoa ab, bisam domba yim totoa ab, bisam domba nerkalkalirlon domba totoa ababyi dekwandum. Tonda, ‘Er Imtamnyi bisi dama deibkwayeb,’ tenen kanci gandum ab, co du yung ab dekminyi ura, Er Imtamnyi bisi dama deibkwandim. Tonda, a dekwandim sapi ab, domba ab nirya asi doboka Er Imtamnyi bisi dama deibkwandim. Ara, Er Imtamnyi Yerusalem atei kururnyi biti keil dukoka don ai deici oboka uk dabkwandum. 18Niryi, ‘Ato kubdum,’ eboka arukmakin bok, perak ab emas ab kablobminyi dinyi ara kan ab kan du weit yabwe ab aryi teleb tenebmunyi tok, kunubdeibkwandum. Ara, Er Imtamnyi biryi teleb tenerur to kunubdeiboka sunci perak ab emas ab kablobmunyi dinyi ur bobdobdarur. 19Tonda, yuk-yuk deirin dinyi sirya karebmakin asi kanci doboka bobminyi ura, Er Imtamnyi urasintam bindoka bobminci, Er Imtamnyi ai umbura Yerusalem atei dam deibkwandum. 20Tonda, Er Imtamnyi ai wa ina ati yuk dinyi imun kubsici ura, kanci, ‘Weik sienyi dengna weik dinyi ur bobkwayeb,’ tenen molobminyi ura, ni talenun dengna weik dinyi kalingnanyi biryi kunubdeiboka kansi karebkwankir. 21Ura, tonda ni weik sienyi Artahsasta biryi me Efrat kouboka kitingbantam mutuk co bok deirin sangkol kalingna nang ati uram ara ato eboka arukman: Er Imtamnyi dama deirinanyi si Ezra bira Er Imtamnyi imtam yin doun nang sienyi biryi karebmou kerek sengna nirya bingdurnyi biryi sunsi utotoa nirya molobsici ura, sunci ton suktaleboka karena mem. Erda nirya ukubmaning karebkwandarur. 22Dengna weik dinyi si perak ikin ara 3.400 kilogram baryi kikliboka karebkwandarur. Tonda, gandum du ikin ara 220.000 liter baryi kikliboka karebkwandarur. Tonda, co anggur du yung me ikin ara 2.200 liter baryi kikliboka karebkwandarur. Tonda, co zaitun du yung me ara 2.200 liter baryi kikliboka karebkwandarur. Tonda, garam ara nung kum wamliboka karebkwandarur,” eboka arukdeibse. 23“Er Imtamnyi, imtam yin doun nang sienyi biryi Er ai deyok ati arukdeiansici dinyi ara sunci kanya busul kuboka nirya kunubkwandum. Sunci a dinyi nirya kununa kum kubmunyi ura, Er Imtamnyi biryi nunsi obsicei. Ara, ni Persia mutuk weik sienyi ab, ni mabwe ab asi Er Imtamnyi biryi yu kun dinyi ara kum obminikwansurur ati sunci ato kubdarur. 24Ura, tonda ni weik sienyi Artahsasta biryi sunda pajak dengna molorandum nang asi ato eboka lak ebmakin: Er Imtamnyi bisi dama deirin nang asi sunci, ‘Weik sienyi bisi pajak dengna karebdarur,’ eboka molona mem. Tonda, Lewi yala nang yuk nang ababyi sunci pajak dengna molona mem. Tonda, Er Imtamnyi ai mot semna nang ab, Er Imtamnyi ai bisik bublan dam kalingna nang ab, Er Imtamnyi ai dam keta mambul wa irmilin nang ab ara sunci, ‘Weik sienyi bisi pajak dengna karebdarur,’ eboka molona mem. 25Ba, ni kwit Ezra, kan Molorumnyi biryi kansi diboka bingna dinyi kareankou to kanci ninyi boboka menengna nang ab, ninyi malyi kun deyok lilin nang ab wiboka tikeibdum. A nang aryi me Efrat kouboka kitingbantam mutuk kuraming nang sun malyi kun dinyi liliboka kalikwaming ati kanci tikeibdum. Sirya tikeibminyi ura, sun a mutuk kuraming nang nirya ara kan Molorumnyi biryi erdeirin uram bingnung nang babyi kum bingnung nang babyi kanci, ‘Ato kubdarur-ato kuna mem,’ eboka eterebkwandum. 26Ba, unanyi-unaner aryi kan Molorumnyi biryi erdeirin uram ab, ni Persia mutuk weik sienyi biryi erdeirin uram kum kunubingnyi nang ara wenebdarur. Ara, ton nang ara weneboka obdarur. Ba, ton yuk nang ara eratoto mutuk donokdarur. Ba, ton yuk nang ara wenebmunci, sun ai ton tukwe ton bona bon dinyi ton dobdarur. Tonda, yuk nang asi malyi kun nang wenen ai dongobdarur. Ni Artahsasta biryi a kunum sirya ebdeibmakin.” Ato eboka Persia mutuk weik sienyi biryi Ezra bisi kerek sekeibmou.

27Ura, Ezra biryi Er Iya Erebdobnyi bisi ato eboka kibdobmou, “Nai Imtamnyi, kanda nun abwe yabwe babyi, nunda sun deibdoba nang babyi molokunubnyi kurum ati, niryi kansi si weik erebdeiboka kibdobmakin. Kanda Iya Erebdobnyi biryi Persia mutuk weik sienyi kanyatam asi arukmoumwe ba, weik sienyi biryi, ‘Er Imtamnyi ai Yerusalem atei dobdarur,’ eboka arukmasou ba, sirya dobdobmab ati niryi kansi weik ebmakin. 28Ura, tonda Nai Iya Erebdobnyi, Kanci Persia mutuk weik sienyi ab, er uram dorkaren nang ab, er amwetam bun nang weik nang ab asi kanya teleb karebmoumwe ba, sunci niti teleb kanya boranei ani, ukuryok ababyi bonunung.” Ato eboka Ezra biryi Er Imtamnyi bisi kisal dakmou. Ura, Ezra biryi Babel mutuk aryi kum anabmou bok, erci ato ebmou, “Ni Nai Imtamnyi taruk mikib aryi nisi kalingnanou ati lak kubmou deyok aryi, ni kanya ara katabum ebdeibnou. Ati, niryi Israel nang ninyi mikbaryi ninyi bon nang wiboka bulubdeibse. A nang ara ni ab tonkwa Yerusalem bindobkwayeb nang wiboka bulubdeibse,” ebmou.

Currently Selected:

Ezra Uram 7: MTG

Highlight

Copy

Compare