Ezra Uram 6

Weik sienyi Koresh biryi Israel nang asi, “Er Imtamnyi ai Yerusalem dam ur dorbindarur,” eboka arukamwe kerek sengna asi tamuboka eibmai uram deyok

6:1-12

1Weik sienyi Darius biryi ninyi si Tatnai ab, er kwit yabwe ab aryi kerek sekdeibmai kerek sengna asi sirya doboka nukmou ura, erci er arungna nang asi arukmou. Ba, sun minob kuramnyi weik sien nang aryi kerek sengna deirin ai bindoka ingkirikdenin yibinmai. Ara, “Minob kalingnamwe weik sienyi Koresh biryi sun Yahudi nang asi, ‘Er Imtamnyi biti dama deirin ai ur dobdarur,’ eboka sekeiamwe ara dib ebmou do, kum do?” tenen ingkirikdenin yibinmai. 2Ingkirikde yibinmai ani, diba, weik sienyi Koresh biryi minob sekeiamwe kerek sengna asi sunci eiboka dobmai. Ara, sien atei Media mutuk wiliba kalikoka bun atei si Ahmeta atei bindoka sunci a kerek sengna ara Koresh biryi minob arukmou uram deyok kerek sekeiamnyi asi eiboka dobmai. Asing eiboka nukmai ba, a kerek sengna ara kitiboka deirin dinyi deici asi sekoka deiamnyi uram deyok ara ato eboka sekamnyi,

“Weik sienyi biryi uram sekwetebmou lak ena uram: 3Ni Koresh weik sienyi kibmase ura, kwalina yuma kwalina kalingnansiryi, niryi Er Imtamnyi biti dama deirin ai Yerusalem atei daksekamnyi ai ati uram dobkwetebmasiryi, ato eboka arukmase: Er Imtamnyi biti dama deirin ai ara tanglona kum uca, ur tubto tamuboka dobdarur. Ba, akai umbura ara Er Imtamnyi wa in nang aryi Er Imtamnyi bisi dama deiboka uk daboka kimkwaming. Akai dangdang cang ara 27 meter baryi kikliboka dobkwandarur. Ba, akai ila ara 27 meter baryi kikliboka dobkwandarur. 4Ba, akai abilinga ara ilila keil-ilila keil dukdandoka dobmunci, langlang winiryi kiboka dobdarur. Tonda, co abilinga ara tab tentok tablakdongoboka dobkwandarur. Ba, akai dona dengna ara ni talebse mutuk co bok deirinanyi nirya dekwandur. 5Ba, tonda minob kalingnamwe weik sienyi Nebukadnezar biryi Yerusalem atei muna kibdongobmouci, Er Imtamnyi ai deiriramnyi dinyi dalubdobmoua asi niryi sun Yahudi nang asi tamubkarebkwan. Ara, niryi arukman ati, ni arungna nang ara dengna weik keil si emas ab, perak ab Babel mutuk dam boyanamnyi dinyi nirya asi tamubkarebkwaming. Ba, Yerusalem atei Er Imtamnyi ai ara minob doamnyi ai olong asi walaboka tubto tamuboka dobokabmunci, a dinyi nirya ara Er Imtamnyi ai akwe deibkwandarur! Nira weik sienyi Koresh biryi arukmasin uram a kunum sirya ebmasin ara kerek sengna deib aryi dobkwetebman,” ato eboka Koresh biryi sekdeiamwe.

6Ato eboka kerek sekdeiamwe uram asing eiboka weik sienyi Darius urasintam aryi nukmai ura, Darius biryi er amwetam bunanyi Tatnai ab, er kwit yabwe ab asi tamuboka kerek sengna sekdeibmou. Ara, erci ato eboka kerek sekdeibmou, “Ni weik sienyi Darius biryi kanda ni amwetam bunanyi Tatnai me Efrat kouboka kitingbantam mutuk kurandimnyi ab, ton nun kwit Syetar-Boznai ab asi, ‘Teleb,’ ebmasin. Tonda, sun ab tonkwa neik wa irmilirandum nang me Efrat kouboka kitingbantam mutuk kurandum nang ababyi, ‘Teleb,’ ebmasin. Minob kalingnamwe weik sienyi Koresh biryi sun Yahudi nang asi, ‘Er Imtamnyi ai daksekamnyi asi tamuboka ur dobdarur,’ eboka dobkwetebmou deyok aryi, sun Yahudi nang aryi Er Imtamnyi bisi molon ai tamuboka ur doranung. Ati, sunci sun Yahudi nang wa asi bisik sengna mem. Eda, sunci Yerusalem atei aryi anaboka sun atei yuk-yuk bindobdarur. 7Sunci Er Imtamnyi ai dona bisik sengminingna kum. Ni amwetam bunanyi Yehuda mutuk weiknyi ab, sun Yahudi nang sien nang ab aryi Er Imtamnyi ai minob doamnyi ai olong akwe ur dobkwanung. 8Ura, tonda sunbabyi, ‘Sun Yahudi nang ara Er Imtamnyi ai donung ara uki dangbisina kum uca ola dobkwaming,’ tenen sun Yahudi nang sien nang asi dengna weik dinyi ola karebkwandarur. Ara, sunda ni wa irmilin nang me Efrat kouboka kitingbantam kalingnandum nang aryi sun mutuk nang asi, ‘Weik sienyi bisi dengna weik dinyi karebdarur,’ eboka molorandum to, dengna weik dinyi doboka ai miningnandum dinyi ati ebman. Sunci a dengna weik dinyi ilinto aryi ton dinyi doboka sun Yahudi nang asi karebdarur ati ebman. Er Imtamnyi ai don deyok ati ni Darius biryi sunsi arukmasin. 9Ura, tonda sun Yahudi nang imun kubmaci dinyi yuk dinyi ababyi sunci karenkwandarur. Ara, bisam sapi yim nerbalbalingmaci bisam karebkwandarur. Tonda, bisam domba yim karebkwandarur. Tonda, bisam domba mi karebkwandarur. Ara, Er Imtamnyi bira im ton tukwe ton kiknibmounyi biti uk dabkwamangnyi dinyi karenkwandarur. Ura, tonda gandum ab, garam ab, co anggur du yung me ab, buna yun me ababyi sunci karenkwandarur. Ara, Yerusalem atei kuraming nang Er Imtamnyi bisi dama deirin nang aryi ebingnyi to a nirya sunsi karenkwandarur. A karerkwanduma ara a uki berengnande nirya ton lourina kum uca, karermurunkwandarur. 10Ara, ‘Sun Yahudi nang aryi Er Imtamnyi, imtam yin doun nang sienyi biti kanya teleb kimdeirina kareboka sun dama deiboka uk dankwanung,’ tenen a dinyi nirya sunsi karebkwandarur. ‘Sirya uk dabingnyi ura, sunci ni weik sienyi ab, ni mabwe ab ati Er Imtamnyi bisi kisal dangna dinyi molobliknibkwansing,’ ati niryi sunsi arukmasin. 11Ura, sunsi ton arukmasin ara ato: Unanyi biryi ni arukmasin uram asi dakbisibingnyi nang ara ato kuboka weneboka obkwandarur. Ni uram dakbisibmarinyi er mining ai abyokomna tentok kwiniboka taici debmunyi ura, anyi lukdongoboka ikeibkwandarur. Ba, er ai ara dakaboka kum daneibdarur. 12Ba, Er Imtamnyi bira, ‘Yerusalem atei aryi Ni si asi erebdeibkwanung,’ tenebunyi biryi ni arukmanyi uram dakbisibingnyi nang ab, ‘Er Imtamnyi ai doraming asi bisik sektibyi,’ tenen nang ab asi Erci obminikwande. Ara, weik sien nang babyi, yuk sien atei-yuk sien atei nang babyi, ‘Er Imtamnyi ai doraming asi bisik sektibyi,’ tenen nang nirya asi Erci obminikwande. A uram dobkweteboka arukmasinanyi si ara ni Darius biryi arukmasin. Ati, sunci ni arukmasin to kuboka diboka kunubkwandarur,” ato eboka Darius biryi kerek sekeibmou.

Er Imtamnyi ai doramnyi sirya dobmaici, Er Imtamnyi ai bublan kukmai ura, weik kwalina si Paskah takloamnyi asi tamuboka yubkalibmai uram deyok

6:13-22

13Weik sienyi Darius biryi kerek sengna deib aryi arukmou to, me Efrat kouboka kitingbantam mutuk weiknyi si Tatnai ab, er kwit Syetar-Boznai ab, sun neik wa irmilin nang ab aryi ton dangbisirdena kum uca nirya kunubde binmai. 14Ba, Er Imtamnyi uram ermurun nang si Hagai ab, Ido mi Zakharia ab aryi Er Imtamnyi uram lak erandei to, sun Yahudi nang sien nang aryi, “Er Imtamnyi ai dona tubto dobmurubkwayeb,” eramnyi ba, sun Yahudi nang aryi akai asi ola dobmai. Ara, sun Nai Er Imtamnyi biryi arukmou uram ara sun Persia mutuk weik sien nang si Koresh ab, Darius ab, Artahsasta ab aryi kekebmaici, sunbabyi neik uram arukmai uca, sun Yahudi nang aryi Er Imtamnyi ai sirya dobmai.

15Er Imtamnyi ai sirya dobmai kwalina ara Darius weik sienyi kiamwe talak nabaryi kwalina kimbinmou bok, sirya dobmai. Ara, wala si Adar eramnyi wala dobmou ba, uki winiryi tum berekmou ura, sunci Er Imtamnyi molon ai sirya dobdongobmai.

16Ura, sun Israel nang ab, Er Imtamnyi bisi dama deirin nang ab, sun Lewi yala nang yuk nang ab, tonda sun Babel mutuk bobinamnyi nang asi tamuryanmai nang yuk nang ab sun nirya aryi, “Er Imtamnyi ai a kunum sirya dobdongobmab,” tenen kilkil kanya boboka mot seboka Er Imtamnyi si weik ebmai. 17Ura, “Er Imtamnyi ai bublan kukwayeb,” tenen sunci bisam oboka uk dam ai ara bisam si sapi yim ara 100 baryi oboka uk dabmai. Ba, bisam domba yim ara 200 baryi oboka uk dabmai. Ba, tonda domba nerbalbalingna ara 400 baryi oboka uk dabmai. Ba, Israel nang nirya sun malyi kun dinyi kilina ati bisam oboka uk dabmai. Ara, bisam kambing yim asi sun Israel yala amolbaryi kuramnyi to kambing amolbaryi oboka uk dabmai. 18Ura, sunci, “Musa biryi minob ura kerek sekeibmou to kunubkwayeb,” tenen Er Imtamnyi bisi dama deirin nang wiboka tikeibmaici, sun Lewi yala nang yuk yala nang ara Er Imtamnyi ai keta wa irmilin nang ababyi wiboka tikeibmai. Ara, “A nang nirya aryi Yerusalem atei aryi Er Imtamnyi ai wa ibkwanung,” tenen sunci Er Imtamnyi bisi dama deirin nang wa deici yuk-yuk kibdeibmaici, sun Lewi yala nang yuk nang ababyi wa deici yuk-yuk kibdeibmai.

19Ura, wala yuma wala tanggal ara 14 aryi Babel mutuk bobinamnyi nang tamuryanmaici, weik kwalina si Paskah kwalibkalibmai. 20Ura, Er Imtamnyi dama deirin nang imam nang ab, sun Lewi yala nang yuk nang ab aryi, “Er Imtamnyi biryi nun malyi kun dinyi teneisina kum uca, teleb tenebsute,” tenen sun damnyi me ilikdanmai ba, Er Imtamnyi bisi dama deibmai. Ura, sun Lewi yala nang aryi weik kwalina si Paskah bisam domba obmai. Ara, “Nunda Babel mutuk aryi tamuboka yanmoubwe nang nirya aryi Paskah domba yuboka yibkwayeb,” tenen sunci Paskah domba obmai. Ara, sun kwit yabwe Er Imtamnyi bisi dama deirin nang ab, sun Lewi yala yuk nang ab, sun Babel mutuk aryi tamuryanmai nang yuk nang ab aryi Paskah kwalibkwamai ati, sun Lewi yala nang aryi Paskah domba uk dabmai. 21Ato kuboka sun Israel nang ara Babel mutuk bobinamnyi asi tamuboka yanamnyi nang aryi kwalina si Paskah kwalibmai. Tonda, Israel nang akwe kuma. Eda, yuk atei nang bok, Israel nang yoka kibdeibdanmai nang ababyi miliboka kwalina si Paskah kwalibmai. A nang ara, “Nun kwemdeina dinyi takloboka Er Iya Erebdobnyi bisi milibkwayeb,” tenen kunuramnyi deyok aryi sunbabyi miliboka kwalina si Paskah kwalibmai. 22Mabmai ani, berekwe ura, weik kwalina si, “Bungbung ena kum roti kwaning yin tum,” berekmou. Ati, sun Israel nang kanya kilkil asa aryi a kwalina kwalibmai. A kwalina kwalibmai ara uki tabaryi kwalibde binmai. Ara, Er Iya Erebdobnyi bira sun Israel nang sun Nai kururnyi biryi karebmou uca, sun me Efrat kouboka yaletam mutuk Asyur kalingnung weik sienyi er kanya dangubmou ura, erci miliboka, “Er Imtamnyi ai dobdarur,” eboka arukmou deyok aryi sun kanya teleb kubmou.

Currently Selected:

Ezra Uram 6: MTG

Highlight

Copy

Compare