Ezra Uram 5

Weik sienyi Darius biryi, “Er Imtamnyi ai ur dobdarur,” ebmou ba, sun Yahudi nang aryi tubto dobmurubde binmai uram deyok

5:1-17

1A talak ara Er Imtamnyi uram ermurun nang si nabi Hagai ab, Ido mi nabi Zakharia ab kurandei. A nang ara sun Yahudi nang ara Yerusalem atei kuramnyi nang ab, Yehuda mutuk yuk atei nang ab urasintam aryi Er Imtamnyi uram ermururandei. Ara, Er Imtamnyi bira Israel nang sun moloraminyi si deib aryi, “Er Imtamnyi molon aitam uboka dobdarur,” eboka ebdeibmarei. 2Ura, a talak ara Sealtiel mi Zerubabel ab, Yozadak mi Yesua ab aryi deyok kouboka Er Imtamnyi ai Yerusalem atei aryi dobkalibmarei. Ba, sun dam tikdongoboka dobmilibdobmai nang ara Er Imtamnyi uram ermurun nang aryi dobmilibdobmai. 3Sirya dobkalibmai bok, me Efrat kouboka kitingbantam mutuk ara Persia weik sienyi amwetam bunanyi si Tatnai ab, yuk sienyi si Syetar-Boznai ab kurandei. A bitinyi nang ara sun neik wa in nang ab tonkwa sun Yahudi nang dam yanmai. Ura, ato ebmai, “Sunda unanyi biryi, ‘Akatei ab akatei lika ab ara ur dobdarur,’ eboka aruksou ba, dondarur do?” eboka sunci asibdenmai. 4Ura, tonda sunci, “Akatei donung nang sun si ara unanyi-unanyi do?” eboka asibdenmai. 5Ara, “Sun Yahudi nang ara Er Imtamnyi ai donung asi takting,” tenen ati ato eboka asibdenmai bok, Er Imtamnyi biryi sun Yahudi nang sien nang asi kalikoka dirniliramwe deyok aryi, a yanmai nang sien nang aryi sunsi arung-arung eboka “Takdarur,” ebman kum kubmou. Eda, sun Yahudi nang aryi a nang asi uram dengna ato ebmai, “Weik sienyi Darius bisi a deyok asi ebmunyi uca, erci nunsi, ‘Takdarur,’ ebsici uca, nunci Er Imtamnyi ai dona takwayeb,” ebmai. “Ba, weik sienyi biryi kerek sengna deib aryi, ‘Takdarur,’ kum eansici ura, nunci tanglona kum uca Er Imtamnyi ai dobmurubde binkwayeb,” ebmai.

6Ura, me Efrat kouboka kitingbantam mutuk weiknyi si Tatnai ab, yuk sienyi si Syetar-Boznai ab, sun kwit yabwe neik wa irmilin nang me Efrat kouboka kitingbantam mutuk kalingna nang ab aryi weik sienyi Darius bisi kerek sengna sekdeibmai. 7A nang aryi weik sienyi bisi kerek sekeibmai ara ato eboka sekeibmai,

“Weik sienyi Darius kansi, ‘Teleb,’ eboka kibmakib. 8Nai weik sienyi kanci biksurum, nunda Yehuda mutuk bindoka, ‘Er Imtamnyi Iya Weiknyi ai donung asi lilibkwayeb,’ tenen binmoubwe. Nun asing dinmoubwe uca, akai ara ilila keil aryi dukdandoka donung. Ba, akai abilinga ara co las aryi donung. Ba, akai donung wa ina ara bita dakeiboka donung aryi sun taruk dam ara seknerdongona ton kum kurur. 9Ura, nunci sun Yahudi nang sien nang asi ato eboka asibdenmoubwe, ‘Sunda unanyi biryi, “Akatei ab akatei lika ab ara ur dobdarur,” eboka aruksou ba, dondarur do?’ eboka asibdenmoubwe. 10Ura, tonda nunci kuboka sunsi, ‘Akatei dorandum ba, “Ato kubkwayeb-ato kubkwayeb,” esunung nang si asi nun dam ebsindarur,’ eboka arukmoubwe. Ara, ‘Nun nai weik sienyi bisi lak ebkwayeb,’ tenen ato eboka arukmoubwe. 11Ba, sun Yahudi nang aryi nun dam ebmasei uram dengna ara ato ebmasei, ‘Nunda Er Imtamnyi, imtam yin doun nang sienyi er wa irmilin nang kunub. Minob talak ara nun abwe yabwe Israel nang kalingnamwe weik sienyi biryi Er Imtamnyi bisi molon ai doramwe ani, dakdongoamwe. Ani, kwalina ilinto o kwali-o kwali yangaramnyi ba, nun abwe yabwe aryi Er Imtamnyi bisi akai dam moloramnyi. 12Ato kuboka doamnyi bok, nun abwe yabwe aryi Er Imtamnyi, imtam yin doun nang sienyi bisi yu kibkarebmai ba, Erci sunsi Kasdim yala ninyi kuramnyi Babel mutuk weik sienyi si Nebukadnezar, Kasdimnyi taruk dam karebmou. Ba, Babel atei nang aryi nun abwe yabwe asi mar muna obdongoboka sun atei babyi Er Imtamnyi bisi molon ai babyi daksiniboka sun atei nang boboka Babel mutuk tanglorbinamnyi. 13A botanglorbinamnyi bok, minob kuramwe sienyi si Koresh bira Babel mutuk weik sienyi kiboka talebmou ura, yuma kwalina aryi erci nun abwe yabwe Yahudi nang asi, “Sun mutuk dam tamurbindoka Er Imtamnyi ai tubto dobdarur,” eboka uram dobkwetebmou. 14Ura, Er Imtamnyi ai umbura dam deiramnyi dinyi ara dengna weik keil si emas totoa, perak totoa asi weik sienyi Koresh biryi tamubkarebmasou. A dinyi nirya ara minob ura weik sienyi Nebukadnezar biryi Yerusalem atei yandoka Er Imtamnyi bisi molon aryi doboka dalubdobmou. Sirya dalubdobmou ura, erci a dinyi nirya asi Babel mutuk bobindoka kwemdeina molon ai deiamwe. A kwemdeina molon ai umbura deiamwe dinyi asi weik sienyi Koresh biryi doboka tamubkarebmasou. Ara, ninyi si Sesbazar bisi weiknyi tikeibokaburyi, erci a dinyi nirya er taruk deib aryi nun Yahudi nang asi tamubkarebmasou. 15Ura, weik sienyi Koresh biryi er amwetam bunanyi si Sesbazar bisi ato ebmou, “Kanci anaboka a dengna weik dinyi nirya doboka Yerusalem atei bobiminyi ura, Er Imtamnyi ai umbura deibdongobdum. Tonda, Er Imtamnyi ai daksiniamnyi ara minob doamnyi ai ol asi walaboka ur dobkwaming ati ebman,” ebmou. 16Weik sienyi Koresh biryi ato ebmou ba, er amwetam bunanyi Sesbazar biryi yandoka Yerusalem atei asi Er Imtamnyi ai abyokomna yuma ingwelena dinyi deibdongobmou. Ba, a talak aryi deyok kouboka dobde yanganub ani, ukubabyi tuba donmab bok, sirya dona kum kubmab,’ ebmang. 17Sun Yahudi nang aryi ato ebmang deyok aryi nai weik sienyi kanci, ‘Teleb,’ tenebminyi ura, kanci arukminyi ura, kan wa in nang Babel atei dam aryi weik sien nang minob kuramnyi nang kerek sengna utotoa deirin ai wengbindoka dibdeting. Ara, ‘Minob kuramwe weik sienyi Koresh biryi, “Yerusalem atei Er Imtamnyi ai tubto dobdarur,” eboka dib arukamwe do, kum do?’ tenen dibdeting. Ura, weik sienyi kanci a deyok ati uram sekwetebmaminyi ura, nun dam lak kiboka kerek sekdeibsurum tenen molobmakib.” Ato eboka a mutuk kalingnamwe weiknyi si Tatnai ab, yuk sienyi si Syetar-Boznai ab, sun kwit yabwe sun wa irmilin nang aryi sun nai Persia mutuk kalingnamwe weik sienyi si Darius bisi kerek sekdeibmai.

Currently Selected:

Ezra Uram 5: MTG

Highlight

Copy

Compare