Ezra Uram 4

Sun Yerusalem atei dam dina-dina kuramnyi nang ara, “Er Imtamnyi ai tamuboka dobingnyei,” tenebmaici, Er Imtamnyi ai dona bisik sengsiniramnyi uram deyok

4:1-24

1Ura, Yehuda yala nang ab, Benyamin yala nang ab sun mar bordan nang aryi kekeramnyi uca, “Israel nang Babel mutuk bobinamnyi nang ara sirya tamuryaici, sun Nai Iya Erebdobnyi biti molon ai donung,” en uram kekebmaici, “Nun li,” tenebmai. 2Ura, “Nun li,” tenebmai cok, sunci yandoka Zerubabel ab Israel yala nang si sin nang ab ebdanmai. Ura, sunsi ato ebmai, “Nun kwit yabwe, minob talak ara Asyur mutuk weik sienyi si Esar-Hadon biryi nunsi yuk mutuk aryi kuboka a mutuk dam boyanmasou. Sirya boyanmasou ura, nunci deyok kouboka Er Imtamnyi bisi moloramoubwe ani, ukuryok tuba molonub. Sunbabyi Er Iya Erebdobnyi bisi molondarur to, nunbabyi Er Imtamnyi bisi moloboka tuba-tuba nun dama Erti deirinub. Ati, sunci nunsi, ‘Ur,’ ebsumunyi ura, nunbabyi sunsi miliboka Er Iya Erebdobnyi bisi molon ai dobkwayeb,” ebmai. 3Ato ebmai bok, Zerubabel ab, Yesua ab, Israel yala nang si sin nang yuk nang ab aryi sunsi ato ebmai, “Akai Er Iya Erebdobnyi ai dona ara sun ab nun ab tonkwa kum dobkwayeb. Eda, Persia mutuk weik sienyi si Koresh biryi aruksou to kuboka donub ati, nunda Yahudi nang nun yuk aryok dobkwayeb,” ebmai.

4Ato ebmai ba, sun Yerusalem atei dam dina-dina kuramnyi nang aryi, “Er Iya Erebdobnyi ai dona bisik sekwayeb,” tenebmai. Ato tenebmaici, sunci sun Yehuda nang asi ilil kibsinibmai ba, sun Yehuda nang aryi, “Er Iya Erebdobnyi ai doramibyi asi nun obsingnyei,” tenebmai. 5Ato kubsinibmai cok, sun Israel nang ordana nang ara Persia mutuk weik sienyi amwetam bun nang dam bindoka ato eboka molobmai, “Sunci nunsi milibsumunci, sun Yehuda nang wa asi bisik sekmunyi ba, nunci sunsi co bok dengna weik dinyi karebkwansib,” Ato eboka molobmai ura, weik sienyi amwetam bun nang ara, “Teleb,” tenebmaici, sun Yehuda nang ai dona bisik sengnamnyi. Ara, Persia weik sienyi si Koresh kuramwe talak aryi kuboka ani, weik sienyi si Darius unubmou talak ababyi sunci, “Sun Yehuda nang ara Er Iya Erebdobnyi molon ai tamuboka dobingnyei,” tenen bisik sengnamnyi.

6Ura, kuramnyi ani, ninyi si Ahasyweros unuboka weik sienyi kibmouci, er yuma ibkalibmou talak aryi sun Yehuda nang mar ordana nang aryi durungdongon kerek sengna sekoka weik sienyi bisi deibmai. Ara, “Sun Yerusalem atei nang ab, yuk Yehuda nang ab ara Er Iya Erebdobnyi molon ai donung ati, kanci, ‘Mem, takdarur,’ ebdum,” eboka kerek sekmai. 7Ani, tubto ninyi si Artahsasta unuboka Persia weik sienyi kibmou talak ababyi sunci, “Sun Yehuda nang wa bisik sekwayeb,” tenen kerek sengna sekoka weik sienyi bisi deibmai. Ara, ninyi si Bislam ab, Mitredat ab, Tabeel ab, sun neik wa in nang yuk nang ab aryi kerek sekoka Persia weik sienyi Artahsasta bisi deibmai. A kerek sengna ara danguboka Aram uram deib aryi sekoka deibmai. 8A kerek sengna ara weik sienyi amwetam bunanyi Rehum ab, kerek sengnanyi si Simsai ab aryi Yerusalem nang deyok ati kerek sekoka weik sienyi Artahsasta bisi sekdeibmarei. A sekdeibmarei kerek sengna si konga ara ato. “Sun Yahudi nang ara Er Iya Erebdobnyi ai tubto donung asi kanci, ‘Ai dona takdarur,’ eboka uram sekdum,” eboka kerek sekmai. 9A talak aryi a kerek sengna sekmai nang ara weiknyi Rehum ab, kerek sengnanyi Simsai ab, sun neik kanya bon nang yuk nang ab aryi kerek sekmai. Ara, malyi kuna deyok lilin nang ab, weik sienyi amwetam bun nang sun wa irmilin nang ab aryi sunsi milibmai ba, kerek sengna sekmai. A nang ara Persia nang ab, ton atei si Erekh kuramnyi nang ab, ton Babel atei kuramnyi nang ab, ton Elam mutuk aryi yandoka Susan atei tingyanmai nang ab aryi, “Sun Yehuda nang wa bisik sekwayeb,” tenen uram dobkarebmai ba, kerek sekmai. 10Tonda, yuk atei nang-yuk atei nang ara sun Yehuda nang ordana nang asi milibmai. A nang ara sun atei yuk-yuk kuramnyi ani, minob kuramwe weik sienyi Asnapar biryi sunsi boboka ilila me si Efrat kouboka bobaramwe ani, sunsi kitingbantam mutuk kabdeiamwe. Ara, ton nang ara erci boboka atei Samaria kabdeiamwe. Tonda, yuk nang ara erci boboka kitingbantam mutuk yuk atei-yuk atei kabdeiamwe. 11Ura, sun Yehuda nang ordana nang aryi antaniboka weik sienyi bisi kerek sengna sekdeibmai. A kerek sengna sekdeibmai to ara ato eboka sekdeibmai, “Nai weik sienyi Artahsasta. Nunda me Efrat kouboka kitingbantam kuramib nang ara kansi wa irmilikin nang aryi kansi ‘Teleb,’ eboka kerek sengna sekdeibmakib. 12Nai weik sienyi, kanci kekebsurum, Yahudi nang ara kan talebumwe mutuk dam aryi anaboka nun mutuk dam yanmai ara Yerusalem dam sirya wengyai. Akatei ara yuma kobdob aryi iya malyi atei, yu ilinto nang taleramnyi atei doramnyi bok, sun Yahudi nang aryi akatei asi tamuboka dobkalibmang. Sunci atei lika ababyi sirya donungci, akatei ai abyokomna yuma dinyi ababyi sirya bitabdeibmang. 13Ati, nai weik sienyi kanci biksurum, ara sun Yahudi nang aryi Yerusalem atei babyi lika babyi doramingnyi ani, sirya dobdobingnyi ura, kanda weik sienyi uram ara tuba kum kekebde binkwaming. Eda, sunci, ‘Weik sienyi bisi pajak dengna yuk-yuk tuba kum karebkwayeb,’ tenen kan ordana nang kibkwaming. 14Nunda kan weik sienyi bisi diboka wa irmilikunub nang kunub ati, nunci, ‘Yuk nang aryi nun nai weik sienyi bisi alyi kibdeibingnyei,’ tenen a uram deyok ati kansi lak ebmakib. 15Ati, nai, kanci minob weik sien nang kubde baramnyi dinyi sekamnyi kerek sengna umbura asi diblilibdenkwandum. Ba, a kerek sengna umbura aryi dinmaminyi uca, kanci, ‘Yerusalem atei ara yuma kobdob tum aryi kuboka weik sienyi uram kum kekeramnyi atei nang kuramnyi,’ en kerek sengna uram asing eiboka nukwamarim. Tonda, ‘Weik sien nang amwetam bun nang uram kum kekeramnyi atei nang kuramnyi,’ en kerek sengna uram asing eiboka nukwamarim. Ura, tonda ‘Yerusalem atei nang ara minob talak ababyi, “Ordarantibyi,” tenen kanya akwe boramnyi ani, ukuryok tuba ato tenen kanya bonung,’ eboka sekamnyi asi ton asing eibkwabmarim. A deyok aryi akatei ara minob ura daksiniboka kum daneiamnyi ati bikwabmarim. 16Ati, nunda weik sienyi kanti a nang aryi kubde banung to lak ebmakib. Akatei babyi lika babyi sirya dobdobingnyi ura, Yerusalem atei nang aryi, ‘Nun yuk tikokwayeb,’ tenen kan uram tuba kum kekebkwaming. Kum kekebingnyi ura, aminda aryi a mutuk me Efrat kouboka kitingbantam mutuk atei nirya ara sun Yahudi nang asi miliboka kan uram tuba kum kekebingnyei. Ato kubci ura, nai weik sienyi, a mutuk atei nirya ara kansi wanikminikicei ati, kanci una kubkwandim do?” Ato eboka sun Yahudi nang ordana nang aryi weik sienyi bisi kerek sekdeibmai.

17-18Ura, weik sienyi biryi a kerek sengna doboka sirya nukmou ura, erci tubto danguboka ato eboka kerek sekdeibmou, “Ni weik sienyi biryi sun nirya ati, ‘Teleb,’ ebmasin! Ara, ni amwetam bunanyi Rehum ab, kerek sengnanyi Simsai ab, ‘Teleb,’ ebmasin. Tonda, sun kwit yabwe neik wa in nang ab, me Efrat kouboka kitingbantam mutuk kurandum nang ara Samaria atei kurandum nang ab, yuk atei-yuk atei kurandum nang ab nirya asi, ‘Teleb,’ ebmasin. Sunci kerek sengna ni sun nai biti deibmanindau ara ni wa irmilin nang aryi asing eiboka nukmang ba, ni sirya kekebman. 19Sirya kekebman ura, niryi arukman ba, ni wa irmilin nang aryi lilibdenmang uca, diba, sunci kerek sekdeibmanindau tok ara, ‘Tola kuma,’ tenen bikmab. Ara, Yerusalem atei nang ara minob talak aryi kuboka minob kuramnyi weik sien nang asi tuba-tuba mar bon nang akwe kuramnyi ati lak kubmar. Akatei nang ara, ‘Nun yuk tiktibyi,’ tenen, ‘Me Efrat kouboka yaletam kurur weik sienyi uram kum kekebkwayeb,’ tenen nang akwe kuramnyi ani, ukuryok tuba kunung ati lak kubmar. 20Minob talak aryi kuboka nunda yaletam kuboka weik sien nang ara mikib kuboka Yerusalem atei ab, me Efrat kouboka kitingbantam mutuk nirya ab taleramoubwe. Taleramoubwe ba, nunci pajak dengna arukoka moloramoubwe. Ani, ukuryok ababyi niryi Yerusalem atei ab, kitingbantam mutuk nirya ab asi mikib kuboka talenunci, pajak dengna yuk-yuk arukoka tuba molonun. 21A deyok aryi, niryi uram dobkwetebman ara, ‘Sun Yahudi nang ara Yerusalem atei tamuboka dona mem,’ eboka dobkwetebman. Ati, sunci sun Yahudi nang asi, ‘Weik sienyi biryi, “Yerusalem atei dona ati takdarur,” ebmar,’ ebdarur ati ebman. Ati, ni weik sienyi biryi, ‘Akatei tamuboka ur dobkwaming,’ kum ebmanyi ura, a nang ara akatei asi tamuboka dobingnyei. 22Sunda ni wa irmilin nang kundarur ati, sunci a arukmasin uram asi tanglona kum uca diboka kunubdarur. Ara, sunci, ‘Weik sienyi talebwe mutuk ara Yahudi nang aryi arabdobingnyei,’ tenen bisik sekdarur. Tonda, ‘Weik sienyi biryi molorur pajak dengna ara taklobingnyei,’ tenen bisik sekdarur.” Ato eboka weik sienyi biryi kerek sekeibmou.

23Ura, weik sienyi Artahsasta biryi sekdeibmou kerek sengna ara Rehum ab, kerek sengna wa inanyi si Simsai ab, sun neik wa in nang dam asi sirya nukarebmai ba, kekebmai. Sirya kekebmai ura, sunci ola anaboka Yerusalem atei bindoka Yahudi nang ab ebdanmai. Sirya ebdanmai ura, sunci Yahudi nang asi, “A wa indarur ara taklobdarur,” eboka arung-arung ebmai.

24Ura, a talak ara Er Imtamnyi ai Yerusalem doramnyi ara taklobmai. A takloamnyi ani, ninyi si Darius Persia mutuk weik sienyi kibmou ura, kwalina bitinyi kwalina aryi erci, “Yerusalem atei ur dobdarur,” ebmou ura, sun Yahudi nang aryi Yerusalem atei tubto dobmurubmai.

Currently Selected:

Ezra Uram 4: MTG

Highlight

Copy

Compare