Ezra Uram 3

Er Imtamnyi biti dama uk dan keil lamna dobmai uram deyok

3:1-7

1Ura, sun Israel nang tamuryanmai nang ara sun atei yuk-yuk yandoka kunmai ani, wala tabaryi sirya dobmou ura, sun nirya ara neik kanya boboka buluboka Yerusalem dam wengyanmai. 2Ura, Er Imtamnyi biti ninyi dama deirin nang imam nang Yozadak mi Yesua ab, er du weit yabwe ab, Sealtiel mi Zerubabel ab, er du weit yabwe ab aryi, “Er Imtamnyi nun Israel nang aryi molonubnyi biti nun dama deibkwayeb ati, Er Imtamnyi dama uk dan keil lamna dobkwayeb,” eboka keil dukdongoboka dobmai. Ara, Er Imtamnyi biryi Er wa irmilinanyi si Musa kerek sengna umbura ebdeiamwe to aryi ato kunubmai. 3Ara, sun Israel nang kanya dam aryi, “Nun ai dam-dam nang ara yuk yala nang aryi bisik sekwansing do?” tenen ilil kubmou bok, sunci Er Imtamnyi biti sun dama uk dan ai keil dukoka dobmai. Ara, minob doamnyi olong asi tubto dobmai. A dama uk dan keil lamna dukdandoka sirya dobmai ura, sunci Er Iya Erebdobnyi biti sun dama uk dan dinyi dama deiboka berentam ababyi sintam ababyi uk dabkalibmai ura, dabde baramnyi. 4A dinyi akwe kum kubmai. Eda, ton yuk dinyi ara kwalina si “Tiya Ai Co Bok aryi Durubdeiboka Bun Ai Uki Tum,” tenen durubde bun ai doboka kwalibmai. Ara, Er Imtamnyi biryi minob uca Musa deici ebdeiamwe to, kunubmai. Ara, “Uki a berengkwande nirya ara Er Imtamnyi biti dama deinkwandarur,” eamwe to, kunubde binmai. 5Ba, a talak aryi sun dama Er Iya Erebdobnyi biti uki-uki nirya dankwamnyi dinyi yuma deyok kouboka uk dabkalibmai. Ura, tonda ukuryok wala don uki tum dankwamnyi dinyi ab, yuk uki-yuk uki weik tum Er Iya Erebdobnyi biti kanya teneiboka uk dankwamnyi tum ababyi deyok koubkalibmaici, uk dabmai. Ura, tonda sun dama kanya lobum eboka karen dinyi ab Er Iya Erebdobnyi biti uk dabkalibmai.

6Wala tabaryi wala aryi yuma uki tum berekmou ura, Er Iya Erebdobnyi biti sun dama deiboka uk dan dinyi uk dabkalibmai. A talak ara Er Iya Erebdobnyi ai ara ai abyokomna keil ara kabul kum deibmai cok, uk dan keil lamna sirya dobmaici, sun dama deirin dinyi asi deiboka dabde baramnyi. 7Ba, sunci, “Er Iya Erebdobnyi ai dobkwayeb,” tenen kiknibminikmai. Ura, sunci Sidon atei nang ab, Tirus atei nang ab asi ato ebmai, “Nunda Er Iya Erebdobnyi ai dobkwayeb ati, sunci kat co bobmilibsindarur. Libanon mutuk dam tingdarur kat co ai don co si aras toubmunyi ura, ilil me katum dam atei Yafo mutuk bordeiriryandarur.” Ato ebmaici, sunci a nang asi yina ab, me ab, minyak goreng buna to en me ab kareboka dekmai. Ura, sun Israel nang aryi sun ai don keil kiknin nang ab, sun ai don nang ab asi, “Er Iya Erebdobnyi ai dobkwayeb,” eboka co bok dengna karebmai. Ato kubmai ara Persia mutuk taleramwe weik sienyi si Koresh biryi sunsi arukmou to ukubmai.

Er Imtamnyi ai yuma dobkalibmai uram

3:8-13

8Ura, Israel nang Yerusalem atei dam tamurbinmai ani, kwalina bitinyi kwalibmaici, wala bitinyi wala dobmou ura, sunci deyok kouboka Er Iya Erebdobnyi ai dobkalibmai. Akai dona deyok nang ara Sealtiel mi Zerubabel ab, Yozadak mi Yesua ab, a bitinyi nang sun du weit yabwe yuk nang ab, Er Iya Erebdobnyi biti ninyi dama deirin nang imam nang ab, Er Iya Erebdobnyi ai wa irmilin nang Lewi yala nang ab aryi deyok koubmai. Tonda, Babel bobinamnyi asi tamuboka yandamnyi nang yuk Israel nang aryi milibdandoka Er Iya Erebdobnyi ai dobkalibmai. Ura, sunci, “Lewi yala nang ara Er Iya Erebdobnyi ai dona asi kalikwanung,” tenen Lewi yala nang ara sun kubde yangaramnyi talak ara kwalina 20 baryi kibmou nang asi wibmai. 9Ba, Yesua ab er mabwe ab er du weit yabwe ab, Hodawya deibdobanyi si Kadmiel ab er mabwe ab ara Er Iya Erebdobnyi ai doramnyi nang asi kalingdamnyi ba, doramnyi. A neiktoto kuboka Lewi yalanyi Henadad ab, er mabwe ab, er du weit yabwe ab ababyi wa ina kalingna nang kibmai.

10Ura, ai don nang aryi Er Iya Erebdobnyi ai yuma abyokomna keil deibdongobmai tum aryok Er Iya Erebdobnyi biti ninyi dama deirin nang imam nang ara sun wa in ongon aling ongobmaici, buu ena taruk douboka tingyanmai. Ba, Lewi yalanyi si Asaf deibdoba nang ababyi tingyandoka lorom-lorom en dinyi douboka dumdongonmai. Ara, Israel sienyi si Daud biryi minob, “Ato-ato kubkwandarur,” ebdeiamwe to, sunci Er Iya Erebdobnyi bisi si weik eboka mot sebkwamai ati ato kubmai. 11Ato kuboka bulubmai ura, sunci Er Iya Erebdobnyi bisi mot seboka Er si weik en mot ab Ersi kisal dangna mot ab sebmaici, mot semna dobmurubdanmai. Ara, ato kuboka sebmai, “Diba, Er Iya Erebdobnyi bira iya Telebnyi kurur! Erci Israel nang asi diba ati ton tanglosina kum uca iya boukwe kimurusurur,” eboka sebmai. Er Iya Erebdobnyi ai yuma abyokomna keil deibdongobmai deyok aryi sun Israel nang nirya aryi uram weikanun iboka mot semna deici aryi Er Iya Erebdobnyi si weik erebdeibmai.

12Ato kubmai bok, dinatam deici nang ara isin dakeiboka-dakeiboka engebmai. Ara, wisi nang sun asing aryi minob Er Imtamnyi ai asing eiriramnyi asi kanya teneibdenmaici, malyi limdon engebmai. Ba, yuk nang ara sun kanya teleb kubmou ati, mot uram weikanun iboka sebmai bok, a nang ara engena weik engebmai. A engena weik engebmai deici nang ara Er Iya Erebdobnyi biti ninyi dama deirin nang imam nang deici ab, Lewi yala nang ab Israel yala nang sun si sin nang ab, du nang ab sun asing aryi minob doamnyi ai eiriramnyi nang aryi ato kuboka engebmai. 13Ati, sun Israel nang nirya ara ton deici nang ara uram weikanun iboka engenmai bok, ton deici nang ara teleb kanya boboka mot semai. Uca, sun a uram kekebmai nang ara, “Mot semang do? Engena engenmang do?” tenen kankana kubmou. A uram ara uram tale-tale ena weikanun enmai uca, yuk mutuk ababyi lumlumung banmou ba, sun eratoto kunmai nang ababyi kekebmai.

Currently Selected:

Ezra Uram 3: MTG

Highlight

Copy

Compare