Ezra Uram 1

Weik sienyi Koresh biryi sun Yahudi nang Persia mutuk bobinamnyi nang ati mundu lobdeibmouci, “Sunci anaboka sun mutuk Israel mutuk ur tamurbindarur,” ebmou uram deyok

1:1-11

1Ninyi si Koresh bira Persia mutuk weik sienyi kibmou talak yuma kwalina aryi, Er Iya Erebdobnyi biryi Koresh kanyatam arukmou. Ba, erci ato teneibmou, “Sun Yahudi nang ara sun mutuk Israel ur tamurbinung,” tenebmou. Ato tenen uram dobdeiboka bokwetebmou uca, er arungna nang aryi er kalingna mutuk atei-atei nirya asi bindoka a uram lak ebnin yibinmai. Ara, kerek sengna biriman deib aryi ton ebdeibmou ura, tonda uram biriman deib ab aryi ton ebdeibmou. Koresh biryi, “Sun mutuk Israel mutuk ur tamurbindarur,” ebmou to ara minob talak aryi Er Imtamnyi biryi Er uram ermururamunyi si nabi Yeremia deici ebdeiamwe to kunubmou. 2Weik sienyi biryi uram dobkwetebmou to ara ato ebmou, “Ni Koresh bira Persia sien mutuk weik sienyi kunun ati ni dobkwetebman uram diboka kekebdarur. Er Iya Erebdobnyi bira im ton tukwe ton kiknibmounyi biryi niti kisal daknouci, im dangna mutuk tukwe dangna mutuk weik sien nang talen mutuk nirya ara nisi karebmanou. Ara, Niryi ato kubkwanse ati karebmanou, Yehuda mutuk atei si Yerusalem asi Er Imtamnyi bisi si weik en ai dobkwan ati wa karebnou. 3Ati, sun Yahudi nang kankan aryi Er Imtamnyi bisi miliramunyi nang asi Er Imtamnyi biryi kisal dakoka kalingsina teleb. Ati, sunci Yehuda mutuk tamurbindoka Er Iya Erebdobnyi bisi si weik en ai Yerusalem atei dam ur dobdarur. Ara, Israel nang sun Nai Imtamnyi bira Yerusalem atei kururnyi biti Er si weik en ai tubto tamuboka ur dorbindarur. 4Ura, sun Persia mutuk nang yoka ara sun Yehuda nang ati ato kubkwandarur. Sun a mutuk dam takdongoamingnyi ba, tuba kuramingnyi nang aryi, ‘Yerusalem atei tamurbinkwayeb,’ tenen kunmangnyi nang ati bisik kona dobdeibdarur. Ara, dengna weik keil si perak ab emas ab, yuk bona talena ab, ninyi winin dinyi ab karebkwandarur. Tonda, sunci kanya teleb kuboka sun dama deiboka Er Imtamnyi ai dona ati karebkwandarur.” Ato eboka weik sienyi biryi uram dobkwetebmou.

5Ato eboka dobkwetebmou ura, Yehuda yala nang sun sien nang ab, Benyamin yala nang sien nang ab, Er Iya Erebdobnyi bisi dama deiriramnyi nang imam nang ab, Er Imtamnyi ai wa irmilin nang Lewi yala nang yuk nang ab, sun Yahudi nang kankan aryi yuk nang ababyi Er Imtamnyi biryi sun kanya dam arukmou ba, sunci, “Nunda anaboka Yerusalem atei bindobibiryi, Er Imtamnyi si weik en aitam tamuboka dobkwayeb,” tenebmaici, ukutotoa kiboka anabminikdobmai. 6Ba, sun tamurbinkwamai nang asi sun neik dam-dam kuramnyi nang aryi bona deiboka karebmai. Ara, dengna weik keil si perak ab, emas ab, ur bona talena ab, ninyi winin dinyi ab, ninyi karena teleb-teleb dinyi ab, deiboka karebmai. A karebmai ara Er Imtamnyi biti sun dama kareninto kuboka sun kanya teleb kuboka karebmai.

7Ato kuboka karenmai ura, weik sienyi Koresh biryi ato ton eboka arukmou. “Yerusalem atei aryi Er Iya Erebdobnyi molon ai deiriramnyi dinyi asi minob kuramwe weik sienyi Nebukadnezar biryi araboyandoka kwemdeina molon ai deiriryanamwe. A dinyi nirya ara niryi Er Iya Erebdobnyi bisi tamubkarebman ati, Yerusalem atei tamuboka bobinkwandarur!” ebmou. 8Ura, Persia mutuk weik sienyi si Koresh biryi er amwetam bunanyi co bok kalingnanyi si Mitredat bisi ato eboka arukmou, “Kanci Er Imtamnyi molon ai araboka boyanamwe dinyi nirya nukoka kerek sekminci, sun Yahudi nang Yerusalem atei binkwaming nang sun taruk dam karebdum. Ara, ni amwetam bunanyi Yehuda mutuk sienyi si Sesbazar taruk dam karebdum,” eboka arukmou.

9Ato eboka arukmou ba, Er Imtamnyi molon ai dinyi Yerusalem atei aryi boyanamnyi dinyi si ara ato eboka kerek sekmai, “Keil si emas aryi kikniamnyi moyok ara 30 baryi dobdeibmab. Ba, keil si perak aryi kikniamnyi moyok ara 1.000 baryi dobdeibmab, Ba, yuk moyok ara 29 baryi dobdeibmab. 10Ba, keil si emas aryi kikniamnyi me yin meyok mitik dinyi ara 30 baryi dobdeibmab. Ba, keil si perak aryi kikniamnyi me yin meyok mitik dinyi ara 410 baryi dobdeibmab. Ba, yuk bona bon dinyi ara 1.000 baryi dobdeibmab.”

11Ba, dengna weik keil si emas ab perak ab aryi kikniamnyi dinyi dobkarebmaia antaniboka nirya ara 5.400 baryi dobkarebmai. A bona talena nirya ara Yehuda mutuk sienyi Sesbazar biryi bomenekmou ba, Yerusalem atei tamurbinmai nang aryi Yerusalem atei tamuboka bobdaki binmai.

Currently Selected:

Ezra Uram 1: MTG

Highlight

Copy

Compare