2Tawarikh Uram 36

Yoahas Yehuda mutuk sienyi kibmou deyok

36:1-4

(2Raj. 23:31-35)

1Ura, Yosia dibmou ura, a mutuk nang aryi, Yosia mi Yoahas bisi er nai olong unuboka, Yehuda mutuk sienyi tikeibmai. 2Ba, Yoahas er kubde yangaramwe ani, kwalina 23 baryi kimbinmou bok sienyi tikeibmai. Ba, sienyi kiboka Yerusalem sienyi kibmou ara wala winiryok talebmou. 3Ura, Mesir sienyi Nekho biryi Yoahas bisi sienyi kiamwe dinyi dobkweteboka Mesir mutuk bobinmou. Ura. Yehuda mutuk ninyi asi, tukwe dengna molobmou. Ba, perak ikin yubwa 3.400 kilogram baryi ab, emas ikin 34 kilogram baryi ab dekmai. 4Ura, Mesir sienyi Nekho biryi Yoahas er du si Elyakim kuramwe bok, ukuryok si Yoyakim si dobmouci, Yehuda mutuk ab, Yerusalem atei ab sienyi tikeibmou.

Yoyakim Yehuda mutuk sienyi kibmou deyok

36:5-21

(2Raj. 23:36–24:7)

5Yoyakim er kubde yanamwe kwalina ara 25 baryi kibmou bok, sienyi tikeibmou. Ba, sienyi kiboka taleamwe kwalina ara kwalina 11 baryi sienyi kiboka taleamwe. Ba, er kunuramwe dinyi ara Er Iya Erebdobnyi urasin dam malyito akwe kuramwe. 6Ba, Babel sienyi Nebukadnezar Yehuda mutuk nirya arabdobmouci, Yoyakim tabwe deboka Babel bobinmou. 7Ani, Er Iya Erebdobnyi ai Yerusalem atei deiriramnyi dinyi dalubmouci, boboka Babel mutuk bindoka sienyi er ai dam deibmou. 8Ba, Yoyakim er kubde yangaramwe dinyi ab, malyi dinyi kunuramwe dinyi ab, liliboka kerek sekyi ara Yehuda mutuk sien nang kimnamnyi kerek sengna raja-raja umbura asi liliboka sekyi. Ura, Yoyakhin biryi er nai Yoyakim unuboka sienyi kibmou.

9Yoyakhin bira kubde yangaramwe ani, kwalina 18 baryi kibmou talak aryi sienyi kibmou. Ba, sienyi kibmou ara wala winiryi uca, dumwe wala ara uki takubaryi kibmou tum ara er sienyi kiamwa kum danmou. Yoyakim bira Er Iya Erebdobnyi uram kununa kum kuramwe. 10Ba, ton kwalina wengbinmai talak ara Babel mutuk sienyi biryi Yoyakhin bisi, “Yoyakhin bisi Babel mutuk bobindarur,” eboka arukmou ba, Babel mutuk bobinmai. Ani, Imtamnyi ai deiriramnyi dengna weik dinyi nirya boboka Babel bobinmai. Ura, Babel sienyi Nebukadnezar biryi Yoyakhin er du si Zedekia bisi sienyi kibdeibmou. Ba, Zedekia biryi Yehuda mutuk Yerusalem atei talebmou.

11 # Yer. 27:1–28:17 Ba, Zedekia er kubde yangaramwe kwalina ara kwalina 21 kibmou bok sienyi tikeibmai. Ba, kwalina 11 baryi Yerusalem atei dam kuboka Yehuda yala nang sienyi kiboka taleamwe. 12A sienyi kibmounyi Zedekia bibabyi Er Iya Erebdobnyi uram kununa kum kuramwe. Ani, Imtamnyi uram ermurunanyi si Yeremia biryi Er Imtamnyi biryi ebmou to er dam eryanmou. Uca, a ebmou uram kekeboka kununa kum kubmouci, erebdandoka Yeremia uram lebesekmou. 13Ara, minob talak aryi Babel sienyi Nebukadnezar biryi Zedekia bisi tataboka, “Imtamnyi si deici aryi, ‘Ni kan ebminyi to kununkwankin,’ ebnurum!” eboka tatab-tatab eamwe to kuboka kunuamwe. Uca, aminda talak ara Zedekia biryi Nebukadnezar bisi yu bobmouci, obmanto kubmou. Bok, Zedekia bira er malyi kun dinyi iya talebnurubmouci, Er Iya Erebdobnyi, Israel nang molonungnyi bisi malyi kiboka kanya kat biribmou. 14Ani, tonda Yehuda mutuk weik nang babyi, Imtamnyi ai wa in nang imam nang babyi, Yehuda mutuk ninyi nirya babyi ara Imtamnyi bisi malyi kiboka kwemdeina asi moloramnyi. Ani, yuk mutuk nang sun mutuk wiliba dina-dina ukubde baramnyi dinyi akwe kunubmaici, Yerusalem atei Er Imtamnyi ai ara betebdongoboka duknasito dinyi kunubmai. 15Akiryi Er Iya Erebdobnyi sun abwe yabwe moloraminyi biryi tuba-tuba Er uram ermurun nang deici asi, “Nisi molona kum kubnumunyi ura, ni obkwansin,” erderamwe ababyi kisok kat biriboka kwemdeina akwe moloramnyi. Ara, Er Iya Erebdobnyi biryi Israel nang Er mabwe ab, Yerusalem atei Er atei boukwe ab ati ato erderamwe. 16Uca, Er Iya Erebdobnyi biryi bokeibmaci nang asi malyi kiboka, Er uram ermurun nang asi akwi tuboka, Er ebdeibmaci uram kununa kum kuramnyi. Ato kuramnyi ba, Er Iya Erebdobnyi biryi Er yu wekmouci, ikin kareboka wenebmou. Ba, lebdobmanto kum kubmou. 17#Yer. 21:1-10; 34:1-5Akiryi Er Iya Erebdobnyi biryi Kasdim sienyi bisi arukmou ba, Israel ninyi asi mar bobmai. Ura, a sienyi biryi Yehuda mutuk kabir nang nirya ninyi on ya aryi Er Imtamnyi ai Bait Allah ai dam obmou. Ani, akatei ninyi nirya, wis nang babyi, wis nerabwe babyi, kabir nang babyi, kam nerabwe babyi asi boukwe kuna kum asa aryi nirya asi, Er Iya Erebdobnyi biryi doboka Babel sienyi taruk dam karebmou ba, nirya obkiribmai. 18Ani, Er Imtamnyi ai Bait Allah ai dam deiriramnyi keica mitik dinyi babyi, weik dinyi babyi, akai dam bona nirya babyi, weik sienyi bona dinyi ababyi, yin doun nang sien nang bona dinyi babyi nirya daluboka bobmaici, Babel mutuk bobinmai. 19Ani, Bait Allah babyi, Yerusalem atei lika babyi, bona teleb-teleb dinyi nirya babyi, weik atei telebto kuboka doramnya nirya babyi dakoka uk dabmaici, a mutuk utotoa nirya kum dandeibmai. 20Ba, ninyi nirya onmai ani, ai bukoka baronmai asi talebmai ninyi ara Babel dam bobinmaici, sun il dimna nang kibmai. A bobinmai nang ara sun nai yabwe aryi sun il dimna nang kiamnyi tok asi sun mabwe aryi sun wa il dimna nang kibde baramnyi tok asi Persia mutuk sasibmou. 21Akiryi ukuboka Er Iya Erebdobnyi uram ermurunanyi si Yeremia deici ebdeiamwe to kunubmou. Ara, ato eamwe, “Israel yala nang aryi kwalina tabaryi kimbici ura, te louboka Er Imtamnyi bisi molona kum uca, tangloramnyi to kikliboka, kwalina 70 baryi ara Israel mutuk dam utotoa aboka lukluk ena kum kubkwande. Eda, kelkel eboka buta dem daklobkwande,” eamwe to kunubmou.

Sienyi si Koresh biryi Israel nang asi, “Ur sun mutuk bindarur!” eboka arukmou deyok

36:22-23

(2Raj. 24:18-20; 2Raj. 25:8-21; Yer. 39:8-10; Yer. 52:1-30)

22Ura, Persia mutuk sienyi Koresh yuma sienyi kibmou kwalina aryi, Er Iya Erebdobnyi biryi sienyi er kanya dam wa ibmou. Ura, Er Iya Erebdobnyi minob Yeremia deici asi ebdeiamwe to Koresh biryi kunubmou. Ura, Koresh taleamwe mutuk Persia dam nirya ato eboka uram ebde yibinmai. 23“Er Iya Erebdobnyi, imtam yin doun nang sienyi biryi niti, tukwetam yala ninyi mutuk nirya sienyi kiboka talebkwanse ati karebnou ba, sienyi kibse. Ani, Er Iya Erebdobnyi biryi niti, Yehuda mutuk dam, Yerusalem atei asi, Imtamnyi Er ai dobkwanse ati, sienyi kibdeibnou. Ati, Israel ninyi Er Imtamnyi mabwe nermabwe nirya sun mutuk dam ur bindarur! Sun Nai sun molondarurnyi, Er Iya Erebdobnyi biryi milibkwansir!” ebmou.

Currently Selected:

2Tawarikh Uram 36: MTG

Highlight

Copy

Compare