Yehezkiel Uram 47

Er Imtamnyi ai dam aryi me anaboka yibaramwe deyok

47:1-12

1Ura, anyi biryi nisi tubto boboka, Imtamnyi ai lika bisik bublan dam bobinmanou. Ura, bindoka diranse uca, a bisik bublan dam amwetam kuboka aryi, ilila me anaboka yaletam binamwe asi eibmase. A me yaletam binamwe ara akai urasin ara yaletam urasin deiboka doamnyi aryi ato kuamwe. A me anaamwe ara weik lika bisik bublan me youkwetam kuboka, dama deirin keil lamna deyok dam aryi anaboka binamwe. 2Anyi biryi nisi boboka weik bisik bublan me utam tingbinmanoumwe. Ba, a me ara me youkwetam kuboka aryi anaboka binamwe.

3Ura, a banmanumunyi bira meter kiklin tabwe er taruk doubmou aryi a me asi kiklibmou uca, 500 meter baryi kubmou. Ura, erci nisi, A me umbura wengbirum, eboka arukmanou. 4Ura, anyi biryi a me asi meter tubto kiklibmou uca, uruk dam bubmou. Ani, tubto meter kiklibmou uca, deyok dam yandoka bubmou. 5Ani, tubto a me asi kiklibmou uca, 500 meter kubmou. Ura, a me ara koubmanto kumto kibmou. A me koubman kum eda, me deici kekoka kouboka otam bana asi kikimanto kubmou.

6Ura, anyi biryi nisi ato ebmanou, “Ami ninyi sirik a, a sirya eibmarim do?” ebmanou. Ura, tubto tamuboka a me balal akwe me utam binmanumwe. 7Tamuboka banmanumuryi, a me balal domanoumwe ara, a me dina kalimna dina-dina ara co ilinto tingdaramwe. 8Ura, anyi biryi nisi ato ebmanou, “A me ara u anaboka yaletam kuboka biu. Ani, yurbindoka Araba-Yordan mutuk yurbindoka, din me kwan darbiu. Din me kwan ara yuma talak ara garam sik ato me kwan kiamwe bok, a me darbiu uca, sik kum me kwan kibwe. 9A me aryi ukubdeibwe to akwe, a me yibinanci mutuk ara kamyoa nirya kam akwe kibdeibkwande. 10Ato ebmou deyok aryi a me umbura ara ilila me kwan kuna mekinaia yala ilinto kurur. Ba, a me duman ara mekinaia don nang ilinto donungci, mekinaia don tabwe labde banung. 11Ba, din me kwan ara sik tuba kurur aryi, a me kubkub dina-dina ara garam don dikum kibkwaming. 12A me bitinyi Imtamnyi ai dam aryi anabnin yibiu me balal dina-dina nirya ara co ilinto tingdarurci, co bok yalaboka, du kuluboka kimna kum kurur. Eda, Wala dobci tok ara ukuryok du mourtabangdur. Ani, co bok ababyi yalangna kum uca, ilinto silingdarur. Ba, co du ara ninyi yina kibdobingnyi ura, co bok ara ninyi kwetena kibkwaming,” ebmou.

Israel mutuk sekoka wiliba yuk-yuk kibmai deyok

47:13-20

13Er Imtamnyi Iya Erebdobnyi biryi ato ebmou, “Sun Israel ninyi yala kundarur to kuboka mutuk wiliboka sekdobkwandarur! Ara yuma ara Yusuf yala ati mutuk bitinyi wiliboka sekeibkwandarur. 14A mutuk ara Ni Iya Erebdobnyi biryi sun abwe yabwe ati sirya eanse ati, sun Israel ninyi yala kundarur to kuboka bokdobkwandarur.

15A mutuk wiliboka bokdobkwandum to ara ato kubkwandum. Me utam kuboka wilibkwandum to ara, weik me kwan dam aryi kuboka, Hetlon atei aryi kuboka, Hamat atei yangan bisik aryi kuboka, Zedad aryi kuboka sekdobkwandum. 16Ani, Berota dam aryi kuboka, Damsyik kan Hamat atei kan Sibraim mutuk dam sekwandum. Ani, Hazar-Enon aryi weik atei Hauran atei dam sekwandum. 17Ukuboka me utam wiliba ara Hazar-Enon mutuk aryi kuboka ani, Damsyik dam ab Hamat dam ab me utam sekwandum.

18Ba, yaletam wilimna ara, Hazar-Henon dam aryi kuboka, sekde binamunyi asi, Hauran kan Damsyik kan sekdobkwandum. Ba, me Yordan wilibdobmunyi uca, dinatam ara Israel ninyi mutuk kibdobmunyi ura, dinatam ara Gilead mutuk ninyi mutuk kibdobkwandum. Akiryi outam kwereboka Tamar mutuk dam sekdobkwandum. Ato kuboka yaletam wilibkwandarur.

19Ba, me youkwetam mutuk wilimna ara, Tamar dam aryi sekdoro binamunyi ani, Meriba me u dam kuboka sekdoro binamunyi ani, Kadesh dam sekdobkwandum. Akiryi kuboka Mesir mutuk me kwerebwe tam aryi kuboka, weik me kwan deibwa dam oubindoka sekdobkwandum. Ukuboka me youkwetam wilimna ara Negeb mutuk sekdobkwandum.

20Ba, kitingbantam kuboka outam ara, ilila me kwan dam tam kuboka ani, Hamat mutuk bisik bana sekdobkwandarur. Kitingbantam ara ukuboka mutuk wilimna sekdobkwandarur,” ebmou.

Israel mutuk wiliboka bokdobkwamnyi to ati ebmou deyok

47:21–48:29

21Ura, Er Iya Erebdobnyi biryi ato ebmou, “A mutuk asi sun Israel ninyi yala yuk-yuk kundarur to kuboka bokdobkwandarur! 22Ani, sun Israel nang kobdoba babyi, yuk mutuk ninyi asi sun kankan dam kurandum ninyi babyi tonkwa bokdobkwandarur. Ara sun kankan dam aryi yuk mutuk nang asi yandoka mi deirinung ninyi ab, yuk mutuk nang bok, Israel ninyi kankan iya kunung ba, Israel ninyi ato kimnung ninyi babyi tukwe bokdobkwandarur. 23Sun Israel yala kankan asi yuk yala ton sun dam a kuramingnyi ura, sun tukwe ara sun ton karebkwandarur. Ni Imtamnyi Iya Erebdobnyi biryi a uram ebman,” ebmou.

Currently Selected:

Yehezkiel Uram 47: MTG

Highlight

Copy

Compare