Yehezkiel Uram 46

1Ura, Er Imtamnyi Iya Erebdobnyi biryi ato ebmou, “Ni ai bisik wengban bublan yaletam kuboka bisik ara uki nabaryi tirikwan. A bisik bublan kukwamangnyi tum ara uki ta tum ab, ukuryok wala dobci tum ab asi a bublan kukwaming. 2Ba, akatei sienyi bira weik ai bisik bublan bisik kuboka wengyandoka, a bisik bublan dam abyokomna bariboka tikwandur. Ura, a sienyi a yandoka tikmaci talak ara Ni ai wa in nang aryi bisam domba oboka uk dan dinyi ab, er malyi dinyi kilin dinyi ab dama deibkwaming. Ukubingnyi ura a sienyi er kisok tukwe dibdongoboka Ni Imtamnyi bisi molobkwanir. Ukuboka molobnici ura bindobkwandur. Ba, a tum sirya inibci talak lukunda ara a bisik bublan tiringna mem, kuklobkwanung. 3Ba, uki ta tum ab, ukuryok wala dobmaci tum ab ara, a mutuk ninyi nirya weik bisik bublan dam yandoka kisok tukwetam dumubdeiboka Ni Iya Erebdobnyi bisi molobkwanunung.

4Ba, a mutuk weik sienyi biryi a uki ta tum aryi Niti dama deibkwamanici ara, bisam domba ukuryok nenmaca akwe nabaryi ab, domba yim bol malmalina kum domba ab asi dama deibkwanurur. 5Bisam domba ab roti kiknin keica gandum ab dama deiriryankouci ura, tepung ongomna meyok tentok deiriryankwandur. Ba, bisam domba mi deiryankouci tum ara, tepung me nungna kum er dam a kubmaci to kuboka boyankwandur. Koubdoba ab gandum aling a kubmaci to kuboka ab boyankwandur. 6Ba, yuma wala dobmaci tum ara bisam lembu yim asi nong yukto dinyi ukurdena kum uca, bol teleb bisam asi oboka dama deibkwandarur. Ani, bisam domba mi akwe nabaryi ab, domba wis tentok kuboka dama deibkwandarur! Anda bisam nirya ara nong butumna ton ukurdena kum bisam akwe dama deibkwandarur. 7Ba, yina koubdoba asi dama deibkwamunyi ura, roti kiknin keica si tepung ongomna tentok ab, bisam lembu tentok ab, bisam domba yim tentok ab boyandoka dama deibkwandarur. Bok, yuk bisam domba ab sun koubdoba ab asi dama deibkwamamunyi ura, sun dam a kubmaci to kuboka deiriryankwandarur. Ba, sun koubdoba gandum asi dama deibkwamamunyi ura, yingying erande me ongomna tentok ara tepung yangamna tentok dikoka kikniraminga kikimanto kuboka boyankwanung.

8Ba, akatei sienyi ni Imtamnyi ai wengyankwamaci ura, weik bisik bublan bisik wengyandoka Ni molonmaneici ani, a bisik bublan akwe sakweteboka binkwandur. 9Ba, weik li dobmamunyi tum aryi Israel ninyi Ni moloryankwamanumunyi ura, eitam bisik bublan wengyanmangnyi ninyi ara, outam bisik sakweteboka binkwanung. Ba, outam bisik kuboka wengyanmangnyi ninyi ara eitam bisik kuboka sakweteboka binkwanung. 10Ba, akatei sienyi bibabyi neikto akwe eitam bisik yanmaci ura outam bisik binkwandur. Outam bisik wengyanmaci ura, eitam bisik binkwandur. 11Weik tum kiboka li dobmamunyi tum ara, sun koubdoba tuba dama deirinkwandarur. Ara roti kiknin keica tepung ongomna aling tentok ab, bisam lembu yim tentok ab, bisam domba tentok ab, tabtabikoka kikniboka dama deibkwandarur. Ba, yuk domba bisam ab dama deibkwamamunyi ura sun dam a kubmaci tum kuboka deibkwandarur. Ani, yingying erande me meyok tentok ab, tepung ongomna tentok kiknin dinyi kikimanto kuboka boyandoka kiknibkwandarur.

12Ba, weik tum li dobmamunyi tum ara weik sienyi biryi er malyi kun dinyi kilina ati, dama deiriryankwamaci ura, yaletam bisik bublan yuk nang aryi kukeibingnyi ura, wengyandoka dama deiboka uk dabkwandur. Ura, sirya sienyi anaboka baroci ura, a lika bublan tubto tirikdongobkwanung.

13Kwalina kwalibingnyi tok nirya sienyi biryi dama deirinkwanci ara bisam domba kwalina tentok bisibmaci domba akwe oboka Ni Iya Erebdobnyi biti dama deirinkwanurur. 14Ba, tonda sienyi biryi belekuna tuba-tuba nirya ara, gandum telebto dinyi akwe wiboka, ikin bitinyi ab, yingying en me ongomna tentok ab kuboka, Niti dama deirinkwanurur. A ebman to ara iya kunubde bankwandarur! 15Uki berekci tok, belekuna kobdob ara, domba ab, koubdoba ab, yingying en me ab, tuba Niti dama deirinkwanunung,” ebmou.

16Ura, Er Iya Erebdobnyi biryi ton ato ebmou, “Weik sienyi biryi er mi ati, er taleranci dinyi kum mutuk kum er mi ati karebkwanci ura, ur karebci ba, er ab er deibdoba ab dinyi iya kibkwanung. 17Ba, sienyi biryi er wa irmilinanyi bisi mutuk etereanci ura, a tukwe asi erdamnyi tamurkarena tum kwalina 50 baryi kikiman kimbana kabul talak ara anyi dinyi kibkwandur. Ani, sirya kwalina 50 tum berekmaci ura, a mutuk taklobci ba, a tukwe tubto weik sienyi mutuk kibdobkwandur. Ba, anda mutuk nirya ara sienyi mabwe dinyi akwe kubkwandur. 18Ba, weik sienyi biryi a mutuk nang mutuk asi ararona ara mem. Eda, er mabwe karebkwanci ara, er mutuk kobdoba asi er mabwe karebkwandur. Ba, sienyi biryi ni uram keken nang asi uram taleboka ikin bordeirina li ati ebman,” ebmou.

Er Imtamnyi ai dam asi dama deiboka yun ai dobdanamnyi deyok

46:19-24

19Ura, anyi biryi Ni Yehezkiel bisi weik bisik dinatam botoamnyi bisik kuboka boboka, wengbinmanou. A bisik ara Er Iya Erebdobnyi ai eitam kuboka dobdanamnyi ai dam tam kuboka bobinmanou. Anda wiliboka dobdanamnyi ai ara Er Imtamnyi ai wa in nang man ai ati dobdanamnyi ai asi kitingbantam lumun kobdob asi bobinmanou. 20Ura, anyi biryi niti ato ebmanou, “A wengyanim ai asi Imtamnyi ai wa in nang aryi, Israel ninyi sun malyi kun dinyi kilina ab, sun olong ununa ab, koubdoba uk dana ab ati, dama deibmangnyi dinyi asi akai aryi yunkwanung. A yubmangnyi dinyi ara ai dam keta boboka sangkwetena mem. Ukuboka ai sangkwetena ara Ni mabwe yuk nang asi obsinibingnyei,” ebmou.

21Ura, Nisi iniboka baitam keta kamdeiriryanmanou. Ura, Er Imtamnyi ai in lingdona lumun a nirya ara bisik um nirya a kubdob. Ani, a bisik ara ai dam keta ban bisik yuk-yuk kikniamnyi. 22Anda ai dam keta yuk-yuk ban bisik nirya ara, cangtam meter kiklina ara 20 meter baryi. Ba, ilatam meter kiklina ara 15 meter baryi kikliboka kikniamnyi. 23Akai dam keta yuk-yuk ara keil lika doboka aknabdongobnin yibinamnyi. Ba, a lika doamnyi dam amwetam ara dama deibmangnyi dinyi asi yun dikum kiamnyi. 24Ura, anyi biryi nisi ato ebmanou, “A dikum ara yun ai boyanmakin. Akai wa in nang aryi Israel ninyi aryi ngang sekoka obmangnyi bisam domba ara a dikum aryi yunkwanung,” ebmanou.

Currently Selected:

Yehezkiel Uram 46: MTG

Highlight

Copy

Compare