Yehezkiel Uram 48

1“Sun Israel ninyi yala si ab, sun mutuk wiliba me utam wiliba ab ara ato. Israel mutuk me utam wiliba ara, Hetlon bisik bana aryi sekeiboka Hamat atei bisik bana aryi kuboka, Hazar-Enon aryi sekoka, Damsyik atei kan Hamat atei kan sekoka ara, Dan yala nang ati, yaletam aryi sekeiboka, me utam mutuk eterebkwandarur. 2Ba, Dan yala nang mutuk yaletam kuboka aryi sekeiboka ani, kitingbantam sekeiboka noutumang me utam ara Asyer yala ati ebkwandarur. 3Ba, Asyer mutuk aryi sekeiboka, me utam aryi kuboka me youkwetam mutuk ara Naftali yala ati ebkwandarur. 4Ba, Naftali mutuk sekoka dinatam ara, kitingbantam aryi kuboka yaletam ara Manasye yala nang ati wilibdeibkwandarur. 5Ba, Manasye mutuk sekoka dinatam ara, kitingbantam aryi kuboka yaletam mutuk ara Efraim yala ati ebkwandarur. 6Ba, Efraim yala nang mutuk aryi dinatam ara, kitingbantam aryi kuboka yaletam mutuk ara Ruben yala nang ati ebkwandarur. 7Ba, Ruben yala nang mutuk dam aryi dinatam ara, yaletam aryi sekeiboka kitingbantam mutuk ara, Yehuda yala nang ati ebkwandarur.

8Ba, Yehuda yala nang mutuk aryi dinatam ara, yaletam mutuk aryi kuboka kitingbantam ara, Ni Imtamnyi biti wiboka tukwe yuk sekeibkwanindarur. A mutuk tukwe kiklina ara, cangtam babyi ilatam babyi ara, 12,5 kilometer sekoka wibdeibkwandarur. Ara yaletam aryi kuboka kitingbantam sekoka ara Ni tukwe wibdeibkwandarur. Ba, noutumang ara Ni ai iya beterdongona mem ai dobkwamunyi dikum ati yuk lobdeibkwandarur. 9Ni Iya Erebdobnyi biti tukwe yuk sekeibkwanumunyi dikum meter kiklina ara, cangtam ara 12,5 kilometer kiklibkwandarur. Ba, ilatam ara 10 kilometer kikliboka wibdeibkwandarur.

10Ba, Ni ai wa in nang ara Niti a wibdeiamunyi tukwe akwe asi, noutumang ara ni ai malyi dinyi beterdongona mem ai dobkwandarur. Ba, dina-dina yaletam aryi kuboka, kitingbantam ara 12,5 kilometer ab, 10 kilometer me utam aryi kuboka me youkwetam ara sun dinyi kibkwande. 11Noutumang tukwe malyi dinyi beterdongona mem tukwe ara, Zadok yala malyi dinyi ton kununa kum kuramungwe ninyi ati sun tukwe kibkwande. A nang Zadok yala nang ara, sun kwit yabwe ton Israel nang ab, Lewi deibdoba nang ab ara Israel ninyi malyi dinyi kunuramungwa kankan tonkwa kuboka, malyi dinyi tonkwa kunuramungwe ati, Zadok yala kum kunuramungwe yala nang dinyi kibkwande. 12A deyok aryi Zadok yala nang aryi sun tukwe dinatam asi Lewi yala nang ati sekoka eterebkwaming. A tukwe ara Iya mem tukwe ati, malyi dinyi beterdongona mem tukwe kibkwande.

13Ura, Lewi yala nang sunti sekoka eterebkwaming tukwe kiklina ara, cangtam 12,5 kilometer. Ba, ilatam ara 5 kilometer kiboka eterebkwaming. Ba, a tukwe ara, Ni ai wa in nang tukwe ab, Lewi yala nang tukwe ab ara, neiktoto lelebdeibkwaming. 14A tukwe ara Ni Imtamnyi biti wibdeiboka karenin tukwe aca ati, tukwe mitikanun ton sekoka dengna babyi, yuk bona unurona babyi ara mem. Telebto tukwe asi yuk nang ati karena ara mem. Ani, Ni Imtamnyi biti wibdeiboka kareanumunyi ba, Ni dinyi kianci tukwe asi yuk nang ati karena ara mem.

15Bok, Niti wibdeibninumunci, dinatam lo tuba kubkwande dikum kiklina 12,5 kilometer ara, yuk ai doboka wa iron dikum kibdobkwandarur. 16A tukwe asi weik atei dobkwamunyi ura, me utam babyi, me youkwetam babyi, kitingbantam babyi, yaletam babyi kiklina meter ara, 2,25 kilometer kikliboka sekwandarur. 17Ani, a weik atei dobmunci dina-dina mutuk tukwe ara lo kubkwande. A lo kubkwande tukwe meter kiklina ara yaletam aryi kuboka kitingbantam babyi, me utam aryi kuboka me youkwetam ababyi ara 125 meter kubkwande. 18Ba, yaletam kuboka ab, kitingbantam kuboka ab, ara 5 kilometer ab, 2 kilometer ab ton a kubkwande. Ati, a mutuk tukwe ara sun akatei wa iron dikum kibdobkwandarur. 19A tukwe ara a weik atei kuramunyi ninyi nirya wa ironkwandarur. 20Sun Israel yala mutuk tukwe nirya Niti wiboka kareanumunyi tukwe nirya ara, in lingdona dumbaryi akwe sekwandarur. Ba, meter kiklina ara, 12,5 kilometer akwe dina-dina sekwandarur.

21Ba, akatei ninyi aryi Niti yuk wiboka sekeianumunyi mutuk tukwe ara, kitingbantam babyi, yaletam babyi, akatei sienyi tukwe kibkwandur. Ba, akatei taleanci sienyi tukwe ara Benyamin yala nang tukwe kan, Yehuda yala nang tukwe kan asi kubkwaming. 22Weik sienyi mutuk tukwe ati kiknirdeirina ara, akatei nang mutuk ab Lewi yala nang tukwe ab akwe kiknibdeibkwanung. Ba, weik sienyi tukwe ara Yehuda yala nang mutuk kan Benyamin yala nang mutuk kan noutumang asi kiknibdeibkwandarur.

23Ura, yuk yala nang deyok: Yaletam wiliba aryi kuboka, kitingbantam wiliba sengdona noutumang ara, Benyamin yala nang ati, ebkwandarur. 24Ba, Benyamin yala nang wiliba dinatam ara, kitingbantam aryi kuboka yaletam ara Simeon yala nang ati ebkwandarur. 25Ba, Simeon yala nang mutuk dinatam ara, kitingbantam aryi kuboka yaletam ara, Isakhar yala nang ati ebkwandarur. 26Ba, Isakhar yala nang tukwe dinatam ara, kitingbantam aryi sekeiboka yaletam nirya Zebulon yala ati ebkwandarur. 27Ba, Zebulon yala nang tukwe wiliba dinatam ara, kitingbantam aryi kuboka yaletam nirya ara, Gad yala nang ati ebkwandarur. 28Ba, Gad yala nang mutuk wiliba me youkwetam ara, Tamar aryi kuboka, Meriba me u anamna dam Kadesh mutuk sekoka, ani akiryi kuboka, Mesir mutuk aryi kwerebwe me kin dam aryi sekeiboka, ilila me kwan dam sekeiboka ara Gad yala nang mutuk ati sekeibkwandarur. 29Ukuboka a mutuk Israel tukwe asi sekoka Israel yala yuk-yuk kundarur to kuboka bokdobkwandarur! Ni Imtamnyi Iya Erebdobnyi biryi a uram ebdeibmasin,” ebmou.

Weik atei Yerusalem lika bublan kiknibkwamnyi to ebdeibmou deyok

48:30-35

30“Weik atei Yerusalem atei wengban bisik lika bublan ara amolbaryi baryi otokamnyi. Me utam kuboka lika bublan kikniamnyi ara, kiklina 2.250 meter baryi kikliamnyi. Ba, bisik bublan winiryi botoamnyi. 31A bublan winiryi nirya sun si yuk-yuk dobmai. Ton bublan si ara Ruben eboka si dobmai. Ton bisik bublan ara Yehuda eboka dobmai. Ton bisik bublan ara, Lewi eboka si dobmai. Ara a weik atei Yerusalem bublan nirya ara, Israel yala nang sun yala yuk-yuk si dobnin yibinmai. 32Ba, yaletam kuboka bisik bublan ara, kiklina 250 meter baryi kiklibmai. Ura, bisik bublan ababyi winiryi botobmai. Ton bisik bublan si ara Yusuf eboka si dobmai. Ton bisik bublan ara, Benyamin eboka si dobmai. Ton bisik bublan ara, Dan eboka si dobmai. 33Ba, me youkwetam bisik bublan ara, meter kiklina neikto akwe, 2.250 meter baryi kikliboka kiknibmai. Ura, a bisik bublan yuk-yuk si dobnin yibinmai. Ton bublan si ara, Simeon eboka si dobmai. Ton bisik bublan si ara, Isakhar eboka si dobmai. Ton bisik bublan si ara, Zebulon eboka si dobmai. 34Ba, kitingbantam bublan ara, meter kiklina neikto akwe 2.250 meter baryi kiklibmai. Ura, a bisik bublan ara, yuk-yuk si dobnin yibinmai. Ara Gad eboka ton si dobmai. Tonda, Asyer eboka si dobmai. Tonda, Naftali eboka si dobmai. 35Akiryi a weik atei boongoboka meter kiklina cang ara 9 kilometer baryi kiklinung. Ba, a weik atei Yerusalem atei ara, ‘Er Iya Erebdobnyi akatei dam kurur,’ ebde binkwaming,” ebmou.

Currently Selected:

Yehezkiel Uram 48: MTG

Highlight

Copy

Compare