Yehezkiel Uram 45

Israel mutuk weik-weik atei dam nirya Er Imtamnyi biti wiboka mutuk yuk sekeibnin yibinamnyi deyok

45:1-8

1Er Iya Erebdobnyi biryi sun Israel ninyi asi ato ebmou, “Sun mutuk yuk-yuk yala kumunyi to keil im sukoka bokdobmunyi ura, mutuk tentok Ni Imtamnyi biti minob wibdeibkwanindarur. Ara sun yala yuk-yuk tukwe wiboka, Niti sunci dama ati, tukwe sekeibnin yibinkwanindarur. A sekeibkwanurum tukwe kiklina cangtam ara 12,5 kilometer baryi sekwandarur. Ba, ilatam ara 10 kilometer baryi sekwandarur. A sekeiboka wibdeianumunyi tukwe ara malyi dinyi beterdongona mem tukwe kibkwandarur. 2Ba, a wiboka Niti sekeianumunyi tukwe ara, Ni ai dobkwamingnyi tukwe ati, meter kikliboka sekeibkwandarur. Ara in lingdona neikto akwe sekmunyi ura, eitam meter babyi, outam meter babyi, otam meter babyi atam meter babyi ara neika 250 meter akwe sekwandarur. Ba, a sekmamunyi dina ara lo tukwe 25 meter sekwandarur. A tukwe ara Ni Imtamnyi ai dobkwandarur ati, ukuboka yuk sekeibkwandarur. 3Ba, a sekoka Ni tukwe karebmanumunyi tukwe ara kikliboka 12,5 kilometer ara Ni ai kobdob malyi dinyi beterdongona iya mem ai dobkwamingnyi dikum yuk kikliboka sekwandarur. A tukwe asi ilatam ara 5 kilometer kikliboka sekeibkwandarur. 4A wiboka sekamunyi tukwe ara malyi dinyi beterdongona mem tukwe. Ati, Ni ai wa in nang imam nang asi a tukwe dam kuboka Ni Iya Erebdobnyi wa inkwanung. Ani, a tukwe asi dinatam ara sun man ai dobkwanung. Ba, ton tam ara Ni Iya Erebdobnyi ai dobkwanung. 5Ba, tonda a tukwe weik tam tukwe cangtam 12 kilometer ba, ilatam ara 5 kilometer ara Lewi yala ninyi a kuramingiryi, Ni Imtamnyi ai wa inkwaming. Ura, a tukwe asi Lewi yala ninyi sun weik-weik atei donkwanung. 6Ba, Israel nang ton nang kuboka weik atei dobkwamingnyi dikum ababyi yuk wibdeibkwandarur. A tukwe meter kiklina ara, cangtam 12,5 kilometer sekwandarur. Ba, ilatam ara 2,5 kilometer sekoka ebkwandarur. 7Ba, weik sienyi mutuk tukwe er yuk sekoka eterebkwandarur. Ara Ni Imtamnyi biti yuk wiboka sekeianumunyi mutuk dam dinatam yaletam kuboka aryi kuboka kitingbantam kalimna sekoka ebkwandarur. 8Ukuboka mutuk bokeianyi aryi Israel mutuk sienyi kibdinyi biryi ni mabwe Israel ninyi mambul kimdongona kum kubkwaming. Eda, Israel nang ati, sun yala kunung to kuboka mutuk yuk-yuk bokeibnyi ba, sun yuk-yuk kubdobkwaming,” ebmou.

Sun Israel ninyi ukunkwamnyi to ab, sun sienyi kiboka talebdinyi ukunkwamwe to ab deyok

45:9-17

9Ura, Er Imtamnyi Iya Erebdobnyi biryi ton ato ebmou, “Israel mutuk sien nang se, malyi dinyi sirya kunubdum! Sunci Israel ninyi asi malyi kiboka tiklim darandarur ara taklobdarur! Eda, dib dinyi ab, sun kanya teleb kubkwamaci dinyi akwe kunubdarur. Sun sien nang aryi ni mabwe Israel nang asi sun mutuk kuroramingnyi asi yangdonongna ara mem. 10Sun dengna dektamubdankwandum ara, ikin kiklibdeboka, ikin kubmaci to dekwandarur. Ara, co du yala babyi, me yala babyi ikin kikliboka ikin kubci to dekwandarur. Tola ati suncok outam kibdeiboka dengna mem. 11Ara, gandum du dakoka weik aling tentok deiriraming ara satu efa eraming. Ura, anggur du me weik moyok tentok deiriraming ara satu bat eraming. Akiryi satu efa ab, satu bat ab ara yubwa kiklina neiktoto kurande. Ba, gandum du aling takubaryi ara satu homer eraming. Ani, anggur du weik moyok takubaryi ababyi neiktoto satu bat eraming. Ati, a dinyi ikin a kubmaci to kuboka kiklibdeboka dekwandarur. 12Sunci ikin kiklibkwamunyi ura, ato kuboka kiklibkwandarur. Keil perak ikin 20 gera ara satu syikal eraming. Ba, keil perak ikin 60 syikal ara satu mina eraming.

13Ura, Ni Er Iya Erebdobnyi biti yuk wiboka ton yuk karebkwanumunyi dinyi ara ato kiklibkwandarur! Sun gandum wa iyamunyi ani, kinmamunyi ura, gandum du weik aling 60 baryi kubci ura, aling tentok ara Niti karebkwandarur. Ba, gandum si jelai weik aling ababyi 60 baryi kubci ura, aling tentok doboka Niti yuk wibdeibkwanindarur. 14Ba, co zaitun du yung me asi weik moyok 100 baryi kubmaci ura, moyok tentok doboka Niti wibdeibkwanindarur. Ani, sun koubdoba babyi, co du babyi ikin kubmaci to kuboka ukubde binkwandarur. 15Tonda, sun Israel ninyi sun bisam domba yubwa 200 baryi winiramunyi bok, domba tentok wiboka Niti karebkwanindarur. Ani, 400 baryi winiramunyi ura, domba bitinyi wiboka Niti karebkwanindarur. Ani, sun bisam yubwa winiramunyi to ukubde binkwandarur. Ba, da bisam yubwa nirya ara, sun yina ati dama deirin dinyi ab, uk dana ati dama deirin dinyi ab, lemdarona ati dama deirin dinyi ab, sun malyi dinyi kunubmamunci, yu bobnicei tenen kanyi teleb kimna ati dama deirin dinyi ab kibkwandarur! Ni Imtamnyi Iya Erebdobnyi biryi a uram ebman. 16Anda dama deirin dinyi nirya buluboka Israel weik sienyi dam boyankwandarur. 17Ukuboka boyamunyi ura, a mutuk Israel weik sienyi biryi wiboka, bisam oboka uk dana ati dama deirin dinyi yuk, koubdoba ati dama deirin dinyi yuk, co du me kikniboka weik tum yin dinyi yuk, ukuryok wala dobmaci ba, li don dinyi yuk, uki ta tum dinyi yuk kiboka wibdeibkwandur,” ebmou.

Weik li tum aryi dama deirina ati ebdeibmou deyok

45:18–46:18

18Ura, Er Iya Erebdobnyi biryi ato ebmou, “Yuma dobci wala tanggal satu tum ara bisam sapi yim nong bingbing ebde nenmaca asi oboka, Niti dama deibkwanindarur. 19Ura, Ni ai wa in nang imam nang aryi a bisam sapi ining doboka, Ni imtamnyi ai abyokomna asi lubde yibinkwanung. Ani, niti dama deirin keil lamna kubkub dina-dina asi lubde yibinkwanung. Ani, Ni ai wengban bisik bublan sibarya dam kubkub dina-dina asi a bisam ining lubkwanung. 20Ani, tubto yuma wala dobdiryi tanggal tujuh tum berekci tum ara, sun malyi dinyi kunuramingnyi ninyi sun malyi dinyi kilina dengna ati, ukuboka sapi yim akwe dama deiboka ining lubde yibinkwandarur. Ba, Ni asing dina ara, ‘Ni ai beteboka manmalibdongobmongwe dinyi sirya me ilikmang,’ tenebkwanun.

21Ba, yuma wala asi tanggal 14 tum berekci ura, Paskah li dobkwandarur. Ba, uki tabaryi nirya ara roti kwaning bungbung ena dongona kum roti asi yinkwanung. 22Ura, a tum aryi a mutuk Israel weik sienyi biryi bisam lembu yim asi oboka, er ab Israel ninyi ab, sun malyi kun dinyi kilina ati, dama deibkwandur. 23Ba, weik sienyi biryi a tabaryi uki nirya ara bisam lembu yim akwe tabaryi ab, domba bisam yim akwe tabaryi ab, kambing bisam yim akwe tabaryi ab akwe oboka ukubmaning uk dankwandur. 24Ba, koubdoba dama deibkwamaci ura, roti kiknina si tepung ongomna tentok ab, bisam lembu ab, tepung kitina tentok ab bisam domba yim ab, yingying en me ongomna tentok ab dobkwandur. 25Ura, a yuma wala tanggal 15 tum berekmaci ura, a mutuk weik sienyi biryi minob ukuranci to kuboka, sun malyi dinyi kilina ati dama deirin dinyi ab, uk dan dinyi ab, yina koubdoba dinyi dama deirina, ab, me yala dama deirina ab ukunkwandur,” ebmou.

Currently Selected:

Yehezkiel Uram 45: MTG

Highlight

Copy

Compare