Keluaran Uram 35

“Uki si Sabat tum asi malyi dinyi kunuboka beterdongona kum uca, diboka kalikdarur,” ebmou deyok

35:1-3

1Ura, er Musa biryi, “Sun Israel nang nirya bulubdarur,” ebmou ba, bulubmai ura, ato ebmou. “Er Iya Erebdobnyi biryi, ‘Iya kunubde bindarur,’ ebmasir uram ara ato ebmar. 2‘Uki nabaryi ara sun wa yuk-yuk ur ibdarur. Eda, uki ta tum berekci ura, taruk louboka bukwandarur. Ara, uki si Sabat tum Er Iya Erebdobnyi uki tum wibdeiboka taruk loubkwandarur. A tum asi wa inmangnyi nang ara obkabkwandarur. 3Ani, sun atei kuramunyi dikum nirya uki ta tum ara uk sengna mem,’ ebmar,” ebmou.

Er Iya Erebdobnyi ai si Kemah Suci dobkwamnyi dinyi ati, dama deiboka bulubmai dinyi ab, akai umbura aryi Iya Erebdobnyi bisi si weik eboka molonkwamnyi to ab deyok

35:4-29

4Sun Israel ninyi nirya asi er Musa biryi ato ebmou, “Er Iya Erebdobnyi biryi ato ebmar. 5-6‘Sun bona talena nirya Iya Erebdobnyi biti sun dama bulubdeibdarur. Unanyi biryi er kanya yongon kanya bobmaci ura, sunci Er Iya Erebdobnyi biti sun dama boyandarur. Ara, dengna weik keil si emas ab, perak ab, tembaga ab, kuruta bol aling wis bol ab, unduk bol ab, kermizi aling ab, namin aling si lenan ab, bisam kambing bol aling ab bulubde boyandarur. 7Ani, bisam domba yim domba bol aling asi bi bol turukdongoamingnyi aling ab, me kwan umbura kurande keica si lumba-lumba bol ab, co si penaga ab bobulubdarur. 8-9Ani, uk ubna ardeirin me zaitun yung ab, tong teleb-teleb dinyi ninyi kisok likeiboka wa karen me ab, Er Imtamnyi biti uk daboka tong teleb en dinyi ab, dengna weik keil si krisopras ab, imam Harun taram limna si efod denena ati yuk dengna weik keil ab ukuboka dama deiriryandarur,’ ebmar,” ebmou. 10Ani, ton ato ebmou, “Utotoa-utotoa kiknina bingna nang nirya ab buluryandarur. Ba, Er Iya Erebdobnyi biryi, ‘Ato kuboka kiknibdarur,’ ebmar to nirya ibkwaming nang iniboka yandarur. 11A nang sun ibkwaming wa ara Er Iya Erebdobnyi keis ol ai si Kemah Suci ab, a keis ol ai aruma ab, abilinga ab, mardeirin co ab, abyokomna ab, yangamna co ab boyankwandarur. 12Ani, Er Iya Erebdobnyi co sangkol ab, a co sangkol kalurdongon maka ol atoa ab, a co sangkol maloua caboka boban co ab, Er Iya Erebdobnyi ai Iya beterdongona mem ai bisik dolorkweten aling ab boyankwandarur. 13Ani, roti kwaning dama deirin co lamna ab, a co lamna asi maloua caboka boban co ab ani, co lamna deici Er Imtamnyi biti deirin roti ab, 14uk ubna yabla ab, uk ubna me ab boyandarur. 15Ani, siltong teleb co yung uk dan co lamna ab, maloua caboka boban co kolongna ab, me lingdeirin me asi tong teleb erande me ab, Er Iya Erebdobnyi ai keis ol ai bisik bublan dolorkweten aling ab boyankwandarur. 16Ani, Er Imtamnyi biti dama deiboka uk dan keil lamna ab, a keil dungna kubkub in lingdona dina-dina tembaga deneamnyi dinyi ab, co maloua kolokoka boban co ab, a dama deirin keil lamna dam aryi ukun dinyi nirya ab boyankwandarur. Ani, yan me ilingna sangkol dinyi ab, a dinyi lulu yangana ab, 17keis ol aling ai kubkub ila ab, abyokomna ab, yangamna ab, ai dam keta limna kaluna ab boyankwandarur. 18Ani, Er Iya Erebdobnyi ai dam limna ati ingna co ab, tabwe kitin tabwe ab, 19Er Iya Erebdobnyi ai Kemah Suci ai wa in nang ongon aling ab, Harun wa ina ati ongon aling ab, er mabwe akai wa in nang ongon aling ab bobulubdarur,” ebmou.

20Ato ebmou ura, sun Israel ninyi nirya Musa dam aryi anaboka binmai. 21Ura, sun kanya yongon kubmou ninyi ara Er Iya Erebdobnyi ai Kemah Suci keica utotoa nirya boboka bulubmai. Ani, akai umbura ai wa in nang ongon aling ab boyanmai. 22Ara, sal babyi, nerabwe babyi sun kanya yongon kubmou ba, “Ukubkwayeb,” tenebmai ninyi nirya aryi, sun urya ongoramnyi dinyi ab, okelenga ab, te dum durkaba ab, ngang karangna ab boboka bulubmai. Ani, emas aryi kiknin yala amuma-amuma dinyi nirya Er Iya Erebdobnyi biti boyanmai. 23Ani, tonda kuruta bol aling kubmananyi bira kuruta aling wis bol babyi, unduk bol babyi, kirmizi aling babyi, namin kaluna si lenan babyi, kambing otong aling babyi, yim domba otong asi bi bol tobtobokna kibdongoamnyi otong babyi, me kwan umbura kurande keica si lumba-lumba bol babyi nirya boyanmai. 24Ani, tonda Er Iya Erebdobnyi biti dama yuk wiboka perak ab, tembaga ab deibmai. Ani, co si penaga kubdob nang ara kiknibkwamnyi co boyanmai. 25Ba, aling wina bikamnyi nerabwe ara aling win keica boyanmai. Ara, kuruta bol aling wis bol ab, unduk bol ab, kirmizi aling ab, lenan aling ab boyanmai. 26Ani, kambing otong aryi wina bikamnyi nerabwe ara sun kanya yongon kubmou ba, kambing otong aryi wibmai. 27Sien nang ara dengna weik dinyi si krisopras ab, dengna weik keil yuk-yuk dinyi ara efod aling ab, Imam Besar taram limna aling irim dikwamnyi dinyi ati boyanmai. 28Ani, ton boyanmai dinyi ara tong teleb co yung ab, uk ubna dingdongon me ab, me lingdeirin me ab, siltong teleb ena ati uk dan dinyi toto ab boyanmai. 29Sal nirya ab, nerabwe nirya ab, sun kanya yongon kubmou ninyi nirya ara Iya Erebdobnyi biryi Musa deici ebmou to kuboka boyanmai. Anda dinyi sun Israel nang aryi mundu loboka Er Iya Erebdobnyi biti boyanmai.

Bezaleel ab Aholiab ab a wa ibkwandei ati tikeibmai deyok

35:30–36:7

30Musa biryi sun Israel nang asi ato ebmou. “Er Iya Erebdobnyi biryi Yehuda yalanyi bisi wibmar. Ara, Hur mi si Uri biryi deiamwe mi si Bezaleel wibmar. 31A wibmarinyi ersi Er Imtamnyi kanya roh langdibdeibmarci, bikdob bingna dinyi ab, mikib dinyi ab, yuk-yuk wa ibkwande bingna dinyi nirya karebmar. 32Ara, emas ab, perak ab, tembaga ab aryi a nirya erci a wa ibkwande ati karebmar. 33Ara, dengna weik keil asi keteboka denebkwande. Ani, co kokoboka sekeibci ba, yuk-yuk wa ibkwaming. 34Ani, Er Iya Erebdobnyi biryi Dan yalanyi Ahisamakh mi si Aholiab bisi, ‘Ton ukubkwayeb,’ ebdingnyi ba, dobkwaming ati bingna dinyi karebmar. 35Ara, Er Imtamnyi biryi yuk-yuk bingna dinyi, ai don dinyi ab, aling win dinyi ab, kuruta bol aling asi bol turukna-turukna kiboka win dinyi ab, unduk bol win dinyi ab, kirmizi aling win dinyi ab, namin aling si lenan win dinyi ab tabwe oraming bingna dinyi ab yuk-yuk wa nirya kunuboka, Bezaleel ab, Oholiab ab aryi wa ibkwanding ati bingna dinyi karebmar,” ebmou.

Currently Selected:

Keluaran Uram 35: MTG

Highlight

Copy

Compare