Keluaran Uram 34

Keil tubto kerek sekoka unubmou deyok

34:1-35

1Er Iya Erebdobnyi biryi Musa bisi ato ebmou, “Keil ila bitinyi minob telebmoumwe dinyi ato akwe tubto telebdum. Ba, Niryi, ‘Ukubdarur-ukuna mem,’ en uram a keil deici asi minob yuma keil teleboka sekmase. Ba, telebkabumwe keil sekmase to akwe tubto yumkuna sekwan. 2Minob belekuna kobdob anaboka mutuk Sinai kon welebkwandum. Welebminyi ura, Ni Iya Erebdobnyi urasin dam yandoka mutuk kon dub nong kobdob asi dinkwamarum. 3Bok, yuk ninyi ton kan ab a mutuk kon weleyangana ara mem. Ani, mutuk kon nirya ara ninyi ton lak kimna mem. Ani, tonda bisam kambing babyi, domba babyi, lembu babyi, sapi babyi a mutuk kon dam sungsunga yibde yibana mem,” ebmou.

4Ura, er Musa biryi keil ila bitinyi min yuma telebmou ba, kerek sekamwe ato keil akwe tubto teleboka kiknibdeibmou. Ura, belekuna kobdob bukokaburyi, anaboka Sinai kon dam Er Iya Erebdobnyi ebmou to kunuboka a keil ila bitinyi doboka bowelebinmou. 5Ura, Er Iya Erebdobnyi yuryandoka Musa dam yandoka tikmou ura, Er Iya Erebdobnyi Er mining si, “Yahweh,” ebdanmou.#34:5 Allah si Ibrani uram ara, “Yahweh,” eramnyi. Ba, nun Una en uram sisingnub uram ara, “Er Iya Erebdobnyi,” eramib 6Ba, Er Iya Erebdobnyi biryi Musa urasin dam yibanmouci, ato eboka uram dobmou, “Nira Sun Nai Iya Erebdobnyi, Ni Iya Erebdobnyi kunun. Ni ninyi boukwe kimnanyi kunun, bico tenenanyi kunun. Minola yu uram ena kumnyi kunun, busul asa aryi iya tuba-tuba boukwe kimnanyi kunun. 7Ninyi yubwa-yubwa asi tuba-tuba boukwe kimnunyi kunun. Ani, malyi dinyi kubmangnyi nang asi lemdeirinunyi kunun. Ani, tuba-tuba malyi dinyi kubmangnyi nang ara diboka liliboka wenenunyi kunun. Ara, er nai malyi kun dinyi babyi, er mi malyi kun dinyi babyi, sun mabwe odei-odei winiryi dumbaryi yaldangna nang malyi kun dinyi babyi liliboka wenenanyi kunun,” ebmou.

8Ba, Musa biryi kisok luknubdongoboka Imtamnyi bisi si weik ebmou. 9Ura, ato eboka molobmou, “Nai se, Kanci nisi dib kanyi deiriraniminyi ura, Kanci nun kankan dam bomeneksurum. Sun Israel nang ara sun kisok kat biriboka ngang dangdongonungci, tenen kumto kuramingnyi ababyi, nun malyi dinyi libdobsurum. Libdobsiminci, Kanci wiboka Kan mabwe kobdoba ato kibdeibsurum,” eboka molobmou.

10Ura, Er Iya Erebdobnyi biryi ton ato ebmou, “Iya dib en uram aryi uram talak tentok Israel ninyi ab ebdankwayeb. Ara, kan atei ninyi Israel ninyi nirya asing dinmangnya dam aryi ilil tenen dinyi ilinto kiknibkwan. A ilil tenen dinyi ara yuk mutuk ninyi im dangna tukwe dangna nirya dinmangnyi dam ara ato dinyi ton kum ukurur to asi kunubkwaman. Ato kuboka ilil tenen dinyi kiknibnyi ba, kan kuruma kankan dam a kunung ninyi ababyi asing eiboka, ‘Nai e Imtamnyi bira dib kurur,’ tenebkwaming. Ara, a kubkwaman dinyi ara iya dib sirik ilil weikto dinyi kunubkwaman. 11Bok, kansi arub aryi a ebdeibmakinyi uram asi diboka talebnurubmarum. Dinmarum! Kan asing dinmaminya dam aryi Amori mutuk ninyi babyi, Kanaan mutuk ninyi babyi, Het mutuk ninyi babyi, Feris ninyi babyi, Hewi yala ninyi babyi, Yebus yala mutuk ninyi babyi asi yakdonokoka kum dandeibkwan. 12Sunci sun damnyi diboka kalikdandobdarur. A mutuk dam minob a kunung nang aryi, ‘Ninyi bun dakdankwayeb,’ ebokabsingiryi, neneboka sun moloramingnyi kwemdeina dam bobisingnyei. Ba, sunci a kwemdeina kanyi bobmunyi ura, sunbiramnyi youbdamunyei. 13Eda, sun a nang kwemdeina molon keil dungna asi dalublobokwandum. Tonda, kwemdeina ati keil dukoka tikeibdanamingnya asi, dalubkabokwandum. Ani, kwemdeina molon co ikamingnya ababyi sekabokwandum. 14Ara, kanci yuk kwemdeina molona mem. Ni kan Nai Er Iya Erebdobnyi bira matan mitik kumnyi kunun ati, matan ebkinyei. 15Ani, sun a mutuk kunung nang ab uram talak lingdeirirdana mem. Ato kuminyi ura, yuk kwemdeina molonmangiryi, dama karebmangnyi yina bindoka yibminci, kan mining damnyi betebdongobdaminyei. 16Ani, kanci kan mabwe asi, sun nermabwe doboka kabdeibminyi ba, sun moloramingnyi kwemdeina dam neneboka bobingnyei. 17Ani, kanci yuk-yuk keica atoa keil emas aryi kiknibdeiboka, ‘Ni kwemdeina,’ tenen molona mem.

18Weik kwalina si, ‘Roti Kwaning Bungbung En Keica Dongona Kum Yibmai Tum,’ asi kanci tuba teneirdenkwandum. Uki tabaryi berekmaci tok nirya ara bungbung en keica dongona kum roti yinkwandarur. Minob wala si Abib talak ebdeibse to kununkwandarur. Abib wala ara Mesir dam aryi anaboka yanandau wala ati ebman.#34:18 Ibrani nang nungna ara Abib. Nun nungna ara yuma wala. 19Ninyi babyi utotoa nirya, yuma mundu boboka deibmunyi mabwe ara Ni dinyi akwe kibkwandur. Ara, sun winirandum dinyi nirya lembu babyi, domba babyi, yim yuma deibca ara Ni dinyi akwe kibdeibkwanindarur. 20Ucab, bisam keledai aryi yuma kobdob yim deibmaca ara domba unubkwandarur. Kum unubkwamunyi ura, a bisam asi ngang kotoklobkwandarur. Ani, sun mabwe yuma mabwe ara Ni mabwe kibdeibkwanindarur. Ninyi mabwe ara oboka Niti karebmanto kum deyok aryi bisam domba mi asi unubkwanindarur. Ba, Niti dama deiryanganmamunyi tum ara taruk baning Ni dam yangana mem. Eda, Niti dama deirina ton bobmamuncok, yankwandarur.

21Uki nabaryi nirya ara sun wa yuk-yuk ur inmamunyi ani, uki tabaryi tum berekci ura, louboka ur kubkwandarur. Ara, wa in talak babyi, wa iyamingnya kin talak babyi, uki tabaryi tum ara taruk louboka bukwandarur. 22Ani, gandum wa iyamunyi ani, kin talak tujuh minggu bisibci ura, weik uki tum, ‘Hari Raya Tujuh Minggu,’ kwalibkwandarur. Ani, co du dangni tum ababyi li dobkwandarur. Ara, weik uki tum, ‘Hari Raya Pondok Daun,’ kwalibkwandarur. 23Ati, kwalina tentok ara sal akwe liki winiryi Ni Israel nang sun Nai Iya Erebdobnyi dam asi yankwandarur. 24Ara, Niryi Kanaan mutuk nang asi sun urasin dam aryi kum dandeibniryi sun kubkwandum mutuk asi weik kibdeibkwansin. Ati, Ni sun Nai Iya Erebdobnyi dam asi liki winiryi kwalina tentok aryi yanmamunyi talak ara yuk nang aryi sun atei yandoka ararona kum kubkwansing. 25Ni dam bisam oboka dama deibmanumunyi bisam ara bungbung eboka weik danarande dinyi ara ining ab dongona mem. Ani, Ni dama deibmamunyi bisam oblobmamunyi ba, maberengna ara mem. 26Teleb dinyi ara sun kourandum dinyi keta oboka mourande dinyi asi Ni sun Nai Er Iya Erebdobnyi ai dam boyankwandarur. Kambing mi asi oboka yubkwamamunyi ura, er mining kwin moum yung ab tonkwa dongoboka yuna ara mem,” ebmou.

27Er Iya Erebdobnyi biryi Musa bisi ato ebmou, “Ni uram a nirya kerek sekdum. A kerek sengna biriman aryi kan ab, sun Israel nang ab asi, ‘Ato kubdarur,’ ebdeibsise uram ati ebman,” ebmou. 28Ani, Musa ab, Er Iya Erebdobnyi ab tonkwa Sinai kon kurandei uki ara kitingtam uki 40 baryi, lukunda uki 40 baryi Musa yina si teboka kuramwe. A kuramwe talak aryi, “Ukubdarur-ukuna mem,” en uram ara takubaryi uram kerek sengna ab ani, yuk-yuk mem en dinyi nirya kerek sengna ab sekamwe.

29Ura, Musa Sinai kon aryi yuryanganmou ura, keil ila bitinyi Er Imtamnyi biryi, “Ukubdarur-ukuna mem,” en uram taruk douboka boyuryanmou. Er Iya Erebdobnyi ab uram sisingnandei akiryi er Musa bira er urasin milil araramwe ara ibarya kuramwe ara kum bikdanamwe.#2Kor. 3:7-16 30Ba, er du Harun ab, sun Israel nang ab aryi Musa dinmai uca, Musa er urasin milil arabmou. Ba, sun ilil mitik kum kubmou aryi er dam binman kum kubmai. 31Uca, er Musa biryi Harun ab, sun Israel nang yuk weik nang ab asi nabmou ba, er banmou tam urasin deibmai ura, erci sunsi uram ebmou. 32Ba, sun Israel nang nirya er dam binmai ura, Er Iya Erebdobnyi biryi Musa ersi Sinai kon dam aryi ebdeibmou uram nirya sunsi ebkarebmou. 33Sirya sun Israel nang ati ato ebmou ura, er urasin lilibdobmou. 34Ara, Musa bira keis ol ai wengbindoka Er Iya Erebdobnyi ab ebdandoka uram sisingkwindingnyi ura, Musa er urasin kaluna ara langakaboka sisingmaringnyi ani, sangkweteramwe. Ba, ai dam sakwetebci ura, sun Israel nang dam asi, “Er Iya Erebdobnyi bira ato ebmar,” eboka lak eramwe.

35Ba, sun Israel nang aryi dinmangnyi ara Musa er urasin ara sinarya milil arabmaci aryi, sun asing imum ati, kaluna urasin limdoramwe. Ba, Er Iya Erebdobnyi ab tonkwa uram sisikwamaringnyi ura, Imtamnyi ai wengbici ura, a libmaci kaluna langangkarongnamwe.

Currently Selected:

Keluaran Uram 34: MTG

Highlight

Copy

Compare