Keluaran Uram 36

1“Ukuboka Bezaleel ab, Aholiab ab wa ibkwandei to kuboka karebmou. Ani, yuk-yuk nang ababyi Er Iya Erebdobnyi biryi bikdob bingna dinyi nirya karebmou ba, malyi dinyi beterdongona kum ai si Kemah Suci asi Er Iya Erebdobnyi biryi ebmou to dangbisina kum uca liliboka dobdarur,” ebmou. 2Ura, er Musa biryi Bezaleel ab, Aholiab ab ani, yuk nang yuk-yuk ababyi bingna dinyi sun kanya dam asi Er Iya Erebdobnyi biryi karebmou. Ba, a nang sun kanya arabkarebmou ura, a ibkalibmai. 3Ura, er Musa biryi sun Israel nang a bulubmai keica nirya doboka Kemah Suci donkwamnyi ati sunsi karebmou. Ani, tonda sun Israel nang belekuna tuba Musa bisi sun kanya lobum eboka sun bona-bona ur boyangaramnyi. 4Ba, sun bingna dinyi yuk-yuk bikamnyi ai don nang ara a wa yuk-yuk iramnyi dam aryi malyi dinyi beterdongona kum ai Kemah Suci doryangaramnyi. 5Ba, akai dobkwamunyi nang aryi Musa bisi ato ebmandau, “Akai don keica ara Er Iya Erebdobnyi biryi ebwe to kum uca, ilinto boyanganung,” ebmandau. 6Ura, Musa biryi dantam-dantam ai doramnyi dam kuramnyi ninyi nirya asi kunubkwamnyi ati ato ebmou, “Ukura nerabwe kum sal kum, ‘Er Imtamnyi biti dama karebkwan,’ tenen yuk dinyi kikniboka tubto boyangana mem. 7Ara, ato ati ebman, akai don dinyi ara dobkwaming to sirya kikib kubwe. Ani, kablobmanto ati ebman,” ebmou.

Er Iya Erebdobnyi ai si Kemah Suci dobmai deyok

36:8-38

8Ura, ai dona bikamnyi nang nirya ara Iya Erebdobnyi ai dobmai. Ara, keis ol ato aling si lenan aryi wiamnyi aling ila takubaryi kiknibdeibmai. Ura, tabwe bol kira bol tabwe ab, kuruta bol tabwe ab, bi bol tabwe ab aryi deneboka wibmai. Ura, a deneboka wibmai kaluna deici ara maka ol atoanun si kerub asi kiknibdongobnin yibinmai. 9A keis ol ato aruma cang ara 12 meter baryi kiklibde sekamnyi. Ba, dumdam tam ara 2 meter kikliboka sekamnyi. A keis ol ato aruma dobkwamnya nirya kiklina menengbisirdana kum uca, neiktoto akwe sekamnyi. 10A keis ol ai aruma amubaryi ara labaruboka amubaryi kibmai. Ani, ton amubaryi ababyi labaruboka tentok kibmai. 11Yuma waluboka koubmai aruma ila sengdona kubkub ara kuruta bol tabwe aryi bitinyi dinyi aruma ab laboka denebmai. Ani, ton labarubmai dinyi ababyi neiktoto laboka denebde yibinmai. 12A aruma sekdoba kubkub dina-dina ara dukdongoboka denebnin yibinmai botona yubwa ara 50 baryi botona asi dukdongoboka denebmai. Ani, bitinyi dinyi ababyi ton dinyi ababyi neiktoto ukuboka denebmai. Ba, a aruma kubkub urasin wanwanubdongobkwandarur. 13Ba, dungdongona ara emas aryi yubwa 50 baryi dukdongobkwandarur. Dukdongobmunyi ura, Er Imtamnyi ai Kemah Suci asi dukdongobkwandarur. Ara, ton dinyi babyi, ton dinyi babyi, emas aryi dukdongobmunyi ba, tentok ato kibdobkwandur. 14Ba, bisam kambing kala aruma ara Er Imtamnyi molon ai alib kalubdongobkwandarur. Ara, aruma koklombaryi ninyi aryi wiamnyi. 15A aruma ara kiklina cangtam ara 13 meter baryi kiklibdeboka sekamnyi. Ba, dumdam tam ara kiklina 2 meter kiklibdeboka sekamnyi. A keis ol aruma nirya ato kuboka sekamnyi. Ba, aruma koklombaryi ara kikliboka sengna neiktoto akwe sekamnyi. 16Keis ol ato aruma amubaryi ara yuk dukdongobmai. Ba, ton nabaryi ababyi yuk dukdongobmai. 17Aruma botona yubwa 50 baryi ara ton labaruboka denebmai dinyi tentok aruma kubkub asi dobmai. Ani, ton labaruboka dinyi ababyi ton dinyi botona kubmai to akwe ukubmai. 18Ton nang ara tembaga aryi aruma dukdongobmai ba, tentok ato kibmou. 19Ba, tonda a aruma kalubdebkwamya ati domba yim kala asi bi bol tobtobokna kibdongoamnya dinyi aryi dobdongobmai. Ba, a deici asi me kwan umbura kurande keica si lumba-lumba kala aryi alib kalubdongobmai.

20Er Imtamnyi molon ai Kemah Suci dobkwamnyi co ara co si penaga loamwe co akwe wiboka abilinga yekmai. 21Abilinga tentok cang kiklina ara 4 meter baryi kikliboka sekmai. Ba, ila ara kiklina ara 66 baryi sentimeter kikliboka sekmai. 22Er Imtamnyi molon ai dobkwamnyi abilinga nirya ara bing bitinyi labaruboka dakdongobnin yibinmai. 23Ukuboka Kemah Suci ai abilinga ibkwamnyi dikum asi talikmai. Ara, outam me youkwetam kuboka, abilinga 20 baryi ibkwamnyi to abyokomna ikoka ananya deibmai. 24Ani, perak aryi abyokomna yan burdeirina yubwa 40 baryi deneboka, bukeibnin yibinmai. Ba, abilinga tentok ara yan bitinyi-bitinyi kiknibdeibnin yibinmai. Ukuboka lang tentok abilinga ibkwamnyi dikum 20 baryi nirya ara yan bitinyi akwe kiknibdeininin yibinmai. 25Ba, Kemah Suci dinatam eitam ababyi abilinga 20 baryi dinatam ukubmai to akwe neiktoto dobmai. 26Yubwa 40 baryi perak aryi deneboka abilinga bitinyi kiboka amwetam denebdongobnin yibinmai. 27Ba, Kemah Suci dongtam kitingbantam ara abilinga nabaryi dobmai. 28Er Imtamnyi molon ai lumuntam abilinga ara bitinyi ibdongobmai. 29A abilinga bitinyi ara yekoka dinato-dinato outam babyi, eitam babyi ton oubna kiknibdeiamnya dam ibdongobmai. Ani, dina bitinyi kubkub lingdona ababyi ukubmai. 30Akiryi ukuboka abilinga inbaryi asi perak aryi wiliboka denebmai. Abilinga tentok ara bitinyi kiboka denebmai asi 16 baryi wiliboka denebmai.

31Ani, Er Imtamnyi ai dinatam kalimna abilinga ibkwamnyi ati, kolongna co ara co si penaga aryi amubaryi mabdeibmai. 32Ba, Er Imtamnyi molon ai dinatam baryi abilinga ibkwamai co mabdeibkwamai co ara co si penaga amubaryi aryi mabdeibmai. Ani, dongtam ababyi co amubaryi mabdeibmai ara kitingbantam kalimna asi mabdeibmai. 33Ani, noutam abilinga ibkwamai ati co noutam dinatam aryi kuboka dinatam kubkub noutam kolokmai. 34A abilinga nirya ara emas aryi denebnin yibinmai. Ba, noutam kolokwamai co ara toubna kiknibdeibnin yibinmai aryi a toubna umbura dongobnin yibinmai. Ba, kolokmai co ababyi emas aryi denebmai.

35Ani, noutam wilimna dolorkweten aling kiknibmai ara kuruta bol tabwe wis bol ab, unduk bol ab, kirmizi bol tabwe ab, namin aling si lenan ab deici asi maka ol atoanun si kerub asi kikniboka denebdongobnin yibinmai. 36A dinyi ati kiknibkwamnya ara abyokomna dumbaryi ikmai ara co si penaga aryi ikmai ura, emas aryi denebmai. Ani, dukdongoboka perak aryi yangabmaia deici asi denebmai.

37Ani, Kemah Suci ai bublan dolorkwetena ara kuruta bol aling wis bol ab, unduk bol ab, kirmizi aling ab, namin aling si lenan ab, ninyi aryi bol turukna wiamnya aryi kiknibmai. 38Ani, abyokomna amubaryi aryi a abyokomna dukdongobmai. Dungdongona dikum ab, kubkub sengdona ab ara emas aryi denebmai. Ba, a amubaryi yangardeina ara perak aryi yangabmai.

Currently Selected:

Keluaran Uram 36: MTG

Highlight

Copy

Compare