Keluaran Uram 33

Musa biryi Er Iya Erebdobnyi bisi, “Yini mutuk bisik bankwayeb dikum milibsurum,” eboka molobmou deyok

33:1-6

1Er Iya Erebdobnyi biryi Musa bisi ato ebmou, “Kan a mutuk dam taklobokabminci, Israel nang Mesir dam aryi boboka yamwe ninyi ab yuk mutuk bindarur. A bobinkwandum mutuk ara sun abwe yabwe Abraham ab, Ishak ab, Yakub ab asi iya dib en uram aryi, ‘A mutuk ara sun deibdoba ati eterebkwan,’ ebdeianse mutuk kunuboka bindarur. 2Niryi Ni uram eryuryangan nang malaikat nang tentok bokdonoknyi ba, er meneksici ura, binkwandum. Ba, Kanaan nang ab, Amori nang ab, Het nang ab, Feris nang ab, Hewi nang ab, Yebus nang ab asi oboka yakdonokwande. 3A mutuk ara sul aryi koubdoba lubanbanabde yibarur mutuk asi binkwandum. Ara, Nira sun a mutuk baramunyi dam ara Ni kum milibkwansin. Sunda taba biriboka Ni uram kekeboka kununa kum kundarur mutuk ninyi ati, bisik dam aryi Niryi obkiribsinyei,” ebmou. 4Er Iya Erebdobnyi biryi ato ebmou uram kekebmai ura, sun Israel nang kweirya doramnya nirya kwiriblobmaici, ukuryok wengyanabne nang bol ato kibdobmai. 5Ura, Iya Erebdobnyi biryi Musa bisi ato ebmou, “Sun Israel nang asi ato ebdum. Sunda ni uram kununa kum uca, tenen kumto dinyi kunurandum nang kundarur. Ati, uki mitikto nun talak Ni ab tonkwa banmabyi ababyi obkwansununa. Ati, sun kweirya-kweirya amol birirdandarur dinyi ara kwiribkabokdarur. Ba, Ni kubkwansin to nun ati,” ebmou. 6Ba, sun Israel nang ukuboka kweirya doramnyi dinyi ara mutuk Horeb kon aryi kwiriblobmai.

Er Imtamnyi ab sun Israel nang ab erdan ai deyok

33:7-11

7Ba, Israel nang sun bisik baramiryi keis ol ai aruma atei bindoka dobmangiryi, kunmangnyi dikum ara Musa biryi Imtamnyi ab erdan ai eratoto akwe dobde baramwe. A doramwe ai si ara, “Er Imtamnyi ab ebdandoka uram sisingni ai,” eboka doramwe. Ba, unanyi biryi Er Iya Erebdobnyi bisi molobkwaman ura, sun ai kobdob aryi sakweteboka binmangnyi ani, Er Imtamnyi ab erdana ai wengbindoka moloramnyi. 8Ba, Musa anaboka Imtamnyi ai wengbaci ura, Israel nang nirya ara sun ai yuk-yuk bisik bublan dam tikoka dinmangnyi bok asi wengbaramwe. 9Musa a keis ol ai umbura wengbin ura, duwa bum yanganman tok bublan dam yandoka irdongoramwe. Yandoka sirya akai asi duwa ibdongobne ura, Er Iya Erebdobnyi ab, Musa ab uram tonkwa sisingnandei. 10Ba, sun Israel nang a dinyi asing eibingnyi ura, sun ai bublan dam yuk-yuk luknubdongoboka Er Imtamnyi si weik eramnyi. 11Ba, Er Iya Erebdobnyi ab, Musa ab uram tonkwa sisingnandei ara ninyi sirik aryi urasin wanwanubdandoka sisingnaming to kuboka sisingnandei. Ukuboka sisingmaringnyi ani, sirya sisikdingnyi ura, er ai yangaroramwe. Uca, ninyi si Nun mi si Yosua bira Musa er milinanyi kuramwe. Akiryi Yosua bira keis ol ai tuba atakdongoboka yangaramwe. Ba, Yosua bira akai iya a kuramwe.

Er Iya Erebdobnyi biryi, “Israel nang asi kalikansinyi ba, bankwandum,” ebmou deyok

33:12-23

12Uki tentok tum ara Musa biryi Er Iya Erebdobnyi bisi ato ebmou, “Kanci nisi, ‘Sun Israel nang asi boboka, Ni ebdeibsise mutuk bobirum,’ eboka aruknoumwe. Bok, ‘Anyi bira kansi milibkwankir,’ kum ebmanirim. Ati, unanyi bisi wibdobkwan do? Ani, Kanci nisi, ‘Kan si ara ni biksiryi, kanyi deibkise,’ ebnoumwe ara tola ebnoumwe do? 13Nai, Kan tenebmarim to ara una tenebmarim do? Kanci Israel ninyi ati tenebmarim to diboka ebkatabniminyi ba, diboka bikoka kunubkwan, se! Sun Israel nang ara Kan mabwe kobdoba kunung ara bingdum cok do?” ebmou. 14Ba, Er Iya Erebdobnyi biryi Musa bisi ato ebmou, “Niryi kansi ebdeibsise mutuk baraminci, bisik noutam binkwandim dikum nirya ara Niryi kansi iya kalikwankin ba, mangkau asa akwe binkwandim,” ebmou.

15Ba, Musa biryi Er Iya Erebdobnyi bisi tubto ato ebmou, “Kanda nun ab tonkwa kum binkwamibyi ura, nun yuk nunglosina mem,” ebmou. 16Tubto Musa biryi ton asibmou, “Ni ab, sun Israel ninyi ab asi boukwe kimdansiminyi ura, nunsi milibsurum. Ba, yuk atei nang aryi, ‘Israel nang sun Nai Iya Erebdobnyi milibmar ba, yibanmang,’ tenen Kansi bikwanking,” ebmou. 17Ba, Er Iya Erebdobnyi biryi Musa bisi ato ebmou, “Niryi kansi si bingkununci, kanyi deibkise deyok aryi kan molobmarim to kuboka milibkwamakin,” ebmou.

18Uca, Musa biryi ato ebmou, “Kan milil ibarya kurankir dinyi ara nisi lak kibderum,” ebmou. 19Ba, Er Iya Erebdobnyi biryi Musa bisi ato ebmou, “Ni ibarya mikib berengna dinyi kan urasin dam lak amubkwamakin. Ani, Ni kan Nai Iya Erebdobnyi bira kan urasin dam aryi Ni mining si lak si semebdanyi ba, kekebkwamarim. Ani, Ni Iya Erebdobnyi biryi Ni kanyi kubnirinyi bisi wiboka ur karen dinyi kareboka boukwe kimkwan,” ebmou.#Rom. 9:15 20Ani, Erci tubto ton ato ebmou, “Ni urasin lak eirinin nang ara kam kubman kum ati, kansi ni urasin lak kum kibdankwaman,” ebmou. 21Ani, Er Iya Erebdobnyi biryi ton ato ebmou, “Ni tikmana dinatam bukwe keil kon asi kanda a keil dub tikmarim. 22Ni yibankunyi ati, milil arabci ura, Niryi kansi doboka a mutuk kon amwetam dongobdeiboka, Ni taruk aryi singibdeibokabkiniryi bisiryibinkwaman. 23Ni taruk singibdeibmakinyi ani, sirya bisiroryibinyi ura, Ni dongtam asi asing eibkwamanirim. Ucab, Ni urasin ara asing kum eibkwamanirim,” ebmou.

Currently Selected:

Keluaran Uram 33: MTG

Highlight

Copy

Compare