Keluaran Uram 32

Keil emas aryi bisam sapi mi atoanun kiknibmai deyok

32:1-35

1Israel nang ara Musa Sinai kon welebinamwe ati, yangana dibde kuramnyi. Uca, Musa ola yangana kum kuramwe. Ba, Israel nang ara, “Musa ukuca yankur-ukuca yankur,” tenen dibde kuramnyi ba, uki dakbisibde baramwe. Ura, sun Israel nang nirya Harun dam buluryanmaici, ato ebmai, “Nun Mesir dam aryi boboka yanansounyi Musa bira minola yangana kum kubde ati, deira er kubwe to nun. Ati, nun nai kiboka boboka menengkwansir keica ton kiknibdeibsurum,” ebmai.#Kis. 7:40#Ul. 9:7-29 2Ura, Harun biryi sunsi ato ebmou, “Sun nerabwe ab, sun nermabwe ab emas amol birirdanunga dinyi nirya loboka ni dam boboka buluryandarur,” ebmou. 3Ba, sun Israel nerabwe ab nermabwe ab amol birirdaramya dinyi nirya loboka Harun dam bobuluryanmai. 4Ba, Harun a dinyi dobmouci, uk daboka nunubmou. Ura, a keica aryi bisam sapi mi atoanun keil emas aryi uk daboka nunuboka kiknibmou.#Kis. 7:41 Ura, sun Israel nang mamun aryi ato ebdanmai, “Sun nai Mesir dam aryi boyasounyi a kiknibsir ati,” ebmai. 5Ba, Israel nang sun kanya teleb kubmou. Ura, Harun bira Israel nang sun teleb tenebmai asi eibmouci, a sapi mi kiknibmoua dam asi keil dungna ton kiknibmou. Ura, Harun biryi ato ebmou, “Ambutum ara nun Nai Iya Erebdobnyi kiknibmasinyi bisi si weik eboka molobkwamab ati buluryankwandarur!” eboka nabmou. 6Ura, mabmai ani, ambutum berekmou ura, belekuna kobdob bukoka bisam sapi nungna dikum oboka a keil dungna deici asi uk dabmai. Ara, sun lemdan dinyi ati dama deibmai dinyi ab, bisam nong nirya Niti dama deibmai dinyi ab oboka dama deibmai. Ato kuboka dama deiboka yinmaici, sun kanya kilkil asa aryi ner sal dumdanmaici,#32:6 Israel nang bisam sapi kiknibmaici, kilkil asa aryi mot seboka dubdandoka talyi yobdandoka kimai. mot semai.#1Kor. 10:7

7Uca, Er Iya Erebdobnyi biryi Musa bisi ato ebmou, “Kanci Mesir dam aryi iniboka boyamwe nang nirya ara malyito kunmang ati yurbirum,” ebmou. 8Ani, tonda ato ebmou, “Niryi sunsi, ‘Kwemdeina kikniboka molona mem,’ ebse dinyi asi ola kunubmang. Ara, bisam sapi mi kiknibmangci, a kiknibmang sapi ati, dama deiboka molonmang. Ani, a kiknibmang bisam ati, ato enmang, ‘Israel nang se, nun nai, Mesir dam aryi leboka boyasumnyi,’ eboka molonmang,” ebmou. 9Ani, tonda Er Iya Erebdobnyi biryi Musa bisi ato ebmou, “Israel yala ninyi ara, ‘Mem en uram,’ kekebman kum kunung. Ati, taba amakwe yala ninyi kunung. 10A deyok aryi a ninyi nirya obkiribokwan ati, bisik seksinibniminyei, eda mundu lobnurum. Ba, Musa kan tentok aryi deibminyi mabwe asi Ni mabwe kibkwaming,” ebmou. 11Uca, Musa biryi er Nai, Er Iya Erebdobnyi yu kubmou asi, “Er kanya namin kibdeibkwan,” tenebmouci, ato ebmou. “Nai, Kanci Mesir mutuk dam aryi Kan taruk mikib ab, Kan ilil tenen kiknin dinyi ab deici aryi boyandoka lebdeibumwe. Bok, Kanci sunsi yu bobmarim ara malyito kubmarim. 12Ani, Mesir mutuk ninyi aryi ato ebkwaming, ‘Israel ninyi sun Nai biryi yini mutuk bisik iniboka bobinamwe ara obkiribkwamwe ati, iniboka bobinamwe,’ ebkwaming. Ati, Kan mabwe asi yu kubmakir ara mundu lokina teleb. 13Kanda ton teneibderum, Kan wa in nang Abraham ab, Ishak ab, Yakub ab asi Kan mining si deici aryi sunsi ato eamoumwe, ‘Sun mabwe odei-odei yaldakde binkwandum ara imtam kurya tilib ato kubkwande,’ eamoumwe. Ani, ‘Niryi sun a mutuk kubkwandum ebsise mutuk ara sun mabwe iya a bindoka kubkwaming mutuk,’ eamoumwe ara ton teneibderum,” ebmou. 14Ba, Er Iya Erebdobnyi biryi Er mabwe asi, yu kuboka, “Obkiribkwan,” tenebmou dinyi ara, “Malyito kanya teneibmonwe,” tenebmou.

15Ura, Musa mutuk Sinai kon aryi anaboka yuryanmou. Ura, Er Imtamnyi biryi, “Ukubdarur-ukuna mem,” en uram keil ila bitinyi kerek sekeibmou dinyi asi taruk bitinyi dina-dina douboka yuryanmou. 16A, “Ukubdarur-ukuna mem,” en kerek sengna bitinyi ara Er Imtamnyi taruk kobdob aryi keil kerek sekmou. 17Ura, Yosua bisik noutam aryi kekenmou uca, Israel nang uram lilim enmai asi kekebmou ura, erci Musa bisi ato ebmou, “Atei doboka kunuba dam asi ninyi ordanmangiryi eraming lilim enmang asi kekebman,” ebmou. 18Uca, Musa biryi ato ebmou, “Ninyi ordanmangiryi sun muna obdongobnaryi luraming lilim ab, kisok daknaryi luraming lilim ab ara kum kekean. Eda, ur mot semnaming lilim asi kekean,” ebmou. 19Ai yandoka doamnya dam bindoka diramwe uca, bisam sapi mi atoa kiknibmai asing eibmou. Ani, a sapi kiknibmaia deyok dam asi mot sebde merenmaici, bobde kinkaningmai asi asing eibmou. Ba, Musa yu wekmou ura, a boyanganmou keil ila, “Ukubdarur-ukuna mem,” en uram kerek sengna asi a mutuk deyok dam yandoka oublobmou ba, telteleboka bukmou. 20Ura, a bisam sapi mi atoa emas aryi kiknibmaia asi tomobtaleboka uk dabmou. Ura, a kiknibmai bisam asi teing-teing erongmou ba, mitik-mitik kibdobmou ura, me umbura yamubdongobmou. Ura, sun Israel ninyi mot a semai ninyi asi, “Yibdarur,” ebmou.

21Ato kubmou ura, Musa biryi Harun bisi ato ebmou, “Kanda Israel nang aryi una kubmaking ba, iya malyito kun dinyi sunsi kiknibdeibmarim do?” eboka asibmou. 22Uca, Harun biryi Musa bisi ato ebmou, “Nai, kanci yu kukina mem se. Sun tenebdobmangnyi tok ukunung ara kanbabyi bingdum se,” ebmou. 23“Ani, tonda ato eboka aruknei, ‘Nun nai Musa Mesir dam aryi iniboka boyasounyi bira er da kubwe to nun aryi ukuca kum yangar ati, kanci nun dam iya a kunkwande kwemdeina asi kiknibdeibsurum,’ eboka aruknei. 24Ba, niryi ato ebmase, ‘Unanyi biryi emas keil ton boranci ura, ni dam boyandarur,’ ebmase. Ba, sun kekeboka emas sun ongoramnyi dinyi niti kwiribdeibnei ura, uk umbura dongobmase uca, bisam lembu mi atoa danmou ba, molonung,” ebmou.

25Ura, Musa dinmou uca, Harun biryi Israel nang asi mundu lobmou ba, bisam kuda aryi winin ai umbura aryi bublan kukeibingnyi ba, borande urasin boblalabmai asi asing eibmou. Ara, Harun biryi, “Ni ab kuma, sun yuk molonung,” eboka lobdobmou. Ba, Israel nang ara malyito dinyi kunuraming nang boraming urasin bobmai. Sun Israel ninyi ato kuboka komobdobmou dinyi ara yuk nang sun mar ordan nang asing eirin ura, nukoka akwi tubmanto dinyi ukubmai. 26Ura, Musa atei bisik bublan dam tikoka ato eboka uram dobmou, “Er Iya Erebdobnyi tam kibdobkwandum nang ara ni dam a yandobdur,” ebmou. Ba, Lewi yala nang nirya Musa dam bulurbinmai. 27Ura, Musa biryi Lewi yala nang asi ato ebmou, “Israel nang sun Nai Er Iya Erebdobnyi bira ato ebmasir. ‘Sun nirya ninyi on ya yuk-yuk mirikna yok dam aryi yokoka doubdobdarur. Ura, eitam bisik bublan dam aryi, sun mining weit yabwe ab, sun mining du yabwe ab, sun mining kwit yabwe ab, sun mining ai ninyi ab asi obde yibindarur. Ani, outam bisik bublan dam sirya bindoka obdarur,’ ebmasir,” ebmou. 28Ba, Lewi yala nang aryi a ebmou to kunuboka, sun kwit yabwe Israel nang asi onmai ara a tum aryi sal akwe yubwa 3.000 baryi obmai. 29Ura, Musa biryi ato ebmou, “Arub tum aryi sun mining atei ninyi onmarum uca, Er Imtamnyi ai wa iboka dama deirin nang kibdarum. Ati, arub tum aryi Er Iya Erebdobnyi biryi kisal dakoka wa karebsir,” ebmou.

30Mabmai ani, berekmou ura, Musa biryi sun Israel nang asi ato ebmou, “Sunda iya malyito dinyi kunubmarum ati, arub tum ara niryi Er Iya Erebdobnyi bisi mutuk kon dam tubto welebinkun. Bindoka Er Imtamnyi bisi sisikdenyi ba, sun malyi kun dinyi sangkuna libdobkwansura tenen ebman,” ebmou. 31Ura, Musa tamuboka mutuk kon binmou ura, Er Iya Erebdobnyi bisi ato ebmou, “Sun Israel nang ara iya malyi dinyi kunubmang. Ara, emas aryi bisam sapi atoa kikniboka molonmang. 32Ato kubmang bok, Nai se, Kanci sun malyito dinyi kunubmang dinyi asi libdum. Ucab, sun malyito kubyi dinyi asi limna kum kubkwaminyi ura, Kan kerek sengna umbura asi ni si sekdongobnumwa ara kilibkaboknurum,” ebmou.#32:32 Er Imtamnyi biryi Er kanyi deianci nang si ara Er kerek sengdeirirur. Akiryi Musa biryi, “A kerek sengna deici ni si sekaniminyi ura, kilibkwanurum,” ebmou. Mazmur 69:29 umbura dibdendarur. 33Uca, Er Iya Erebdobnyi biryi Musa bisi ato ebmou, “Unanyi biryi Niryi, ‘Ukuna mem,’ ebse to asi dakbisibmaci ura, er si asi Ni kerek sengna umbura seksa ara kilibkabokwan. 34Ba, kanda ola Israel nang dam biminyi ura, minob Niryi kansi, ‘Israel yala nang a mutuk dam bobinkwandum,’ eboka arukankise mutuk bobirum. Ba, bisik dam binkwaming dikum ara Ni uram eryuryangananyi malaikat biryi sunsi boboka menekwaming. Bok, sun malyi kun dinyi kunubmang dinyi ara ukuca kum lilibkwan. Eda, aminda aryi sun malyi dinyi lilibkunyi tum aryi lilibkwan,” ebmou.

35Ura, Er Iya Erebdobnyi biryi sun Israel nang Harun biryi bisam sapi mi atoa kiknibdeiamwe ba, moloramnyi deyok aryi sunsi ikin weik dinyi karebmou.

Currently Selected:

Keluaran Uram 32: MTG

Highlight

Copy

Compare