Keluaran Uram 31

Bezaleel ab Aholiab ab asi wibmou deyok

31:1-11

1Er Iya Erebdobnyi biryi Musa bisi ato ebmou, 2“Yehuda yalanyi si Hur biryi ninyi si Uri deiamwe. Ba, Uri biryi deibwe mi Bezaleel bisi Niryi nabman ati bikandum. 3Anyi bira Ni kanya er dam koukwe olokdeibman. Ara, erci bikdob bingna dinyi ab, mikib dinyi ab, yuk-yuk dinyi bingna nirya ersi karebman. 4Ba, erci emas keil ab, perak keil ab, tembaga keil ab, 5dengna weik keil nirya ketebokabdiryi, yuk-yuk dinyi kiknibkwande. 6Ani, ton er ab tonkwa ibde binkwandingnyi bira Dan yalanyi Ahisamakh mi si Aholiab bisi wibman. A wibman ara ninyi bitinyi sun kanya dam utotoa kiknin dinyi bingna yuk-yuk karenun. Akiryi utotoa nirya Niryi, ‘A wa ibdurum!’ ebman to kunuboka ibde binkwanding. 7Ara, Ni ai Kemah Suci ai ab, Niryi, ‘Ukubdarur-ukuna mem,’ ebdeibsise uram deirin co sangkol ab, ni ab sun ab antanirdana alib eitam tiringdongona ab ani, Ni ai umbura kubdob ni dinyi nirya kiknibkwandum. 8Ara, Niti roti deirin co lamna ab yuk-yuk dinyi ab, uk ubna yan tabtabingna kum emas ab yuk-yuk dinyi ab, tong teleb co yung dama deiboka uk dan co lamna ab kiknibkwandum. 9-10Niti dama deiboka uk dan keil lamna ab yuk-yuk dinyi ab, taruk me ilingni meyok ab a meyok lulu yangamna ab ani, Ni ai wa in nang ongon aling beterdongona mem aling, Harun ongon aling babyi, er mabwe ongon aling babyi kiknibkwandum. 11Tonda, malyi dinyi beterdongona mem dinyi ati, tong teleb co yung uk dan me yung babyi, ninyi kisok lingdeirin me yung babyi, Niryi, ‘Ato kubdarur,’ ebman to akwe kikliboka Bezaleel ab Aholiab ab aryi kiknibkwandum,” ebmou.

“Uki si Sabat tum asi taruk louboka bukwandarur,” ebmou deyok

31:12-17

12Er Iya Erebdobnyi biryi Musa bisi ato ebmou, 13“Sun Israel ninyi asi ato ebdum, ‘Uki si Sabat tum ara taruk louboka bunkwandarur. A tum ara, “Nun Nai Iya Erebdobnyi dib kurur,” tenenkwanurum tum berekde bankwande. Ani, Nibabyi, “Niryi lebdeiboka beterdongona kum ninyi kibdeibsise ba, Ni mabwe a kunung,” tenenkwansin tum berekde bankwande. Ati, sunci a tum si Sabat tum asi teneibde baramunyi asi sun mabwe odei-odei ababyi tuba teneibde binkwaming. 14A deyok aryi uki si Sabat tum ara diboka kalikoka kununkwandarur. A tum ara sunci malyi dinyi beterdongona mem tum kibkwande. A tum ara beterdongona mem tum ati, unanyi biryi a tum ara, “Ukuna mem,” eanyi asi dakbisibmarinyi bira obkabkwandarur. 15Uki nabaryi ara sun wa yuk-yuk ur ironmamunyi ani, uki ta tum berekci ura, taruk loubdeiboka bukwandarur. A tum ara Ni tum berekwamarur ati, malyi dinyi beterdongona mem. Unanyi biryi a tum asi wa inmaci ura, anyi bisi obkabkwandarur. 16A deyok aryi sun Israel ninyi mabwe odei-odei binkwanduma nirya ara a tum diboka kalikoka kunubde binkwandarur. Ba, a tum ara iya kum danana kum kubkwande. 17A tum ara, “Niryi uki nabaryi ara wa inmase ani, uki ta tum ara loubmase,” tenen teneirdenkwan tum kibkwande. Ani, sunbabyi, “Nun Nai bira uki nabaryi ara utotoa kikninmou ani, uki ta tum asi loubmou,” tenebkwandum tum berekwande,’ ebdum,” ebmou.

Er Iya Erebdobnyi biryi Musa bisi, “Ukubdarur-ukuna mem,” en uram karebmou deyok

31:18

18Ura, mutuk Sinai kon dam aryi Er Iya Erebdobnyi biryi Musa bisi a uram sirya ebdeibmou. Ura, “Ukubdarur-ukuna mem,” en uram Er Imtamnyi er taruk kobdob aryi keil ila bitinyi deici asi kerek sekoka Musa bisi karebmou.

Currently Selected:

Keluaran Uram 31: MTG

Highlight

Copy

Compare