Keluaran Uram 30

Tong teleb co yung uk dan co lamna si mezbah ukupan deyok

30:1-10

1Ura, Er Iya Erebdobnyi biryi Musa bisi ton ato ebmou. “Ninyi asi arukminyi ba, co si penaga boyangnyi ura, a co aryi tong teleb co yung uk dankwanung co lamna kiknibdum. 2A co lamna kiknibkwandim ara in lingdona dumbaryi in likwandum. Ba, dina barwe-dina barwe meter kiklina ara kiklina 45 sentimeter baryi kiklibkwandum. Ba, dangdang cang ara kiklina 90 sentimeter baryi kiklibkwandum. 3A co lamna dub kubkub eitam in lingdona bitinyi babyi, outam in lingdona bitinyi babyi ara yang belebdeibnin yibinkwandum. Ba, a co lamna kubkub sengdona dina-dina ara tabtabingna kum emas aryi nunuboka denebnin yibinkwandum. 4Ba, a tong teleb co yung dama deirin co lamna taleboka bobana bitinyi dina-dina kiknibkwandum. Ara, uturumna amwetam asi toubna bitinyi dina-dina emas aryi liliboka kiknibkwandum. Ba, a bisik asi talena dina-dina dongobdongoboka bobinkwanung. 5A dama deirin co lamna taleboka bobana ara co si penaga aryi kikniboka emas aryi lubkwandum. 6Ura, a dama deirin co lamna ara, ‘Ukubdarur-ukuna,’ mem en uram deirin co sangkol deiamunyi ba, Ni ab sun ab antanibdankwayeb dikum asi baitam kuboka deibkwandum.

7Belerukna Harun uk buk ardeiryangaci ura, a co lamna deici asi, minob kwamingca, dobkabokci ura, siltong ena ati tong teleb co yung uk dardongonkwandur. 8Ani, sintam ababyi uk ardeirinkwandur ba, lukunda uk buk armurunkwandur. Tong teleb co yung uk dana ara iya tangdongona kum uca, Er Iya Erebdobnyi urasintam tuba uk dankwandur. 9A dama deirin co lamna ara mem dinyi ara uk dana mem. Ara, kamyoa oboka uk dana dinyi babyi, siltong en dinyi uk dana babyi, ani yuk uk dabde yin dinyi babyi, anggur me dingdongona babyi a dama deirin co lamna deici asi dingdongona mem. 10Kwalina kwalibingnyi tok ara Harun biryi sun malyi kun dinyi kilina ati, Er Iya Erebdobnyi biti dama boyanmangnyi bisam domba ining aryi a lamna kisok yang kiknianca deici asi lubkwandur. A co lamna tong teleb en dinyi uk dan co lamna ara Ni Imtamnyi dinyi akwe beterdongona mem dinyi kibkwande.

Israel ninyi si sengna tum aryi dama deirin deyok

30:11-16

11Er Iya Erebdobnyi biryi Musa bisi ato ebmou. 12Sun Israel ninyi si sengkwamamunyi ati sunci yuk-yuk aryi keil uang Niti dama deibkwandarur. Ba, a ninyi si sengmamunyi aryi a ninyi asi u yiboka yuk-yuk dinyi sun dam oungyacei. 13Ani, ninyi si sekmaminyi ninyi nirya ara dengna mitik keil perak uang ikin kiklibdeboka setengah shekel ara perak 6 gram baryi kiboka, Ni Iya Erebdobnyi ai dengnaming to kuboka ninyi yuk-yuk Niti karebkwanunung. 14Ara, ninyi si sekmangnyi ninyi sal yoka kwalina 20 baryi sekoka eitam kwaliamingnyi nang akwe a keil uang bulubkwanung. 15A lemdaron dinyi dengna ara bona ilinto boramingnyi nang ara weikto dengna kum kubkwaming. Ani, bona kum nang ara mitikto kum dekwaming. Eda, dengna neikto akwe dengdoryankwanung. 16Sun Israel ninyi asi bulunmamunyi ani, Niti dama Ni ai dam boyankwandarur. A buluboka boyankwamamunyi keil uang ara sun nong lemdaron ati boyankwanung. Ba, ‘Anyi bira sirya lebdandobmar,’ tenebkwanyi to” ebmou.

Taruk me ilingna me kwan dinginkwamwe ati, sangkol baskom atoanun kiknibmai deyok

30:17-21

17Ura, Er Imtamnyi biryi Musa bisi ato ebmou, 18“Taruk me ilingna sangkol baskom kat keil si tembaga aryi kiknibkwandarur. Ani, lulu tam yangana ababyi tembaga aryok kiknibkwandarur. Sirya kiknibmunyi ura, Ni keis ol ai Kemah Suci kan, Niti dama deirin keil dungna kan noutam asi me dikdongoboka deibkwandarur. 19Ba, Harun ab er mabwe ab ara sun yan toto-taruk toto me ilingkwanung. 20Ni ai Kemah Suci kum wengyanabingiryok, a me asi yandoka taruk ab, yan ab me ilikwanung. Ba, dina kum kubkwanung. Ani, tonda dama deirin keil dungna dam Niti dama deiboka, uk daboka moloryanganmaningnyi ababyi taruk ab yan ab me ilikwanung. 21Ba, sun dina kum kubkwanung. A dinyi ara Harun ab, er mabwe odei-odei binkwaminga nirya ato akwe kubmurubde binkwaming,” ebmou.

Malyi dinyi beterdongona mem co me yung si minyak urapan lingdeirin deyok

30:22-33

22Er Iya Erebdobnyi biryi Musa bisi ato ebmou, 23“Tong teleb-teleb co me yung boboka bulubdum. Ara, mur yung lukarika 6 kilogram ab, minmin co yung ikin 3 kilogram ab, tong teleb kwei yung lukarika 3 kilogram ab, co si teja 3 kilogram ab bulubdum. 24Ani, ikin kiklirdena ara Ni Imtamnyi ai dam aryi ikin kubmaici to kikliraming to kuboka boyankwandum. Ani, co zaitun yung lukarika 4 liter boyankwandum. 25A tong teleb co yung nirya ara wiboka Niti kiknibkwanindarur. Ara, co me yung kiknin nang aryi diboka kikniraming to kuboka kiknibkwandarur. Ba, a kiknibmamunyi tong teleb me ara Ni ai dinyi asi dikoka teleb kimkwamingnyi me ati kiknibkwandarur.

26A kiknibmamunyi co me yung aryi Ni ai Kemah Suci ai ton likeibmunyi ura, tonda Niryi, ‘Ukubdarur-ukuna mem,’ en uram deirin co sangkol deici asi likeibkwandarur. 27Ani, Niti roti deirin co lamna ab, yuk-yuk dinyi ab, uk ubna ab, yuk-yuk keica ab, Niti dama deiboka siltong en dinyi uk dan co lamna ab likeibkwandarur. 28Ani, Niti dama deiboka uk dan keil dungna ab, yuk-yuk dinyi ab, taruk ab yan ab ilingna me ab, a me lulu ab likeibkwandarur. 29Ati, a dinyi nirya beterdongona mem dinyi kibdeibkwandum. Ato kubminyi ba, iya malyi dinyi beterdongona mem dinyi kibkwande. Ba, a dinyi asi unanyi biryi bolibdinyi bira beterdongona iya memnyi kibkwande. 30Ani, tonda Harun ab, er mabwe ab asi kanci a tong teleb-teleb co me yung likeiboka beterdongona mem nang kibdeibkwandum. Ba, sunci Niti dama deirin nang kibkwaning.”

31Ba, sun Israel ninyi ati ato ebkwan, “A dinyi ara sun Israel ninyi mabwe odei-odei binkwanduma nirya ara Nisi malyi dinyi beterdongonina mem co me yung likeibdanin binkwandum. 32A ebman dinyi ara talyi ninyi nong bol deici asi dingdeirina ara mem. Ani, a me yung atoanun kikniboka tabtabingdongona mem. A me yung ara sun beterdongona mem me yung ati, talyi dinyi beterdongona mem. 33A tong teleb-teleb co yung aryi buluboka a co me yung kikniamingnyi to kikliboka kikniboka talyi ninyi nong bol talyi likeibdinyi bira akatei ninyi kankan dam aryi obkabkwandarur,” ebmou.

Tong teleb-teleb co yung si ukupan deyok

30:34-38

34Er Iya Erebdobnyi biryi Musa bisi ato ebmou, “Tong teleb-teleb co yung boboka bulubdum. Ara, co si damar yung ab, co si lokan kala ab, co si ramala yung ab, kemenyan kobdoba yung ab kuboka bulubkwandum. 35A dinyi nirya ara Ni siltong yuna ati uk dakwaminyi dinyi ati, a tong teleb erande keica nirya kiknibkwandum. A kiknibkwaminyi to ara tong teleb co yung kikniraming to akwe kiknibkwandum. Ani, minmin ebkwanci to garam dikokabminci kiknibminyi ura, tong teleb me yung kobdoba kibdeibkwanurum. 36A co yung ton dinyi ara keil teingmaminyi ba, mitik-mitik kibci ura, boboka Ni ai Kemah Suci ai umbura deirbinkwandum. Ara, ‘Ukubdarur-ukuna mem,’ en uram deirin co sangkol dam bindoka deibkwandum. Niryi sun ab erdankwamibyi dikum asi bindoka deibkwandim ara malyi dinyi beterdongona mem. 37Talyi anda co yung bobuluboka kan yuk kiknirona ara iya mem. Eda, a dinyi ara Ni Iya Erebdobnyi biti kiknin dinyi ati, beterdongonina mem. 38Unanyi biryi, ‘Tong yumdonkwan,’ tenen ato kuboka er yuk kiknibdinyi bira obkabkwandarur,” Er Iya Erebdobnyi biryi Musa bisi ebmou.

Currently Selected:

Keluaran Uram 30: MTG

Highlight

Copy

Compare