Keluaran Uram 29

Er Iya Erebdobnyi biryi Musa deici asi, “Niti dama deirin nang Harun ab, er mabwe ab asi imam nang kibkwamunyi ara ato-ato kubkwandarur,” ebmou

29:1-37

1Ura, Er Iya Erebdobnyi biryi ato ebmou, “Harun ab, er mabwe ab asi, Ni ai wa inkwamingnyi ati sunsi malyi kun dinyi kilibminci beterdongona kum nang kibdeiboka ato kubkwandum. Bisam lembu yim ukuryok nenmaca lembu ab, bisam domba bitinyi malyi dinyi ton kum kubmaci domba ab boyankwandum. 2Roti kwaning kikniraming keica tepung teleb akwe doboka me nyamnyam eboka kiknibkwandum. Ukubminyi ura, roti bungbung erande keica dongona kum uca tepung dem aryi kisoka nun ton kikniboka zaitun yung aryi lingna roti ton kiknibkwandum. Ba, tonda ilil roti bungbung ena kum roti ton kiknibkwandum. Ukuboka kiknibminyi ura, yingying erande co yung aryi likoka kiknibminyi ura, a nirya dabkwandum. 3Ukubminyi ura, anda dinyi nirya tower aling kibdongoboka Niti dama deibkwanurum. Ani, bisam lembu babyi, bisam domba yim bitinyi babyi Ni dama deibkwanurum.

4Ura, Harun ab, er mabwe ab asi, ‘Kemah Suci ai bublan dam yandarur,’ ebminyi ba, yangnyi ura, sun nong asi me dikoka akwandum. 5Ukubminyi ura, imam nang ongon aling doboka, Harun bisi tebumna aling ab, alib ongon aling ab, efod aling ab, taram limna aling ab ongobdeibminyi ura, sun der koubdongobkwandum. 6Ani, asok kourdongona arikdeibminyi ura, ato eboka a kisok kourdongona deici asi emas aryi ato eboka sekwandum. ‘Anyi bira wiboka Imtamnyi ai wa inanyi kibwe,’ eboka sekwandum. 7Sirya ukubminyi ura, yingying erande me aryi er kisok dam asi dikeiboka Ni ai wa inanyi Imam Besar tikeibkwandum. 8Ani, Harun er mabwe ababyi nabminyi ba, kan dam yangnyi ura, tebumna aling sunsi kait bol aling ongobdeibkwandum. 9Ura, Harun babyi, er mabwe babyi, sun der koubdobkwandum. Ukubminyi ura, Harun er mabwe ara kisok kaluna aling dinyi aryi kisok koubdongobkwandum. Ara, sun a nang aryi Ni Imtamnyi wa in nang imam nang kibkwaming ati, a dinyi ara iya kunubde binkwandum. Ukuboka Harun ab er mabwe ab asi kwit kibdeibkwandim.

10Ukubminyi ura, kanci bisam lembu yim boboka Ni ai Kemah Suci ai dam boyaminyi ura, Harun ab er mabwe ab aryi a bisam lembu kisok deici asi taruk deibdongobkwanung. 11Ura, Kemah Suci ai bublan dam Ni Er Iya Erebdobnyi urasintam aryi dama deibdongoboka obkwandum. 12Ura, kanci a bisam lembu ining mitikanun taruk du aryi likdongobokabminci, ni dama deirin lamna yang dina-dina asi lubkwandum. Ba, kablobminyi ining ara Ni dama deirin keil lamna deyok dam asi dikwandum. 13Ukubminyi ura, a bisam lembu kob ab, noutama ab, kiliruk dina-dina ab, deisu alirande minta nirya doboka Niti molon lamna deici dama deiboka uk dabkwandum. 14Ba, a bisam lembu tub ab, kala ab, dei ab ara Ni ai dam baitam asi uk dabkwandum. A dabmaminyi dinyi ara sun malyi kun dinyi kilin dinyi uk dabkwandum.

15Ukubminyi ura, bisam domba yim ton dinyi ara Harun ab er mabwe ab aryi a bisam lembu yim kisok deici asi taruk deibdongobingnyi ura, ngang sekoka obkwandum. Ba, a bisam lembu obkwandum. 16A bisam domba sirya obminci sekminyi ura, ining doboka Ni molonin lamna deyok dam asi dikde yibinkwandum. 17Ura, a bisam domba asi alya yuk-yuk sekwandum. Ba, deisu ab, biryok ab, yuk-yuk alya ab ara me ilikoka kisok nunukoka deibmaminyi deici asi deibkwandum. 18Ukuboka a bisam domba yim nong nirya Ni molonin lamna deici uk dabkwandum. A ukubminyi dinyi ara Niti siltong en dinyi uk dabkwanurum.

19Ukubminyi ura, ton yuk domba yim ton doboka boyaminyi ura, Harun ab er mabwe ab aryi a bisam domba kisok deici taruk deibdongobingnyi ura, ngang sekoka obkwandum. 20A bisam domba yim asi sirya ngang sekminyi ura, ining mitikanun doboka Harun ab, er mabwe ab sun amol siriktam amol dolona asi likdeibnin yibinkwandum. Ani, sun siriktam taruk amwe ab, siriktam yan amwe ab asi ining lubkwandum. Ba, kablobminyi ining ara Ni molonin lamna dam deyok dam dikoka bo'ongobkwandum. 21Ura, Niti dama deirin keil lamna deici kubmaci ining ab, wa kareboka tingdeirinmangiryi kisok deici dingdeiriraming me ab doboka Harun er ab er mabwe ab asi sun nong ab, sun ongon aling deici ab ababyi dikoka akwandum. Ba, sun ongon aling ababyi sun nong babyi ara Ni ai wa in nang kiknibkwandur.

22Ba, a bisam domba yim ara minta ab, kob ab, amwe minta ab, noutama ab, kiliruk bitinyi nirya ab, alirande minta ab, siriktam yan ab ara Ni ai wa in nang tingdeirin tum dinyi kibkwandarur. 23Ani, roti bungbung erande keica si ragi dongona kum roti tokol tentok ab, roti dilo kukdob roti yingying en me dongobmangnyi roti ab, bukam kum uca ilil roti ab, roti tower aling umbura Ni Er Iya Erebdobnyi urasintam deibmangnyi dinyi asi ab dobkwandum. 24Ura, a dinyi nirya Harun taruk dam ab, er mabwe taruk dam ab asi karebminyi ba, Ni Iya Erebdobnyi biti, a dinyi erebtalebingiryi ura, Ni urasin dam amuboka karebkwaning. 25Ani, sun taruk dam nirya doboka Ni molonin lamna deici uk dabkwandum. Ara, Ni Iya Erebdobnyi biti siltong en dinyi ab, uk dan dinyi ab ati kibkwandarur. 26Ani, domba yim asi taram lakoka, Niti taruk ereboka karebkwanurum. A dinyi ara Harun Ni wa inanyi tingdeirinmaminyi tum aryi ukubkwandum. 27Ukuboka a domba yim taram ab, yan ab ara taruk erebtaleboka taruk sunukoka Niti karebkwanurum. A wibdeibmaminyi dinyi ara Ni Imtamnyi ai wa in nang imam nang Harun ab, er mabwe ab tikeiboka wa karenmaminyi tum aryi ukubkwandum. 28Ato kuboka dama deirin dinyi ara Niryi minob ato ebdeibsise. A dinyi ara tangni dinyi kuma, Ni uram keken nang Israel ninyi iya kunubde binkwandum uram ebdeibse. Ara, ninyi yuk-yuk aryi sun malyi dinyi lemdana ati dama deiryanmangnyi dinyi asi yan ab, taram ab ara Ni ai wa in nang dinyi yuk wibdeibkwandarur. Ato kuboka a dinyi ara Niti dama deibkwanunung.

29Ni ai wa inanyi Harun aminda dibci ababyi, er ongoboka Ni ai wa iranci ongon aling ara aminda er mabwe er unubkwandinyi biti kwiribdeibkwandur. Ba, er unubdinyi bira er wa kareboka tingdeirin tum tuba uki tabaryi nirya ongoboka yangankwandur. 30Er Harun mi asi er nai unubdinyi bira Ni ai Kemah Suci ai asi lemna dinyi boyandoka Ni moloryankwanurur. Ni ai moloryankuci ura, er nai ongoranci aling ongoboka uki tabaryi ongoboka yankwandur.

31Ba, Ni ai wa inanyi kiboka tingdeirinmamunyi tum aryi obmamunyi domba ara beterdongona kum dikum asi yubkwandum. 32Ani, a domba yim tub ab, roti bungbung ena kum roti Kemah Suci ai dumdam tam tower aling kiboka deindarur dinyi ab ara Harun ab, er mabwe ab akwe yibkwanung. 33Ba, Ni ai wa inanyi kiboka tingdeirinmamunyi tum aryi Niti dama deibmanumunyi bisam domba tub ara kel deirina mem. Eda, a tum aryok yibsekwanung. Bok, yuk nang ara yina mem. Ara, Niti sun dama deibmaningnyi dinyi ara beterdongona mem dinyi ati talyi nang yibingnyei. 34Kablobminyi roti ab, a domba kablobminyi tub ab ara lukunda maboka berengna mem. Ara, Niti yuk wibdeibmangnyi deyok aryi maboka berekmaici ura, yina mem eda uk dabkwandarur. Ara, roti ab bisam domba tub ab nirya ara beterdongona mem dinyi deyok aryi ato kubkwandarur. 35Harun ab er mabwe ab asi, wa kareboka tikeibkwaminyi ara uki tabaryi nirya Ni ebman to kunubde binkwandum.

36Ani, bisam lembu yim asi tuba-tuba sun malyi dinyi kilisina ati, dama deibkwandarur. A bisam sapi aryi dama deirin co lamna asi betebdongobman kumto kibdeiboka, tong teleb co si zaitun yung aryi dikdongoboka me ilikwandarur. 37Uki tabaryi ara malyi dinyi kilin dama deiboka dama deirin keil dungna asi iya beterdongona mem dinyi kibdeibkwandarur. Ba, a dama deirin keil dungna bolibmarinyi bira Ni Imtamnyi dinyi kibkwande,” ebmou.

Bisam domba oboka, belekuna aryi dama deirin dinyi ab, sintam aryi dama deirin dinyi ab deyok

29:38-46

38Tonda, Er Iya Erebdobnyi biryi ato ebmou, “Iya kubde bankwanduma nirya uki berekmaci tok ara dama deirin keil dungna dam asi domba bitinyi kwalina tentok domba asi oboka dama deibkwanindarur. 39Ara, ton bisam domba ara belekuna oboka nong nirya uk dabkwandarur. Ba, ton bisam domba ara kiting wengbici bok oboka uk dabkwandarur. 40Belekuna dam deibkwamamunyi dinyi ara a domba ab, roti kikniraming keica si gandum ikin kilogram tentok ab, me si zaitun yung yuk me tabtabingna kum me liter tentok ab, anggur du yung liter tentok ab dikdongoboka dama deibkwandarur. 41Sintam dama deibkwamamunyi ababyi, tubto belekuna kubmamunyi to akwe ukubkwandarur. Ara, a domba bisam ab, roti kiknin keica si tepung ab, zaitun du yung ab, anggur du yung ab dikdongoboka dama deibkwandarur. Ba, a ukuboka uk dabmamunyi ba, siltong ena Ni Iya Erebdobnyi kekebkwan. 42Kwalina o kwali-o kwali binkwanduma nirya ara Ni urasin dam, Ni ai bublan dam asi keil lamna deici uk daboka Niti dama deibkwanindarur. Ba, a dikum aryi Ni ab sun ab ebdandoka uram tonkwa sisingkwayeb. 43Ba, Ni ab sun Israel ninyi ab ebdankwayeb. Ba, a ebdanmabyi dikum ara Ni ibarya milil aryi ibarya dumdum ebkwande. 44Ni molonin ai ab, Ni dama deinin keil lamna ab asi, Niryi beterdongona mem dinyi kibdeibkwan. Ani, Harun ab, er mabwe ab ara Niryi sunsi wiboka sun yuk beterdongona mem nang kibdeibkwan. Ba, sunda Ni ai dam sun imam wa inkwaming. 45Niryi sun Israel ninyi kankan kuraniryi, Ni sun nai Imtamnyi sun molonanyi kibkwan. 46Ba, sunci Nisi ato tenebkwaning, ‘Nun Nai Imtamnyi nun kankan dam kunkwamwe deyok ati Mesir mutuk dam aryi boyasou,’ tenebkwaning,” ebmou.

Currently Selected:

Keluaran Uram 29: MTG

Highlight

Copy

Compare