Keluaran Uram 3

Er Iya Erebdobnyi biryi Musa bisi co tiling asi uk angmoua kankan aryi uram sisikmou deyok

3:1-22

1A talak aryi Musa er yamal si Yitro bisam domba mer ab, kambing mer ab boamuryi, yini mutuk asi bobaramwe. Musa er yamal Yitro bira Midian mutuk Er Imtamnyi biti ninyi dama deirirbananyi imam kuramwe. Uki tentok tum aryi Musa biryi yini mutuk bukde baramwe ani, sirya kobdob burbinamwe ai ara Er Iya Erebdobnyi biryi, “Lak kibdankwan,” teneamwe mutuk kon asi bobinmou. A mutuk kon si ara Sinai.#3:1 Yitro yuk si ara Rehuel. Ba, Sinai yuk si ara Horeb. 2A mutuk dam aryi Musa biryi dinmou uca, tiling co deici uk buk angmoua kankan aryi Er Iya Erebdobnyi uram eryuryangananyi biryi er dam lak kibdanmou. A tiling co asi uk buk ilinto angmou bok, a co ara ton yaliboka yirdena kum kubmou asi eibmou. 3Ura, Musa biryi ato tenebmou, “Nai kobe, a co ara uk buk ilinto angmar bok, ton yalirdena kum kubmar. Ato kubmar ara ton kum kurur to asi kubmara, ara yukto kubmar. Ati, dam kobdob dirderbinkwan,” tenebmou. 4Ato tenebmou ura, a uk buk ilinto angmou dam banmou. Asi Er Iya Erebdobnyi biryi dinmou uca, Musa bira a tiling co deici uk angmoua dam bau asi eibmou ura, a tiling co deici uk angmoua umbura aryi ato ebmou, “Musa! Musa!” ebmou. Ba, Musa biryi ato ebmou, “Ni a tikman,” ebmou. 5Ura, Er Iya Erebdobnyi biryi ato ebmou, “Dam a yangana mem! Kan yandoka tikmarim dikum ara malyi dinyi beterdongona mem dikum ati, kanci kanya luknubdongoboka kan yan karuk kwiribdeibmincok, ni dam a yarum! 6Nira, Imtamnyi kan abwe yabwe Abraham moloranounyi, Ishak moloranounyi, Yakub moloranounyi kunun,” ebmou. Ba, Musa biryi Er Imtamnyi asok dirdena ilil kubmou ba, urasin libdandobmou. 7Ura, Er Iya Erebdobnyi biryi ato ebmou, “Ni wianse nang, Israel nang asi Mesir mutuk mambul mitik kum donung ara Ni sirya diboka eirinun. Sun Mesir nang aryi talebsei asi, ‘Lebdeibsiting,’ tenen ngalukoka Nisi uram donunung ara Ni sirya kekenun. Dib kobdob ati sun mambul weik donung ara Ni sirya bingnun. 8A deyok aryi sun Israel nang asi Mesir nang taruk talebyi bok lebdeibkwaman ati yuryanman. Ba, Niryi sunsi iniboka, iya telebto ilila mutuk bakan asi, sapi moum yung ab, kwiryi me ab ilinto kurur mutuk bobinkwan. A mutuk ara Kanaan yala nang mutuk ab, Het yala nang ab, Amori yala nang ab, Feris yala nang ab, Hewi yala nang ab ani, Yebus yala nang ab, kunung mutuk dam asi bobinkwan,” ebmou. 9Ura, tonda Er Imtamnyi biryi Musa bisi ato ebmou, “Israel nang ngolongnung ara Ni sirya kekenun. Ani, Mesir nang aryi Israel nang asi il weik wa dimnunga ababyi Ni sirya eirinun. 10Ati, ukuryok aryi kanda Mesir mutuk weik sienyi dam bokdonokinyi ba, biminci, Ni wianse nang, Israel nang Mesir aryi anaboka sunti nukanse mutuk bobinkwandim ati bokdonokwinkin,” ebmou. 11Ato ebmou bok, Musa biryi Er Imtamnyi bisi ato ebmou, “Nira unanyi bitonyi kunun aryi, weik sienyi Firaun urasin dam bindoka Israel nang asi Mesir mutuk aryi bobinkwan do?” eboka asibdenmou. 12Uca, Er Imtamnyi biryi uram dengna ara ato ebmou, “Kan ilil kukina mem! Niryi kansi milibkwankin ati, kanci akatei nang asi Mesir mutuk aryi boboka a mutuk kon dam asi boyankwandim. Boyaminyi ba, sunci a mutuk kon dam yandoka Ni si weik ebnumunyi talak aryi, kanci ‘Er Imtamnyi biryi nisi bokdonokoka miliranou,’ teneboka bikdankwandim,” ebmou.

13Ba, Musa biryi ato ebmou, “Ato ebmarim to kubkwan bok, Israel nang dam asi biniryi ato ebkwan, ‘Sun abwe yabwe moloraminyi Er Imtamnyi biryi ni sun dam bokdonokmanir,’ ebnyi asi sunci ato eboka asibdenkwaning, ‘Er si ara unanyi do?’ eboka asibdeningnyi ura, niryi una ebkwanun do?” eboka asibdenmou. 14Uca, Er Imtamnyi biryi ato ebmou, “Nira, Ni a kununyi a kunum kunun. Ati, kanci, sun Israel nang dam asi biminyi ura, ato ebkwandum! ‘Er si ara, “Nira, A Kunun, A Kunum Kunun,”#3:14 Imtamnyi Er mining si, si semebdanmouci, ato ebmou, “Nira, A kunun, A Kunum kunun,” eboka er mining si ebdanmou. Ba, Ibrani uram deib ara, “YHWH,” ebdanmou to enung. Ba, nun Una uram ara, “Er Iya Erebdobnyi,” enub. ebdanmaranyi biryi ebdeibmar to sun dam eryanman,’ ebkwandum!” ebmou.

15Ura, tubto Er Imtamnyi biryi Musa bisi ato ebmou, “Kanci Israel nang asi ato ebdum, ‘Sun Nai Iya Erebdobnyi sun kiknibsounyi, sun abwe yabwe Abraham ab, Ishak ab, Yakub ab moloraminyi biryi arukmanir ba, sun dam yanman.’ Ara, Ni si iya kubkwande si ab, Ni si asi iya odei-odei binkwaming nang ababyi tuba-tuba ebde binkwaning si ara a ebman atiba. 16Biminyi ura, Israel sien nang nirya bulubdeibkwandum! Bulubdeibminyi ura, Ni Iya Erebdobnyi bira sun abwe Abraham moloranounyi, Ishak moloranounyi, Yakub moloranounyi biryi kan dam lak kibdanmanto asi bindoka ebkwandum! Niryi, Iya Erebdobnyi sun kankan dam asi dirnilinun to ab, sun mambul donung asi asing eirinun to ab asi bindoka ebkwandum!” ebmou. 17Tonda, Er Imtamnyi biryi Musa bisi ato ebmou, “Nira uram ara sirya dobdeibsiryi, sun mambul donung mutuk Mesir akiryi bobokabniryi, tentok mutuk dam asi bobinkwan. A mutuk ara sapi moum yung ab, kwiryi me ilinto kurur mutuk dam asi bobinkwan. A mutuk ara Kanaan mutuk nang ab, Het nang ab, Amori nang ab, Feris nang ab, Hewi nang ab, Yebus nang ab kunung mutuk dam asi bobinkwan,” ebmou. 18Ura, ton ato ebmou, “Israel sien nang ara kan ebminyi uram kekebkwamaking. Ba, kan ab, sun ab tonkwa Mesir weik sienyi dam bimunyi ura, ato ebkwandarur! ‘Nun Nai Iya Erebdobnyi Israel nang moloramibyi biryi nun dam lak kibdanmar. Ati, ukuryok lobdeibmasiminyi ba, tiya ati uki winiryi banmabyi ani, yini mutuk binkwamab. Bibyi ura, Er Iya Erebdobnyi, nun Nai Er Imtamnyi biti nun bisam domba toto, kambing toto dama deiboka, Ersi uram sisikoka molorbinkwamab,’ ebkwandarur,” ebmou. 19Er Imtamnyi biryi Musa bisi ato ebmou cok, tubto ton ato ebmou, “Mesir weik sienyi biryi, ‘Ur bindarur,’ eboka ola mundu kum lobdeibkwansir. 20Eda, Ni mikib aryi tatab-tatab ebnyi uca, mundu lobdeibkwansir dinyi ara Ni sirya bikman. Mundu lobdeibkwansir ati, Niryi Ni mikib aryi Mesir mutuk asi ilil tenen dinyi dobkweteboka wenebkwan. Ato kuboka wenebnyi bok asi, ‘Ur anaboka bindarur,’ eboka mundu lobdeibkwansir. 21Ni wiansise nang anaboka baromunyi ura, ur dem kum binkwandum ati, Niryi Mesir nang asi kanya teleb karebnyi ba, sun kanya namin aryi sunsi utotoa karebkwansing. 22Israel nerabwe aryi sun ka yabwe Mesir nerabwe ai dam nerabwe ab, ai tonkwa kuramingnyi nerabwe ab asi ongon aling totoa, nerabwe ongoraming kweirya keil si perak aryi kikniraming dinyi totoa ab, mil dangding erande keil si emas aryi kikniraming dinyi totoa ab molobdobkwaming. Ba, sunci sun mabwe nermabwe asi ongobdeibkwandum. Ato kubokabmunci Mesir nang bona asi daluboka dobdobkwandum,” ebmou.

Currently Selected:

Keluaran Uram 3: MTG

Highlight

Copy

Compare