Keluaran Uram 4

Er Imtamnyi biryi Musa bisi ilil tenen dinyi kunubkwamwe dinyi eterebmou deyok

4:1-17

1Ato ebmou bok, Musa biryi Er Iya Erebdobnyi bisi ato ebmou, “Ato ebmarim bok, niryi bindoka ebmanyi uram asi, sunci kekeboka, ‘Diba ati ebmar,’ kum tenebningiryi, ‘Tola enmarim, Er Iya Erebdobnyi biryi kantonyi dam asi lak kum kibdanmote,’ ebningnyi ura, una kubkwanun do?” eboka asibdenmou. 2Uca, Er Iya Erebdobnyi biryi Musa bisi danguboka asibdenmou, “Kan taruk dam ara unatoa dumubmarim do?” eboka asibdenmou. Ba, Musa biryi, “Ara, kama dumubman,” ebmou. 3Ura, Er Iya Erebdobnyi biryi Musa bisi ato ebmou, “A kama ara tukwe ai donokokdum!” ebmou. Ba, Musa biryi tukwe ai donokokmou uca, a kama ara kwatima danmou. Ba, Musa a kama takloboka kisibdobmou. 4Asi Er Iya Erebdobnyi biryi Musa bisi ato ebmou, “A kwatima dam tingbindoka er aimwe asi talebokdum!” ebmou. Ba, Musa biryi a kwatima dam tingbindoka a kwatima aimwe dobtalebmou uca, Musa er taruk dam aryi tubto kama dandobmou. 5Ato kubmou ura, Er Iya Erebdobnyi biryi ato ebmou, “Kanci Israel nang dam asi bindoka ukubminyi ba, Israel nang aryi kansi, ‘Diba ati, nun abwe yabwe Abraham ab, Ishak ab, Yakub ab sun moloraminyi Iya Erebdobnyi biryi er dam lak kibdanmar,’ tenebkwanking,” ebmou.

6Er Iya Erebdobnyi biryi tubto ton ato ebmou, “Kan taruk ara kan ongon aling kin bisik dongobdarum!” ebmou. Ba, Musa biryi kunuboka dongoabwe ani, dororamwe uca, er taruk ara susa eibmou ba, lumtaia dalarande to kubmou. 7Ura, Er Iya Erebdobnyi biryi ato ebmou, “Kan taruk tubto ongon aling kin bisik dongobdanderum!” ebmou. Ba, Musa biryi kunuboka dongoabwe ani, dororamwe uca, a keica ara taruk ai kubmoua ara kum dandobmou. 8Ato kubmou ura, Er Iya Erebdobnyi biryi ato ebmou, “Sun Israel nang aryi kan ebmaminyi uram asi, ‘Diba ati ebmar,’ kum tenebkingnyi ab, yuma kobdob ilil tenen dinyi kiknibmaminyi dinyi asi, ‘Diba,’ kum tenebingnyi ab ura, a ilil tenen dinyi kiknibminyi ba, ‘Diba,’ tenebkwamang. 9A deyok bitinyi ilil tenen dinyi asi ukurdeminyi bok, iya ati, ‘Diba,’ kum tenebingiryi, kan enmaminyi uram ara kum kekeana ato kubkingnyi ura, me Nil asi mitikanun kwebtaleboka tukwe ai diklobkwandum! Ba, a me ara ining me bol deibkwamar,” ebmou.

10Er Imtamnyi biryi ato ebmou bok, Musa biryi Ersi ato uram dekeibmou, “Se Nai Imtamnyi, Kan Iya Erebdobnyi biryi uram ara sirya ebkarebmanirim bok, nira minob kubde yanganun ababyi, uku talak kunman ababyi, uram ena ara diboka kum bikse deyok aryi uram sisingna ara ni ikin kunurur. Ba, uram ena ara ola kum sisingnunci nimalyi sisingnun aryi una kuboka ebkwaman,” ebmou. 11Uca, Iya Erebdobnyi biryi ato ebmou, “Sun ninyi si bambul ara unanyi biryi kiknibsou do? Ba, uram kum daneirina babyi, amol kiningdeirina babyi ara unanyi biryi ukurur do? Ba, asing elengdeirina babyi, asing kurdeirina babyi ara unanyi biryi ukurur do? Ni sun Nai Iya Erebdobnyi biryi a nirya kiknibsise! 12Ati, ukuryok akiryi anabdobminyi ura, minola birum! Niryi kansi uram ebkwamarim to eterebmilibkwamakin ati ur birum!” ebmou.

13Ato ebmou bok, “Nai, niryi kansi molobmakin, nira bongdonongnin kum, eda yuk nang asi bokdonokdum!” ebmou. 14Ura, Er Iya Erebdobnyi biryi Musa bisi yu bobmouci, ato ebmou, “Kanda kan du Harun, Lewi yalanyi bira kum kurur do? Kan du bira uram ena erda bingdur ara Ni sirya bingnun. Dib kobdob ati ebkwinkin ara: Kan du bira o yanganmar ati, kan ab ebdarurumnyi ura, er kanya teleb mitik kum kubkwamar. 15Ba, kanci ersi si bambul deici deibdongoboka ebkarebmimba, erci uram ebkwande. Niryi kan si bambul ab, er si bambul ab asi ukubkwamarurumnyi to eterebkwansin. 16Erci kan si deici aryi Israel nang urasin dam asi uram sunsi kalikwansin ebkarebkwabmar. Erda uram enanyi kibci ura, kanda Ni Imtamnyi bitonyi kiboka uram ebkwamaci to ebkarebkwandim. 17A kama aryi ilil tenen dinyi kiknibkwandim ati dumubdobdum!” ebmou.

Musa biryi Midian mutuk aryi Mesir mutuk dam tamurbinmou uram

4:18-31

18A sirya ebdeibmou ura, Musa bira er yamal Yitro bisi atei bindobmouci, ato ebmou, “Nai, ‘Ni du yabwe ab, ni weit yabwe ab, ni atei nang ab Mesir mutuk ara kam tuba kunung do?’ tenen dirbinkwaman ati, ‘Ur eboka lobum,’ ebnurum tenen molobmakin,” ebmou. Uca, “Ur birum! Teleb akwe banmaminyi ani, atei binkwamarim,” ebmou. 19Er Iya Erebdobnyi biryi Musa bisi Midian dam aryi sirya ato eamwe, “Mesir nang aryi kansi, ‘Obkwayeb,’ teneramnyi nang ara sirya dibsekyi ati, Mesir dam tubto ur tamurbirum!” ebmou.

20Ura, Musa ab, er ner ab, er mabwe ab asi iniboka bisam keledai deici bukeibmou. Ura, anaboka Mesir mutuk dam tamuboka yanmou. Ani, Er Imtamnyi kama ababyi taruk doubdobmou tok yanmou. 21Er Iya Erebdobnyi biryi Musa bisi ato ebmou, “Niryi kansi ilil tenen dinyi kiknibkwandim mikib ara sirya karebmakin. Ati, Mesir mutuk sirya tamurbiminyi ura, ilil tenen dinyi nirya Mesir mutuk weik sienyi urasin dam bindoka kiknibkwandum. Ato kubkwandim bok, Niryi Mesir sienyi kanya biribdeiboka Israel nang ara ola, ‘Ur bindobdarur,’ kum ebkwansir. 22Ura, Mesir weik sienyi bisi bindoka ato ebkwandum, ‘Er Iya Erebdobnyi biryi kansi ato ebdeibmar, “Israel nang ara Ni mi du mi ato nang kunung ati, 23Niryi kansi uram ebdeibman, ‘Ni mi mundu lobdongobminyi ba, bindoka Nisi si weik eboka molorbinkwanir ati lobdeibdum!’ ebman bok, kanci Ni ebmanyi uram kum kekebminci bai donokminyi ura, Niryi kan mi du mi asi obkwaman,” ebmar,’ ebkwandum!” ebmou.

24Ura, Musa ab er mabwe silib ab yanganmai ani, bisik noutam mutuk tentok yandoka mabmai. Uca, er Musa biryi Er Iya Erebdobnyi ebmou to kum kunubmou deyok aryi, Imtamnyi biryi Musa bisi obkwamouci, yanmou. 25Ba, Zipora biryi keil aryi kikniamnyi but dobdobmou ura, er mi den bama sekmou. Ura, a den bama sekdoba aryi doboka Musa yan asi bolibdongobmouci, ato ebmou, “Iya dib uram aryi ebkun. Ara, ‘Er Imtamnyi biryi kanda ni akenyi bisi obkicei,’ a ining aryi lebdeibkin,” ebmou. 26Ba, Er Iya Erebdobnyi biryi Musa kum obmouci, deiblobmou. Ba, Zipora biryi er mi den bama sekmoua ining aryi er akenyi bisi lebdeibmou ati erci er akenyi bisi, “Kanda ni akenyi ining aryi lebdeibmakin anyi,” eboka nabmou.

27A talak aryok Er Iya Erebdobnyi biryi Harun bira Mesir mutuk tuba kuramwe asi ato ebdeibmou. “Yini mutuk bindoka kan weit Musa ab ebdankwandururum ati birum!” ebmou. Ba, Harun banmou ani, Er Imtamnyi biryi, “Lak kibdankwan,” teneamwe mutuk si Sinai binmou ura, er weit ab ebdanmareici ersi iribdobmou. 28Ura, Musa biryi Harun dam asi Er Iya Erebdobnyi biryi, “Mesir dam tamurbirum!” eboka bokdonokmouci, ebmou to nirya nukarebmou. Ba, ilil tenen dinyi kiknibkwamwe dinyi ababyi nukarebmou. Ba, Musa ab Harun ab anabdobmarei ura, Er Imtamnyi biryi ebdeibmou to kunuboka Mesir mutuk binmarei. 29Musa ab, Harun ab anaboka binmareici, Israel sien nang nirya bulubdeibmarei. 30Ura, Harun biryi Musa dam asi Er Iya Erebdobnyi biryi ebdeibmou to nirya nukarebmou. Ba, Musa bira ilil tenen dinyi nirya sun Israel nang urasin dam kiknibmou. 31Ura, sun nirya ara, “Diba ati ebmar,” tenebmai. Sun Israel nang aryi kekenmai uca, “Er Iya Erebdobnyi bira sun Israel nang asi dirnilisururci, il weik wa indarura nirya ara eirisurur,” ebmou uram kekebmai ura, sunci kutam ikdongobmaici kanya luknubdongoboka Er Imtamnyi bisi si weik erebmai.

Currently Selected:

Keluaran Uram 4: MTG

Highlight

Copy

Compare