Keluaran Uram 28

Er Imtamnyi biti dama deirin nang imam nang ongon aling deyok

28:1-43

1“Sun Israel nang kankan dam aryi kan du Harun ab, er mabwe ab asi nabkwandum. Ba, Ni Imtamnyi ai wa in nang imam nang kibingiryi, Ni wa talebkwaming. Ati, Harun ab, er mabwe si Nadab ab, Abihu ab, Eleazar ab, Itamar ab naboka Ni ai wa in nang tikeibdum. 2Ba, kanda, kan du Harun bisi Ni Imtamnyi bisi Kemah Suci dam molonkwamangiryi ongonkwamnyi ongon aling Ni ibarya milil likniryangan aling kiknibdum. 3Ani, niryi ongon aling wina bingni dinyi karebse ba, ongon aling wina bikoka winung nang asi kanci sunsi arukminyi ba, Harun ongon aling yuk wibkwanung. Ba, a ongon aling Harun ongoboka Ni ai wa iranci ba, Ni ai wa in sienyi imam besar kibkwande. 4Sun aling win nang wibkwaming aling ara taram limna ab, ongon aling si efod ab, alib ongon aling ab, tebumna aling ab, kisok aringdan aling ab, der aringna ab, ukuboka wibkwanung. Ba, ukuboka kan du Harun ab, er mabwe ab sun beterdongona mem ongon aling wibingnyi ura, ongobkwaming. 5Ukuboka kiknibkwamangnyi ati, dengna weik keil si emas ab, bol kuruta aling wis bol ab, unduk bol ab, kirmizi aling ab, namin aling si lenan ab dobkwanung. 6Ongon aling si efod kiknibkwamangnya ara emas bol aryi kiknibkwanung. Ba, bol kuruta aling wis bol ab, unduk bol ab, kirmizi aling ab, namin aling si lenan ab ara aling wina bikdobnyi biryi tabwe aryi wiamingnyi aling aryi kiknibkwandarur. 7Ongon aling si efod ara takonyok yubwe dungdongona dina-dina bitinyi kiknibkwanung. 8Ba, der arikna ababyi efod aling ato akwe neiktoto kibdeiboka wiboka dukdongobkwanung. Ara, emas bol dinyi aling ab, bol kuruta aling wis dinyi ab, unduk dinyi ab, kirmizi aling ab, namin aling si lenan ab aryi kiknibkwanung. 9Ani, kanci dengna weik keil si krisopras bitinyi doboka Israel ninyi sun abwe Yakub mabwe amolbaryi nang si sekdongobkwandum. 10Dengna weik keil krisopras yuma dinyi deici ara Israel nang si nabaryi sekminyi ura, bitinyi dinyi deici ara ton nabaryi nang si sun deibde binanci to sekdongobkwandum. 11Ara, keil teleboka uturunanyi biryi keterande to kuboka, Israel nang mabwe si asi a dengna weik keil si krisopras deici asi uturuboka sun si sekdongobkwandum. A dengna weik keica asi emas aryi kubkub dina-dina libdongobnin yibinkwandum. 12Ura, a dengna weik keil ara taram limna aling takonyok dina-dina bitinyi deici asi deibkwandum. Ara, Israel nang teneirden dinyi kiboka Harun biryi Ni urasin dam boyankwandur. 13Ani, emas aryi tabwe bondaming to kuboka ton kiknibkwandum. 14Ara, a tabtabingna kum emas aryi tabwe bomna atoa bitinyi kiknibmunyi ura, a emas tabwe bobna aryi a der arikna asi dukdongobkwanung.

15Kanci taram limna a wiraming nang asi arukminyi ba, Ni ai wa in sienyi imam besar taramtam limna wibkwanung. A wibmingnyi taram limna ara efod keil Niti, ‘Imtamnyi bira una tenebmar do?’ tenen asirdenkwanci keica kiboka bonkwanci ati taram limna wibkwanung. A taram limna wibkwamingnyi tabwe yala si ara emas bol tabwe ab, kira bol tabwe ab, kuruta bol ab, unduk bol tabwe ab, bi bol tabwe ab, kaluna si lenan iya namin dinyi ab aryi wibkwanung. 16Ura, a wibmangnyi taram limna aling asi bitinyi likasubkwandum. Ba, kubkub dina-dina in lingdona dumbaryi kibkwandur. 17Ura, a ongon aling deici asi dengna weik keil aryi yakna dumbaryi tobdongobde kwerebkwandum. Yuma yakna ara dengna weik keil si yaspis bi bol dinyi ab, krisolit ab, malakit ab lelebdeibnin binkwandum. 18Ba, yakna bitinyi dinyi ara dengna weik keil si ining keil ab, lazurit ab, yaspis yikmakla bol ab, lelebdeibnin binkwandum. 19Yakna winiryi dinyi biriman ara dengna weik keil si ambar ab, akik ab, kecubung ab aryi lelebdeibnin binkwandum. 20Yakna dumbaryi dinyi biriman ara dengna weik keil si pirus ab, krisopras ab, nefrit ab aryi emas asi lelebdeibnin binkwandum. Ukuboka dengna weik keil si emas bol tabwe aryi lelebdeiboka denebkwanung. 21Sun Israel yala nang kunung to kuboka dengna weik keil ababyi neiktoto kuboka amolbaryi dongobkwanung. Ba, a dengna weik keil nirya ara Israel nang yala sun si yuk-yuk ilinto nirya uturuboka sekdongobkwanung. 22Ba, taram limna denebkwamingnyi tabwe ara bitinyi likasuboka denebkwanung. Ara, tabtabingna kum emas aryi labaruboka denebkwanung. 23Ani, taram limna dinyi eitam kubkub bitinyi dina-dina ara emas toubna aryi biribdongobkwandum. 24Ba, tabwe koubne bitinyi akiryi a taram limna kubkub dina emas biribdongobmaminya asi biribdongobkwandum. 25Ani, dinatam kubkub biribmaminyi tabwe aryi boboka emas asi biribdongobkwandum. Ukuboka taram limna aling kiknibkwandum. 26Ani, emas aryi toubna bitinyi kiknibminyi ura, a taram limna aling asi kwising kurkurya kibdeibkwandum. Ba, kubkub dinatam ara umbura tam a taram limna aling aitam asi ukubkwandum. 27Ani, tonda emas toubna bitinyi kiknibminyi ura, taram limna ongon aling takonyok amwetam limdongona kiknibkwandum. Ani, taramtam aling efod mumurona dikum der arikna deici tam kiboka asi biribdongoboka denebkwandum. 28Ani, taram limna toubna aryi ongon aling si efod biriaminyi toubna asi biribdongobkwandum. A biribdongobkwaminyi tabwe ara bol kuruta tabwe aryi toubna asi biribkwandum. Ba, lulungna kum uca, a biriaminyi tok iya kubkwandur. 29Ba, Harun biryi Ni ai malyi dinyi beterdongona mem ai wengbinkouci ura, er taramtam ongon aling deici asi Israel nang yala nirya dengna weik keil amolbaryi aryi si sekdongoamingnya, ongon aling ongoboka, Ni Iya Erebdobnyi urasin dam ai umbura, Kemah Suci ai boboka wengbankwandur. Ba, Ni Iya Erebdobnyi biryi sun Israel nang Ni uram keken nang iya teneinkwanun. 30Ura, a taram ongon aling umbura asi yamin deirin dinyi si Urim ab Tumim ab Harun taramtam bobmaci tok Ni Iya Erebdobnyi dam bobinkwandur.

31Kanci alib aling efod deici kiknibkwamaminyi ara bol kuruta tabwe akwe niniboka oamingnyi tabwe aryi kiknibkwandum. 32Ngang dam ara noutam kobdob asi kiknibkwandum. Ba, kubkub dina-dina ara aling win nang aryi oamingnyi tabwe aryi denebminyi ba, a deneaminya longokoka sangna kum kubkwandur. 33A alib aling kubkub dina-dina ara co du si delima du atoa nun aryi bol kuruta tabwe ab, kirmizi tabwe ab aryi otam atam emas aryi wanwanuboka denebkwandum. 34Ba, emas toukwe tentok ab, yalinenga du ab ara kubkub dina-dina aryi boboka wanwanubdeibkwandum. 35A alib aling ara Harun bisi ongonkwandur. Ni Er Iya Erebdobnyi ai malyi dinyi beterdongona kum ai dam wa irbariryi, ongoboka baci lilim lak kekebkwaming. Ani, ongoboka yangaci ababyi tiltiling ena lak kekebkwaming. Ba, er ona kum kubkwanunga ati ebman. 36Ani, kanci tabtabingna kum emas aryi doboka kweirya uturuboka meterai atoanun kiknibminyi ura, ato eboka sekwandum. ‘Anyi bira wiboka Er Iya Erebdobnyi biti wa inanyi,’ eboka sekwandum. 37A kweirya uturuboka sekwaminyi ura, tabwe kuruta bol aryi a kaluna taram dikum asi denebdongobkwandum. 38A kweirya ara Harun asok tam asi ongobkwandur. Ba, a kweirya Harun asok koubdongobmaci aryi Israel nang beterdongobdanmangnyi dinyi ati, ‘Kilibsurur,’ tenen boyanmangnyi dinyi ara Ni Iya Erebdobnyi kanyi deibkwanun.

39Ani, kanci Harun ongonkwamwe ongon aling ara kait bol tebumna ongon aling, namin aling si lenan aryi wibkwandum. Ani, er kisok aringdan aling ton wibkwandum. Ba, er der kourdongon arikna ara tobtobokna bol tabwe aryi kikniboka wibkwandum. 40Ani, tonda Harun er mabwe ongonkwamingnyi aling ababyi tebumna aling ab, sun der kourdongon arikna ab wibdeibkwandum. Ani, sun kisok kaluna aling ababyi wibdeibkwandum. Ba, sun aling ongona akai wa in nang kikniboka ibarya kubkwandur. 41Ba, a nirya ukuboka kan du Harun ab er mabwe ab asi ongobdeibkwandum. Ongobdeibminyi ura, wiboka me kisok likeibminyi ba, Ni ai wa in nang kiboka wa ibkwaming. 42Ani, tonda sun den limna aling ababyi wibdeibkwandum. Ba, sun den libdobkwanung. Ara, cang mirikna dam aryi kuboka keil dam asi kikliboka wibdeibkwandum. 43Ura, Harun ab, er mabwe ab ara Ni ai Kemah Suci dam babyi, Ni dama deirin lamna dam yangana babyi, malyi dinyi beterdongona kum ai dam Ni moloryanganina babyi ara a wiaminyi aling asi ongoboka yankwanung. Asi kum ongobmangiryi yangnyi ura, sun mining dam nang manmalibdongobdandoka dibingnyei. A yan memen uram ara sunbabyi sun nermabwe mabwe nirya iya kubkwande dinyi kibdeibne,” ebmou.

Currently Selected:

Keluaran Uram 28: MTG

Highlight

Copy

Compare