Keluaran Uram 27
27
Er Imtamnyi biti bisam sapi toto, domba toto oboka uk daboka dama deirin co lamna deyok
27:1-8
1Kanci Niti dama deiboka uk dan lamna kiknibkwaminyi ura, co si penaga aryi kiknibkwandum. Cangtam kiklina 2,2 meter baryi kiklibkwandum. Dumdam tam kiklina ababyi 2,2 meter baryi kiboka kiklibkwandum. 2Ani, a dama deirin co lamna ara co si penaga aryi kiknibkwandum. Ba, a dama deirin co lamna kubkub dina-dina ara bisam domba kisok yang atoanun dumbaryi kikniboka belebdeibnin yibinkwandum. Ura, a kisok yang ab dama deirin co lamna ab asi keil tembaga aryi nunuboka denebkwandum. 3Ani, sici deirinkwaminya ati kuali totoa, sekop totoa, me kwena totoa, te kwaleng sendok totoa, uk kalum kin dinyi totoa, anda dinyi nirya ara keil si tembaga aryi kiknibkwandum. 4Ani, tembaga aryi wiboka bisik botobdankwandum. Ba, a keica deici asi bisam daramingnyi ba, uk kwamingca sangkwanci dinyi ati ukuboka bisik botoboka kiknibkwandum. Ura, a keica kubkub dina-dina dumbaryi asi keil tembaga aryi nunuboka taruk talena bisik toubna kuna botobdeibnin yibinkwandum. 5Ura, a taruk kwalengdana kikniaminya ara Ni dama deirin lamna dam tam asi kiknibkwandum. Ara, amwetam aryi kiknibde weleaminyi ani, Niti dama deirin lamna damtoto kubkwandur. 6Ani, a co lamna bobankwamingnyi co ababyi kolokwandum. A kolokwaminyi co ara penaga aryi kolokminyi ura, perak aryi lubkwandum. 7A lamna bobankwamingnyi co kolongna ara dama dein lamna dina-dina toubna umbura dongobdeiaminyi aryi dongoboka bobinkwanung. 8Dama dein co lamna ara co las aryi sangkol yuk-yuk kiknibkwandum. Niryi mutuk kon dam aryi, ‘Dama deirin lamna ukuboka kiknibkwandum,’ eanse to kuboka kiknibkwandum,” ebmou.
Imtamnyi biti dama deirin ai dam keta si pelataran yuk kiknibmai deyok
27:9-19
9Ura, Er Iya Erebdobnyi biryi ton ato ebmou, “Ni ai, Niti dama deiboka molon ai si Kemah Suci dam asi ninyi wengna keta kiknibkwandum. Ura, abilinga ara namin kaluna aryi wiamingnya aryi abilinga ibkwandum. A kaluna ila kiklina ara 40 meter baryi kubci ba, sekminyi ura, me youkwetam kuboka dobkwandum. 10Ba, abyokomna ara 20 baryi ikwandum. Abyokomna ingna deyok dam ababyi tembaga aryi 20 baryi deibminyi ura, perak aryi nunuboka denebminyi ura, kaluna dirirkwetebkwandum. 11Ani, eitam ababyi neikto akwe ukubkwandum. Kubkub dinatam cangtam ara aruma ol ila weikanun kiklina 44 meter baryi kikliboka sekminyi ura, diriboka dolobkwetebkwandum. Tonda abyokomna ara 20 baryi ikwandum. Ura, a ikmaminyi abyokomna yan dam asi tembaga aryi ikin 20 baryi nunuboka denebkwandum. Ba, a abyokomna dungdongon dikum ara perak aryi nunuboka dukdongobkwandum. 12Ba, akai dumdam tam kitingbantam kuboka atei keta ara abyokomna takubaryi ikminyi ura, kaluna aryi libkwandum. Ara, meter kiklina 22 meter baryi kikliboka dolobkwetebkwandum. 13Ani, pelataran dumdam yaletam kiklina ara 22 meter baryi ababyi kiklibkwandum. 14Ara, kiklina 6,6 meter baryi bisik bublan dam lumun ab, asi abyokomna winiryi ab, a abyokomna limna ab asi kaluna dolobkwetebkwandum. 15Ani, bisik bublan dam dinatam ababyi kiklina 6,6 meter baryi kikliboka abyokomna winiryi dub asi kaluna dolobkwetebkwandum. 16Ba, weik bublan noutam wilimna ara kaluna kuruta wis bol ab, unduk bol ab, aling si kirmizi ab, namin aling kaluna si lenan ab tabwe aryi wiamingiryi, tobtobokna bol kiamingnyi kaluna asi kiklina sembilan meter kikliboka abyokomna dumbaryi ab, a abyokomna wilimna ab asi diribkwetebkwandum. 17Ura, pelataran kikniaminyi abyokomna nirya ara perak aryi nunuboka dukdongobnin yibinkwandum. Ura, yangamna ara tembaga aryi kiknibkwandum. 18Pelataran kiknibkwaminya cangtam kiklina ara 44 meter baryi kiklibkwandum. Ba, dumdam tam kiklibkwaminya ara 22 meter baryi kiklibkwandum. Ba, tingdeirin dinyi kiklina ara 2,2 meter baryi. Ara, namin aling tabwe aryi wiamingnya aryi kiknibkwandum. Ba, yangabkwaminya ara tembaga aryi kiknibkwandum.
19Beterdongona mem ai dinyi ukutotoa nirya dobkwaminyi ab, ai dam keta limna dobkwaminya ab, nirya ab ara tembaga aryok nunuboka kiknibkwandum,” ebmou.
Uk ubna me dingdongona deyok
27:20-21
20“Kanci Israel nang asi arukminyi ba, co zaitun du teikoka yingying erande me yung boyangnyi ura, uk dinibdongobingnyi ba, uk buk aboka berengmurunkwandura ati ebman. 21Ni keis ol ai Kemah Suci noutam wilimna, ‘Ukubdarur-ukuna mem,’ en uram deirin co sangkol limna kaluna dam ara Harun ab, er mabwe ab akikwe Ni ai kalikoka uk kwamingca dobkaboka kibde kunkwanung. Ni Iya Erebdobnyi urasintam aryi ibna aryi kuboka wa inmangnyi asi sintam kibkwandur. Niryi, ‘Ukubkwandarur,’ ebdeianyi dinyi akwe kunubde baramunyi asi sun mabwe odei-odei ababyi ato kunubde binkwaming,” ebmou.
Currently Selected:
Keluaran Uram 27: MTG
Highlight
Copy
Compare
Share
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
